ტურისტები თბილისში

რა ბედი ელის ზაფხულის ტურისტულ სეზონს? ანუ ანტრე, ბატონო!

1034
(განახლებულია 17:23 12.07.2021)
ქართული ეკონომიკის პრიორიტეტი – ტურიზმი... ბოლო სამი თვის მაჩვენებლები სამნიშნა ზრდაზე მიანიშნებს. როგორია დინამიკა 2019-2020 წლების პირველი ექვსი თვის მაჩვენებლებთან შედარებით, რა მოლოდინი ჰქონდა მთავრობას და რა შედეგი მიიღო?

სამსონ ხონელი

წინამდებარე სტატიაში უახლოესი წარსულის შეხსენებით აწმყოზე მოგახსენებთ და მომავლის განჭვრეტასაც ვეცდები. არ მინდა მკითხველმა იფიქროს, რომ მის ყურადღებას გლობალური და ზოგადსაკაცობრიო მნიშვნელობის საკითხებზე მივაპყრობ. არა, ეს ჩემს ანალიტიკურ უნარებს აღემატება, ამიტომ, ზაფხულის ცხელი დღეების გათვალისწინებით, ტურიზმზე მოგახსენებთ.

არ ვიცი თქვენ როგორ ფიქრობთ, მე კი მგონია, რომ ბოლო რამდენიმე წლის გამოცდილებამ ყველანი დაგვარწმუნა, რომ ტურიზმი ის სტრატეგიული სფეროა, რომელიც მნიშვნელოვნად განსაზღვრავს ჩვენი ეკონომიკის ზრდისა თუ შემცირების ტენდენციასა და დინამიკას. ვეჭვობ, არახალია – ის, თუ რამდენი საერთაშორისო ვიზიტორი ეწვევა ქვეყანას, საგრძნობლად აისახება ზოგადად ჩვენი მოქალაქეებისა და, განსაკუთრებით, უშუალოდ ტურიზმის, ან მომიჯნავე სექტორში დასაქმებული ადამიანების კეთილდღეობაზე. ასე რომ, თანმიმდევრულად მივუყვები თხრობას...

ცოტა რამ წარსულიდან: 2019 წლის 19-20 ივნისიდან მოყოლებული, თითქმის სამი თვის განმავლობაში ყველაფერი ვიღონეთ, რომ ქვეყნის ტურისტული იმიჯისთვის ზიანი მიგვეყენებინა. დაგვავიწყდა ან მხედველობაში არ მივიღეთ, რომ ქვეყანაში სტაბილურობა და წესრიგი ის აუცილებელი პირობაა, რომელსაც პოტენციური ტურისტი მოგზაურობის ადგილის შერჩევისას ითვალისწინებს. განვითარებული მოვლენების შედეგად მაშინდელი ზაფხულის ტურისტული სეზონი ფაქტობრივად ჩავარდა.

იმავე წლის დეკემბრის შუა რიცხვებში კი COVID-19-ის სახით სამყაროს უხილავი მტერი მოევლინა. მომდევნო წლის მარტის თვის მეორე დეკადის დასაწყისში მსოფლიოში COVID-19-ის პანდემია გამოცხადდა. ეპიდემიოლოგიურმა ვითარებამ ეკონომიკის ყველა მიმართულება, მათ შორის ტურიზმი, მძევლად აიყვანა. მსოფლიო ეკონომიკურმა კრიზისმა მოიცვა. გამონაკლისი არც საქართველო იყო. ახალ რეალობაში ქვეყანაში ეკონომიკურ საქმიანობაზე ჯერ წერტილოვანი შეზღუდვები დაწესდა, შემდეგ კი სრული „ლოკდაუნი“ გამოცხადდა. იმ პერიოდიდან მოყოლებული გასული წლის ბოლომდე ყოველი მომდევნო თვის სტატისტიკური მონაცემები ტურისტული შემოსავლების ფაქტობრივ განულებაზე მიანიშნებდა. ეს კი, სხვა ეკონომიკური პარამეტრების გაუარესებასთან ერთად, ეროვნული ვალუტის კურსსა და ინფლაციურ პროცესებზე მკვეთრად ნეგატიურად აისახა.

