ვალუტის კურსი

რა ეშველება ემიგრანტების იმედად დარჩენილ ლარს

161
(განახლებულია 19:50 29.04.2021)
27 აპრილს ეროვნული ვალუტის კურსმა დოლარის მიმართ 3.4534 GEL/$1 ნიშნულს მიაღწია, ექსპერტები კი დამაიმედებელი პროგნოზების გაკეთებას არ ჩქარობენ.

ეროვნული ვალუტა დოლარის მიმართ წლის ბოლომდე, შესაძლოა, 3.60 ნიშნულამდე დაეცეს, ვარაუდობს ეკონომიკის დოქტორი ნიკა შენგელია.

„თუ გავითვალისწინებთ რა მდგომარეობაა ზოგადად ეკონომიკაში და იმასაც, რა ფულად-საკრედიტო პოლიტიკა გვაქვს, არ გამოვრიცხავ, რომ წელს ლარის კურსი დოლარის მიმართ 3,60 ნიშნულზე ვიხილოთ“, – თქვა ნიკა შენგელიამ „Sputnik–საქართველოსთან“ საუბრისას.

ლარის გაუფასურებას მოჰყვება ინფლაცია, ფასების ზრდას ეროვნული ბანკი მონეტარული პოლიტიკის გამკაცრებით უპასუხებს, რაც თავის მხრივ გააძვირებს ფულს. ძვირი ფული კი ნეგატიურად აისახება ეკონომიკურ ზრდაზე, აღნიშნა ნიკა შენგელიამ.

წინა ხუთშაბათს ეროვნულმა ბანკმა სავალუტო ბაზრისთვის 30 მილიონი დოლარის მიწოდებით ლარის გაუფასურება შეაჩერა, თუმცა – დროებით.

„მხოლოდ სავალუტო ინტერვენციებით ლარის კურსის გაუფასურების შეჩერება შეუძლებელია და არც ინტერვენციების ძირითადი დანიშნულებაა ვალუტის კურსის გამყარება“, – განმარტა ნიკა შენგელიამ.

სავალუტო ბაზრის სტაბილიზაციის მიზნით წლის დასაწყისიდან ეროვნულმა ბანკმა შვიდი აუქციონი ჩაატარა, სადაც  უკვე 240 მილიონ დოლარზე მეტი გაყიდა.

როგორც ეკონომისტმა განმარტა, ზოგადად, ვალუტის და, მათ შორის, ლარის კურსის ჩამოყალიბებაზეც ძირითადად გავლენას ახდენს სახელმწიფო სავაჭრო ბალანსი, მაკროეკონომკური მაჩვენებლები, განსაკუთრებით – მშპ, ინფლაცია და უმუშევრობა, საინვესტიციო გარემო და ინვესტიციები. კურსზე ასევე მოქმედებს პოლიტიკური ფაქტორები, ფორსმაჟორული გარემოებები, მოსახლეობის განწყობა ეროვნული ვალუტის მიმართ და ფსიქოლოგიური ფაქტორი.

გარდა ამისა, ლარის კურსის ფორმირებაზე გარკვეულ გავლენებს ახდენს აგრეთვე საგარეო-ეკონომიკური ხელშეკრულებები და სავალუტო ბაზარზე სპეკულაციური მოქმედებები.

„ამ ეტაპზე ქვეყნის მაკროეკონომიკური მაჩვენებლებიც არასახარბიელოა და ასევე ნეგატიური გვაქვს სხვა ფაქტორებიც, იქნება ეს ინვესტიციები თუ პოლიტიკური სიტუაცია. ამიტომაც შექმნილ ვითარებაში არ უნდა გაგვიკვირდეს დღევანდელი ეროვნული ვალუტის კურსის სისუსტე“, – აღნიშნა ნიკა შენგელიამ.

თუმცა, მისივე თქმით, გაუარესებულ ეკონომიკურ მაჩვენებლებს მარტო პანდემიას ვერ დავაბრალებთ.

„ამის ძირითადი მიზეზი ის არასწორი ეკონომიკური პოლიტიკაა, რომლის გატარებაც ათწლეულობით ხდებოდა და რომელიც ძირითადად ტურისტული სექტორის განვითარებაზე იყო ორიენტირებული, ხოლო ლარის კურსი ძირითადად ემიგრანტების მიერ სამშობლოში დარჩენილი ოჯახებისთვის გადმორიცხული თანხების იმედად იყო“, – თქვა ნიკა შენგელიამ.

