კობა გვენეტაძე

გაამკაცრებს თუ არა პოლიტიკას ეროვნული ბანკი ფასების ზრდის გამო გვენეტაძის განმარტება

46
(განახლებულია 14:46 21.07.2021)
ეროვნული ბანკის პრეზიდენტი, ქვეყანაში ინფლაციის მაღალი მაჩვენებლის მიუხედავად, რეფინანსირების განაკვეთის გაზრდას ჯერ არ გეგმავს.

თბილისი, 21 ივლისი – Sputnik. საქართველოში ფასების ზრდა კორონავირუსის პანდემიითა და გლობალური პროცესებით არის გამოწვეული, განაცხადა ეროვნული ბანკის პრეზიდენტმა კობა გვენეტაძემ. 

2020 წლის ივნისიდან 2021 წლის ივნისის ჩათვლით პერიოდში წლიურმა ინფლაციამ 9,9% შეადგინა (მიზნობრივი მაჩვენებელი 3%-ს შეადგენს).

ეს ბოლო 10 წლის მანძილზე ინფლაციის ყველაზე მაღალი დონეა. ბოლოს ფასების მკვეთრი ზრდა 2011 წელს დაფიქსირდა, როდესაც ინფლაციამ 10% შეადგინა.

„როგორც საერთაშორისო სავალუტო ფონდი აღნიშნავს, მაღალი ინფლაცია დღეს უკვე გლობალური ტრენდია და გამოწვეულია პანდემიასთან დაკავშირებული მიზეზებით. საქართველოს შემთხვევაში ამჟამად ფასების ზრდას იწვევს საერთაშორისო ბაზრებზე მნიშვნელოვნად გაზრდილი ფასები, მიწოდების შეზღუდვის ფონზე წარმოებაში მაღალი შუალედური ხარჯები. ასევე კომუნალური გადასახადების გაზრდა“, – განაცხადა გვენეტაძემ ჟურნალისტებთან.

როგორც მან აღნიშნა, საერთაშორისო სავალუტო ფონდისა და ეროვნული ბანკის ერთობლივი ანალიზის შედეგად გამოვლინდა, რომ დოლარში გამოხატული მსოფლიო ფასები შარშანდელ ნიშნულზე რომ დარჩენილიყო, საქართველოში ინფლაციის დონე 3%-იან მაჩვენებელს მიუახლოვდებოდა.

„ვვარაუდობთ, რომ ეს ტენდენია მალე დასრულდება და 2022 წლის ბოლოსთვის ინფლაცია 2,3%-ს შეადგენს, ამ პერიოდისთვის საშუალო ინფლაცია კი 2,8% იქნება“, – აღნიშნა გვენეტაძემ და დასძინა, რომ პროგნოზი არ შეიძლება საბოლოო იყოს. 

პანდემიას აქვს ერთი ძალიან ცუდი მხარე – ეს არის გაურკვევლობა, რადგან ყოველთვის შეიძლება რაღაც ახალი ფაქტორი გაჩნდეს, რომელმაც შეიძლება პროგნოზი არ გაამართლოს და სიტუაცია საერთოდ საპირისპირო მიმართულებითაც შეცვალოს, დასძინა მან.

ამავე დროს ეროვნული ბანკის პრეზიდენტმა განაცხადა, რომ გაურკვევლობა იქნება ძირითადი ფაქტორი, რომელიც საქართველოს მონეტარული პოლიტიკის განაკვეთზე იმოქმედებს.

„ჩვენ ძალიან ფრთხილად უნდა ვიყოთ და დავაკვირდეთ, ხომ არ ძლიერდება ისეთი ფაქტორები ან მოლოდინები, რომელმაც გრძელვადიან პერიოდში შეიძლება ინფლაცია უფრო მაღალ დონეზე შეინარჩუნოს. აქედან გამომდინარე, ჩვენ მზად ვართ გავამკაცროთ საპროცენტო განაკვეთი. თუმცა ასეთ გადაწყვეტილებას აუცილებლად ექნება თავისი საფუძველი. დღეს შემიძლია გითხრათ, რომ ვერ ვხედავ აუცილებლობას, გაიზარდოს საპროცენტო განაკვეთი. თუმცა იმ გაურკვევლობიდან გამომდინარე, რაც პანდემიას თან ახლავს, ჩვენ ძალიან ფრთხილად ვიქნებით“, – განაცხადა კობა გვენეტაძემ. 

მისი თქმით, რეფინანსირების საკითხთან დაკავშირებით საბოლოო გადაწყვეტილებას 4 აგვისტოს მონეტარული პოლიტიკის კომიტეტის სხდომა მიიღებს.