აქვე ისიც გავიხსენოთ, რომ გასული წლის შემოდგომიდან მოყოლებული თითქმის რვა თვის განმავლობაში ქვეყნის ტურისტული იმიჯის გაკეთილშობილებას პოლიტიკურმა პროცესებმაც შეუწყო ხელი. ეს, რა თქმა უნდა, ხუმრობით. თუმცა, შესაძლოა, ვცდები და აქ სახუმარო არაფერია და, პირიქით, ექსტრემალური ტურიზმის მოყვარულთათვის მაშინ საქართველო უალტერნატივო არჩევანი იყო. ვისთვის – როგორ, ალბათ, გემოვნების ამბავია. ოპოზიციური პოლიტიკური ფლანგის დიდმა ნაწილმა დაიჩემა, არჩევნები გაყალბდაო, მერე დედა დაიფიცა, ქვეყანა სულ რომ დაიქცეს, პარლამენტში მაინც არ შევალთო. საბოლოოდ სიჯიუტეს სამშობლოს სიყვარულმა სძლია და მათი უმრავლესობა პარლამენტში შევიდა. ერთი სიტყვით, ფაქტია, სანახაობა შედგა. რაც შეეხება პურს, ვეჭვობ, ეს ის არის, რისთვისაც საერთაშორისო ვიზიტორი ამ ქვეყანაში ყველაზე ნაკლებად ჩამოდის. თუ ვინმე ქართულ სუფრას შემახსენებს, ვიტყვი, რომ ესეც სანახაობის ნაწილია და ისიც ყოველთვის არა.

COVD-19-ის პანდემიის გამო ეკონომიკურ საქმიანობაზე დაწესებული შეზღუდვები

გასული წლის ბოლოდან მოყოლებული ეტაპობრივად მოიხსნა. ცხოვრება გამოცოცხლდა. შედეგად – პანდემიის პერიოდში ქვეყანა ეკონომიკური რეცესიიდან პირველად გამოვიდა. ეს იყო მარტში, როდესაც ეკონომიკა შემცირების ნაცვლად 4 პროცენტით გაიზარდა. უკვე აპრილში კი ეკონომიკური ზრდის რეკორდული მაჩვენებელი – 44,8 პროცენტი დაფიქსირდა. სხვა მრავალ ფაქტორთან ერთად პოზიტიური დინამიკის ერთ-ერთ მიზეზად ერთ თვეში 141 პროცენტით გაზრდილი ტურისტების რაოდენობაც დასახელდა.

მთავრობა ეკონომიკური ზრდის ტემპის ოპტიმისტურ სცენარზე ალაპარაკდა. ითქვა, რომ შესაძლოა წლის ბოლოს მთლიანი შიდა პროდუქტის ზრდის ორნიშნა მაჩვენებელიც კი მივიღოთ. დასახელდა კონკრეტული რიცხვიც − 10,2 პროცენტი. რა იყო ამ ოპტიმიზმის საფუძველი? როგორც ფინანსთა მინისტრი ლაშა ხუციშვილი აღნიშნავდა, ოპტიმისტური სცენარი მიმდინარე წელს ტურიზმის კიდევ უფრო სწრაფი აღდგენისა და ეკონომიკის სხვა დარგების დინამიკური განვითარების პროგნოზს ეფუძნებოდა.

როგორ განვითარდა მოვლენები?

მაისში ტურისტების რაოდენობა 362 პროცენტით გაიზარდა. 1 ივნისს საქართველომ სახმელეთო საზღვარიც გახსნა და, ბუნებრივია, იყო მოლოდინი, რომ თვის ბოლოსთვის საერთაშორისო ვიზიტორთა რაოდენობა კიდევ უფრო მზარდი იქნებოდა. ასეც მოხდა, ივნისში ვიზიტორების რაოდენობა 287 პროცენტით გაიზარდა. თუმცა, ამ მკვეთრი ზრდის მიუხედავად, მთავრობის მოლოდინი ვერ გამართლდა. მიმდინარე წლის პირველი ექვსი თვის მაჩვენებლები, გასული წლის ამავე პერიოდის მონაცემების მხოლოდ ნახევარია, ხოლო 2019 წლის ანალოგიურ პერიოდთან შედარებით 80 პროცენტით ნაკლებია.

