თბილისი, 27 მაისი - Sputnik. ელექტროენერგიაზე ტარიფის ზრდის საკითხი არ განიხილება, განაცხადა ენერგეტიკისა და წყალმომარაგების მარეგულირებელი ეროვნული კომისიის (GNERC, სემეკი) თავმჯდომარე დავით ნარმანიამ.
ხუთშაბათს კომისიამ „თბილისის ენერჯის“ აბონენტებისთვის გაზზე ტარიფის 0,08 ლარით გაზრდის გადაწყვეტილება მიიღო.
„ამ ეტაპზე რაიმე სახის გადაანგარიშებები ელექტროენერგიის ნაწილში მოსალოდნელი არ არის, რადგან შედარებით ახალი დადგენილია ელექტროენერგიის ტარიფი. გარდა ამისა, ამ გაზაფხულზე გვაქვს კარგი ჰიდროლოგია საქართველოში არსებული უხვი ნალექებიდან გამომდინარე“, – განაცხადა ნარმანიამ.
ბოლოს ტარიფი ელექტროენერგიაზე საქართველოში მიმდინარე წლის 1 იანვარს შეიცვალა – კომისიის გადაწყვეტილებით, ერთ კვტ/სთ–ზე გაიზარდა 3,5 თეთრით და 26.537 თეთრი შეადგინა ელექტროენერგიის დანახარჯის მიხედვით.
მოსახლეობის ცხოვრების შესამსუბუქებლად მთავრობა ზამთრის პერიოდში ტარიფის განსხვავებას იხდიდა იმ ოჯახებისთვის, რომლებიც თვეში 300 კვტ/სთ–ზე ნაკლებ ელექტროენერგიას ხარჯავდნენ.
