თბილისი, 4 თებერვალი – Sputnik. უწყებათშორისი საკოორდინაციო საბჭოს გადაწყვეტილებით, 8 თებერვლიდან მუნიციპალური ტრანსპორტის მუშაობა მთელ საქართველოში აღდგება, განაცხადა საქართველოს პრემიერ-მინისტრმა გიორგი გახარიამ მთავრობის დღევანდელ სხდომაზე.
თუმცა შაბათ–კვირას საქართველოს დიდ ქალაქებში საზოგადოებრივი ტრანსპორტი არ ივლის.
„ორშაბათიდან, 8 თებერვლიდან საქართველოში სრული მასშტაბით ამოქმედდება მუნიციპალური ტრანსპორტი, რაც ნიშნავს, რომ მუნიციპალური ტრანსპორტი ამოქმედდება თბილისშიც, რუსთავშიც და ქუთაისშიც – მეტრო, ავტობუსი და სამარშრუტო მიკროავტობუსები“, – განაცხადა გახარიამ.
უწყებათშორისი საკოორდინაციო საბჭოს გადაწყვეტილებით, 1 თებერვლიდან საზოგადოებრივი ტრანსპორტი ამუშავდა საქართველოს ყველა დიდ ქალაქში, თბილისის, რუსთავისა და ქუთაისის გარდა. ამ სამ ქალაქში საზოგადოებრივი ტრანსპორტის შეზღუდვა 1 მარტამდე იყო დაგეგმილი.
