თბილისი, 18 ივნისი — Sputnik. თბილისში, მტკვრის მარჯვენა სანაპიროზე მომხდარი ავტოსაგზაო შემთხვევის შედეგად სამი ადამიანი დაშავდა, იუწყება ტელეკომპანია Rustavi2.
ავტოსაგზაო შემთხვევა თბილისში, მტკვრის მარჯვენა სანაპიროზე დაახლოებით ერთი საათის წინ მოხდა. ერთმანეთს რამდენიმე ავტომობილი შეეჯახა. დაზიანებულია 6 ავტომობილი.
დაშავებულები მსუბუქი დაზიანებებით სასწრაფო სამედიცინო დახმარების ბრიგადებმა საავადმყოფოში გადაიყვანეს.
მომხდარ ფაქტზე გამოძიება საქართველოს სსკ-ის 276-ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს და ითვალისწინებს თავისუფლების აღკვეთას ვადით სამ წლამდე.
