კეუკენჰოფი – ეს გახლავთ ადგილი, რომელიც ცხოვრებაში ერთხელ მაინც უნდა ნახო, და ალბათ თუ სადმე შექმნილა ადამიანის ხელით სამოთხე დედამიწაზე, აქ პირველობას ეს ბაღი არავის დაუთმობს.
წარმოიდგინეთ 32 ჰექტარზე გაშენებული 7 მილიონი ტიტა, ნარგიზი, სუმბული, ყაზახა... კეუკენჰოფი ბევრად მეტია, ვიდრე მხოლოდ ფერებისა და სურნელის ზეიმი. ამ უშველებელ ტერიტორიაზე ყოველ ახალ მოსახვევში ახალი ემოცია გხვდებათ, უშველებელი ხეების ქვეშ განსხვავებულ არშიებად დაფენილი ტიტებისა და სხვა ბოლქვოვანი ყვავილების სახით.
თავად სიტყვა კეუკენჰოფი სამზარეულო ბაღს ნიშნავს და მისი ისტორია მე-15 საუკუნიდან იწყება, როცა ამ ტერიტორიაზე ჰოლანდიის ერთ-ერთი დიდგვაროვნის სასახლე მდებარეობდა. ბაღის კონცეფცია მე-16 საუკუნის ბოტანიკოსის, ჰოლანდიაში ტიტების კულტივაციის ფუძემდებლის კაროლუს კლუციუსის სახელთან არის დაკავშირებული. ბაღში წარმოდგენილია სწორედ ამ ბოტანიკოსის მიერ 4 საუკუნის წინ შექმნილი ჯიშები და ყველა ის ახალი ჯიში, რომელიც ჰოლანდიაში ამ 400 წლის განმავლობაში იქმნებოდა. თავდაპირველად, 1857 წელს ამ ტერიტორიაზე კლასიკური ინგლისური ბაღი გაშენდა. 1949 წელს კი 20-მდე ტიტების მწარმოებელმა გადაწყვიტა ბაღის ტერიტორია გამოეყენებენა თავისი პროდუქციის წარმოსაჩენად. მას შემდეგ ბაღი 60 მილიონზე მეტმა სტუმარმა მოინახულა.