საახალწლოდ მორთული თბილისი

ჯერ სახლში და მერე ისევ სახლში, ანუ კორონავირუსს ახალი წლის მოპარვა ვერ მივართვით

425
(განახლებულია 13:04 02.01.2021)
 მრავალი წელია კაცობრიობა ახალი წლის დღესასწაულს ზეიმობს, მაგრამ წელს ყველაზე ადვილად პროგნოზირებადი ახალი წლის ღამე გვექნება.

 „ჯერ სახლში და მერე – ვნახოთ“ – ამ ახალ წელს აშკარად აღარ იმუშავებს. მიუხედავად იმისა, რომ გარკვეული შეზღუდვები 31 დეკემბრის ღამეს მოხსნილი იქნება, ვირუსი არსად გამქრალა.

სეზონი, რომელიც ადრე ერთად ყოფნის და შეკრებების დროდ ითვლებოდა, წელს ჩავარდა. უმეტესობა თვითიზოლაციაშია. მოსახლეობის ნაწილი საყვარელი ადამიანების გარდაცვალებას, ავადმყოფობას გლოვობს, სამსახურების დაკარგვას დარდობს და ვირუსის ახალი შტამების საფრთხეზე შიშობს. ყველაზე „ფერადი“ თვე, დეკემბერი კი საახალწლო დეკორაციებით მორთული ქალაქით, კოკა-კოლის მომღერალ ქარავნებთან ერთად ხვდება ახალ წელს.

პანდემიამ დედაქალაქში საახალწლო ღონისძიებების განრიგი ვერა, მაგრამ ფორმატი შეცვალა. იმისთვის, რომ „გრინჩ კორონას“ შობა-ახალი წელი არ მოეპარა, მთავრობამ მოსახლეობას ბევრი ის ალტერნატიული აქტივობა შესთავაზა, რაც კორონავირუსის ჟამიანობისას შესაძლებელი იყო. მაგალითად:

ძველი ნაძვის ხე ახალ წელს და ოხ ეს კომენდანტის საათი...

თბილისი ახალ წელს ძველი, მაგრამ განახლებული საახალწლო ნაძვის ხით ხვდება. თუ გახსოვთ, შარშან იტალიიდან ჩამოტანილმა ნაძვის ხემ დიდი კრიტიკა გამოიწვია. მერიას როგორც ხის „სილამაზეს“, ასევე გადახდილ თანხებს უწუნებდნენ. წელს კი, მხოლოდ ტოტების გადაკეთება გახდა საჭირო იმისთვის, რომ ხეს ხალხის მოწონება დაემსახურებინა.

მოსახლეობა ცდილობს კომენდანტის საათის დაწყებამდე მოასწროს და პირბადეებით მოინახულოს ქვეყნის ყველაზე პოპულარული ნაძვის ხე, რომელიც 17 დეკემბერს მაყურებლის გარეშე აინთო. ანთებისას ხალხს არც 10-დან 1-მდე დაუთვლია საახალწლო ნაძვის ხის გარშემო და უფრო მეტიც, მარადმწვანე ხე ზოგისთვის დღესაც მხოლოდ ტელეეკრანებიდან არსებობს...