„წინასწარი შეფასებით, ჩვენ ძირითად სცენარში მშპ-ის უფრო მაღალი ზრდა გვექნება, ვიდრე 7,7%, სულ მცირე, 8%-ზე მეტი. ამის საფუძველს გვაძლევს ის ძალიან სოლიდური სიტუაცია და ბუფერები, რომლებიც კომერციულ ბანკებს აქვთ და რომლებიც ისევ და ისევ ეკონომიკის ლოკომოტივად რჩებიან“, – განაცხადა გვენეტაძემ და იმედი გამოთქვა, რომ ნეგატიური ფაქტორები პროგნოზებზე გავლენას არ მოახდენს.

საქართველოში ეკონომიკური პროგნოზების გაუმჯობესება კოვიდ-შეზღუდვების გაუქმებასთან და ტურიზმის ზრდასთან არის დაკავშრებული. ხელისუფლება მიმდინარე წლის შემოდგომისთვის ეკონომიკის სრული დატვირთვით აღდგენას გეგმავს.

46
თემები:
საქართველოს ეკონომიკა (1115)
სურსათით სავსე კალათა

ინფლაცია და ფასები საქართველოში: ეროვნული ბანკი ახალ მიმოხილვას აქვეყნებს

32
(განახლებულია 19:54 30.07.2021)
საქართველოს ეროვნული ბანკის ინფორმაციით, მსოფლიო ბაზარზე ფასის მატების გამო მზესუმზირის ზეთი ერთ წელიწადში 96.1%-ით  გაძვირდა.

თბილისი, 30 ივლისი - Sputnik. მიმდინარე წლის ივნისში წლიურმა ინფლაციამ 9.9% შეადგინა, ხოლო მაისთან შედარებით ფასები 0.7%-ით გაიზარდა, აცხადებს საქართველოს ეროვნული ბანკი.

უწყების ინფორმაციით, ივნისში, წინა თვესთან შედარებით, ინფლაციის მაჩვენებლის ზრდაზე ყველაზე მეტად კარტოფილის 0.4%-ითა და გაზის გადასახადის 0.3%-ით გაძვირებამ იმოქმედა. ყველისა და პომიდვრის გაიაფებამ კი ინფლაციის მაჩვენებელზე შემცირებაზე მოახდინა გავლენა — თითოეულმა 0.2%-ით.

როგორც ეროვული ბანკის ივნისის თვის მიმოხილვაშია აღნიშნული, წლიურ ჭრილში, ინფლაციაზე ყველაზე დიდ გავლენას — 1.7%-ით, კომუნალური გადასახადები ახდენდა.

„როგორც წინა ანგარიშში აღვნიშნეთ, ამის მიზეზი, მეტწილად, კომუნალური გადასახადების სუბსიდირების დასრულება და ასევე გარკვეული კომუნალური გადასახადების ზრდაა. მსოფლიოში მობილობის აღდგენასთან ერთად, გაიზარდა ნავთობზე მოთხოვნა და შედეგად, ფასებიც, რამაც საწვავიც გააძვირა. საწვავის წვლილმა წლიურ ინფლაციაში ივნისში 1.6 პროცენტული პუნქტს მიაღწია“, —აღნიშნულია განცხადებაში.

უწყების ცნობით, ჯანმრთელობის დაცვა წლიურად 11.6%-ით გაძვირდა, ხოლო სიგარეტის წვლილმა ინფლაციაში 0.2 პროცენტული პუნქტი შეადგინა.

რაც შეეხება სურსათის წლიურ ინფლაციას, უწყების ცნობით, ამ მაჩვენებელმა 9.0%-მდე, ხოლო წვლილმა მთლიან ინფლაციაში 2.5%-მდე მოიმატა.

  • „აქედან გამოსარჩევია მსოფლიო ბაზარზე ფასის მატების გამო მზესუმზირის ზეთის 96.1%-ით გაძვირება, რამაც მთლიანი ინფლაცია 0.7%-ით გაზარდა. კვერცხის, კარტოფილისა და შაქრის გაძვირებამ ინფლაცია ჯამში ასევე 0.7%-ით გაზარდა. ინფლაციის შემცირების მიმართულებით 0.3%-ით ვაშლის გაიაფება მოქმედებდა“, — აღნიშნულია განცხადებაში.

ივნისში წლიურმა ინფლაციამ იმპორტირებულ საქონელზე 18.4%-მდე  მოიმატა, ხოლო ადგილობრივად წარმოებულ საქონელზე 5.5% შეადგინა. შერეული საქონელი კი 10.8%-ით გაძვირდა.

