ზვიად ქორიძე

8 წლის გოგონას მკვლელობა გორში: ბრალდებული პრეზიდენტის მიერ შეწყალებული პირია

287
ქორიძის განცხადებით, ნებიერიძე საპატიმროში წამების მსხვერპლი იყო

თბილისი, 28 ოქტომბერი — Sputnik. გორში 8 წლის გოგონას მკვლელობაში ბრალდებული, რომელიც წარსულში ნასამართლევია, ქვეყნის პრეზიდენტმა გიორგი მარგველაშვილმა შეიწყალა, განაცხადა შეწყალების კომისიის თავმჯდომარე ზვიად ქორიძემ.

მკვლელობა გორში 25 ოქტომბერს მოხდა. გავრცელებული ინფორმაციით, ნანა ნებიერიძე ნაშუადღევს გაუჩინარდა. ის სახლიდან სკოლაში, ცეკვის წრეზე წავიდა, მაგრამ სკოლაში არ მისულა. მოგვიანებით ბავშვის ცხედარი მის სახლთან ახლოს, მდინარე ლიახვის ნაპირზე იპოვეს.

„გვეშინია შვილების გაზრდის": 8 წლის გოგონას მკვლელობამ საქართველო შეძრა>>>

შსს-ს ინფორმაციით, გოგონა 34 წლის იაგო ნებიერიძემ მოკლა, რომელიც მოკლული ბავშვის საცხოვრებელი სახლის პარალელურ ქუჩაზე მდებარე სახლში სარემონტო სამუშაოებს ასრულებდა. პოლიციამ ბრალდებული ცხელ კვალზე დააკავა.

ქორიძის სიტყვებით, ნებიერიძე საპატიმროში 2008 წელს ძარცვისა და ყაჩაღობის ბრალდებით მოხვდა. პირველი ინსტანციის სასამართლომ მას 18 წლითა და 4 თვით თავისუფლების აღკვეთა შეუფარდა, თუმცა, შემდეგ სააპელაციო სასამართლომ ვადა 17,4 წლამდე შეუმცირა. გარდა ამისა, 2012 წელს ხელისუფლების ცვლილების შემდეგ საქართველოს პარლამენტმა კანონი "ამნისტიის შესახებ" მიიღო, რომლის თანახმად, ნებიერიძის პატიმრობის ვადა 10 წლამდე შემცირდა. 2016 წელს კი კომისიამ პრეზიდენტს ნებიერიძის შეწყალების თაობაზე დადებითი რეკომენდაცია წარუდგინა.

„კომისიის რეკომენდაცია განაპირობა შემდეგმა ფაქტორებმა: იაგო ნებიერიძეს საპატიმრო დაწესებულებიდან ჰქონდა დადებითი დახასიათება; მოხდილი ჰქონდა სასჯელის ძალიან დიდი ნაწილი; ჯანმრთელობის ცნობასა და ფსიქოლოგის დასკვნაში არაფერი იყო ნათქვამი რაიმე ტიპის ფსიკური ჯანმრთელობის პრობლემასა და აგრესიულ ხასიათზე, რასაც შეეძლო საზოგადოებისთვის ზიანი მოეტანა; სასჯელაღსრულების დაწესებულებიდან გამოგზავნილ დოკუმენტებში დადასტურებული იყო, რომ მსჯავრის მოხდის დროს (2008 წლიდან) იგი იყო წამებისა და არაადამიანური მოპყრობის მსხვერპლი. პრეზიდენტმა არ გაიზიარა კომისიის რეკომენდაცია სრულ გათავისუფლებასთან დაკავშირებით და იაგო ნებიერიძეს დარჩენილი საპატიმრო სასჯელიდან მხოლოდ 1 წელი და 1 თვე ჩამოაკლო", - განაცხადა ქორიძემ.

მისი სიტყვებით, იმ პერიოდში სახალხო დამცველი სოზარ სუბარი იყო, რომელმაც საკუთარ ანგარიშებში არაერთხელ დააფიქსირა თუ როგორი წამების მსხვერპლი იყო ნებიერიძე.

გამოძიება წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ფაქტზე საქართველოს სსკ-ის 109-ე მუხლის მე-2 ნაწილის „ბ" ქვეპუნქტით მიმდინარეობს, რაც 13-დან 17 წლამდე ვადით თავისუფლების აღკვეთას ითვალისწინებს.

 

287
თემები:
8 წლის გოგონას საზარელი მკვლელობა გორში (15)
სასწრაფო დახმარება

ხობში მომხდარ ავარიას მეათეკლასელი ბიჭის სიცოცხლე ემსხვერპლა

77
(განახლებულია 13:46 04.07.2020)
ქვეითად მოსიარულე მოზარდს ტოიოტა Toyota-ს მარკის მსუბუქი ავტომანქანა თბილისი-სენაკი-ზუგდიდის ცენტრალური ავტომაგისტრალის შუა ხორგას მონაკვეთზე დაეჯახა.

