თბილისი, 1 ოქტომბერი — Sputnik. თელავი-ნაფარეულის საავტომობილო გზაზე მომხდარი ავტოსაგზაო შემთხვევის შედეგად ცოლ-ქმარი დაშავდა, იუწყება საზოგადოებრივი მაუწყებლის პირველი არხი.
ავტოსაგზაო შემთხვევა გუშინ, ღამით მოხდა.
გავრცელებული ინფორმაციით, BMW-ს მარკის ავტომობილი სავალი ნაწილიდან გადავიდა და ხეს შეეჯახა.
შემთხვევის ადგილზე მობილიზებული იყვნენ საპატრულო პოლიციის ეკიპაჟები, სასწრაფო სამედიცინო დახმარებისა და სახანძრო-სამაშველო ბრიგადები.
60 წლამდე მამაკაცი, რომელიც უგონო მდგომარეობაში იმყოფებოდა, სასწრაფო დახმარების ბრიგადამ თელავის რეფერალურ საავადმყოფოში გადაიყვანა.
ავტომობილში მყოფი 55 წლამდე ქალის ამოყვანა კი მეხანძრე-მაშველებმა მხოლოდ მოგვიანებით, სპეციალური სამაშველო აღჭურვილობის გამოყენებით მოახერხეს.
ამ დროისთვის ორივე დაშავებული თელავის რეფერალურ საავადმყოფოს რეანიმაციულ განყოფილებაშია მოთავსებული. ექიმების თქმით, მათი ჯანმრთელობის მდგომარეობა სტაბილურად მძიმეა.
საქმეზე გამოძიება საქართველოს სსკ-ის 276-ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს და ისჯება ჯარიმით, ან თავისუფლების აღკვეთით ვადით სამ წლამდე.