32
თემები:
საქართველოს ეკონომიკა (1115)
საწარმო

აჭარაში პოლიეთილენის ყუთების წარმოება დაიწყო

31
(განახლებულია 20:48 30.07.2021)
სოფლის განვითარების საგრანტო პროგრამა სოფლის განვითარების სააგენტოსთან თანამშრომლობით ხორციელდება და საქართველოს რვა მუნიციპალიტეტს მოიცავს (ახალქალაქი, ბორჯომი, დედოფლისწყარო, თეთრიწყარო, ლაგოდეხი, ქედა, ხულო, ყაზბეგი).

თბილისი, 30 ივლისი – Sputnik. სოფლის განვითარების პროგრამის თანადაფინანსებით ქედას მუნიციპალიტეტში ახალი საწარმო ამოქმედდა.

კერძოდ, სოფლის განვითარების პროგრამის მხარდაჭერით კომპანია Ajara Trading Group-მა პოლიეთილენის ყუთების წარმოება დაიწყო. საწარმო გადამუშავებული პლასტმასისგან სხვადასხვა ზომის ყუთებს ამზადებს, რომლებიც სასოფლო-სამეურნეო ნაწარმის ტრანსპორტირებისთვის, მათ შორის, ექსპორტზე გასატანად გამოიყენება.

„სოფლის მეურნეობის ღირებულებათა ჯაჭვში მნიშვნელოვან ადგილს იკავებს შესაფუთი მასალა. სწორედ ამ საწარმოში მზადდება ის პოლიეთილენის ყუთები, რომლითაც საქართველოში წარმოებული სასოფლო-სამეურნეო პროდუქცია გადის ექსპორტზე“, – განაცხადა სოფლის განვითარების სააგენტოს დირექტორის მოადგილემ გიორგი ჯიბლაძემ.

სოფლის მეურნეობის სამინისტრის ინფორმაციით, საწარმოში ათი ადგილობრივია დასაქმებული. საწარმოს მოსაწყობად 700 ათას ლარამდე ინვესტიცია განხორციელდა, მათ შორის 170 ათასი ლარი სოფლის განვითარების პროგრამის თანადაფინანსებაა.

„სოფლის განვითარების პროგრამა” ქედას, ხულოს, ბორჯომის, ახალქალაქის, თეთრიწყაროს, ყაზბეგის, ლაგოდეხისა და დედოფლისწყაროს მუნიციპალიტეტებში ხორციელდება. პროგრამის მიზანი სოფლად არასასოფლო-სამეურნეო სამეწარმეო საქმიანობის განვითარების მხარდაჭერაა.

პროგრამის ფარგლებში დაფინანსებულია 30-ზე მეტი პროექტი, ინვესტიციების ჯამური ღირებულება 5,5 მლნ ლარს აჭარბებს, თანადაფინანსება 3,7 მილიონ ლარზე მეტია.

„სოფლის განვითარების პროგრამას“ სოფლის განვითარების სააგენტო (RDA) ევროკავშირისა (EU) და გაეროს განვითარების პროგრამის (UNDP) მხარდაჭერით „სოფლისა და სოფლის მეურნეობის განვითარების ევროპის სამეზობლო პროგრამის” (ENPARD) ფარგლებში ახორციელებს.

31
თემები:
საქართველოს ეკონომიკა (1115)
ბათუმი

დღის ასტროპროგნოზი ზოდიაქოს ნიშნებისთვის: 31 ივლისი

0
(განახლებულია 10:31 30.07.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 31 ივლისია, შაბათი. კლებადი მთვარე კუროს ნიშანშია. ამ დღეს პლანეტა სატურნი მფარველობს.

ენერგია ჩქეფს, შრომისუნარიანობა სათანადო სიმაღლეზეა და ეს ჩანაფიქრის განხორციელებისთვის კარგ შესაძლებლობებს იძლევა. გამოიყენეთ ეს დრო წარმატების მისაღწევად, მაგრამ გაითვალისწინეთ, რომ დღე უფრო უკვე დაწყებული საქმეების დასამთავრებლად გამოდგება, ვიდრე ახლის დასაწყებად. დიდია ქონებასთან და ფინანსებთან დაკავშირებული დავების ალბათობა.

