თბილისი, 22 მარტი – Sputnik. ავტომობილი, რომელშიც საფეხბურთო კლუბ „კოლხეთის“ ხუთი წევრი იმყოფებოდა, გორთან ახლოს ავტოავარიაში მოყვა, იუწყება საზოგადოებრივი მაუწყებლის პირველი არხი.
ტელეკომპანიის ინფორმაციით, ავტომობილი ბორდიურს შეეჯახა, მძღოლი ადგილზე დაიღუპა. ფეხბურთელები სხვადასხვა სახის დაზიანებით გორის საავადმყოფოში გადაიყვანეს.
„ფოთის „კოლხეთმა“ კვირას თბილისში ითამაშა. ამის შემდეგ ფეხბურთელებს ორდღიანი დასვენება ჰქონდათ. დღეს კი ხუთი ფეხბურთელი ფოთში ვარჯიშზე მიემგზავრებოდა. სამწუხაროდ, ვიცით, რომ ავტომობილის მძღოლი გარდაიცვალა, ფეხბურთელების უმრავლესობას კი მცირე დაზიანებები აღენიშნება. ისინი გორის საავადმყოფოში გადაიყვანეს. ორი მათგანი რჩება სამედიცინო დაწესებულებაში, სამი კი გაწერეს“, – განაცხადა კლუბის პრეს–მდივანმა გია ეჯიბიამ ტელეარხის ეთერში.
მისი თქმით, ფეხბურთელ გიორგი არქანიას ხელი აქვს მოტეხილი.
სისხლის სამართლის საქმე აღძრულია სსკ–ის მუხლით, რომელიც ტრანსპორტის მოძრაობის უსაფრთხოების წესების დარღვევას გულისხმობს, რამაც ადამიანის დაღუპვა გამოიწვია. დანაშაული ოთხიდან შვიდ წლამდე პატიმრობას ითვალისწინებს.
