შრი-ლანკიდან დაბრუნებული მეზღვაურები

სახელმწიფოს დახმარებით: ქართველი მეზღვაურები სამშობლოში დაბრუნდნენ

99
(განახლებულია 19:52 05.08.2020)
გავრცელებული ინფორმაციით, დაიშვა გამონაკლისი და კომპანია „ელ-ვიქტორ ქრუ მენეჯმენტის“ გემის ეკიპაჟი ისევ მთლიანად ქართველი მეზღვაურებით შეიცვალა.

თბილისი, 5 აგვისტო — Sputnik. ქართული ეკიპაჟი შრი-ლანკიდან სამშობლოში დაბრუნდა, იუწყება საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტო.

მეზღვაურები საქართველოში სახელმწიფოს დახმარებით, ავიაკომპანია Myway Airlines-ის სპეციალური ავიარეისით ჩამოვიდნენ.

სააგენტოს ხელმძღვანელობის ინფორმაციით, თავად სააგენტოს, საგარეო საქმეთა სამინისტროსა და ინდოეთში საქართველოს ელჩის არჩილ ძულიაშვილის დახმარებით მოხერხდა დაშვებულიყო გამონაკლისი და კომპანია „ელ-ვიქტორ ქრუ მენეჯმენტის“ გემის ეკიპაჟი ისევ მთლიანად ქართველი მეზღვაურებით შეიცვალა.

„მიუხედავად იმისა, რომ ინდოეთს დაშვებული აქვს მეზღვაურთა შეცვლა თავის ტერიტორიაზე, საკარანტინო სივრცეების გადატვირთვისა და ფრენების გადადების გამო ეკიპაჟის წევრების როტაცია რამდენიმე თვის განმავლობაში ვერ ხერხდებოდა. სახელმწიფო სტრუქტურების ჩართულობის შემდეგ შესაძლებელი გახდა ჩვენი 34 მეზღვაურის შეცვლა“, — განაცხადა საზღვაო ტრანსპორტის სააგენტოს ხელმძღვანელმა თამარ იოსელიანმა.

მისი თქმით, განსაკუთრებით დიდი მნიშვნელობა აქვს იმ ფაქტს, რომ პანდემიის ფონზეც კი გახდა შესაძლებელი, შექმნილიყო მოთხოვნა ქართველ მეზღვაურებზე „და დღეს ისინი ისეთ პოზიციებზე საქმდებიან, სადაც ადრე სხვა ეროვნების მათი კოლეგა მეზღვაურები საქმდებოდნენ“.

აღსანიშნავია, რომ პანდემიის დაწყებიდან დღემდე საზღვაო ტრანსპორტის სააგენტო, საგარეო საქმეთა სამინისტროსთან ერთად, საქართველოს მოქალაქე 4000-მდე მეზღვაურს დაეხმარა. 

99
პოლიცია გორში

გორში „ნაცმოძრაობის“ ოფისში მინები ჩაამსხვრიეს - ორი პირი დაკავებულია

3
„ნაციონალური მოძრაობის“ გორის ორგანიზაციის წარმომადგენლების განცხადებით, მათ ოფისს რამდენიმე ახალგაზრდა დაესხა თავს. ორი პირი დაკავებულია.

თბილისი, 2 მარტი – Sputnik. გორში ოპოზიციური პარტია „ერთიანი ნაციონალური მოძრაობის“ ოფისის მინები ქვებით ჩაამსხვრიეს.

თვითმხილველების თქმით, ოფისზე თავდასხმა რამდენიმე ადამიანმა განახორციელა. 

„ეს ჯგუფური თავდასხმაა „ნაციონალური მოძრაობის“ ოფისზე. მინები ქვებითაა ჩამსხვრეული. მომხდარში პასუხისმგებლობას ხელისუფლებას ვაკისრებთ. არ გამოვრიცხავთ იმას, რომ გიორგი ხოჯევანიშვილის (მმართველი პარტია „ქართული ოცნების“ დეპუტატი - რედ.) პირდაპირი დავალებით მოქმედებდნენ ეს ადამიანები, რადგან რაც ის შევიდა ერთპარტიული, გაყალბებული ხმებით მოსულ პარლამენტში, ჩვენ გორის ოფისმა არაერთხელ ვაჩვენეთ საზოგადოებას მისი საქმეები“, - განაცხადა „ნაციონალური მოძრაობის“ გორის რაიონული ორგანიზაციის წევრმა, ვასილისა ჯალაბაძემ.

ვასილისა ჯალაბაძის თქმით, ოპოზიციური პარტიის წევრებს აქვთ განცდა, რომ  მათ ოფისზე თავდასხმა არის „ქართული ოცნების“ მიერ წახალისებული, შესაბამისად, მომხდარზე პასუხისმგებელია მთავრობა, რომელიც ახალისებს ძალადობას.

თავდასხმის მომენტში ოფისში არავინ არ იყო. ასევე უცნობია, შეაღწიეს თუ არა თავდამსხმელებმა ოფისში და მიყენებული ზარალის ოდენობა.

ადგილზე საპატრულო პოლიციის თანამშრომლები მუშაობენ. მათ მომხდარიდან მალევე, ცხელ კვალზე ორი პირი დააკავეს.

შინაგან საქმეთა სამინისტრომ ფაქტზე გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.