დღის ასტროპროგნოზი ზოდიაქოს ნიშნებისთვის: 30 ივლისი>>

ვერძი: დღეს შესანიშნავი შანსი გეძლევათ, რომ თუ გამდიდრდეთ არა, ფინანსური მდგომარეობა გამოასწოროთ მაინც. მთელი დღის განმავლობაში სხვადასხვა ფულთან დაკავშირებული სიურპრიზი გელოდებათ: პრემია გაწეული შრომისთვის, ადრე გაცემული ვალის დაბრუნება, საჩუქარი ახლობელი ადამიანისგან ან, ბოლოს და ბოლოს, „ოქროს მთების“ დაპირება პერსპექტივაში. თუ უფრო შემოსავლიანი თანამდებობის მოძებნას აპირებდით, ამისთვის ეს დღე ძალიან კარგ შესაძლებლობებს იძლევა.

კურო: ხართ ამაღლებულ, პოზიტიურ განწყობაზე და ამის წყალობით თქვენი საქმეები თავისით წაიწევს წინ. ერთნაირად, „თამაშ–თამაშით გაუმკლავდებით როგორც მონოტონურ სამუშაოს, ისე პროექტებს, რომლებიც ანალიზსა და შემოქმედებით დამოკიდებულებას მოითხოვს. შინაგანი ჰარმონიით აღსავსეებს დღეს ჩვეულებრივზე მეტის გაკეთება შეგიძლიათ და დაღლაც არ დაგეტყობათ.

ტყუპი: დღეს შრომისთვის მოულოდნელ ჯილდოს მიიღებთ. ეს შეიძლება იყოს ხელმძღვანელობის მადლობა, კარიერული ზრდა ან საჩუქარი საყვარელი ადამიანისგან. ასევე შესაძლებელია სხვა სასიამოვნო სიურპრიზები, მოვლენები, როგორიცაა ვალის დაბრუნება, დაუგეგმავი მოგება, მივლინება რომელიმე კურორტზე და სხვა. მოკლედ, დღეს ფორტუნა აუცილებლად გაგიღიმებთ და არაა გამორიცხული, რომ სწორედ ეს დღე გახდეს თქვენს ცხოვრებაში იღბლიანი პერიოდის დასაწყისი.

კირჩხიბი: მარტივი დღე არ გელოდებათ. მოვლენები შეიძლება სულაც არ განვითარდეს ისე, როგორ ელოდებით. რაღაც მომენტში შესაძლოა ინიციატივა გაუშვათ ხელიდან და ვითარება ვეღარ გააკონტროლოთ. როგორც ასტროლოგები ამბობენ, ეს ცუდი მომზადების ან ინფორმაციების ნაკლებობის ბრალი შეიძლება იყოს. აქედან გამომდინარე, თუ არ გინდათ, რომ ყველაფერი ხელიდან გაგისხლტეთ, ისეთ საქმეებს შეეჭიდეთ, რომლებშიც ასი პროცენტით ხართ დარწმუნებული.

ლომი: აჯობებს იმ პროექტზე იმუშაოთ, რომელიც უკვე მომზადებული გაქვთ და შესაძლოა, სულ მცირე რაღაც აკლია, რომ ამოქმედდეს. ამას გარდა, დღეს შეიძლება რაღაც კარგი ინფორმაცია მიიღოთ, რაც ხელს შეუწყობს ამ პროექტის უახლოეს დღეებში ამუშავებას. ეს შეიძლება იყოს თანხის მიღება, ინფორმაცია, აუცილებელი კონტაქტები ან ახლობლების თანხმობა. უნდა გამოიყენოთ ეს შანსი, რათა პროექტი, ბოლოს და ბოლოს, ამოქმედდეს.

ქალწული: ვარსკვლავები გაფრთხილებენ – შეიძლება შეეჯახოთ რაღაც ჭორებს, რომლებიც უარყოფითად აისახება თქვენს კარიერაზე, სტატუსზე ან ცხოვრების დონეზე. ამასთან, შეიძლება გახდეთ ამ ჭორების არა მხოლოდ მსხვერპლი, არამედ დაზარალდეთ იმის გამო, რომ ეს ხმები თავად გაავრცელეთ. ასე რომ, უსიამოვნებების თავიდან ასაცილებლად აჯობებს, თუ თქვენს მოსაზრებებს გარშემომყოფების შესახებ თქვენთვისვე შეინახავთ. ხოლო იმას, რასაც ირგვლივ ლაპარაკობენ, ყურადღებით უნდა მოუსმინოთ – ასე მიაგნებთ ჭორების გავრცელების წყაროს და მისგან თავის დაღწევის შანსი გაგიჩნდებათ.