თბილისი, 4 ივლისი — Sputnik. ხობის მუნიციპალიტეტის სოფელ შუა ხორგაში მომხდარ ავტოსაგზაო შემთხვევის შედეგად მოზარდი დაიღუპა, იუწყება საზოგადოებრივი მაუწყებლის პირველი არხი.

ქვეითად მოსიარულე მეათეკლასელ ბიჭს Toyota-ს მარკის მსუბუქი ავტომანქანა თბილისი-სენაკი-ზუგდიდის ცენტრალური ავტომაგისტრალის შუა ხორგას მონაკვეთზე დაეჯახა.

მოზარდი ხობის სასწრაფო დახმარების ბრიგადამ ხობის რაიონულ საავადმყოფოში გადაიყვანა. თუმცა ბიჭი საავადმყოფოში მიყვანისთანავე გარდაიცვალა.

ცხედარი უკვე გადაასვენეს ქუთაისის სამხარაულის სასამართლო-სამედიცინო ექსპერტიზის ბიუროში.

შსს-ს ინფორმაციით, გამოძიება სისხლის სამართლის კოდექსის 276-ე მუხლის მეექვსე ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია. აღნიშნული დანაშაული ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

77
თემები:
შემთხვევები საქართველოში
პოლიციის ლენტი

კასპში ახალშობილი გარდაცვლილი იპოვეს

98
გამოძიება 112-ე მუხლით დაიწყო, რაც დედის მიერ ახალშობილის განზრახ მკვლელობას გულისხმობს. აღნიშნული დანაშაული ისჯება შინაპატიმრობით ვადით ექვსი თვიდან ორ წლამდე ან თავისუფლების აღკვეთით ვადით სამიდან ხუთ წლამდე.

თბილისი, 4 ივლისი – Sputnik. კასპის მუნიციპალიტეტის სოფელ ახალქალაქში პარასკევს ახალშობილი გარდაცვლილი იპოვეს, იუწყება ტელეკომპანია Imedi.

არსებული ინფორმაციით, ახალგაზრდა ქალმა სახლში 2 ივლისს იმშობიარა, ახალშობილი კი საპირფარეშოში დატოვა. მას მშობიარობის შედეგად სამედიცინო დახმარება დასჭირდა, ექიმებმა კი სამართალდამცველებს შეატყობინეს.

ბავშვის ცხედარი ექსპერტიზაზეა გადასვენებული, შესაბამისი სამედიცინო შემოწმება ჩაუტარდა ქალსაც. მას ერთი შვილი ჰყავს.

შინაგან საქმეთა სამინისტრომ გამოძიება 112-ე მუხლით დაიწყო, რაც დედის მიერ ახალშობილის განზრახ მკვლელობას გულისხმობს.

აღნიშნული დანაშაული ისჯება შინაპატიმრობით ვადით ექვსი თვიდან ორ წლამდე ან თავისუფლების აღკვეთით ვადით სამიდან ხუთ წლამდე.

98
თემები:
შემთხვევები საქართველოში
 COVID-19-ზე აღებული ანალიზები

COVID-19 საქართველოში: რამდენია გამოჯანმრთელებულთა საერთო რაოდენობა

0
(განახლებულია 14:05 04.07.2020)
საქართველოში დღითი დღე იზრდება იმ პაციენტების რაოდენობა, რომლებმაც საშიში ინფექცია COVID-19 დაამარცხეს.

თბილისი, 4 ივლისი — Sputnik. საქართველოში ბოლო დღე-ღამეში COVID-19-სგან ოთხი პაციენტი გამოჯანმრთელდა, ნათქვამია სამთავრობო ვებ-გვერდზე stopcov.ge.

ამ დროისათვის საქართველოში ახალი კორონავირუსი 943 ადამიანს დაუდგინდა. გამოჯანმრთელდა 821 (87%), ეპიდემიის დაწყებიდან დღემდე გარდაიცვალა 15 ადამიანი.

ამ დროისთვის საქართველოში კორონავირუსის დიაგნოზით 107 პაციენტი მკურნალობს. ქვეყანაში გამოჯანმრთელებულთა რაოდენობა თითქმის რვაჯერ აღემატება ინფიცირებულთა რაოდენობას.

კარანტინის რეჟიმში იმყოფება 3080, ხოლო სტაციონარებში დაკვირვების ქვეშ 242 პაციენტია. ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს სამი მოქალაქე.

საქართველოში კორონავირუსის პირველი შემთხვევა 26 თებერვალს დაფიქსირდა. კორონავირუსის პანდემიასთან დაკავშირებით საქართველოში 21 მარტს საგანგებო მდგომარეობა გამოცხადდა, რომელიც 23 მაისს გაუქმდა, თუმცა ზოგიერთი შეზღუდვა კვლავ დარჩა. ხელისუფლება შეზღუდვებს ეტაპობრივად ხსნის.

0
თემები:
COVID-19 საქართველოში