ამასთან ერთად, შეზღუდვების საათებში საახალწლო ილუმინაციების გამორთვაზეც კი იყო საუბარი. თუ თქვენი ფანჯრებიდან არ ჩანს განათება, გეტყვით რომ თბილისის მერიის და მოქალაქეების საერთო გადაწყვეტილებით, ეს ამბავი იმით დამთავრდა, რომ 21:00 საათის შემდეგაც იბრჭყვიალებს ქალაქი. რომ დავფიქრდეთ, ვინ ნახულობს ღამის განათებებს მაშინ, როდესაც კომენდანტის საათი იწყება? ამ განათებებს ნახულობენ ის ადამიანები, ვინც ბრძოლის წინა ხაზზე სტრესულ გარემოში არიან. ეს არიან ექიმები, რომლებიც ჩვენს ჯანმრთელობაზე ზრუნავენ, ეს არიან პოლიციელები, რომლებიც ჩვენს უსაფრთხოებაზე ზრუნავენ, ასევე ჟურნალისტები და თბილსერვისის თანამშრომლები, მეხანძრე-მაშველები, სხვადასხვა გადაუდებელი სამუშაოების გამო ქუჩაში მყოფი თბილისელები, ოჯახები, რომელთა ფანჯრებიდან ჩანს ახალი წლის მოლოდინში განათებული იმედიანი ქალაქი. თითქოს თბილი და მყუდრო ქუჩები ამ ადამიანების დაღლილობას, სტრესს და მძიმე სამუშაო დღეს მალამოდ ედება, ათბობს და იმედით ავსებს, რაც მნიშვნელოვანია არსებული მძიმე ემოციური მდგომარეობების შესამსუბუქებლად.

 

პანდემიამ საახალწლო კონცერტების ფორმატიც შეცვალა. თბილისში 31 დეკემბერს, 6 და 14 იანვარს საახალწლო კონცერტებს მაყურებელი რესპუბლიკის მოედანზე ვერა, მაგრამ ტელეეკრანებზე იხილავს. მონაწილეობას მიიღებენ სოლო შემსრულებლები, ბენდები, ანსამბლები, კლასიკური ჟანრის შემსრულებლები და მსახიობები. სცენაზე უმეტესად ახალგაზრდები იქნებიან წარმოდგენილნი, ხოლო მაღალი რისკის მქონე ასაკოვანი შემსრულებლები, რომლებიც აქამდე დიდ სცენებზე, თუ სასტუმროებში სხვადასხვა ნომრებს ასრულებდნენ, საკუთარი, საახალწლოდ მოწყობილი სახლის ფანჯრებიდან, აივნებიდან და ტერასებიდან ჩაერთვებიან. უწყებათაშორისი საბჭოს გადაწყვეტილებით, თბილისის მერიას გამოეყო 400 ათასი ლარი, რათა საახალწლო ღონისძიებებში კულტურის სფეროს რაც შეიძლება მეტი წარმომადგენელი ჩაერთოს.

სოფლის შენებას რა უნდა? მაგრამ...

ეპიდემიოლოგიური მდგომარეობიდან გამომდინარე, წელს დედაქალაქში საახალწლო სოფელი აღარ მოეწყობა. იქ ყოველთვის ხალხმრავლობა იყო და ყველა ასაკის ადამიანს შეხვდებოდით. საშიში და თანაც სასაცილო იქნებოდა ხალხი ხალხმრავლობის გამო რომ არ შესულიყო საახალწლო სოფელში, ან იქაც რიგში ჩადგომა დასჭირვებოდათ. ამიტომ... რა გაეწყობა...

თუმცა მეტ-ნაკლებად ყველაფერს ხომ აქვს დადებითი მხარე და აქ კი სასიხარულო ამბავი ისაა, რომ თანხა, რომელსაც თბილისის მერიას საახალწლო სოფლის მოწყობაში უნდა დაეხარჯა, ახლა წინასაახალწლოდ ხელმოკლე ოჯახების პროდუქტებით უზრუნველყოფას მოხმარდება. 

საახალწლო სოფელი ვერ ავაშენეთ, მაგრამ მრავალი გაჭირვებული ოჯახი გაიხარებს დახმარებით და არც მარტოობას იგრძნობენ...

