თბილისი, 5 ნოემბერი — Sputnik. რუსთავის საქალაქო სასამართლომ ირანის მოქალაქეს საქართველოში დიდი ოდენობით ნარკოტიკული საშუალება ჰეროინის შემოტანისთვის 17 წლით თავისუფლების აღკვეთა შეუფარდა, ნათქვამია საქართველოს მთავარი პროკურატურის ვებ-გვერდზე განთავსებულ განცხადებაში.
უწყების ინფორმაციით, ბრალდებულმა ნარკოტიკული საშუალება ირანში შეიძინა და სასაზღვრო-გამშვებ პუნქტ „სადახლოს" გავლით საქართველოში მისი შემოტანის ორგანიზება მოახდინა.
„ირანის მოქალაქემ ნარკოტიკული საშუალება ფუთებად დააფასოვა და საქართველოში უკანონოდ შემოტანის მიზნით სხვადასხვა ოდენობით, წინასწარი შეთანხმებით ა.ბ-ს, მ.ყ.-ს, ფ.ჰ.-ს და საკუთარ სხეულში მოათავსა... სასაზღვრო-გამშვებ პუნქტ „სადახლოს“ მეშვეობით ორგანიზება გაუწია განსაკუთრებით დიდი ოდენობით - 531,3626 გრამი ნარკოტიკული საშუალება ჰეროინის საქართველოში უკანონოდ შემოტანას", – აღნიშნულია განცხადებაში.
სამართალდამცველებმა ირანის მოქალაქე დანაშაულებრივი ჯგუფის სხვა წევრებთან ერთად 2018 წლის 9 თებერვალს თბილისში დააკავეს.
მას ბრალდება საქართველოს სისხლის სამართლის კოდექსის 260-ე და 262-ე მუხლებით წარედგინა, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას და განსაკუთრებით დიდი ოდენობით ნარკოტიკული საშუალების წინასწარი შეთანხმებით ჯგუფის მიერ საქართველოში უკანონო შემოტანას გულისხმობს.
