თბილისი, 16 ნოემბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა საქართველოს საბაჟო საზღვარზე საქონლის გადაადგილებასთან დაკავშირებული წესის დარღვევის ფაქტზე ორი პირი პასუხისგებაში მისცა, ნათქვამია ფინანსთა სამინისტროს საგამოძიებო სამსახურის განცხადებაში.
გამოძიებით დადგინდა, რომ ბრალდებულებმა საბაჟო გამშვები-პუნქტი "სარფის" გავლით საბაჟო კონტროლისგან მალულად, სატვირთო ავტომანქანით არადეკლარირებული, განსაკუთრებით დიდი ოდენობით ოქროს ნაწარმი შემოიტანეს.
საგამოძიებო მოქმედებების შედეგად ამოღებულია საერთო ჯამში 10 კგ-მდე ოქროს ნაკეთობები, რომელთა საბაჟო ღირებულება 610 ათას ლარს აღემატება.
გამოძიება საქართველოს სისხლის სამართლის კოდექსის 214-ე მუხლით მიმდინარეობს, რაც 8-დან 11 წლამდე ვადით თავისუფლების აღკვეთას ითვალისწინებს.
