თბილისი, 23 სექტემბერი - ”ახალი ამბები - საქართველო”, ციცია მამულაშვილი. საქართველოს საგარეო საქმეთა მინისტრი გრიგოლ ვაშაძე, ნიუ-იორკში გაეროს გენერალური ასამბლეის 65-ე სესიის ფარგლებში, თავის კოლეგებთან სხვადასხვა ქვეყნებიდან ორმხრივი ურთიერთობების განხილვას განაგრძობს, განუცხადეს ”ახალი ამბები - საქართველოს” ხუთშაბათს საგარეო საქმეთა სამინისტროს პრეს-სამსახურში.
კერძოდ, ოთხშაბათს ვაშაძე ნიუ-იორკში შეხვდა ხორვატიის, მონტენეგროს, ნიგერიის, ფიჯის, კვიპროსის, ბოლივიის და ლატვიის საგარეო საქმეთა მინისტრებს.
სხვადასხვა ქვეყნების დიპლომატებთან შეხვედრებს ატარებს ასევე მინისტრის მოადგილე ალექსანდრე ნალბანდოვი, რომელიც გუშინ ნიუ-იორკში შეხვდა ფილიპინების საგარეოპოლიტიკური უწყების ხელმძღვანლის მოადგილეს და სხვა დიპლომატებს.
”შეხვედრებზე ქართველმა დიპლომატებმა უცხოელ კოლეგებს გააცნეს საქართველოს ოკუპირებულ რეგიონებში არსებული მდგომარეობა და განიხილეს როგორც ორმხრივი ურთიერთობების განვითარებასთან დაკავშირებული საკითხები, ისე საერთაშორისო ორგანიზაციების ფარგლებში თანამშრომლობის გაღრმავების პერსპექტივები”, - აღნიშნეს საგარეო საქმეთა სამინისტროში.