ახალ წელს თავი მარტოდ არავინ უნდა იგრძნოს, არავინ, კორონავირუსის გარდა

ასე მოხდა, დედაქალაქს არ ჰქონდა ახალი ნაძვის ხე, მაგრამ დღეს ბევრი ჩვენი მეგობრის Facebook გვერდზე ვხედავთ როგორ ალამაზებს ახლებური ნაძვის ხე რუსთაველის გამზირს; ერთხმად გადავწყვიტეთ ყველაფერში ეკონომია არ გაგვეკეთებინა და საახალწლო ილუმინაციები 21:00 საათის შემდეგ არ გამოგვერთო, რაც დედაქალაქს ახალი წლის განწყობას რამდენიმე საათით მაინც უბრუნებს. საახალწლო განწყობის ერთ-ერთი მთავარი კომპონენტიც ხომ მოლოდინია. მოლოდინი ჯადოსნური მაგიის, უკეთესი მომავალი წლის იმედის და ბედნიერების. ხმამაღლა შეიძლება ითქვას, რომ კორონავირუსმა ამ მოლოდინის ვერც განრიგი და ვერც ფორმატი შეცვალა.

ადამიანები ცდებიან, როდესაც ელიან, რომ ახალი წლის განწყობა დადგება და დაიწყებენ სადღესასწაულო საქმის კეთებას. სინამდვილეში ჩვენ ერთმანეთის განწყობაზე ზრუნვა დიდიხანია დავიწყეთ, თითქმის ერთი წელია უცხო, თუ ნაცნობი ადამიანებისთვის ახალი იმედებით, სიყვარულის და ზრუნვის გაზიარება დავიწყეთ. ამაშია ბედნიერება და არა საახალწლო განათებებში და ეს იქამდე გაგრძელდება, სანამ ვირუსი მარტო არ დარჩება.

კორონავირუსს შობა-ახალი წლის მოპარვა კი ვერ მივართვით!

425
„ქართული ოცნების“ მთავარი ოფისი

პირველად ივანიშვილის გარეშე: „ქართული ოცნება“ ყრილობისთვის ემზადება

26
ყრილობის 400 დელეგატი აირჩევს პარტიის ახალ თავმჯდომარეს - მის ამჟამინდელ აღმსასრულებელ მდივან ირაკლი კობახიძეს

თბილისი, 15 იანვარი - Sputnik. ქვეყნის მმართველი პარტია „ქართული ოცნება - დემოკრატიული საქართველო" შაბათს გამართავს თავის პირველ ყრილობას, რომელსაც არ დაესწრება მისი დამფუძნებელი და სულის ჩამდგმელი, ქართველი მილიარდერი ბიძინა ივანიშვილი.

ივანიშვილმა მოულოდნელად გამოაცხადა გასულ კვირას, რომ ტოვებს პოლიტიკას, პარტიის ხელმძღვანელის პოსტსა და საჯარო ცხოვრებას და აღარ ჩაერევა „ქართული ოცნების“ საქმეებში და მის ლიდერებს კონსულტაციებს აღარ გაუწევს.

ყრილობის 400 დელეგატი აირჩევს პარტიის ახალ თავმჯდომარეს - მის ამჟამინდელ აღმსასრულებელ მდივან ირაკლი კობახიძეს, აგრეთვე პოლიტსაბჭოს 21 წევრს. პოლიტსაბჭოს შემადგენლობას პარტია მალავს ყრილობამდე, თუმცა ცნობილი გახდა, რომ მმართველი პარტიის გენერალური მდივანი კვლავ თბილისის მერი კახა კალაძე იქნება.

„დავიცავ შეთანხმებებს და პრინციპს, რომ დეტალებზე წინასწარ არ ვსაუბრობთ. ხვალ გაიგებთ ამის შესახებ ყველაფერს. განსაკუთრებული სიურპრიზები არ იქნება. წინასწარ გარკვეული ინფორმაციები ვრცელდება ხოლმე, დასახელებული გვარებიდან შეიძლება ზოგი მართალი იყოს და ზოგი არა. ხვალ ამის შესახებ პირდაპირ ეთერში გაიგებთ“, - განაცხადა პარტიის ერთ-ერთმა ლიდერმა მამუკა მდინარაძემ.

