ოჯახური ძალადობა

ქალებს საქართველოში უმეტესად ოჯახური კონფლიქტების საფუძველზე კლავენ

37
(განახლებულია 15:48 19.06.2018)
საქართველოს სახალხო დამცველის აპარატმა „გაერო-ქალების" მხარდაჭერით ჩაატარა კვლევა ქვეყანაში ქალების გენდერული ნიშნით მკვლელობის პრობლემის შესახებ.

თბილისი, 19 ივნისი — Sputnik. გამოძიება 2017 წელს ქალების მკვლელობის 26 ფაქტზე დაიწყო, აქედან 14 შემთხვევაში იყო ოჯახური დანაშაულის ნიშნები, განაცხადა სახალხო დამცველმა ნინო ლომჯარიამ კვლევის პრეზენტაციაზე.

„2017 წელს ქალთა მკვლელობის მცდელობის მუხლით 15 ფაქტზე დაიწყო გამოძიება და მათგან ოჯახში ძალადობის ნიშნით 12 ფაქტი იყო ჩადენილი. ეს სტატისტიკა მიანიშნებს, რომ ქალთა მკვლელობების უმრავლესობა ოჯახში ძალადობას უკავშირდება და ამ შემთხვევაში სახალხო დამცველის უმთავრესი რეკომენდაციაა ფემიციდის, როგორც ცალკე მდგომი დანაშაულის განსაზღვრა", — განაცხადა ლომჯარიამ.

უშუალოდ სახალხო დამცველის აპარატის კვლევა 2016 წელს ჩადენილ დანაშაულებს ეხებოდა. უფლებადამცველებმა გააანალიზეს ამ პერიოდში ქალების მკვლელობისა და მკვლელობის მცდელობის 11 საქმე და დაადგინეს, რომ ცხრა შემთხვევაში საქმე ეხება ოჯახურ ძალადობას. თუმცა, დანაშაულის მოტივი მხოლოდ შვიდ შემთხვევაში დადგინდა.

„ფემიციდის მაღალი რაოდენობა მჭიდროდაა დაკავშირებული როგორც ქვეყანაში არსებულ გენდერულ უთანასწორობასთან, ისე ქალთა მიმართ და ოჯახში ძალადობის პოლიტიკასთან და ძალადობის მსხვერპლთა/დაზარალებულთა დაცვის სისტემის ნაკლოვანებებთან", — აღნიშნულია კვლევაში.

უფლებადამცველებმა შესწავლილი საქმეებიდან გამოავლინეს მსხვერპლის მიმართ სექსისტური–დისკრიმინაციული დამოკიდებულება. მათ ეპყრობოდნენ როგორც საკუთრებას, აკონტროლებდნენ მათ საქციელს ან ითხოვდნენ დამორჩილებას.

მიუხედავად ამისა, საქმეების უმრავლესობაში, გარდა ერთისა, არც პროკურატურის ორგანოებს, არც სასამართლოს დისკრიმინაციულ მოტივზე ყურადღება არ გაუმახვილებია. რიგ საქმეებში მოტივი არ სახელდება, ხოლო რიგ საქმეებში მითითებულია ისეთი მოტივები, როგორიცაა ჩხუბი, შურისძიება, შეურაცხყოფა და ეჭვიანობა, აღნიშნულია კვლევაში.

სახალხო დამცველის აპარატმა ხელისუფლებისთვის რიგი რეკომენდაციები შეიმუშავა. მათ შორისაა სრულფასოვანი სტატისტიკის წარმოება სიძულვილის გამო ჩადენილი ოჯახური ძალადობისა და დანაშაულის ფაქტებზე, მსხვერპლისა და დაზარალებულთა დაცვის სისტემის გაუმჯობესება და მათი დახმარება.

სახალხო დამცველი ასევე იძლევა რეკომენდაციას, სისხლის სამართლის კოდექსში ცალკე მუხლად გამოიყოს ქალის მკვლელობა, ყურადღება მიექცეს გენდერულ ფაქტორს სასამართლოში საქმის განხილვისას, ასევე გამოძიების მიმდინარეობისას ყურადღება მიექცეს დანაშაულის წინაისტორიას და გათვალისწინებულ იქნას საქმის სპეციფიკა სასამართლოში განხილვისას.

