დავით სერგეენკო

С ჰეპატიტის მკურნალობა საქართველოში უფრო ხელმისაწვდომი გახდება

39
(განახლებულია 16:11 07.03.2018)
დაგეგმილია იმ დაწესებულებების რაოდენობის გაზრდა, სადაც С ჰეპატიტის მკურნალობა იქნება შესაძლებელი.

თბილისი, 7 მარტი — Sputnik. С ჰეპატიტის დიაგნოსტიკისა და მკურნალობის მეტი ხელმისაწვდომობისთვის საქართველოში ახალი დაწესებულებები გაჩნდება, განუცხადა ჟურნალისტებს საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომ.

თბილისში С ჰეპატიტის მკურნალობის სახელმწიფო პროგრამის განხორციელების საკითხებზე მეხუთე ეროვნული სამუშაო შეხვედრა მიმდინარეობს.

„თავიდან მხოლოდ მცირე რაოდენობის სპეციალიზებულ კლინიკებში შეეძლოთ ჩვენ მოქალაქეებს დიაგნოსტიკა და მკურნალობა; მართალია, ამ კლინიკების რაოდენობა გაიზარდა, მაგრამ… საჭიროა ყველა რაიონში მინიმუმ ერთი დაწესებულება და დიდ ქალაქებში დამატებით დაწესებულებების გახსნა", — განაცხადა სერგეენკომ და დასძინა, რომ ასევე აუცილებელია ოჯახის ექიმების გადამზადება და ამ პროცესში ჩართვა.

С ჰეპატიტის მკურნალობის სახელმწიფო პროგრამაში დაახლოებით 45 ათასი პაციენტი ჩაერთო, 40 ათასმა უკვე დაასრულა მედიკამენტის მიღება. სერგეენკოს განცხადებით, საქართველოში დაახლოებით 100 ათასი ადამიანი დარჩა, რომლებმაც არ იციან, რომ С ჰეპატიტი აქვთ. სწორედ ამიტომ მნიშვნელოვანია როგორც მოსახლეობის გამოკვლევა, ისე საინფორმაციო კამპანიები.

მინისტრმა აღნიშნა, რომ С ჰეპატიტის გამოსავლენად ანალიზის ჩატარება უფასოა და სულ 15 წუთი სჭირდება. ანალიზი უკვე ჩააბარა 1,5 მილიონმა ადამიანმა, მაგრამ მათი რაოდენობა 2,5 მილიონი უნდა იყოს, აღნიშნა მინისტრმა.

ღონისძიებას, მინისტრის გარდა, ესწრებოდნენ საქართველოში აშშ-ის ელჩის მოადგილე ელიზაბეტ რუდი, აშშ-ის დაავადებების კონტროლისა და პრევენციის ცენტრის ხელმძღვანელი ბეტ სკაგსი, ასევე არასამთავრობო ორგანიზაციების წარმომადგენლები, ადგილობრივი და საერთაშორისო ექსპერტები.

С ჰეპატიტის უფასო დიაგნოსტიკა შესაძლებელია საქართველოს დაავადებების კონტროლისა და საზოგადოებრივი ჯანმრთელობის ეროვნული ცენტრის ლაბორატორიებში, ასევე მთელი ქვეყნის მასშტაბით 600 სამედიცინო ცენტრში.

საქართველოს მთავრობამ ამერიკულ კომპანია Gilead Sciences–თან 10–წლიანი ხელშეკრულება გააფორმა, რომლის თანახმად, ის ქვეყანას С ჰეპატიტის მკურნალობისთვის აუცილებელი მედიკამენტებით ამარაგებს.

39
თეგი:
დავით სერგეენკო
თემები:
ჯანდაცვა საქართველოში 2018 (251)
პალატა

საქართველოში კორონავირუსით გარდაცვლილთა რაოდენობა 33–მდე გაიზარდა

12
(განახლებულია 10:57 29.09.2020)
საქართველოში ახალი კორონავირუსით დაავადებულთა რაოდენობა ბოლო დღე-ღამეში 314-ით გაიზარდა და 5866-ს მიაღწია.

თბილისი, 29 სექტემბერი — Sputnik. საქართველოში კორონავირუსით გარდაცვლილ პაციენტთა რაოდენობა 33-მდე გაიზარდა, შესაბამისი ინფორმაცია გავრცელდა ვებ-გვერდზე stopcov.ge.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 314-ით გაიზარდა და 5866-ს მიაღწია.

ამ დროისათვის სულ გამოჯანმრთელდა 2324 ადამიანი, გარდაიცვალა – 33, კარანტინის რეჟიმში იმყოფება 5 637, სტაციონარებში ექიმების დაკვირვების ქვეშ 836 პაციენტია, ხოლო კოვიდ–სასტუმროებში 800 ადამიანი იმყოფება.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

12
თემები:
COVID-19 საქართველოში
გიორგი კეკელიძე

კითხვა შემიძლია ყველგან საქართველოში ახალი პროექტი დაიწყო

5
(განახლებულია 09:51 29.09.2020)
კორონავირუსის პანდემიის პირობებში გიორგი კეკელიძე წიგნის მოყვარულებს მორიგ სახალისო კონკურსს სთავაზობს

თბილისი, 29 სექტემბერი  — Sputnik. საქართველოს ეროვნული ბიბლიოთეკის დირექტორმა გამომცემლობა Palitra L–თან ერთად სახალისო კონკურსი დაიწყო.

კეკელიძე ხშირად ახორციელებს საინტერესო კონკურსებს, ამჯერად მან საკუთარ Facebook–გვერდზე კონკურსის „კითხვა შემიძლია ყველგან“ დაწყება დააანონსა, რომელსაც შეუერთდა საგამომცემლო სახლი Palitra L. 

კონკურსის პირობების თანახმად, თითოეულ მონაწილეს შეუძლია ნებისმიერ ადგილზე – საყვარელ,  მყუდრო ან თუნდაც უცნაურ ადგილას – გადაღებული ფოტოსურათი Facebook–გვერდზე გამოაქვეყნოს ჰეშთეგით #კითხვაშემიძლიაყველგან.

 „რამდენადაც კითხვა სტრესს ამცირებს, გვაქცევს უფრო გულისხმიერ და საუკეთესო თანამოსაუბრედ, აუმჯობესებს ჩვენს მეხსიერებას და აზროვნებას, ჩვენ გვინდა მაქსიმალურად წავახალისოთ ეს პროცესი“, – განაცხადა Palitra L–ის საზოგადოებასთან ურთიერთობის მენეჯერმა მარიამ აბდუშელიშვილმა.

სასურველია, რომ ფოტოზე ჩანდეს მთავარი გმირი, რომელიც კითხულობს. გამომცემლობა ორ საუკეთესო ფოტოსურათს შეარჩევს, რომელთაც მის გვერდზე გამოაქვეყნებს, ავტორები კი საჩუქრებს მიიღებენ.

გიორგი კეკელიძე ქართველი პოეტი, ესეისტი ტელეწამყვანი, პრემია „საბას“, „ოქროს ფრთის“ ლაურეატი, ელექტრონული ბიბლიოთეკა lib.ge–ის დამფუძნებელია, რომელიც აქტიურად ეწევა კითხვის პოპულარიზაციას. იგი 2012 წლიდან საქართველოს ეროვნული ბიბლიოთეკის გენერალური დირექტორია.

5