თბილისი, 24 სექტემბერი — Sputnik. თბილისი–სენაკი–ლესელიძის გზის 25-ე კილომეტრზე (საგურამოსთან) მოძრაობა კვლავ შეფერხებულია და ადგილზე მოძრაობას საპატრულო პოლიციის თანამშრომლები არეგულირებენ, იუწყება საზოგადოებრივი მაუწყებლის პირველი არხი.
საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ გავრცელებული ინფორმაციით, საგურამოსთან, წიწამურის ხევზე არსებულ ხიდზე გადაუდებელი სარეაბილიტაციო სამუშაოები 24-საათიან რეჟიმში უწყვეტად მიმდინარეობს და 10 დღის განმავლობაში დასრულდება.
უწყების ცნობით, ამ ეტაპზე წიწამურის ხევზე არსებულ ხიდზე ავტოტრანსპორტის მოძრაობა ერთ სამოძრაო ზოლზე ხორციელდება, რის გამოც პერიოდულად იქმნება „საცობი".
დასავლეთ საქართველოდან თბილისის მიმართულებით მოძრავ მძღოლებს ალტერნატიული გზებით შეუძლიათ სარგებლობა, კერძოდ, ნარეკვავი-მცხეთა-რკინიგზის სადგურის საავტომობილო გზის გავლით.
დეპარტამენტის განცხადებით, წიწამურის ხევზე არსებულ ხიდზე დაზიანებული იყო სავალი ნაწილი, კერძოდ, აღინიშნებოდა ჯდენები და ორმოები, რის გამოც ავტოტრანსპორტის გადაადგილებას შესაძლოა საფრთხე შექმნოდა.