3
საქართველოში ბაზრობები ამუშავდა

საქართველოში ფასების ზრდამ პროგნოზს გადააჭარბა: „საქსტატის“ ახალი მონაცემები

22
(განახლებულია 23:13 02.03.2021)
თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

თბილისი, 2 მარტი – Sputnik. საქართველოში წლიურმა ინფლაციამ (2021 წლის თებერვალი – 2020 წლის თებერვალი) 3,6% შეადგინა – 3%-იანი მიზნობრივი მაჩვენებლის პირობებში, იუწყება საქართველოს სტატისტიკის ეროვნული სამსახური „საქსტატი“

2021 წლის თებერვალში, 2021 წლის იანვართან შედარებით, ინფლაციის დონემ 1,1% შეადგინა.

რუსული ხორბლის გაძვირება ქართველ მეწარმეებს ალტერნატივის ძებნას აიძულებს >>

„საქსტატის“ მონაცემებით, თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

როგორ იცვლებოდა ინფლაციის დონე გასულ წელს

2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტარული პოლიტიკის გამკაცრება დაიწყო. წლის ბოლომდე რეფინანსირების განაკვეთი 6,5%-დან 9%-მდე გაიზარდა, ბოლოს იგი 2019 წლის დეკემბერში გაიზარდა. 

2020 წლის დასაწყისიდან ინფლაციის დონემ შემცირება დაიწყო – იანვარსა და თებერვალში მან 6,4% შეადგინა, მარტში – 6,1%, სექტემბერში – 3,8% და ამ დონეზე სამი თვე შენარჩუნდა. საქართველოში კორონავირუსის გავრცელების პრევენციის მიზნით ხელისუფლებამ 21 მარტიდან კარანტინი და კომენდანტის საათი დააწესა. ეკონომიკური აქტივობის სტიმულირებისთვის ეროვნულმა ბანკმა აპრილიდან სამ ეტაპად 8%-მდე შეამცირა მონეტარული პოლიტიკის ძირითადი განაკვეთი.

2021 წლის თებერვალში, გასული წლის ანალოგიურ პერიოდთან შედარებით, ფასები შემცირდა კომუნალურ მომსახურებაზე (21,2%).

ამასთან, წლის განმავლობაში სურსათი 6,2%-ით გაძვირდა, მათ შორის, რძე, ყველი და კვერცხი – 6,4%-ით, მზესუმზირის ზეთი – 34,3%-ით, ყავა და ჩაი – 12,4%-ით, პურპროდუქტები – 8,7%-ით. ხილი კი გაიაფდა 4,8%-ით. კორონავირუსის გამო შექმნილი ვითარების გათვალისწინებით, 9,8%-ით გაიზარდა ჯანდაცვის სფეროს მომსახურების ფასებიც.

რა მოქმედებს საქართველოში ფასების დინამიკაზე

ბოლო ორ თვეში წლიური ინფლაციის დონე 3%-იან მიზნობრივ მაჩვენებელზე დაბალია. საქართველოს ეროვნული ბანკის (სებ-ის) ინფორმაციით, ეს დაკავშირებულია სახელმწიფოს მხრიდან კომუნალური ხარჯების სუბსიდირებასთან, რაც დროებით ხასიათს ატარებს. 

პანდემიის პერიოდში საქართველოს ხელისუფლებამ გადაწყვეტილება მიიღო მოქალაქეებისთვის ელექტროენერგიისა და ბუნებრივი აირის (შესაბამისად, 200 კვტ/სთ და 200 მ3) ხარჯების დაფარვის შესახებ.

„როგორც წესი, ცენტრალური ბანკები მსგავსი ტიპის ეგზოგენური ფაქტორების გამო ინფლაციის დროებით გადახრებზე არ რეაგირებენ და ინფლაციის საშუალოვადიანი პროგნოზით ხელმძღვანელობენ. მიმდინარე პროგნოზის თანახმად, 2021 წელს ინფლაცია საშუალოდ 4%-ის ფარგლებში შენარჩუნდება და შემდეგ მიზნობრივ მაჩვენებელს ეტაპობრივად დაუახლოვდება“, – აღნიშნავს ეროვნული ბანკი.

 სებ-ის მონაცემებით, საერთაშორისო სასაქონლო ბაზრებზე ფასების მნიშვნელოვან ზრდასთან ერთად, რაც განსაკუთრებით იანვარში გამოიკვეთა, ინფლაციაზე აღმავალი ზეწოლა შენარჩუნებულია პანდემიასთან დაკავშირებული შეზღუდვების გახანგრძლივების ფონზე წარმოების ხარჯების ზრდისა და ლარის გაუფასურებული კურსის გამო.

„ნომინალური ეფექტური გაცვლითი კურსის გაუფასურება ასუსტებს ერთობლივი მოთხოვნის დაღმავალ გავლენას პროგნოზირებულ ინფლაციაზე, ხოლო ეკონომიკის მაღალი დოლარიზაციის გამო გაცვლითი კურსის ცვლილების გადაცემა ინფლაციაზე საგრძნობია“, – ნათქვამია ეროვნული ბანკის განცხადებაში.

რეგულატორის ინფორმაციით, რჩება გაურკვევლობის მაღალი დონე როგორც გლობალური ეკონომიკური აქტივობის აღდგენის დინამიკის, ისე ადგილობრივი დაკრედიტების ზრდის ტემპის თვალსაზრისით.

22