საქართელოს პროკურატურა

მირზა სუბელიანსა და მერაბ მორჩაძეს ბრალი ოფიციალურად წარუდგინეს

151
(განახლებულია 20:55 10.06.2018)
სსკ-ის მუხლი, რომლის მიხედვითაც წარუდგინეს ბრალი მერაბ მორჩაძეს, ითვალისწინებს ჯარიმას ან თავისუფლების აღკვეთას ვადით სამიდან ექვს წლამდე, ხოლო სუბელიანს - ჯარიმას ან თავისუფლების აღკვეთას ვადით ორიდან ოთხ წლამდე.

თბილისი, 10 ივნისი — Sputnik. ხორავას ქუჩაზე მომხდარი მკვლელობის საქმეზე მიმდინარე გამოძიების ფარგლებში დაკავებულ მირზა სუბელიანსა და მერაბ მორჩაძეს პროკურატურამ ბრალდება ოფიციალურად წარუდგინა, ნათქვამია საქართველოს პროკურატურის მიერ გავრცელებულ განცხადებაში.

განმეორებითი გამოძიების ფარგლებში პირველი ბრალდებული — 45 წლის მერაბ მორჩაძე სამართალდამცველებმა 8 ივნისს დააკავეს, ხოლო 9 ივნისს, ხორავას ქუჩაზე მომხდარი მკვლელობის შეუტყობინებლობისთვის, პროკურატურის ყოფილი მაღალჩინოსანი მირზა სუბელიანი დააკავეს. 

პროკურატურის ინფორმაციით, მირზა სუბელიანს ბრალდება საქართველოს სსკ-ის 376-ე მუხლით (განსაკუთრებით მძიმე დანაშაულის შეუტყობინებლობა) წარედგინა, ხოლო მერაბ მორჩაძეს — საქართველოს სსკ-ის 372-ე მუხლის მე-2 ნაწილით (მიწოდებული ინფორმაციის შეცვლის მიზნით მოწმის მოსყიდვა ქონებრივი სარგებლის შეთავაზებით).

სსკ-ის მუხლი, რომლის მიხედვითაც წარუდგინეს ბრალი მერაბ მორჩაძეს, ითვალისწინებს ჯარიმას ან თავისუფლების აღკვეთას ვადით სამიდან ექვს წლამდე, ხოლო სუბელიანს — ჯარიმას ან თავისუფლების აღკვეთას ვადით ორიდან ოთხ წლამდე.

პროკურატურის ყოფილ მაღალჩინოსანს მირზა სუბელიანს გამოძიება დანაშაულის შეუტყობინებლობას ედავება.

„ჩატარებული გამოძიებით  დადგინდა, რომ 1 დეკემბერს ქ. თბილისში, ხორავას ქუჩა N4-ის მიმდებარე ტერიტორიაზე ორი არასრულწლოვნის მკვლელობის შემდეგ მ. ს.-სთვის ცნობილი გახდა გ. ჯ.-ს დანაშაულის შესახებ, რაც მან არ შეატყობინა სამართალდამცავ ორგანოებს“, — აღნიშნულია პროკურატურის მიერ გავრცელებულ ინფორმაციაში.

მერაბ მორჩაძეს კი გამოძიება მოწმეზე ზემოქმედებაში ადანაშაულებს. საქმის მასალების მიხედვით, მორჩაძე მკვლელობაში ბრალდებული ერთ-ერთი არასრულწლოვნის სასარგებლოდ ჩვენების შეცვლას მიხეილ კალანდიას აიძულებდა.

„მ. მ.-მ თვითმხილველ მოწმეს რამდენჯერმე გადასცა ფულადი თანხა და დაპირდა, რომ თუ სასამართლოში ჩვენების მიცემის დროს შეცვლიდა გამოძიებისთვის მიწოდებულ ინფორმაციას და გ.ჯ.-ს არ ამხელდა დანაშაულში, მას მატერიალურად დაეხმარებოდა და მოსალოდნელი გართულებების შემთხვევაში უზრუნველყოფდა მედიისა და საზოგადოების ფართო მასების მხარდაჭერას“, — ნათქვამია განცხადებაში.

