ახალი წლის ღამეს საქართველოს დედაქალაქში გრანდიოზული კონცერტი გაიმართა. „ვარდების მოედანზე“, უზარმაზარ სცენასთან, ათასობით ადამიანი შეიკრიბა. „Sputnik-საქართველოს" ფოტოლენტაში იხილეთ, როგორ შეხვდნენ ახალ 2017 წელს თბილისელები და ჩვენი დედაქალაქის სტუმრები.
ახალი წლის ღამეს თბილისის ცენტრში სადღესასწაულო კონცერტი რამდენიმე საათი გაგრძელდა. ახალი წლის აღსანიშნავად, რუსთაველის გამზირზე ათასობით ადამიანი გამოვიდა. ზეიმის დროს გამზირი და მიმდებარე ქუჩები მხოლოდ ფეხით მოსიარულეებს დაეთმო. წესრიგს პოლიცია იცავდა.
რუსთაველის გამზირზე საკონცერტო სცენასთან ახლოს იყიდებოდა საახალწლო სათამაშოები და სუვენირები, შუშხუნები და ფოიერვერკები, მიმდებარე ტერიტორიაზე არსებულ სადღეღამისო სუპერმარკეტებს და კაფეებს მუშაობა მთელი ღამის განმავლობაში არ შეუწყვეტიათ.
კონცერტის ძირითადი ნაწილის დასრულების შემდეგ, რომელიც ორ საათზე მეტ ხანს გაგრძელდა და პირდაპირი ეთერით გადაიცემოდა, რუსთაველის გამზირზე მთელი ღამის განმავლობაში სახალხო სეირნობა გრძელდებოდა.