მეტი კონკრეტიკისა და სიზუსტისათვის: ექვსი თვის განმავლობაში საქართველოს 486 ათასი საერთაშორისო მოგზაური ეწვია, რაც 66,4 პროცენტით ნაკლებია 2020 წლის იანვარი-ივნისის მაჩვენებელზე, ხოლო 87,4 პროცენტით ნაკლებია 2019 წლის პირველი ექვსი თვის მონაცემებზე. საერთაშორისო მოგზაურთა შორის 464 ათასი ვიზიტორი იყო, რაც გასული წლის ანალოგიურ პერიოდთან შედარებით 62,2 პროცენტით, 2019 წელთან შედარებით კი 85,6 პროცენტით ნაკლებია. რაც შეეხება ტურისტებს, მათმა რაოდენობამ 422 ათასს მიაღწია, რაც გასული წლის ანალოგიურ პერიოდთან შედარებით ორჯერ, 2019 წელთან შედარებით კი ხუთჯერ ნაკლებია.

თუ გავითვალისწინებთ, რომ გასული წლის იანვარში ტურისტების რაოდენობა სულ 20 პროცენტით გაიზარდა, ხოლო თებერვალში ნულოვანი ზრდა შენარჩუნდა, მიმდინარე წლის ბოლო სამი თვის განმავლობაში სამნიშნა პროცენტული ზრდით შესაძლებელი გახდა შარშანდელი მაჩვენებლის მხოლოდ ნახევართან გატოლება.

ასე რომ, ხელისუფლების სურვილი, ტურიზმი პანდემიამდე პერიოდის მაჩვენებელს 50 პროცენტით მიუახლოვდეს, მხოლოდ სურვილად რჩება. COVD-19-ის პანდემიის გამო დაწესებული რეგულაციების დიდი ნაწილის მოხსნის მიუხედავად, კვლავაც პრობლემად რჩება ვაქცინაციის დაბალი ტემპი. ტურიზმი სანახევროდ დარჩენილ თვეებში მაინც რომ აღდგეს, საჭიროა არსებულთან შედარებით ორჯერ უფრო სწრაფი ზრდა, რაც ნიშნავს, რომ წლის ბოლომდე მინიმუმ 700 პროცენტით მეტი ტურისტი უნდა შემოვიდეს.

მიუხედავად იმისა, რომ მიმდინარე წლის პირველი ექვსი თვის მაჩვენებლები ორი წლის წინანდელი ანალოგიური პერიოდის მონაცემებს ხუთჯერ ჩამორჩება, ისიც ფაქტია, რომ ბოლო პერიოდში ტურიზმის სექტორი საგრძნობლად გამოცოცხლდა და საზაფხულო სეზონისთვის ოპტიმისტური მოლოდინებიც გაჩნდა. თუმცა, სად იყო და სად არა, ივლისის

პირველ კვირაში, ორი დღის განმავლობაში ქვეყნის მთავარ გამზირზე ერი და ბერი კვლავ შევიკრიბეთ და... აღარ განვაგრძობ, დარწმუნებული ვარ, მკითხველს კარგად მოეხსენება, ვინ რას ითხოვდა, ვის რისი შიში ჰქონდა და რისგან იცავდა თავს, რა ჩამოხიეს, რა აღმართეს და ა.შ. მკითხველს ისიც ემახსოვრება, რომ ღირსების დასაცავად ბრძოლისას პოლონელი ტურისტი გაილახა... ფაქტია, მსოფლიოს ყურადღება კიდევ ერთხელ მივიქციეთ. როგორ აისახება ტურიზმის სექტორზე 5-6 ივლისის მოვლენები, ამას დრო გვიჩვენებს. მანამდე კი, რაკი აგვისტო წინ არის, მოდით, ჩვენ ჩვენი ვეცადოთ და ზაფხულის ტურისტული სეზონის „ხელშესაწყობად“ რაც აქამდე გადაგვირჩა, აწი გავაფუჭოთ...   