„ქართული ოცნება" ივანიშვილმა 2011 წლის დეკემბერში დააფუძნა. ივანიშვილი პარტიას ხელმძღვანელობდა ორჯერ - 2015 წლამდე და 2018 წლის ივნისის შემდეგ. დღეს პარტიის პოლიტსაბჭოში 12 ადამიანია - კახა კალაძე, ირაკლი კობახიძე, ირაკლი ღარიბაშვილი, დიმიტრი სამხარაძე, გია ვოლსკი, არჩილ თალაკვაძე, მამუკა მდინარაძე, დავით საგანელიძე, მაია ცქიტიშვილი, სოზარ სუბარი, ილია ნაკაშიძე და ირაკლი ტრიპოლსკი.

26
ევროპის საბჭოს საპარლამენტო ასამბლეის სხდომათა დარბაზი

PACE უკმაყოფილოა ოპოზიციის მიერ საქართველოს პარლამენტის მუშაობის ბოიკოტირებით

29
პარლამენტი - დებატებისა და პოლიტიკური ცხოვრების ადგილია და ამიტომ ასამბლეა საპარლამენტო ბოიკოტების წინააღმდეგია, ნათქვამია ევროსაბჭოს საპარლამენტო ასამბლეის მოხსენებაში.

თბილისი, 15 იანვარი - Sputnik. ოპოზიციური პარტიები უნდა შევიდნენ პარლამენტში და უარი თქვან ბოიკოტზე, ნათქვამია ევროპის საბჭოს საპარლამენტო ასამბლეის (PACE) მონიტორინგის კომიტეტის დასკვნაში.

საპარლამენტო არჩევნები საქართველოში 31 ოქტომბერს ჩატარდა. ოპოზიციური პარტიების უმრავლესობამ არჩევნების შედეგები არ ცნო და საკანონმდებლო ორგანოს მუშაობას ბოიკოტი გამოუცხადა. 60 ოპოზიციონერი დეპუტატიდან პარლამენტში შევიდა მხოლოდ 4 ადამიანი. ისინი პარლამენტში მოხვედრილ არცერთ ძალას არ წარმოადგენენ, მათ ახალი პარტია შექმნეს.

ევროპის საბჭოს საპარლამენტო ასამბლეამ გამოაქვეყნა ყოველწლიური მოხსენება რამდნეიმე ქვეყანაში არსებული ვითარების შესახებ. ქვეყნების ჩამონათვალში საქართველოც მოხვდა.

„სამწუხაროდ, ოპოზიციურმა პარტიებმა, რომლებმაც არჩევნები გაყალბებულად გამოაცხადეს, თქვეს, რომ ბოიკოტს უცხადებენ მეორე ტურსა და ახალ პარლამენტს. ეს განსაკუთრებით სამწუხაროა იმის გათვალისწინებით, რომ ამ არჩევნების შედეგებმა ოპოზიციურ პარტიებს მიანიჭა ძლიერი პოზიციები საპარლამენტო ზედამხედველობის განხორციელებისთვის. პარლამენტი - დებატებისა და პოლიტიკური ცხოვრების ადგილია და ამიტომ ასამბლეა საპარლამენტო ბოიკოტების წინააღმდეგია“, - ნათქვამია მოხსენებაში.

აქვე აღნიშნულია, რომ მართალია, არჩევნები კონკურენტული იყო, კონკურენციის პირობები არათანაბარი იყო „ადმინისტრაციული რესურსის გამოყენებისა და სახელმწიფოსა და მმართველ პარტიას შორის საზღვრების წაშლის გამო“.

ევროპის საბჭოს საპარლამენტო ასამბლეის კომიტეტი მიიჩნევს, რომ ყველა ბრალდება არჩევნების არამართლზომიერად ჩატარებაში, რაც სერიოზულ შეშფოთებას იწვევს, სრულად უნდა იქნეს გამოძიებული და დამნაშავეები უნდა დაისაჯონ.

