თბილისი, 13 მაისი — Sputnik. ხელვაჩაურის რაიონულმა სასამართლომ განსაკუთრებული სისასტიკით ჩადენილი ჯანმრთელობის განზრახ მძიმე დაზიანებისა და ქურდობისთვის ბრალდებული მამაკაცი დამნაშავედ ცნო და ცხრა წლის ვადით თავისუფლების აღკვეთა მიუსაჯა, ნათქვამია მთავარი პროკურატურის ვებ-გვერდზე გავრცელებულ განცხადებაში.
მტკიცებულებების თანახმად, 2018 წლის 3 აგვისტოს გ.ა. უკანონოდ შეიჭრა ხულოს მუნიციპალიტეტის სოფელ ვაშლოვანში ი.დ.-ს საცხოვრებელ ბინაში და მოიპარა მობილური ტელეფონი.
დაზარალებულმა დანაშაულის შესახებ სამართალდამცველებს შეატყობინა. აღნიშნულის გამო გ.ა. შურისძიების მოტივით თავს დაესხა საკუთარ სახლში მყოფ ი.დ.-ს და განსაკუთრებული სისასტიკით, დანით სხეულის სხვადასხვა არეში მრავლობითი ჭრილობები მიაყენა, შემდეგ კი შემთხვევის ადგილიდან მიიმალა.
პოლიციამ მამაკაცი სოფელ ვაშლოვანიში იმავე დღეს დააკავა. მას ბრალი წარედგინა სსკ-ის ორი მუხლით - „ჯანმრთელობის განზრახ მძიმე დაზიანება, ჩადენილი განსაკუთრებული სისასტიკით" და „ქურდობა, რამაც მნიშვნელოვანი ზიანი გამოიწვია, ჩადენილი ბინაში უკანონოდ შეღწევით".
ხელვაჩაურის რაიონულმა სასამართლომ მამაკაცი ორივე მუხლით დამნაშავედ ცნო.
