თბილისი, 28 ივნისი — Sputnik. საქართველოს მთავრობა რადიომაუწყებლობის კომპანიებს 1,5 მილიონი ლარის დავალიანებას ჩამოაწერს, ხოლო წლის ბოლომდე მომსახურების საფასურს არ მოითხოვს.
როგორც საქართველოს ეკონომიკისა და მდგრადი განვითარების მინისტრმა ნათია თურნავამ მთავრობის დღევანდელი სხდომის შემდეგ გამართულ ბრიფინგზე განაცხადა, საუბარია 24 რადიომაუწყებელი კომპანიის ვალებზე.
„სახელმწიფო საკუთრებაში არსებობს კომპანია შპს „საქართველოს ტელე-რადიოცენტრი", რომელიც მთელი საქართველოს მასშტაბით ფლობს ანძებს. ამ ანძების მეშვეობით ვაწვდით სიხშირეებს სხვადასხვა რადიომაუწყებელს. ბოლო პერიოდში ჩვენ და მარეგულირებელ კომისიას 24-მა კომპანიამ მიმართა. მათ მოითხოვეს "ტელე-რადიოცენტრის" მიმართ დაგროვილი დავალიანების ჩამოწერა, რაც ახსნილი იყო კორონავირუსის პანდემიის პერიოდით", – განაცხადა ნათია თურნავამ.
მისი თქმით, ასეთი კომპანიების შემოსავლის ძირითადი წყარო რეკლამაა. იმის გათვალისწინებით, რომ 2020 წელს ეკონომიკური საქმიანობა პრაქტიკულად შეჩერებული იყო, მათი შემოსავლები არსებითად შემცირდა.
როგორც მინისტრმა აღნიშნა, შექმნილი სოციალურ-ეკონომიკური მდგომარეობიდან გამომდინარე, მთავრობამ გაიზიარა აღნიშნული კომპანიების მოთხოვნა დავალიანების ჩამოწერასთან დაკავშირებით.