კვლევა ფემიციდის (ქალების მკვლელობა გენდერული ნიშნით) პრობლემებზე „გაერო-ქალების" მხარდაჭერით მომზადდა.

37
თემები:
კრიმინალი საქართველოში – 2018 (1086)
თბილისის ინფექციური საავადმყოფო

თავსხმა წვიმამ თბილისის ინფექციური საავადმყოფოს ერთ-ერთი შენობა დატბორა

57
თბილისის ინფექციური საავადმყოფოს ისედაც გაპარტახებული და ამორტიზებული შენობა სტიქიამ კიდევ უფრო დააზიანა

თბილისი, 25 მაისი - Sputnik. თავსხმა წვიმამ თბილისის ინფექციური საავადმყოფოს ადმინისტრაციული შენობა დატბორა, იუწყება ტელეარხი Rustavi2.

წვიმა, სეტყვა, წყალდიდობა – საქართველოში უამინდობა გრძელდება >>

წყალმა შენობაში დაზიანებული სახურავიდან შეაღწია. კლინიკის პერსონალის თქმით, დატბორვა მათ სრულფასოვან მუშაობას უშლის ხელს. მედიკოსების თქმით, მათ აუცილებლად სჭირდებათ სხვა შენობაში გადასვლა, წინააღმდეგ შემთხვევაში, მსგავსი პრობლემების გამო კლინიკა ნორმალურად მუშაობას ვერ გააგრძელებს.

„განა შეიძლება, რამდენჯერაც გაწვიმდება, იმდენჯერ ქვეყნის ერთ-ერთი ყველაზე მნიშვნელოვანი დაწესებულება და მისი სერვერი დაიტბოროს და ჩვენ წყალდიდობის პირობებში მუშაობა გვიწევდეს?!“, - განაცხადა საავადმყოფოს აღმასრულებელმა დირექტორმა შოთა გოგიჩაიშვილმა.

ტერიტორია, რომელზეც კლინიკა მდებარეობს, 2009 წელს გაიყიდა. ის კომპანია „ავერსი-ფარმამ“ შეიძინა. ამის შემდეგ ცენტრის თანამშრომლებს არაერთხელ დაუჩივლიათ, რომ პაციენტების სამკურნალოდ სათანადო ინფრასტრუქტურა არ გააჩნიათ და ვერც შენობას არემონტებენ, ვინაიდან ის კერძო მფლობელობაშია. ობიექტი იმ პირობით გაიყიდა, რომ ინფექციური საავადმყოფო ახალ ფართსა და შენობას მიიღებდა, მაგრამ მას შემდეგ წლები გავიდა, დაპირება კი დაპირებად დარჩა - ცენტრი იძულებულია ძველ ადგილზე უუფლებოდ დარჩეს.

სტიქია რაჭაში: ადიდებულმა მდინარემ გზა დატბორა >>

ინფექციური საავადმყოფოს კოლექტივმა არაერთხელ გამართა საპროტესტო აქცია. 2019 წლის ნოემბერში ისინი „ავერსის“ მიერ ტერიტორიაზე ერთ-ერთი შენობის დემონტაჟის წინააღმდეგ გამოვიდნენ.

ამჟამად ინფექციური საავადმყოფო საყოველთაო ყურადღების ცენტრშია - სწორედ მან დაიწყო კორონავირუსით ინფიცირებულთა მიღება და დღემდე ქვეყანაში COVID-19-ის მკურნალობის ფლაგმანია.