 

1034
სურსათით სავსე კალათა

ინფლაცია და ფასები საქართველოში: ეროვნული ბანკი ახალ მიმოხილვას აქვეყნებს

32
(განახლებულია 19:54 30.07.2021)
საქართველოს ეროვნული ბანკის ინფორმაციით, მსოფლიო ბაზარზე ფასის მატების გამო მზესუმზირის ზეთი ერთ წელიწადში 96.1%-ით  გაძვირდა.

თბილისი, 30 ივლისი - Sputnik. მიმდინარე წლის ივნისში წლიურმა ინფლაციამ 9.9% შეადგინა, ხოლო მაისთან შედარებით ფასები 0.7%-ით გაიზარდა, აცხადებს საქართველოს ეროვნული ბანკი.

უწყების ინფორმაციით, ივნისში, წინა თვესთან შედარებით, ინფლაციის მაჩვენებლის ზრდაზე ყველაზე მეტად კარტოფილის 0.4%-ითა და გაზის გადასახადის 0.3%-ით გაძვირებამ იმოქმედა. ყველისა და პომიდვრის გაიაფებამ კი ინფლაციის მაჩვენებელზე შემცირებაზე მოახდინა გავლენა — თითოეულმა 0.2%-ით.

როგორც ეროვული ბანკის ივნისის თვის მიმოხილვაშია აღნიშნული, წლიურ ჭრილში, ინფლაციაზე ყველაზე დიდ გავლენას — 1.7%-ით, კომუნალური გადასახადები ახდენდა.

„როგორც წინა ანგარიშში აღვნიშნეთ, ამის მიზეზი, მეტწილად, კომუნალური გადასახადების სუბსიდირების დასრულება და ასევე გარკვეული კომუნალური გადასახადების ზრდაა. მსოფლიოში მობილობის აღდგენასთან ერთად, გაიზარდა ნავთობზე მოთხოვნა და შედეგად, ფასებიც, რამაც საწვავიც გააძვირა. საწვავის წვლილმა წლიურ ინფლაციაში ივნისში 1.6 პროცენტული პუნქტს მიაღწია“, —აღნიშნულია განცხადებაში.

უწყების ცნობით, ჯანმრთელობის დაცვა წლიურად 11.6%-ით გაძვირდა, ხოლო სიგარეტის წვლილმა ინფლაციაში 0.2 პროცენტული პუნქტი შეადგინა.

რაც შეეხება სურსათის წლიურ ინფლაციას, უწყების ცნობით, ამ მაჩვენებელმა 9.0%-მდე, ხოლო წვლილმა მთლიან ინფლაციაში 2.5%-მდე მოიმატა.

  • „აქედან გამოსარჩევია მსოფლიო ბაზარზე ფასის მატების გამო მზესუმზირის ზეთის 96.1%-ით გაძვირება, რამაც მთლიანი ინფლაცია 0.7%-ით გაზარდა. კვერცხის, კარტოფილისა და შაქრის გაძვირებამ ინფლაცია ჯამში ასევე 0.7%-ით გაზარდა. ინფლაციის შემცირების მიმართულებით 0.3%-ით ვაშლის გაიაფება მოქმედებდა“, — აღნიშნულია განცხადებაში.

ივნისში წლიურმა ინფლაციამ იმპორტირებულ საქონელზე 18.4%-მდე  მოიმატა, ხოლო ადგილობრივად წარმოებულ საქონელზე 5.5% შეადგინა. შერეული საქონელი კი 10.8%-ით გაძვირდა.

32
თემები:
საქართველოს ეკონომიკა
საწარმო

აჭარაში პოლიეთილენის ყუთების წარმოება დაიწყო

31
(განახლებულია 20:48 30.07.2021)
სოფლის განვითარების საგრანტო პროგრამა სოფლის განვითარების სააგენტოსთან თანამშრომლობით ხორციელდება და საქართველოს რვა მუნიციპალიტეტს მოიცავს (ახალქალაქი, ბორჯომი, დედოფლისწყარო, თეთრიწყარო, ლაგოდეხი, ქედა, ხულო, ყაზბეგი).

თბილისი, 30 ივლისი – Sputnik. სოფლის განვითარების პროგრამის თანადაფინანსებით ქედას მუნიციპალიტეტში ახალი საწარმო ამოქმედდა.