საჭირო იყო სხვა სექტორების დახმარება და ამუშავება. თუნდაც ის პროექტები, რომლებიც ახლა გამოაქვს მთავრობას იმავე სოფლის მეურნეობის სხვადასხვა დარგების განვითარების ხელშესაწყობად, გაცილებით ადრე, თუნდაც 8-10 წლის წინ უნდა დაწყებულიყო.

„შექმნილ ვითარებაში აუცილებელია მთლიანად ეკონომიკური პოლიტიკის შეცვლა და საკითხებისადმი ახლებური მიდგომა, ასევე ფულად-საკრედიტო პოლიტიკის გადახედვა“, – მიაჩნია ნიკა შენგელიას. 

დოლარის მიმართ ლარის ოფიციალური გაცვლითი კურსი 2009 წლის მაისიდან Bloomberg-ის სავაჭრო სისტემის ბანკთაშორის ბაზარზე გარიგებების აგრეგირების მეშვეობით განისაზღვრება. 2021 წლის 1 თებერვლიდან ქართული სავალუტო ბაზარი მთლიანად Bmatch Bloomberg-ის სისტემაში ვაჭრობაზე გადავიდა.

2020 წელს ლარის გაცვლითი კურსის ანტირეკორდი 3,4842 GEL/$1 იყო. ის 27 მარტს დაფიქსირდა.

სავალუტო ბაზრის დასტაბილურების მიზნით გასულ წელს ეროვნულმა ბანკმა 26 აუქციონი გამართა, რა დროსაც ჯამში 873,2 მილიონი დოლარი გაყიდა. 

 

ნატა პატარაია

 

161
ურეკი–შეკვეთილის გზა

პროგრამა „განახლებული რეგიონები“ გურიაში: რისი გაკეთება იგეგმება

34
(განახლებულია 17:10 08.05.2021)
პროგრამის „განახლებული რეგიონები“ ფარგლებში ინფრასტრუქტურის სამინისტროს მუნიციპალური განვითარების ფონდმა 160 მილიონი ლარის ღირებულების ტენდერები გამოაცხადა.

თბილისი, 8 მაისი — Sputnik. პრემიერ-მინისტრ ირაკლი ღარიბაშვილის ინიციატივით დაწყებული ახალი სახელმწიფო პროგრამის „განახლებული რეგიონები“ ფარგლებში შექმნილი სპეციალური კომისიის სხდომა ოზურგეთში გაიმართა, იუწყება საქართველოს რეგიონული განვითარებისა და ინფრასტრუქტურის სამინისტრო.

ქუთაისში ოლიმპიური საცურაო აუზის მშენებლობა დაიწყო>>

„გურიის სამივე მუნიციპალიტეტში კომისიის მიერ უკვე იდენტიფიცირებულია ის პირველი ეტაპის აუცილებელი მდებარეობები, რომლებიც უნდა განვითარდეს ურბანულად. ამ ადგილების განვითარება გაზრდის მუნიციპალიტეტების შესაძლებლობებს, რითაც დიდ სარგებელს ნახავენ როგორც ადგილობრივი მცხოვრებლები, ისე - ვიზიტორები“, - აღნიშნა რეგიონული განვითარებისა და ინფრასტრუქტურის მინისტრმა ირაკლი ქარსელაძემ.

  • ახალი პროგრამის ფარგლებში რეაბილიტაცია ჩაუტარდება ოზურგეთში კულტურისა და დასვენების პარკს, ასევე მის მიმდებარე ტერიტორიასა, ჩოხატაურში მოეწყობა ცენტრალური მოედანი და მოწესრიგდება დუმბაძის ქუჩა, ლანჩხუთში კი დაიგეგმა ცენტრალური მოედნის, ცენტრალური პარკისა და საავტომობილო მაგისტრალიდან ლანჩხუთში შესასვლელი კვანძის მიმდებარე ტერიტორიის რეაბილიტაცია.

კომისიის სხდომას რეგიონული განვითარებისა და ინფრასტრუქტურის მინისტრი ირაკლი ქარსელაძე,  სახელმწიფო რწმუნებული გურიის მხარეში გიორგი სახოკია და მუნიციპალიტეტების წარმომადგენლები ესწრებოდნენ.

გურიაში კომისიის სხდომა ქუთაისის, ამბროლაურისა და ზუგდიდის შემდეგ გაიმართა,  კომისიის ფორმატში შემდეგი შეხვედრა უკვე აჭარაში, ხოლო მომდევნო კვირიდან კი აღმოსავლეთ საქართველოში გაიმართება.

