აზიის განვითარების ბანკი

აზიის განვითარების ბანკი საქართველოს ეროვნული ვაქცინაციის გეგმის განვითარებაში ეხმარება

45
(განახლებულია 11:36 02.02.2021)
გეგმის მიხედვით შესაძლებელი გახდება ქვეყანაში კორონავირუსის ვაქცინის შემოტანა, ვაქცინაცია და ზედამხედველობა. ასევე ვაქცინაციის პროცესში მოსახლეობის მიზნობრივი პრიორიტეტული ჯგუფების შერჩევა.

თბილისი, 1 თებერვალი – Sputnik. აზიის განვითარების ბანკი (ADB) საქართველოს მთავრობას კორონავირუსის პანდემიის გავრცელების შესაკავებლად ვაქცინაციის ეროვნული გეგმის განვითარებაში ეხმარება, ნათქვამია ADB-ს განცხადებაში.

საქართველო ვაქცინაციისთვის მზადაა – პრემიერი>>

გასული წლის მაისსა და ოქტომბერში ბანკმა დაავადების გავრცელების შესაკავებლად და საქართველოს საჯარო ფინანსური მართვისა და სოციალური დაცვის სისტემების გასაძლიერებლად, შესაბამისად, 100 მილიონი და 200 მილიონი დოლარის ოდენობის სესხები დაამტკიცა. გასული წლის აგვისტოში ADB-მ ასევე გამოყო გრანტი PCR ტესტის დანადგარის შესაძენად, რათა გაუმჯობესდეს ვირუსის ტესტირება, აღმოჩენა და გავრცელების შეკავება.

პრემიერ-მინისტრ გიორგი გახარიას ხელმძღვანელობით საქართველოს მთავრობის მიერ 21 იანვარს დამტკიცებული ვაქცინაციის ეროვნული გეგმით შესაძლებელი გახდება ქვეყანაში კორონავირუსის ვაქცინის შემოტანა, ვაქცინაციის განხორციელება და ზედამხედველობა. აზიის განვითარების ბანკმა გაეროს ბავშვთა ფონდთან, მსოფლიო ბანკთან და სხვა პარტნიორებთან ერთად გეგმის განვითარების პროცესში მნიშვნელოვანი როლი შეასრულა. გეგმა ვაქცინაციის სამართლებრივ, მარეგულირებელ და ინსტიტუციურ ასპექტებს მოიცავს, ასევე ვაქცინაციის პროცესში მოსახლეობის მიზნობრივი პრიორიტეტული ჯგუფების შერჩევის პროცესებს.

„აზიის განვითარების ბანკის ხელშეწყობით სამინისტრომ შეძლო სწრაფად მოეხდინა ექსპერტების მობილიზება და სრულყოფილი გეგმის შექმნა, რომელიც დაგვეხმარება 2021 წლის ბოლომდე საქართველოს 1.7 მილიონი მოქალაქის ვაქცინაციით უზრუნველყოფაში“, – განაცხადა საქართველოს ჯანდაცვის მინისტრმა ეკატერინე ტიკარაძემ.

აზიის განვითარების ბანკში აცხადებენ, რომ ბანკის მიერ გამოყოფილი ფინანსური და ტექნიკური დახმარების პაკეტი საქართველოს კორონავირუსით მიყენებული ზიანის შემცირებაში დაეხმარება.

„გეგმის წყალობით საქართველო კორონავირუსით გამოწვეული სიკვდილიანობისგან მოსახლეობის დაცვასა და ეკონომიკის სრულად გახსნას შეძლებს“, – აღნიშნა ADB-ს მუდმივი წარმომადგენლობის დირექტორმა საქართველოში შეინ როზენტალმა.

ADB-ს მიზანია ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, სტაბილურ განვითარებას. ამავდროულად ის კვლავაც აგრძელებს მუშაობას რეგიონში უკიდურესი სიღარიბის აღმოსაფხვრელად. 1966 წელს დაარსებული ორგანიზაცია აერთიანებს 68 ქვეყანას, მათ შორის 49 აზიის რეგიონიდანაა.

ADB საქართველოს 2007 წლიდან ეხმარება და ქვეყნის ერთ-ერთი ყველაზე მრავალმხრივი პარტნიორია.

45
ხელბორკილი

13 წლის გოგონას გაუპატიურების საქმე: პროკურატურამ ბრალი მოზარდის დედას წარუდგინა

4
(განახლებულია 18:12 14.04.2021)
გავრცელებული ინფორმაციით, გოგონას დედისთვის ცნობილი გახდა მამაკაცის მიერ მისი შვილის გაუპატიურების ფაქტი, თუმცა ამის შესახებ მან სამართალდამცავ ორგანოებს არ შეატყობინა.

თბილისი, 14 აპრილი - Sputnik. გორის მუნიციპალიტეტში მომხდარ სექსუალური ძალადობის ფაქტზე მიმდინარე გამოძიების ფარგლებში საქართველოს პროკურატურამ განსაკუთრებით მძიმე დანაშაულის შეუტყობინებლობის ფაქტზე არასრულწოვანი გოგონას დედას ბრალი წარუდგინა, ნათქვამია უწყების მიერ გავრცელებულ განცხადებაში. 