კერძოდ, სოფლის განვითარების პროგრამის მხარდაჭერით კომპანია Ajara Trading Group-მა პოლიეთილენის ყუთების წარმოება დაიწყო. საწარმო გადამუშავებული პლასტმასისგან სხვადასხვა ზომის ყუთებს ამზადებს, რომლებიც სასოფლო-სამეურნეო ნაწარმის ტრანსპორტირებისთვის, მათ შორის, ექსპორტზე გასატანად გამოიყენება.

„სოფლის მეურნეობის ღირებულებათა ჯაჭვში მნიშვნელოვან ადგილს იკავებს შესაფუთი მასალა. სწორედ ამ საწარმოში მზადდება ის პოლიეთილენის ყუთები, რომლითაც საქართველოში წარმოებული სასოფლო-სამეურნეო პროდუქცია გადის ექსპორტზე“, – განაცხადა სოფლის განვითარების სააგენტოს დირექტორის მოადგილემ გიორგი ჯიბლაძემ.

სოფლის მეურნეობის სამინისტრის ინფორმაციით, საწარმოში ათი ადგილობრივია დასაქმებული. საწარმოს მოსაწყობად 700 ათას ლარამდე ინვესტიცია განხორციელდა, მათ შორის 170 ათასი ლარი სოფლის განვითარების პროგრამის თანადაფინანსებაა.

„სოფლის განვითარების პროგრამა” ქედას, ხულოს, ბორჯომის, ახალქალაქის, თეთრიწყაროს, ყაზბეგის, ლაგოდეხისა და დედოფლისწყაროს მუნიციპალიტეტებში ხორციელდება. პროგრამის მიზანი სოფლად არასასოფლო-სამეურნეო სამეწარმეო საქმიანობის განვითარების მხარდაჭერაა.

პროგრამის ფარგლებში დაფინანსებულია 30-ზე მეტი პროექტი, ინვესტიციების ჯამური ღირებულება 5,5 მლნ ლარს აჭარბებს, თანადაფინანსება 3,7 მილიონ ლარზე მეტია.

„სოფლის განვითარების პროგრამას“ სოფლის განვითარების სააგენტო (RDA) ევროკავშირისა (EU) და გაეროს განვითარების პროგრამის (UNDP) მხარდაჭერით „სოფლისა და სოფლის მეურნეობის განვითარების ევროპის სამეზობლო პროგრამის” (ENPARD) ფარგლებში ახორციელებს.

31
თემები:
საქართველოს ეკონომიკა
ბათუმი

დღის ასტროპროგნოზი ზოდიაქოს ნიშნებისთვის: 31 ივლისი

0
(განახლებულია 10:31 30.07.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 31 ივლისია, შაბათი. კლებადი მთვარე კუროს ნიშანშია. ამ დღეს პლანეტა სატურნი მფარველობს.

ენერგია ჩქეფს, შრომისუნარიანობა სათანადო სიმაღლეზეა და ეს ჩანაფიქრის განხორციელებისთვის კარგ შესაძლებლობებს იძლევა. გამოიყენეთ ეს დრო წარმატების მისაღწევად, მაგრამ გაითვალისწინეთ, რომ დღე უფრო უკვე დაწყებული საქმეების დასამთავრებლად გამოდგება, ვიდრე ახლის დასაწყებად. დიდია ქონებასთან და ფინანსებთან დაკავშირებული დავების ალბათობა.

დღის ასტროპროგნოზი ზოდიაქოს ნიშნებისთვის: 30 ივლისი>>

ვერძი: დღეს შესანიშნავი შანსი გეძლევათ, რომ თუ გამდიდრდეთ არა, ფინანსური მდგომარეობა გამოასწოროთ მაინც. მთელი დღის განმავლობაში სხვადასხვა ფულთან დაკავშირებული სიურპრიზი გელოდებათ: პრემია გაწეული შრომისთვის, ადრე გაცემული ვალის დაბრუნება, საჩუქარი ახლობელი ადამიანისგან ან, ბოლოს და ბოლოს, „ოქროს მთების“ დაპირება პერსპექტივაში. თუ უფრო შემოსავლიანი თანამდებობის მოძებნას აპირებდით, ამისთვის ეს დღე ძალიან კარგ შესაძლებლობებს იძლევა.