ანგარიშში მითითებულია, რომ მიუხედავად გასული წლის მარტში მთავრობასა და ოპოზიციას შორის საარჩევნო სისტემის ცვლილების შესახებ მიღწეული შეთანხმებისა, პოლიტიკური კლიმატი საქართველოში პოლარიზებული და სადავოა.

29
გველეთის ჩანჩქერი

დღის ასტროპროგნოზი ზოდიაქოს ნიშნებისთვის: 16 იანვარი

0
(განახლებულია 11:36 15.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 16 იანვარია, შაბათი. მზარდი მთვარე თევზების ნიშანშია. ამ დღეს პლანეტა სატურნი მფარველობს.

დღეს ცხოვრების სხვადასხვა სფეროში მთავარი გახდება ისეთი თვისებები, როგორიცაა კონკრეტულობა და პრაგმატიზმი. როდესაც ხელს მოჰკიდებთ ნებისმიერ საქმეს, დაფიქრდით, გჭირდებათ თუ არა ის და რას მიიღებთ ამისგან. სწორედ ასე ირგვლივ მყოფი ადამიანებიც ნებისმიერ საკითხში თავიანთ ინტერესებზე დაფიქრდებიან. რამის გაკეთება მხოლოდ ალტრუიზმის გამო ძალზე რთული იქნება. ამიტომ, თუ რამის გაკეთებას გადაწყვეტთ, საკუთარი აზრი მკაფიოდ უნდა ჩამოაყალიბოთ: რა უნდა გაკეთდეს, რატომ და ვის რა სარგებელს მოუტანს ეს.

2021 წლის მთავარი მიმოხილვა: როგორი იქნება ხარის წელიწადი აღმოსავლური ჰოროსკოპის მიხედვით>>

ვერძი: დღეს ძალებისგან გამოფიტვა გემუქრებათ – სულ უბრალო საქმის გაკეთებაც კი გაგიჭირდებათ. ამიტომ სამომავლოდ გადადეთ ყველაფერი, რისი გადადებაც შესაძლებელია. თუ საქმე თქვენს აქტიურ ჩარევას მოითხოვს, ამ შემთხვევაში არაა გამორიცხული, რომ ყველაფერში ქაოსი შეიტანოთ. ამის ბრალი იქნება არა მხოლოდ ფიზიკური მდგომარეობა, არამედ პესიმისტური სულიერი განწყობაც. ექსპერტები ამბობენ, რომ საკმარისი იქნება, თავს შეუძახოთ და მელანქოლიური მდგომარეობიდან გამოხვიდეთ, რომ ეს დღე საკმაოდ კარგ შესაძლებლობებს გააჩენს.

კურო: კაშკაშა ემოციებით სავსე დღე გელოდებათ. მდიდარი წარმოსახვის წყალობით შემოქმედებით საქმიანობაში თავის გამოჩენა შეგიძლიათ. თუმცა მთავარი მაინც დღეს გრძნობათა სპონტანურობა იქნება – ვნებათა მთელი „ქარტეხილი“. ამის საბაბი ნებისმიერ რამ შეიძლება გახდეს – ღიმილი, პაემანზე დაპატიჟება, საკუთარი ფანტაზიები, რამე მინიშნება... თქვენი დღე ცისარტყელის ყველა ფერით აივსება და ყველაფერი იმ განცდების წყალობით, რომლებიც თქვენს გულს ააძგერებს.

ტყუპი: დღეს რაღაც საკითხში გამარჯვება გელოდებათ. ეს შეიძლება იყოს პროექტის წარმატებით დასრულება, გამარჯვება სიყვარულში, ან ვინმესთვის კამათის მოგება. ვარსკვლავები გირჩევენ, გამოიყენოთ ეს იმისთვის, რომ არა მხოლოდ განამტკიცოთ მიღწეული პოზიციები, არამედ წინაც გადადგათ ნაბიჯი და კონკურენტები უკან მოიტოვოთ. ეს დღე იდეალურია იმისთვის, რომ დაისახოთ ამბიციური გეგმები, მიაღწიოთ სასურველს და კარიერის საკითხებს მიხედოთ.

