თბილისი, 16 ნოემბერი — Sputnik. შსს-ს აჭარის პოლიციის დეპარტამენტის ბათუმის საქალაქო სამმართველოს თანამშრომლებმა ბათუმში განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით 1977 წელს დაბადებული მოქალაქე დააკავეს, იუწყება შსს-ს პრეს-სამსახური.
სამართალდამცველებმა ბრალდებულის პირადი და საცხოვრებელი ბინის ჩხრეკისას ნარკოტიკული საშუალება „სუბოქსინის" 191 აბი, 35 ნატეხი და ასევე ორ შეკვრად დაფასოებული „სუბოქსინის" ფხვნილი ამოიღეს.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობს საქართველოს სსკ-ის 260-ე მუხლის მე-6 ნაწილის "ა" ქვეპუნქტით, რაც 8-დან 20 წლამდე ვადით, ან უვადო თავისუფლების აღკვეთით ისჯება.