ხელოვნური ინტელექტის ლაბორატორია BTU-ში

Mercedes-Benz-მა თბილისში ხელოვნური ინტელექტის ლაბორატორია გახსნა

77
(განახლებულია 15:02 05.12.2018)
ლაბორატორიის თანამშრომლები და სტუდენტები უცხოურ კომპანიებთან ურთიერთობას შეძლებენ.

თბილისი, 5 დეკემბერი — Sputnik. თბილისის ბიზნესისა და ტექნოლოგიების უნივერსიტეტში (BTU) ხელოვნური ინტელექტის ლაბორატორია გაიხსნა, რომელშიც მომავლის ტექნოლოგიებს დანერგავენ კომპანია Mercedes-Benz-ის დახმარებით, აცნობეს „Sputnik-საქართველოს" BTU-ს პრეს-სამსახურში.

ლაბორატორია განათლების სისტემაში ხელოვნური ინტელექტის ინტეგრირების პროექტებზე იმუშავებს. უნივერსიტეტის სტუდენტებს წამყვან IT-კომპანიებთან თანამშრომლობის შესაძლებლობა გაუჩნდებათ.

ლაბორატორიის სპეციალისტები ითანამშრომლებენ დიდ საერთაშორისო პარტნიორებთან ისეთ სფეროებში, როგორიცაა განათლება, ტურიზმი, მარკეტინგი, ინჟინერია და სხვ.

კომპანია Mercedes-Benz-ის ინოვაციური კვლევითი ლაბორატორიები მსოფლიოს წამყვან უნივერსიტეტებშია განთავსებული. როგორც BTU-ში აღნიშნავენ, ხელოვნური ინტელექტის ლაბორატორიის თბილისში გახსნა – ეს უმაღლესი სასწავლებლის კორპორატიულ სექტორთან მჭიდრო თანამშრომლობის შედეგია.

ხელოვნური ინტელექტი მსოფლიოში ყველაზე განვითარებადი ტექნოლოგიაა, რომელიც ნებისმიერ ინდუსტრიაში ეტაპობრივად ინტეგრირდება. ეს პროექტი მნიშვნელოვნად შეუწყობს ხელს საქართველოში სამრეწველო ეკოსისტემების ჩამოყალიბებას, აღნიშნავენ უნივერსიტეტში.

77
თემები:
საქართველოს სამეცნიერო ცხოვრება (35)