უბედური შემთხვევა თბილისში - ძლიერი აფეთქების შედეგები

თბილისში, ქავთარაძის ქუჩაზე მდებარე მრავალსართულიან კორპუსში მომხდარმა აფეთქებამ რამდენიმე ოჯახი უსახლკაროდ დატოვა. იხილეთ Sputnik-საქართველოს ფოტოლენტა შემთხვევის ადგილიდან.

საბედნიეროდ, აფეთქებას მსხვერპლი არ მოჰყოლია. დაშავდა ერთი ადამიანი, რომელიც საავადმყოფოში გადაიყვანეს. ის სწორედ იმ ბინის მცხოვრებია, რომელშიც აფეთქება მოხდა. შემთხვევის დროს ის აბაზანაში იმყოფებოდა, რამაც იხსნა კიდეც სიკვდილისგან.

აფეთქების შედეგად გაჩენილმა ხანძარმა ფაქტობრივად მთელი ბინა გაანადგურა, რომელიც პირველ სართულზე მდებარეობდა, შემდეგ კი მეორე სართულზეც გადავიდა.

გარდა ამისა, დაზიანდა ასევე პირველ სართულზე, აფეთქებული ბინის გვერდით მდებარე პროდუქტების მაღაზია, რომელსაც მნიშვნელოვანი ზარალი მიადგა: დაინგრა კედელი, გაფუჭდა ინვენტარი და გასაყიდი საქონელი.