თბილისი, 30 ივლისი – Sputnik. გაწმენდითი სამუშაოების შედეგად ფშაველი–აბანო–ომალოს საავტომობილო გზის 12-72 კმ მონაკვეთზე აღდგა მაღალი გამავლობის ავტოტრანსპორტის მოძრაობა, ნათქვამია საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის განცხადებაში.
დანარჩენი სახის ავტოტრანსპორტის მოძრაობა აკრძალულია.
ფშაველი–აბანო–ომალოს საავტომობილო გზის 10-41 კმ მონაკვეთზე ადიდდა ხევები და მოსალოდნელი ღვარცოფის გამო გზის აღნიშნულ მონაკვეთზე სამშაბათს ყველა სახის ტრანსპორტის მოძრაობა აიკრძალა.
საავტომობილო გზის 1-11 კმ (ფშაველი-ლეჩური) მონაკვეთზე ავტოტრანსპორტის მოძრაობა თავისუფალია.
ფშაველი–აბანო–ომალოს საავტომობილო გზის სიგრძე 72 კილომეტრია. ეს გზა ერთადერთია, რომელიც თელავს ომალოსთან აკავშირებს.
ულამაზესი გზა ერთ-ერთ ყველაზე საშიშად მიიჩნევა არა მხოლოდ საქართველოში, არამედ მთელ მსოფლიოში. ის გახსნილია მაისიდან ოქტომბრამდე, დანარჩენი ექვსი თვე კი ჩაკეტილია.