კირჩხიბი: დღეს ვარსკვლავები კარგ შესაძლებლობებს მოგცემენ და შანსები რომ ხელიდან არ გაუშვათ, სწრაფად ფიქრი და მოქმედებებია საჭირო. დიდი ალბათობით, საჭირო იქნება მოქნილი და არასტანდარტული მოქმედება. ამისთვის კი ყველა თვისება გაქვთ: კომუნიკაბელურობა, სწრაფი რეაქცია და ავანტიურული სული. ეს ყველაფერი დაგეხმარებათ, რომ გარშემომყოფების სიმპათია მოიპოვოთ და ნებისმიერი მოვლენა თქვენ სასარგებლოდ შემოაბრუნოთ, ანუ გაქვთ შანსი, „მინუსი“ „პლუსად“ აქციოთ.

ლომი: ესაა დღე, როდესაც რეალობად შეგიძლიათ აქციოთ ყველაზე გრანდიოზული გეგმებიც კი. ვარსკვლავები დიდ წარმატებებს გპირდებიან ამბიციურ წამოწყებებში. თუ რამე გლობალურ პროექტს წამოიწყებთ ცხოვრების ნებისმიერ სფეროში, სამუშაო იქნება ეს, ბიზნესი, სიყვარული თუ სხვა, არ ინანებთ: გეგმები დროთა განმავლობაში განხორციელდება, ხოლო შედეგი ყველა მოლოდინს გადააჭარბებს. სწორედ ამიტომ არ ღირს „დაწვრილმანება“ და დროის უაზრო და ყოველდღიურ საზრუნავზე დახარჯვა – არ შეუშინდეთ ოცნებებს და იმოქმედეთ – წინ ახალი ჰორიზონტები გელოდებათ.

ქალწული: დღეს რაღაც საკითხში არჩვენის წინაშე დადგომა მოგიწევთ. შესაძლოა, ეს საკითხი მნიშვნელოვნად არც მოგეჩვენოთ, მაგრამ ვარსკვლავები გაფრთხილებენ: ამ გადაწყვეტილებაზე შემდგომ ბევრი რამ იქნება დამოკიდებული. სწორედ ამიტომ გადაწყვეტილების მიღებისას არ აჰყვეთ ემოციებს, სხვების რჩევებს, „მკითხაობას“. საკითხზე კარგად დაფიქრდით, პასუხისმგებლობით მოეკიდეთ მას და ეს თქვენი არჩევანი შემდეგ სანანებელი არ გაგიხდებათ.

სასწორი: დღეს უკომპრომისოდ ხართ განწყობილი – ან ყველაფერი, ან არაფერი. მიზანს მკაფიოდ დაინახავთ და მისკენ მიმავალ გზაზე მომთხოვნი იქნებით როგორც გარშემომყოფების, ისე საკუთარი თავისადმი. გასაკვირი არ იქნება, თუ უკმაყოფილო იქნებით და გააკრიტიკებთ ირგვლივ მყოფებს. თქვენ ფიქრობთ, რომ გინდათ, საქმე კარგად წავიდეს, გარშემომყოფები კი ფიქრობენ, რომ მათ ექსპლუატაციას ეწევით და მათზე მბრძანებლობთ. სხვათა შორის, ამგვარი დამოკიდებულების წყალობით ბევრი რამის მიღწევა შეგიძლიათ, მაგრამ არა ადამიანებთან ურთიერთობებში.