პროგრამის „განახლებული რეგიონები“ ფარგლებში, 160 მილიონი ლარის ღირებულების ტენდერები ინფრასტრუქტურის სამინისტროს მუნიციპალური განვითარების ფონდმა 28 აპრილს გამოაცხადა.

ტენდერები მოიცავს დასავლეთ საქართველოს ოცდათოთხმეტივე მუნიციპალიტეტს. გამოცხადებული 8 ტენდერიდან თითოეულის მოცულობა 20 მილიონი ლარია. ტენდერების შედეგად გამოვლინდება საპროექტო და სამშენებლო კომპანიები, რომლებიც მოამზადებენ სპეციალური კომისიის მიერ შერჩეული ობიექტების ურბანული განახლების პროექტებს და შეასრულებენ ამავე დოკუმენტაციით განსაზღვრულ სამშენებლო-სარეაბილიტაციო სამუშაოებს.

ოთხწლიანი  პროგრამა, რომელიც  საქართველოს 63 მუნიციპალიტეტს მოიცავს და მისი მხოლოდ პირველი ეტაპის საორიენტაციო ღირებულება 500 მილიონი ლარია, ითვალისწინებს რეგიონების ურბანულ განახლებას, რაც სახელმწიფოს, მუნიციპალიტეტის და კერძო საკუთრებაში არსებული მნიშვნელოვანი ობიექტის განვითარებას გულისხმობს.

პროექტები განხორციელდება როგორც სახელმწიფო ბიუჯეტის დაფინანსებით, ისე საერთაშორისო საფინანსო ინსტიტუტების მხარდაჭერით.

34
თემები:
საქართველოს ეკონომიკა
ავტოსამრეცხაო

საქართველოში ეკოლოგიურად სუფთა სარეცხ საშუალებებს გამოუშვებენ

40
(განახლებულია 21:21 07.05.2021)
კომპანიამ სპეციალური ფორმულა შექმნა, რომელიც ითვალისწინებს ადგილობრივი წყლის სიხისტეს, ამას გარდა მინიმალურად აბინძურებს გარემოს.

თბილისი, 7 მაისი – Sputnik. ფონიჭალაში სახელმწიფოს მხარდაჭერით სარეცხი და საწმენდი საშუალებების მწარმოებელი საწარმო აშენდება, ნათქვამია საქართველოს ეკონომიკის სამინისტროს განცხადებაში.

თბილისსა და რეგიონებში ოთხი მცირე საწარმოს შექმნის პროექტი საქართველოს მთავრობამ აპრილის ბოლოს დაამტკიცა. ის განხორციელდება სახელმწიფო პროგრამის „აწარმოე საქართველოში“ ფარგლებში.

ქიმიური პროდუქციის საწარმოს შესაქმნელად შპს „ეკოკემიკა სერვის ჯგუფს“ (Ekokemika International) სიმბოლურ ფასად – ერთ ლარად საკუთრებაში გადაეცემა თბილისში, ფონიჭალის დასახლებაში მდებარე არასასოფლო-სამეურნეო დანიშნულების მიწის ნაკვეთი და მასზე მდებარე შენობა-ნაგებობა.

Ekokemika International წარმოადგენს საერთაშორისო სავაჭრო კომპანიას, რომლის სათავო ოფისი და ძირითადი საწარმოო ბაზა მდებარეობს იტალიის ქალაქ პიაცენსაში. საწარმო აწარმოებს პროდუქტებს, რომელთა ფორმულები თვითონ Ekokemika International-მა შეიმუშავა და მის საკუთრებაშია.

ნედლეულს, რომელიც პროდუქტების შესაქმნელად გამოიყენება, ევროპის სხვადასხვა ქვეყანაში აწარმოებენ. კომპანია 20 წელზე მეტია ბაზარზე მოქმედებს და მისი ძირითადი პროფილია ავტომობილების სარეცხი საშუალებების წარმოება.

ახალ ქარხანაში სარეცხ საშუალებებს სპეციალურად ქართული ბაზრისთვის დაამზადებენ. Ekokemika International-მა სპეციალური ფორმულა შექმნა ადგილობრივი წყლის სიხისტის გათვალისწინებით, ასევე გარემოს დაბინძურების შესამცირებლად. აგრეთვე გათვალისწინებულია ტექნოლოგიები, რომლითაც ადგილობრივი ავტოსამრეცხაოები მუშაობენ.

