თბილისი, 6 მაისი — Sputnik. თბილისში ნარკოდანაშაულის ბრალდებით დააკავეს ყოფილი ტელეწამყვანი, სპორტსმენი ლევან როსტოშვილი და მსახიობი ლაშა კურტანიძე, იუწყება ქართული მასმედია.
საქართველოს შსს-ში ორი ადამიანის დაკავების ფაქტს ადასტურებენ, თუმცა მათ ვინაობას არ ასახელებენ. ასევე არ ზუსტდება ამოღებული ნარკოტიკული საშუალებების რაოდენობა.
„ორი პირის დაკავებას ვადასტურებ. გუშინ თბილისში ნარკოდანაშაულისთვის ორი პირი დააკავეს. პერსონალურ ინფორმაციაზე არაფრის თქმა არ შემიძლია“, — განაცხადა შსს-ს პრეს-სამსახურის თანამშრომელმა ნინო ცხადაძემ, იუწყება საინფორმაციო სააგენტო „ნოვოსტი-გრუზია“.
სისხლის სამართლის საქმე აღძრულია სსკ-ის მუხლით „ნარკოტიკული საშუალების, მისი ანალოგის ან პრეკურსორის უკანონოდ დამზადება, წარმოება, შეძენა, შენახვა, გადაზიდვა, გადაგზავნა ან გასაღება“, რაც რვიდან ოც წლამდე ან უვადო პატიმრობით ისჯება.
ლევან როსტოშვილი, რომელიც ქართულ შოუ-ბიზნესში ცნობილია, როგორც „როსტო“, ადრე „ნანუკას შოუს“ თანაწამყვანი იყო, როდესაც გადაცემა ტელეკომპანია „იმედის“ ეთერში გადიოდა.
ლაშა კურტანიძე პოპულარულ ტელესერიალში „ჩემი ცოლის დაქალები“ მონაწილეობს, რომელიც ტელეკომპანია „რუსთავი 2“-ზე გადის.
