თბილისი, 15 აგვისტო — Sputnik. საქართველოს შსს-ს თანამშრომლებმა რუსთავში ახალი ფსიქოაქტიური ნივთიერების უკანონო შეძენა-შენახვის ბრალდებით 32 წლის მამაკაცი დააკავეს, აღნიშნულია უწყების ვებ-გვერდზე განთავსებულ განცხადებაში.
შსს-ს მონაცემებით, სამართალდამცველებმა დაკავებულის პირადი და დროებითი საცხოვრებლის ჩხრეკისას 294 შეკვრად დაფასოებული ახალი ფსიქოაქტიური ნივთიერება, ე. წ. ბიო ამოიღეს.
სისხლის სამართლის საქმე აღძრულია სსკ-ის მუხლით „ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა ან გადაგზავნა", რაც სასჯელის სახით ხუთ წლამდე პატიმრობას ითვალისწინებს.
„ბიო" ნარკოტიკებთან ბრძოლა ქართველი სამართალდამცავი ორგანოებისთვის ერთ-ერთი მთავარი პრიორიტეტი გახდა. ახალი სახის ნარკოტიკის მოხმარებამ საქართველოში პიკს 2014 წელს მიაღწია.
შსს-ს სტატისტიკით, „ბიო" ნარკოტიკის წინააღმდეგ კამპანიის დაწყებიდან (2014 წლის მარტი) მისი მოხმარება 90%-მდე შემცირდა.