პროკურატურამ ბრალდებულებისთვის აღკვეთი ღონისძიების სახით პატიმრობის შეფარდების შუამდგომლობით სასამართლოს უკვე მიმართა. 

 ხორავას ქუჩაზე მოკლული დავით სარალიძის მამა, ზაზა სარალიძე მირზა სუბელიანს დამნაშავეების მფარველობაში ადანაშაულებს და  მის დასჯას მოითხოვს. პარლამენტის  შენობის წინ გამართული აქციების დრო  მისი მთავარი მოთხოვნა სწორედ სუბელიანის დაკავება გახლდათ.

ხორავას ქუჩაზე ორი მოზარდი 2017 წლის 1 დეკემბერს დაჭრეს. ლევან დადუნაშვილი საავადმყოფოში მიყვანამდე გარდაიცვალა, დავით სარალიძე კი ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.

იმ პერიოდში სუბელიანი მთავარ პროკურატურაში ადამიანური რესურსების მართვისა და განვითარების დეპარტამენტში მუშაობდა. 2017 წლის 3 დეკემბერს სუბელიანმა პროკურატურაში თანამდებობა დატოვა.

 


151
თემები:
მკვლელობა ხორავას ქუჩაზე – პროტესტის ტალღა თბილისში–2018 (131)
ოჯახური ძალადობა

ძალადობის სტატისტიკა: 8 თვეში ოჯახური ტირანების მსხვერპლი 6 ათასზე მეტი ადამიანი გახდა

29
(განახლებულია 12:34 27.09.2020)
1 სექტემბრიდან ოჯახურ ტირანებთან ბრძოლა ახლებურად დაიწყო - მატ შემაკავებელ ორდერთან ერთად ელექტრონულ სამაჯურებს უმაგრებენ

თბილისი, 12 სექტემბერი - Sputnik. საქართველოში მიმდინარე წლის 1 იანვრიდან 31 აგვისტომდე ოჯახური ძალადობის მსხვერპლი 6 678 ადამიანი გახდა, ნათქვამია შსს-ს მასალებში.

უწყების მონაცემებით, ოჯახური ტირანებისგან ყველაზე ხშირად ქალები ზარალდებიან. აღნიშნულ პერიოდში სულ 5 528 ქალი დაზარალდა.

დაზარალებულებს შორის 16 წლამდე ასაკის 300 ბავშვია. სტატისტიკა ცხადყოფს, რომ საქართველოში ოჯახური ძალადობისგან გოგონები ბიჭებთან შედარებით უფრო ხშირად ზარალდებიან.

რაც შეეხება ოჯახურ ტირანებს, იანვრიდან აგვისტომდე 6 385 ბოროტმოქმედი გამოავლინეს. მათი უმრავლესობა მამაკაცია, თუმცა არიან ქალებიც. ოჯახურ ძალადობაში 1 096 ქალია მხილებული.

ამასთან, თუ ტირანი-მამაკაცის ასაკი ძირითადად 25-44 წელია, ქალებს შორის ის 45 წლიდან იწყება. მსხვერპლებს შორის ყველაფერი პირიქითაა: ქალები ოჯახური ძალადობის მსხვერპლები ყველაზე ხშირად 25-44 ასაკში ხდებიან, მამაკაცები - 45 წელს ზემოდ.

იმავე სტატისტიკით, აღნიშნულ პერიოდში ოჯახური ძალადობის შედეგად მოკლულია 11 ადამიანი, დაჭრილია - 16.

29
თემები:
კრიმინალი საქართველოში
კომპიუტერის მომხმარებელი

ბაჩალიაშვილის საქმე: სკანდალური ფოტოების გამომგზავნი პატიმრობაშია

98
ბრალდების ვერსიით, ფურცხვანიძემ ადვოკატისგან შემთხვევის ადგილის კოორდინატები შეიტყო, მოიპოვა ძველი სატელიტური ფოტოები და მათი გადაღების თარიღი გააყალბა.

