თბილისი, 19 აპრილი — Sputnik. საქართველოში აზერბაიჯანის მოქალაქეები დააკავეს, რომლებიც ქვეყანაში 1,1 მილიონი ლარის ღირებულების 12 კილოგრამი ოქროს ზოდების უკანონო შემოტანას ცდილობდნენ.
ეს უპრეცედენტო შემთხვევაა, აღნიშნულია საქართველოს ფინანსთა სამინისტროს საგამოძიებო სამსახურის განცხადებაში.
ინციდენტი „წითელ ხიდზე“, საკონტროლო-გამშვებ პუნქტზე მოხდა.
დაკავებულებს ასევე ბრალად ედებათ საქართველოში 132 ათასი აშშ დოლარის უკანონოდ შემოტანის მცდელობა.
ოქროს ზოდები და დოლარები ავტომობილის სამალავში იყო მოთავსებული. ისინი ნივთიერი მტკიცებულებების სახით არის ამოღებული.
სისხლის სამართლის საქმე აღძრულია მუხლით „საქართველოს საბაჟო საზღვარზე დიდი ოდენობით მოძრავი ნივთის გადატანა ან გადმოტანა, ჩადენილი საბაჟო კონტროლის გვერდის ავლით ან მისგან მალულად, დოკუმენტის ან საბაჟო იდენტიფიკაციის საშუალების მოტყუებითი გამოყენებით, დეკლარაციაში ყალბი მონაცემების შეტანით“, ჩადენილი ორგანიზებული ჯგუფის მიერ, რაც 8-დან 11 წლამდე თავისუფლების აღკვეთით ისჯება.