57
თემები:
შემთხვევები საქართველოში
შოთა არველაძე

შოთა არველაძემ ბასილაშვილს მხარდაჭერა გამოუცხადა

52
საქართველოს უძლიერესი ჩოგბურთელი ყოფილ მეუღლეზე თავდასხმის ბრალდებით დააკავეს და მას აღკვეთის ღონისძიების სახით 100 ათას ლარიანი გირაო შეეფარდა

თბილისი, 25 მაისი – Sputnik. საქართველოს ფეხბურთის ნაკრების საუკეთესო ბომბარდირმა, ახლა კი ტაშკენტის „პახტაკორის“ მთავარმა მწვრთნელმა შოთა არველაძემ სოციალურ ქსელში მხარი დაუჭირა საქართველოს ნომერ პირველ ჩოგბურთელს, ნიკოლოზ ბასილაშვილს, რომელსაც ბრალი ოჯახურ ძალადობაში ედება.

„ჩემი ბუნებით, ხასიათით და პრინციპებით, ყოველთვის, ყველანაირი ძალადობის წინააღმდეგი ვარ - განსაკუთრებით ქალების მიმართ, რომლებიც ჩვენს ცხოვრებას ალამაზებენ. ნიკოლოზ ბასილაშვილი ძალიან დიდი, მოქმედი ქართველი სპორტსმენია, რომელმაც პირადად მე და მის ათასობით გულშემატკივარს, არაერთხელ მოგვცა სიამაყის საფუძველი. არ ვიცნობ პირადად, მაგრამ, მინდა ამ რთულ მომენტში მხარდაჭერა გამოვუცხადო“, - დაწერა არველაძემ თავის Facebook-გვერდზე.

ნიკოლოზ ბასილაშვილი 22 მაისს დააკავეს. პროკურატურის ინფორმაციით, 21 მაისს თბილისში, ავჭალის დასახლებაში ბასილაშვილმა ურთიერთშელაპარაკების ნიადაგზე ყოფილი მეუღლის მიმართ ფიზიკური ძალადობა განახორციელა. სისხლის სამართლის საქმეზე გამოძიება 126-ე პრიმა მუხლის მეორე ნაწილით მიმდინარეობს.

გავრცელებული ინფორმაციით, საქართველოს ნომერ პირველი ჩოგანი მას შემდეგ დააკავეს, რაც ბასილაშვილი და მისი მამა ჩოგბურთელის ყოფილ ცოლს ფიზიკურად გაუსწორდნენ. ამ ფაქტს შეესწრო მათი არასრულწლოვანი შვილიც.

ნიკოლოზ ბასილაშვილი და მისი მეუღლე ნეკა დოროყაშვილი ერთმანეთს დაახლოებით ერთი წლის წინ დაშორდნენ, თუმცა ამაზე ოფიციალურად არც ერთს არ უსაუბრია.

ბასილაშვილი - მსოფლიოს 27-ე ჩოგანი, АТР-ს სერიის სამი ტურნირის გამარჯვებულია. თავის კარიერაში 28 წლის ჩოგბურთელმა თითქმის 5,5 მილიონი დოლარი გამოიმუშავა, აქედან 343 ათასი - ამ სეზონზე.

52
თემები:
გახმაურებული სასამართლო პროცესები
მისტიკა

ზოდიაქოს ნიშნები, რომლებსაც მომავლის განჭვრეტის უნარი გააჩნიათ

0
(განახლებულია 15:08 25.05.2020)
ასტროლოგები გამოყოფენ ზოდიაქოს ოთხ ნიშანს, რომელთა წარმომადგენლებს სხვებზე ხშირად შეუძლიათ მომავლის წინასწარმეტყველება და ცხოვრების სხვადასხვა სფეროში მოახლოებული ცვლილებების შეგრძნება

თითოეულ ადამიანს აქვს თავისი უნიკალური თვისება და ნიჭი. ზოდიაქოს ამ ოთხ ნიშანს შესწევს უნარი, შეაფასოს მომავალი და პროგნოზები გააკეთოს.

ქალწული

ქალწულები ერთ–ერთი ყველაზე ბრძენი ხალხია. მათი წინასწარ განჭვრეტის უნარი აუხსნელ წინათგრძნობებს ეფუძნება. ხანდახან ეს ცხოვრებისეული გამოცდილებაა, ხანდახან კი, უბრალოდ, გამართლება და ინტუიცია. ასეა თუ ისე, ქალწულებს ვარსკვლავები ხშირად ეხმარებიან მოვლენების ჰორიზონტს მიღმა მზერაში.

