მთელ მსოფლიოსა და საქართველოში უფრო და უფრო პოპულარული ხდება ფიტნესი და ბოდიბილდინგი. თუ რა განსხვავებაა მათ შორის და რა დროისა და ძალისხმევის დახარჯვას მოითხოვს ლამაზი სხეული, ამის შესახებ "Sputnik-საქართველოს" ფოტომასალაში შეიტყობთ.
ბოდიბილდინგი — მუსკულატურის განვითარებისა და გაძლიერების პროცესი ფიზიკური დატვირთვისა და მაღალენერგეტიკული კვების საშუალებით 1950-1960-იან წლებში გახდა პოპულარული. 1960 წლიდან ბოდიბილდინგში ეროვნული და საერთაშორისო შეჯიბრებების გამართვა დაიწყო, სადაც ათლეტები უჩვენებდნენ საკუთარ მუსკულატურას, მის მოცულობასა და პროპორციებს.
ბოდიბილდინგისა და ფიტნესის საერთაშორისო ფედერაცია (International Federation of Bodybuilders & Fitness) 2000 წლის დასაწყისში ბოდიბილდინგისთვის სპორტის ოლიმპიური სახეობის სტატუსის მინიჭებას ცდილობდა, ვინაიდან იმავე წელს ორგანიზაციამ საერთაშორისო ოლიმპიურ კომიტეტში წევრობის სრული უფლება მიიღო, მაგრამ ეს არ მომხდარა, რადგან ბოდიბილდინგს ყველა არ მიიჩნევს სპორტად.
ფიტნესი — ეს არის ვარჯიშების კომპლექსი, რომლებიც მიმართულია ორგანიზმის ფიზიკური განვითარებისკენ მისთვის კარგი ფორმის შესანარჩუნებლად. ფიტნესი არ არის მიმართული მუსკულატურის განვითარებისკენ, ფიტნესის მიზანია მთელი ორგანიზმის კარგ ფორმაში ყოფნა — გულ-სისხლძარღვთა სისტემის მხარდაჭერა, მოქნილობა და კუნთების ამტანობა, ძალა, სიმძლავრე, წონასწორობის გრძნობა, სისწრაფე, მოძრაობის კოორდინაცია და რეაქცია. ფიტნესი ასევე მიმართულია ორგანიზმში კუნთოვანი და ცხიმოვანი ქსოვილების ურთიერთქმედებისკენ.
დღეისათვის არსებობს მრავალი მიმართულება, სხვადასხვანაირი მეთოდები და ფიტნესის ვარჯიშების კრებულები. და, კიდევ, ფიტნესის ნაირსახეობაა კროსფიტი.