თბილისი, 25 სექტემბერი – Sputnik. თბილისის საქალაქო სასამართლომ შეუფარდა პატიმრობა დავით ფურცხვანიძეს, რომელსაც ბრალად ედება გარდაცვლილი პროგრამისტის, თამარ ბაჩალიაშვილის საქმის სამხილების გაყალბება და კომპიუტერულ სისტემაში უკანონო შეღწევა, იუწყება პირველი არხი.

სასამართლომ სრულად დააკმაყოფილა პროკურატურის შუამდგომლობა, რომელიც აცხადებდა, რომ თავისუფლებაზე მყოფმა დაკავებულმა შეიძლება ქვეყანა დატოვოს, რადგან მას აქვს ნაყიდი ავიაბილეთი და უცხოურ ბანკში ანგარიშზე თანხაც გააჩნია.

ადვოკატები გირაოს მოითხოვდნენ და აცხადებდნენ, რომ ფურცხვანიძე აპირებდა წასვლას მივლინებაში, და არა სამუდამოდ.

ფურცხვანიძე პარასკევს დააკავეს. იყო დაღუპული პროგრამისტის თამარ ბაჩალიაშვილის ოჯახის ადვოკატის მიხეილ რამიშვილის წყარო. საუბარია ე.წ. სატელიტურ ფოტოებზე, რომლებიც რამიშვილმა გაავრცელა. ფოტოებზე, რომლებიც 19–22 ივლისითაა დათარიღებული, ჩანს, რომ გოგონას ავტომობილი იმ ადგილზე არ იდგა, სადაც გარდაცვლილი 22 ივლისს აღმოაჩინეს.

დაკითხვა საპროტესტო აქციის ფონზე - სკანდალი ბაჩალიაშვილის საქმის ირგვლივ არ წყდება >>

პროკურატურამ დაადგინა, რომ ფურცხვანიძემ, რომელიც ხელმძღვანელობს არასამთავრობო ორგანიზაცია „უსაფრთხოების პრობლემების ანტიკრიზისულ ცენტრს“, საკუთარი ორგანიზაციის რეკლამირებისა და დაფინანსების მიღების მიზნით გააყალბა მტკიცებულებები, რომლებიც გაამყარებდა ოჯახის ვერსიას იმის შესახებ, რომ დაღუპული გოგონას ავტომობილი იმ ადგილზე იმ დღეს მიიყვანეს, როცა გარდაცვლილი იპოვეს.

ბრალდების ვერსიით, ფურცხვანიძე დაუკავშირდა რამიშვილს და სთხოვა შემთხვევის ადგილის კოორდინატების მიწოდება. 7 სექტემბერს დავით ფურცხვანიძემ სოციალურ ქსელ „სკაიპის” მეშვეობით მიიღო პროგრამა zoom.earth-ის 2019 წლის ნოემბრის შესაბამისი კოორდინატების სატელიტური ფოტოსურათები და განიზრახა აღნიშნული ფოტოების გაყალბება.

ამ მიზნით ზემოხსენებული ფოტოები ელექტრონული ფოსტის გამოყენებით გადაუგზავნა თავის შვილს და სთხოვა დაემუშავებინა ისე, რომ შთაბეჭდილება შექმნილიყო, თითქოსდა აღნიშნული სატელიტური ფოტო გადაღებულია 2020 წლის 19 ივლისს და მასზე თამარ ბაჩალიაშვილის ავტომანქანა არ არის ასახული. 

დაკავებულმა გაყალბებული სურათები სოციალურ ქსელ WhatsApp-ის საშუალებით გადაუგზავნა მიხეილ რამიშვილს, რომელმაც, თავის მხრივ, აღნიშნული ფოტოები წარუდგინა გამოძიებას მტკიცებულების სახით.

დაკითხვისას ფურცხვანიძემ განაცხადა, რომ ეს ფოტოები ავთენტურია, თუმცა ექსპერტიზამ მათი გაყალბების ფაქტი დაადგინა.

ახლა მას 2-დან 6 წლამდე ვადით თავისუფლების აღკვეთა ემუქრება.