სასწორი: დღეს შეიძლება იეჭვიანოთ სხვების წარმატებებზე და იმედი გაგიცრუვდეთ საკუთარი თავის გამო. ეს შეიძლება გამოიწვიოს რომელიმე კოლეგის წახალისებამ ან იმის გაცნობიერებამ, რომ თქვენი საქმეები ჩიხში შევიდა. თუ გარშემომყოფები უფრო წარმატებულებად გეჩვენებათ, ასტროლოგები გირჩევენ, ნაკლებად იყუროთ აქეთ–იქით და საკუთარ საქმეებს მიხედოთ. გაიხსენეთ, როდესაც თქვენ იყავით ყველაზე წარმატებული და ეცადეთ, განეწყოთ ახალი მწვერვალების დასაპყრობად.

მორიელი: დღეს თქვენი მთავარი მამოძრავებელი ძალა ჯანსაღი კონკურენცია გახდება. ეს გრძნობა შეიძლება გაგიჩნდეთ კოლეგების, მეგობრების ან ახლობლების წარმატებების მიმართ. მთავარი ისაა, რომ სწორედ ეს გაიძულებთ, იმოქმედოთ უფრო ენერგიულად. შესაძლოა, აზარტული განწყობის კარნახით გადადგათ ისეთი ნაბიჯი, რომელსაც სხვა დროს სიფრთხილის გამო ვერ გაბედავდით. და რამდენად გაამართლებს ეს რისკი, ამას უფრო მოგვიანებით, სხვა დღეს შეიტყობთ.

მშვილდოსანი: კონფლიქტისთვის ხართ განწყობილი, ყოველ შემთხვევაში, ასე მოეჩვენებათ გარშემომყოფებს. ერთი მხრივ, არ დაუშვებთ სხვების ჩარევას და მტკიცედ იდგებით თქვენს მოსაზრებაზე და მეორე მხრივ, ყველას გაკრიტიკებისა და დაუკითხავი რჩევების მიცემის სურვილი გამოძრავებთ. თქვენ თავად დარწმუნებული ხართ, რომ საქმის ინტერესებიდან გამომდინარე მოქმედებთ. შესაძლოა, რაღაც საკითხებში მართლაც მართალი ხართ, მაგრამ არა სიმშვიდისა და ნერვების შენარჩუნების საკითხებში.

თხის რქა: დღეს თქვენი წარმატების გარანტი თქვენი უნარია, იგრძნოთ, საიდან უბერავს ქარი. სიტუაცია მოითხოვს, რომ გზადაგზა გაერკვიოთ ვითარებაში, მოერგოთ მას და წარმოადგინოთ თქვენი იდეები იმგვარად, რომ ისინი ირგვლივ მყოფებს აუცილებლად მოეწონოთ. შეგიძლიათ, რომ ყველა შესაძლო ვარიანტიდან შეუცდომლად აირჩიოთ ის, რომელიც ყველაზე მომგებიანია თქვენთვის, თუნდაც ამისთვის მოქმედებების ჩვეული სტილის შეცვლა დაგჭირდეთ.

მერწყული: დღეს ნებისმიერი წამოწყებისთვის შესანიშნავი დღეა. რასაც არ უნდა მოჰკიდოთ ხელი, პრაქტიკულად ყველა საქმე დროთა განმავლობაში მოგებასა და წარმატებას გპირდებათ. ასე რომ, თამამად დააწყვეთ გეგმები, წამოაყენეთ ახალი პროექტი, დაისახეთ ახალი მიზნები. ერთადერთი, რამაც დღეს შეიძლება ხელი შეგიშალოთ, ეს შურით გაჟღენთილი კრიტიკაა. თუ ამ კრიტიკას მოუსმენთ და აჰყვებით, შესაძლოა, საკუთარ თავში ეჭვი შეგეპაროთ, რაც თქვენს საქმეებზე ცუდად აისახება.

თევზები: მოუსვენრობა შეგიპყრობთ და ერთ ადგილზე გაჩერება გაგიჭირდებათ. თქვენი ენერგია გამოსავალს ეძებს, ეჭიდება ნებისმიერ შანსს, რომ ცხოვრება გაამრავალფეროვნოს. შესაძლოა, ინიციატივა გამოიჩინოთ და რომელიმე მივლინებას დათანხმდეთ რამე საბაბით, ან კამათში ჩაებათ იმისთვის, რომ რაღაც განსხვავებული მოხდეს და ყველაფერი ჩვეულ რეჟიმში არ მიდიოდეს. და თუ საქმეებს ადრე მორჩებით, შემდეგ შეგიძლიათ მთელი შემართებით გაერთოთ.

0