კურო: ხართ ამაღლებულ, პოზიტიურ განწყობაზე და ამის წყალობით თქვენი საქმეები თავისით წაიწევს წინ. ერთნაირად, „თამაშ–თამაშით გაუმკლავდებით როგორც მონოტონურ სამუშაოს, ისე პროექტებს, რომლებიც ანალიზსა და შემოქმედებით დამოკიდებულებას მოითხოვს. შინაგანი ჰარმონიით აღსავსეებს დღეს ჩვეულებრივზე მეტის გაკეთება შეგიძლიათ და დაღლაც არ დაგეტყობათ.

ტყუპი: დღეს შრომისთვის მოულოდნელ ჯილდოს მიიღებთ. ეს შეიძლება იყოს ხელმძღვანელობის მადლობა, კარიერული ზრდა ან საჩუქარი საყვარელი ადამიანისგან. ასევე შესაძლებელია სხვა სასიამოვნო სიურპრიზები, მოვლენები, როგორიცაა ვალის დაბრუნება, დაუგეგმავი მოგება, მივლინება რომელიმე კურორტზე და სხვა. მოკლედ, დღეს ფორტუნა აუცილებლად გაგიღიმებთ და არაა გამორიცხული, რომ სწორედ ეს დღე გახდეს თქვენს ცხოვრებაში იღბლიანი პერიოდის დასაწყისი.

კირჩხიბი: მარტივი დღე არ გელოდებათ. მოვლენები შეიძლება სულაც არ განვითარდეს ისე, როგორ ელოდებით. რაღაც მომენტში შესაძლოა ინიციატივა გაუშვათ ხელიდან და ვითარება ვეღარ გააკონტროლოთ. როგორც ასტროლოგები ამბობენ, ეს ცუდი მომზადების ან ინფორმაციების ნაკლებობის ბრალი შეიძლება იყოს. აქედან გამომდინარე, თუ არ გინდათ, რომ ყველაფერი ხელიდან გაგისხლტეთ, ისეთ საქმეებს შეეჭიდეთ, რომლებშიც ასი პროცენტით ხართ დარწმუნებული.

ლომი: აჯობებს იმ პროექტზე იმუშაოთ, რომელიც უკვე მომზადებული გაქვთ და შესაძლოა, სულ მცირე რაღაც აკლია, რომ ამოქმედდეს. ამას გარდა, დღეს შეიძლება რაღაც კარგი ინფორმაცია მიიღოთ, რაც ხელს შეუწყობს ამ პროექტის უახლოეს დღეებში ამუშავებას. ეს შეიძლება იყოს თანხის მიღება, ინფორმაცია, აუცილებელი კონტაქტები ან ახლობლების თანხმობა. უნდა გამოიყენოთ ეს შანსი, რათა პროექტი, ბოლოს და ბოლოს, ამოქმედდეს.

ქალწული: ვარსკვლავები გაფრთხილებენ – შეიძლება შეეჯახოთ რაღაც ჭორებს, რომლებიც უარყოფითად აისახება თქვენს კარიერაზე, სტატუსზე ან ცხოვრების დონეზე. ამასთან, შეიძლება გახდეთ ამ ჭორების არა მხოლოდ მსხვერპლი, არამედ დაზარალდეთ იმის გამო, რომ ეს ხმები თავად გაავრცელეთ. ასე რომ, უსიამოვნებების თავიდან ასაცილებლად აჯობებს, თუ თქვენს მოსაზრებებს გარშემომყოფების შესახებ თქვენთვისვე შეინახავთ. ხოლო იმას, რასაც ირგვლივ ლაპარაკობენ, ყურადღებით უნდა მოუსმინოთ – ასე მიაგნებთ ჭორების გავრცელების წყაროს და მისგან თავის დაღწევის შანსი გაგიჩნდებათ.

სასწორი: დღეს შეიძლება იეჭვიანოთ სხვების წარმატებებზე და იმედი გაგიცრუვდეთ საკუთარი თავის გამო. ეს შეიძლება გამოიწვიოს რომელიმე კოლეგის წახალისებამ ან იმის გაცნობიერებამ, რომ თქვენი საქმეები ჩიხში შევიდა. თუ გარშემომყოფები უფრო წარმატებულებად გეჩვენებათ, ასტროლოგები გირჩევენ, ნაკლებად იყუროთ აქეთ–იქით და საკუთარ საქმეებს მიხედოთ. გაიხსენეთ, როდესაც თქვენ იყავით ყველაზე წარმატებული და ეცადეთ, განეწყოთ ახალი მწვერვალების დასაპყრობად.