 

98
თემები:
გახმაურებული სასამართლო პროცესები
ნიკოლ ფაშინიანი

კონფლიქტი მთიან ყარაბაღში: სომხეთმა საყოველთაო მობილიზაცია გამოაცხადა

33
(განახლებულია 13:41 27.09.2020)
სომხეთის პრემიერ-მინისტრმა ჯარებში რეგისტრირებული პირად შემადგენლობას ტერიტორიულ სამხედრო კომისარიატებში გამოცხადება უბრძანა

თბილისი, 27 სექტემბერი — Sputnik. სომხეთის მთავრობამ ქვეყანაში სამხედრო მდგომარეობა და საყოველთაო მობილიზაცია გამოაცხადა, იუწყება Sputnik-სომხეთი.

მთიან ყარაბაღში 27 სექტემბრის დილას სიტუაცია მკვეთრად გამწვავდა - სომხეთი და აზერბაიჯანი ერთმანეთს აგრესიაში ადანაშაულებენ.

„მთავრობის გადაწყვეტილებით სომხეთის რესპუბლიკაში ცხადდება სამხედრო მდგომარეობა და საყოველთაო მობილიზაცია. გადაწყვეტილება ძალაში გამოქვეყნების მომენტიდან შედის. პირად შემადგენლობას, რომელიც ჯარებშია რეგისტრირებული, ვუბრძანებ გამოცხადდეს ტერიტორიულ სამხედრო კომისარიატებში. სამშობლოსთვის, გამარჯვებისთვის“, - დაწერა თავის Facebook-გვერდზე რესპუბლიკის პრემიერ-მინისტრმა ნიკოლ ფაშინიანმა.

 

ბაქო და ერევანი ერთმანეთს სიტუაციის გამწვავებაში ადანაშაულებენ. აზერბაიჯანის თავდაცვის სამინისტრო ამტკიცებს, რომ ცეცხლი სომხურმა მხარემ გახსნა, ხოლო აზერბაიჯანის ძალებმა კონტრშეტევითი ოპერაცია დაიწყეს. სომხეთის თავდაცვის სამინისტროში აცხადებენ, რომ ყარაბაღზე აზერბაიჯანის მხრიდან „საჰაერო და სარაკეტო იერიში მიიტანა“.

კონფლიქტის მხარეები მოწინააღმდეგის დანაკარგებზე საუბრობენ. ასე, სომხეთში ჩამოგდებულ ვერტმფრენებსა და აფეთქებულ ტანკებზე საუბრობენ, ხოლო აზერბაიჯანში - განადგურებულ საზენიტო კომპლექსებზე.

რუსეთის საგარეო საქმეთა სამინისტრომ სომხეთსა და აზერბაიჯანს მოუწოდა დაუყოვნებლივ შეწყვიტონ ცეცხლი და სიტუაციის სტაბილიზაციის მიზნით მოლაპარაკებები დაიწყონ.

მთიანი ყარაბაღის გამო სომხეთსა და აზერბაიჯანს შორის კონფლიქტი 1988 წლის თებერვალში დაიწყო, როდესაც მთიანი ყარაბაღის ავტონომიამ აზერბაიჯანის სსრ–დან გასვლის თაობაზე განაცხადა. 1992-1994 წლებში აზერბაიჯანმა დაკარგა კონტროლი მთიან ყარაბაღზე და მის მიმდებარე შვიდ რაიონზე. კონფლიქტის მშვიდობიანად მოგვარების მოლაპარაკებები 1992 წლიდან მიმდინარეობს ეუთოს მინსკის ჯგუფის ფარგლებში, რომელსაც სამი თანათავმჯდომარე ჰყავს - რუსეთი, აშშ და საფრანგეთი. აზერბაიჯანი მოითხოვს საკუთარი ტერიტორიული მთლიანობის შენარჩუნებას, სომხეთი არაღიარებული რესპუბლიკის ინტერესებს იცავს, რადგან თავად ყარაბაღი მოლაპარაკებების მხარე არ არის.

33
თემები:
მთიან ყარაბაღში სიტუაცია გამწვავდა