თბილისი, 17 ივლისი — Sputnik. შინაგან საქმეთა სამინისტროს თანამშრომლებმა გლდანში მომხდარი ყაჩაღობის ფაქტზე 24 წლის ორი ახალგაზრდა დააკავეს, ნათქვამია უწყების მიერ გავრცელებულ განცხადებაში.
საქმის მასალებიდან ირკვევა, რომ 15 ივლისს ბრალდებულები ერთ-ერთ მოქალაქეს თავს დაესხნენ, დანის მუქარით ფული გასტაცეს და შემთხვევის ადგილიდან მიიმალნენ.
სამართალდამცველებმა ეჭვმიტანილები სარფის სასაზღვრო–გამშვებ პუნქტზე იმ დროს დააკავეს, როდესაც ისინი ქვეყნის დატოვებას ცდილობდნენ.
დაკავებულების პირადი ჩხრეკისას ნივთმტკიცების სახით ამოიღეს დანაშაულის იარაღი — დანა და წაღებული თანხის ნაწილი.
მომხდარ ფაქტზე გამოძიება სსკ-ის 179-ე მუხლით დაიწყო, რაც ყაჩაღობას გულისხმობს და ითვალისწინებს ხუთიდან შვიდ წლამდე ვადით თავისუფლების აღკვეთას.