ქალწულები უკვე ბავშვობიდან ამბობენ ხშირად: „ხომ ვამბობდი“, რაც ასე არ უყვართ გარშემომყოფებს. იქმნება შეგრძნება, რომ ამ ადამიანებმა ისეთი რამ იციან, რაც სხვა არავინ იცის. ანტენასავით არიან, რომელიც სამყაროს გასაიდუმლოებულ და დაშიფრულ გზავნილებს იღებენ. ამასთან, ისინი კარგად გრძნობენ ადამიანებს – ყოველთვის იციან, ვის უნდა ენდონ და ვის – არა.

მორიელი

მორიელებს მომავლის განჭვრეტის უნარი ზოდიაქოს ყველა ნიშანზე მეტად აქვთ განვითარებული, რადგან ვარსკვლავები და პლანეტები მათ საოცარი ინტუიციით აჯილდოებენ. ეს ადამიანები პრობლემებსა და უიამოვნებებს მათ გამოჩენამდე დიდი ხნით ადრე გრძნობენ. თუ მორიელი გეუბნებათ, რომ რაღაც ცუდი უნდა მოხდეს, სჯობს, ეს სიტყვები არ უგულებელყოთ.

ამ ნიშნის წარმომადგენლები მხოლოდ ცუდს არ წინასწარმეტყველებენ – კარგი ამბების განჭვრეტაც შეუძლიათ. მათ უმართლებთ სასიყვარულო წინასწარმეტყველებებში. წინასწარ გრძნობენ საბედისწერო შეხვედრას, რომ გაიცნობენ თავიანთ საყვარელ ადამიანს, რომელიც ყველაფერს უკეთესობისკენ შეცვლის. ისინი ხშირად წინასწარ გრძნობენ ასევე უსიამოვნებებს სამსახურში, დიდი პრობლემების დაწყების მოახლოებას მთელი მსოფლიოს მასშტაბით.

თხის რქა

თხის რქების ნიჭი შორსაა მაგიისა და ინტუიციისგან. ის მხოლოდ მათ მდიდარ ცხოვრებისეულ გამოცდილებას, დაკვირვების უნარსა და გარშემომყოფებისგან მიღებულ ცოდნას ეფუძნება. ისინი არ წყვეტენ სწავლას, დეტალურად არჩევენ სხვის შეცდომებს. სწავლობენ არა მხოლოდ საკუთარ შეცდომებზე, არამედ ისრუტავენ ყველაფერს, რასაც ახლობლები, მეგობრები თუ გარშემომყოფები უზიარებენ მათ.

ეს თხის რქებს საშუალებას აძლევს, განჭვრიტონ მომავალი, რადგან ბევრი იციან ცხოვრების ზოგიერთ სფეროსა და ასპექტებზე. მათ შეუძლიათ წინასწარ ამოიცნონ მოვლენები და ადამიანების ქცევები, რაც ამ ნიშნის წარმომადგენლებს ეხმარება წარმატების შენარჩუნებაში, პატივისცემის მოპოვებაში.

მერწყული

მერწყულები თხის რქებს ჰგვანან, რადგან არც ისინი წყვეტენ სწავლას ნებისმიერ ასაკში. მძლავრი სწრაფვა ცოდნის მიღებისკენ მათ ეხმარება ადამიანური ქცევის ზღვრების შესწავლაში. მერწყულებს სჩვევიათ მათთვის საინტერესო სფეროში ყველა წვრილმანის გააზრება. ეს აძლევს შესაძლებლობას, რომ უფრო უკეთესად, ხშირად და მკაფიოდ იწინასწარმეტყველონ მომავალი.

როგორც ასტროლოგები აღნიშნავენ, მერწყულებს ასევე ნიჭიერი ადამიანების ამოცნობის განსაკუთრებული ალღო აქვთ. იოლად საზღვრავენ, ვინ იქნება წარმატებული და ვინ – არა.

0