მორიელი: დღეს თქვენი მთავარი მამოძრავებელი ძალა ჯანსაღი კონკურენცია გახდება. ეს გრძნობა შეიძლება გაგიჩნდეთ კოლეგების, მეგობრების ან ახლობლების წარმატებების მიმართ. მთავარი ისაა, რომ სწორედ ეს გაიძულებთ, იმოქმედოთ უფრო ენერგიულად. შესაძლოა, აზარტული განწყობის კარნახით გადადგათ ისეთი ნაბიჯი, რომელსაც სხვა დროს სიფრთხილის გამო ვერ გაბედავდით. და რამდენად გაამართლებს ეს რისკი, ამას უფრო მოგვიანებით, სხვა დღეს შეიტყობთ.

მშვილდოსანი: კონფლიქტისთვის ხართ განწყობილი, ყოველ შემთხვევაში, ასე მოეჩვენებათ გარშემომყოფებს. ერთი მხრივ, არ დაუშვებთ სხვების ჩარევას და მტკიცედ იდგებით თქვენს მოსაზრებაზე და მეორე მხრივ, ყველას გაკრიტიკებისა და დაუკითხავი რჩევების მიცემის სურვილი გამოძრავებთ. თქვენ თავად დარწმუნებული ხართ, რომ საქმის ინტერესებიდან გამომდინარე მოქმედებთ. შესაძლოა, რაღაც საკითხებში მართლაც მართალი ხართ, მაგრამ არა სიმშვიდისა და ნერვების შენარჩუნების საკითხებში.

თხის რქა: დღეს თქვენი წარმატების გარანტი თქვენი უნარია, იგრძნოთ, საიდან უბერავს ქარი. სიტუაცია მოითხოვს, რომ გზადაგზა გაერკვიოთ ვითარებაში, მოერგოთ მას და წარმოადგინოთ თქვენი იდეები იმგვარად, რომ ისინი ირგვლივ მყოფებს აუცილებლად მოეწონოთ. შეგიძლიათ, რომ ყველა შესაძლო ვარიანტიდან შეუცდომლად აირჩიოთ ის, რომელიც ყველაზე მომგებიანია თქვენთვის, თუნდაც ამისთვის მოქმედებების ჩვეული სტილის შეცვლა დაგჭირდეთ.

მერწყული: დღეს ნებისმიერი წამოწყებისთვის შესანიშნავი დღეა. რასაც არ უნდა მოჰკიდოთ ხელი, პრაქტიკულად ყველა საქმე დროთა განმავლობაში მოგებასა და წარმატებას გპირდებათ. ასე რომ, თამამად დააწყვეთ გეგმები, წამოაყენეთ ახალი პროექტი, დაისახეთ ახალი მიზნები. ერთადერთი, რამაც დღეს შეიძლება ხელი შეგიშალოთ, ეს შურით გაჟღენთილი კრიტიკაა. თუ ამ კრიტიკას მოუსმენთ და აჰყვებით, შესაძლოა, საკუთარ თავში ეჭვი შეგეპაროთ, რაც თქვენს საქმეებზე ცუდად აისახება.

თევზები: მოუსვენრობა შეგიპყრობთ და ერთ ადგილზე გაჩერება გაგიჭირდებათ. თქვენი ენერგია გამოსავალს ეძებს, ეჭიდება ნებისმიერ შანსს, რომ ცხოვრება გაამრავალფეროვნოს. შესაძლოა, ინიციატივა გამოიჩინოთ და რომელიმე მივლინებას დათანხმდეთ რამე საბაბით, ან კამათში ჩაებათ იმისთვის, რომ რაღაც განსხვავებული მოხდეს და ყველაფერი ჩვეულ რეჟიმში არ მიდიოდეს. და თუ საქმეებს ადრე მორჩებით, შემდეგ შეგიძლიათ მთელი შემართებით გაერთოთ.

0