2021 წლის მარტში ცნობილი გახდა, რომ გორის მუნიციპალიტეტის ერთ-ერთ სოფელში 13 წლის მოზარდმა ბავშვი გააჩინა. საქმეზე პოლიციამ 50 წლის მამაკაცი დააკავა.

გამოძიებამ დაადგინა, რომ 2017 წლიდან 2020 წლამდე მამაკაცი არასრულწლოვანზე სისტემატურად ძალადობდა, შედეგად გოგონა დაორსულდა და ბავშვი გააჩინა.

გავრცელებული ინფორმაციით, გოგონას დედისთვის ცნობილი გახდა მამაკაცის მიერ მისი შვილის გაუპატიურების ფაქტი, თუმცა ამის შესახებ მან სამართალდამცავ ორგანოებს არ შეატყობინა.

დაზარალებულის დედას ბრალი სსკ–ის  376-ე მუხლის მეორე ნაწილით (დანაშაულის შეუტყობინებლობა იმის მიერ, ვინც ნამდვილად იცის, რომ ჩადენილია განსაკუთრებით მძიმე დანაშაული) წარედგინა, რაც სასჯელის სახედ სამიდან შვიდ წლამდე ვადით თავისუფლების აღკვეთას ითვალისწინებს.

სისხლის სამართლის საქმე ამ დროისთვის ძიების სტადიაშია. თავად მოძალადეს 8–დან 12 წლამდე პატიმრობა ემუქრება.

4
თემები:
კრიმინალი საქართველოში
არჩილ თალაკვაძე

„ქართული ოცნება“ მზადაა „გირჩის“ მოთხოვნები პარლამენტში განიხილოს

12
(განახლებულია 17:53 14.04.2021)
საქართველოს ერთ-ერთმა ოპოზიციურმა პარტიამ განაცხადა, რომ მზადაა პარლამენტში შევიდეს, თუმცა გარკვეული პირობით.

 

თბილისი, 14 აპრილი – Sputnik. საქართველოს პარლამენტის თავმჯდომარემ არჩილ თალაკვაძემ ოპოზიციური პარტია „გირჩის“ წამომადგენლები საკანონმდებლო ორგანოში მათ მიერვე  შეთავაზებული რეფორმების განსახილველად მიიწვია. 

პარტიამ „ახალი პოლიტიკური ცენტრი-გირჩი“ შვიდი მოთხოვნა წამოაყენა და მათგან თუნდაც ერთის სრულყოფილად შესრულების შემთხვევაში მზადაა საქართველოს პარლამენტში შევიდეს. „გირჩის“ მოთხოვნებს შორისაა: ყველა შემდგომი საპარლამენტო არჩევნები ჩატარდეს სრულად პროპორციული სისტემით და ბუნებრივი ბარიერით. პარტია, რომელიც ცნობილია თავისი არაორდინალური გადაწყვეტილებებით, ასევე მოითხოვს მარიხუანის სრული ლეგალიზაციას და მულტისავალუტო რეჟიმის დაშვებას ქვეყანაში.

„მათ შვიდი პუნქტიც, და შესაძლოა მეტიც აქვთ ასეთი. ეს არის „გირჩის“ დღის წესრიგი, „გირჩის“, როგორც პოლიტიკური პარტიის პროგრამა და ამ პროგრამით ისინი გამოვიდნენ არჩევნებში. ყველამ ვნახეთ, თუ რამდენმა მოქალაქემ დაუჭირა ამას მხარი. ამიტომ, ერთადერთი შესაძლებლობა, „გირჩმა“ იმსჯელოს თავის სასურველ რეფორმებზე, არის პარლამენტში ყოფნა და პარლამენტში დისკუსია“, – აღნიშნა თალაკვაძემ. 

„გირჩს“, რომელსაც არჩევნების შედეგების მიხედვით პარლამენტში სამი ადგილი ერგო, სხვა ოპოზიციური პარტიებისგან განსხვავებით, ბოლო დრომდე ნეიტრალური პოზიცია ეკავა, დეპუტატის მანდატებზე უარი არ უთქვამს, მაგრამ ბოიკოტის რეჟიმში რჩებოდა.

„ვფიქრობ, უპირველესად, დასაფასებელია პოზიცია, რომელიც მათ დააფიქსირეს დიალოგის ბოლო რაუნდში. მათ პირდაპირ თქვეს, რომ მზად იყვნენ დოკუმენტზე ხელმოსაწერად, რაც ვფიქრობ, იყო სწორი გადაწყვეტილება“, – განაცხადა არჩილ თალაკვაძემ.

დღესდღეობით პარლამენტში ოპოზიციურ ფრთას წარმოადგენენ პარტია „მოქალაქეები“ და პარტია „ევროპელი სოციალისტები“. დანარჩენი პარტიები უარს აცხადებენ 2020 წლის არჩევნების ლეგიტიმურობის ცნობაზე და არ იღებენ მონაწილეობას პარლამენტის მუშაობაში.
იმ შემთხვევაში, თუ პარტია „ახალი პოლიტიკური ცენტრი-გირჩი“ პარლამენტში შევა, საკანონმდებლო ორგანოში დეპუტატების რაოდენობა სამით გაიზრდება და 99-ს მიაღწევს, რომელთაგანაც 9 ოპოზიციონერი იქნება.

12
თემები:
საქართველოს პოლიტიკური ცხოვრება