ამ დროისთვის კომპანია Ekokemika International-ს წარმომადგენლობა აქვს საქართველოში, ბელარუსში, სომხეთში, რუსეთსა და ყაზახეთში, ასევე ცენტრალური და აღმოსავლეთ ევროპის და აზიის ათზე მეტ ქვეყანაში.

40
თემები:
საქართველოს ეკონომიკა
გიგა წულეისკირი

გიგა წულეისკირი: მევახშეებისგან დაზარალებული სულ უფრო მეტი ადამიანი მოგვმართავს

0
(განახლებულია 20:02 08.05.2021)
„იპოთეკით, მშენებლობებითა და მევახშეებისგან დაზარალებულთა გაერთიანება“  რამდენიმე თვის წინ შეიქმნა და უფასო იურიდიულ დახმარებას სთავაზობს იმ მოქალაქეებს, რომელთა ქონებაც უკანონოდ მიითვისეს

თბილისი, 8 მაისი — Sputnik. კორონავირუსის პანდემიის შედეგად ქვეყანაში შექმნილი ვითარების გამო იპოთეკით დაზარალებულთა რაოდენობა საგრძნობლად გაიზარდა, განაცხადა „იპოთეკით, მშენებლობებითა და მევახშეებისგან დაზარალებულთა გაერთიანების“ თავმჯდომარე გიგა წულეისკირმა Sputnik-საქართველოსთან საუბრისას.

არასამთავრობო ორგანიზაცია უფასო იურიდიულ დახმარებას უწევს იმ მოქალაქეებს, რომლებმაც მევახშეებისგან ფული უძრავი ქონების გარანტიით ისესხეს, შემგეგ ვალი ვერ დააბრუნეს და საცხოვრებელი ბინების დაკარგვის საფრთხის წინაშე აღმოჩნდნენ.

გიგა წულეისკირის თქმით, ბოლო დროს მათ  სულ უფრო მეტი დაზარალებული მიმართავს და ეს იმ თაღლითური სქემების ბრალია, რომელსაც მევახშეები ბოლო დროს იყენებენ.

„მევახშეებმა მიმართეს თაღლითურ სქემას, რაც იმაში გამოიხატება, რომ რეალურად ხდება ფული გასესხება, ხოლო იურიდიულად ფორმდება ნასყიდობა-გამოსყიდვის ხელშეკრულება“, - აღნიშნა გიგა წულეისკირმა.

არასამთავრობო ორგანიზაციის ხელმძღვალელის განმარტებით, რადგან თანხის გასესხება დაბეგვრას ექვმედებარება, ამიტომ მევახშეები ნასყიდობა-გამოსყიდვის ხელშეკრულებას თითქოსდა გადასახადისთვის თავის არიდების მიზნით აფორმებენ, შედეგად მსესხებელები, რომლებიც დადგენილ ვადაში ჩადებული ქონების უკან გამოსყიდვას ვერ ახერხებენ, ნასესხებზე ორჯერ და სამჯერ მეტი ღირებულების სახლებს კარგავენ.

მოქალაქეებს აღარ რჩებათ რეალური ბერკეტი მევახშეებთან საბრძოლველად. კრედიტორები კი  ისაკუთრებენ მათ ქონებას და ამით სჩადიან სისხლის სამართლის დანაშაულს, რადგან შეთანხმება ხდება ერთზე, ხოლო ფორმდება სულ სხვა დოკუმენტი, აღნიშნა წულეისკირმა.

„დიდი მნიშვნელობა აქვს, როგორ მოხდება ამ საკითხების გამოძიება, რადგან სამწუხაროდ, პოლიცია მოსახლეობას სასამართლოში ამისამართებს, სასამართლო კი, პირიქით, პოლიციაში და ასე ინსტანციიდან ინსტანციაში სიარულში ადამიანები უძრავ ქონებას კარგავენ“, - აღნიშნა გიგა წულეისკირმა.

არასამთავრობო ორგანზიაციის ხელმძღვანელმა  მოუწოდა სამართალდამცველ უწყებებს, არ დატოვონ მევახშეებისგან დაზარალებული ადამიანების საჩივრები უყურადღებოდ, ხელისუფლების წარმომადგენლებს კი –  მოახდინონ ამ საკითხის დარეგულირება საკანონმდებლო დონეზე.

„იპოთეკით, მშენებლობებითა და მევახშეებისგან დაზარალებულთა გაერთიანება“ რამდენიმე თვის წინ შეიქმნა უფასო იურიდიულ დახმარებას სთავაზობს იმ მოქალაქეებს, რომელთა ქონებაც უკანონოდ მიითვისეს.

0