მორიელი: დღეს „დამოუკიდებლობის“ დღე გაქვთ. ირგვლივ მყოფთა მოსაზრებები ყველაზე ნაკლებად აგაღელვებთ – დარწმუნებული ხართ საკუთარ სიმართლეში და ყველაფერში, რასაც აკეთებთ. ასეთი განწყობა, ერთი მხრივ, დაგეხმარებათ ბიზნესში და გადაწყვეტილებების მიღებაში, თუმცა, მეორე მხრივ, ეს ჩხუბის მიზეზიც შეიძლება გახდეს. სხვათა შორის, თუ ვინმეს თქვენთან თანამშრომლობის სურვილი გაუჩნდება, არაა საჭირო კამათი, საკმარისი იქნება რჩევის კითხვა – თქვენ ბრძენი მრჩევლის როლს სიამოვნებით შეასრულებთ, გაუზიარებთ მას საკუთარ გამოცდილებას, მხარს დაუჭერთ და დაეხმარებით.

მშვილდოსანი: თქვენი ენერგიულობა დღეს მხოლოდ შესაშური იქნება: აქტიურობა, შრომისუნარიანობა, თავდაჯერებულობა. არაა გასაკვირი, თუ ასეთი შემართებითა და მოზღვავებული ძალებით ყველაზე რთულ და მწვავე საკითხებს შეეჭიდებით, იქნება ეს ძველი, თაროზე შემოდებული საქმეები თუ ახალი პროექტი. ვარსკვლავები წინასწარმეტყველებენ, რომ რასაც არ უნდა მოჰკიდოთ ხელი, ყველაფერი გამოგივათ. მთავარია, ეცადოთ და არ გააღიზიანოთ გარშემომყოფები თქვენი „რკინისებრი“ თავდაჯერებულობით.

თხის რქა: დღეს მოულოდნელი სირთულეები გელოდებათ, თუმცა კარგი ამბავი ისაა, რომ უამრავი ძალა და ენერგია გექნებათ მათთან საბრძოლველად. ვარსკვლავები და პლანეტები დაგეხმარებიან, რომ აღიჭურვოთ ნებისყოფით, კომუნიკაბელურობით, სხვების დარწმუნების უნარით, რომელთა წყალობითაც ნებისმიერი სიტუაციის თქვენთვის სასარგებლოდ შემობრუნება შეგიძლიათ. ყოველი ვითარების უკან ხომ, როგორც წესი, კონკრეტული ადამიანები დგანან, ხოლო ადამიანებთან შეთანხმებას აუცილებლად შეძლებთ.

მერწყული: დღეს თქვენთვის მშრალი ფაქტებისა და ციფრების დღეა, ხოლო ყველაფერი, რისი დასაბუთებაც ლოგიკურად არის საჭირო, გართულდება. სწორედ ამიტომ ვარსკვლავები გირჩევენ, ენდოთ ისეთ არასაიმედო რამეს, როგორიც ინტუიციაა. სამაგიეროდ, გათვლები და ფაქტების ანალიზი იოლად გამოგივათ. მიუძღვენით დღე ზუსტ მეცნიერებებს, დაგეგმვასა და ფინანსებს – არ ინანებთ. ბევრი რამ შეგიძლიათ, მაგალითად, გადასახადების მოწესრიგება, ბიუჯეტის გათვლა და გენიალური გეგმის შედგენა, თუ როგორ „გახდეთ მილიონერი“.

თევზები: დღეს რისკავთ, რომ თქვენი თავდაჯერებულობა ამპარტავნებაში გადაიზარდოს. სხვა რა შეიძლება ეწოდოს იმას, რომ შეგიძლიათ, უარი უთხრათ ირგვლივ მყოფებს დახმარებაზე, უარყოთ მათი რჩევები და ეს იმით გაამართლოთ, რომ თქვენ უფრო კარგად იცით ყველაფერი. ექსპერტები გაფრთხილებენ, რომ თუნდაც 100 პროცენტით იყოთ რამეში დარწმუნებული, ეს არ ნიშნავს, რომ 100 პროცენტით მართალი ხართ. ყველაზე დიდი შეცდომა ის იქნება, იფიქროთ, რომ შეცდომას არ დაუშვებთ. წარმატებებს დღეს მხოლოდ ამის გათვალისწინებით მიაღწევთ.

0