სავაჭრო ცენტრი Galleria Tbilisi

საქართველოს ბიზნეს-ასოციაცია: მეწარმეები ოპტიმიზმს არ კარგავენ

46
(განახლებულია 23:49 02.04.2021)
2021 წლის პირველ კვარტალში მომდევნო ექვსი თვის ბიზნეს-მოლოდინი ეკონომიკის ყველა სექტორისთვის დადებითია

თბილისი, 2 აპრილი - Sputnik. საქართველოში კორონავირუსის პანდემიით გამოწვეული ეკონომიკური კრიზისისა და სირთულეების მიუხედავად, ბიზნესი ოპტიმისტურადაა განწყობილი, აღნიშნულია საქართველოს ბიზნეს-ასოციაციის (BAG) კვლევაში.

საქართველოს ბიზნეს-ასოციაცია 2009 წელს დაფუძნდა და ქვეყნის 70 წამყვან კომპანიას აერთიანებს. მათ შორის არიან ბანკები, ავტოგასამართი სადგურების ქსელები, სააფთიაქო ქსელები, სამშენებლო კომპანიები, კომუნიკაციის კომპანიები, ასევე მსხვილი სუპერმარკეტების ქსელები.

კვლევის თანახმად, 2021 წლის პირველ კვარტალში, 2020 წლის მეოთხე კვარტალთან შედარებით, მნიშვნელოვნად გაუმჯობესდა BAG საქმიანი კლიმატის ინდექსი, რომელიც წარმოადგენს ბიზნესის მიმდინარე მდგომარეობისა და მომდევნო ექვსი თვის მოლოდინის საბალანსო მნიშვნელობების ტრანსფორმირებულ საშუალოს.

აღნიშნულ პერიოდში ასოციაციის წევრი კომპანიების წარმომადგენლებმა გააუმჯობესეს როგორც მიმდინარე მდგომარეობის, ისე მოლოდინის შეფასება. თუმცა, მიუხედავად გაუმჯობესებისა, მიმდინარე მდგომარეობა კვლავ ნეგატიურია. ამავე დროს ბიზნესი ინარჩუნებს დადებით მოლოდინს, რომელიც მნიშვნელოვნად - 34 პუნქტით გაუმჯობესდა.

BAG-ის წევრები და მათ ჯგუფში შემავალი კომპანიები გადანაწილდა ოთხ სექტორში: ვაჭრობა, მომსახურება, მრეწველობა და მშენებლობა.

2021 წლის I კვარტალში სექტორებს შორის BAG ბიზნეს-კლიმატის მაჩვენებელი, მშენებლობის სექტორის გარდა, ყველა სექტორისთვის დადებითია. ეს უკავშირდება სამშენებლო სფეროში მიმდინარე სიტუაციის ნეგატიურ შეფასებას. მიმდინარე სიტუაცია ასევე ნეგატიურადაა შეფასებული ვაჭრობისა და მომსახურების სექტორების მიერ. თუმცა უნდა აღინიშნოს, რომ 2021 წლის პირველ კვარტალში, 2020 წლის მეოთხე კვარტალთან შედარებით, ბიზნესის მიმდინარე მდგომარეობის შეფასება ყველა სექტორში, გარდა სამშენებლო სექტორისა, გაუმჯობესდა.

2021 წლის პირველ კვარტალში მომდევნო ექვსი თვის ბიზნეს-მოლოდინი ყველა სექტორისთვის დადებითია. ამ პერიოდში განსაკუთრებით ოპტიმისტური განწყობა შეინიშნება მომსახურებისა და ვაჭრობის სფეროებში, რაც უნდა უკავშირდებოდეს შეზღუდვების შემსუბუქებას.

დასაქმების ბარომეტრი

BAG დასაქმების მაჩვენებელი, რომელიც ასახავს მომდევნო სამი თვის განმავლობაში ასოციაციის წევრთა შორის დასაქმების დონის მოსალოდნელ ცვლილებას, 2021 წლის პირველ კვარტალში დადებითი იყო და 14,7 ქულა შეადგინა. შესადარებლად, 2020 წლის პირველ კვარტალში BAG-ის წევრ საწარმოებს დასაქმების მიმართ უარყოფითი მოლოდინი ჰქონდათ, ამიტომ დასაქმების ბარომეტრი უარყოფითი, -47,7 ქულა იყო.

ბიზნეს-ასოციაციის გამოკითხვის თანახმად, მიმდინარე წლის პირველ კვარტალში დასაქმების მაჩვენებელი ყველაზე მეტად სამშენებლო სფეროში გაუმჯობესდა. გამოკითხული კომპანიების 30,8% თანამშრომლების რიცხვის გაზრდას გეგმავს.

ჯერ კიდევ ერთი წლის წინ გამოკითხული სამშენებლო კომპანიების 80% თანამშრომლების შემცირებას გეგმავდა, მაშინ, როცა დღეს ასეთი გეგმები არავის აქვს.

გარდა ამისა, გამოკითხული კომპანიების 28,9% ფიქრობს, რომ 2021 წლის მეორე კვარტალში, 2021 წლის პირველ კვარტალთან შედარებით, თანამშრომლების რიცხვს გაზრდის, 9,6% კი ფიქრობს, რომ შეამცირებს. კომპანიების უმრავლესობა (61,5%) არ აპირებს დასაქმებულთა შემცირებას.

ინვესტიციები

2021 წელს ინვესტიციების გაზრდას გეგმავს კომპანიების 51%. ამასთან, რესპონდენტების მხოლოდ 11% ვარაუდობს შემცირებას. ასოციაციის ანალიტიკოსთა აზრით, ეს მიუთითებს წელს საინვესტიციო აქტივობის მოსალოდნელ ზრდაზე, მაგრამ ჯერ კიდევ ჩამორჩება პანდემიამდე არსებულ ტემპებს.

2020 წელს პანდემიის გავლენა ყველა სექტორს დაეტყო. ვაჭრობის სფეროში რესპონდენტების 44%-მა განაცხადა, რომ 2019 წელთან შედარებით, 2020 წელს ინვესტიციები შემცირდა. სამშენებლო, მომსახურებისა და მრეწველობის სფეროებში ამ მაჩვენებელმა, შესაბამისად, 36%, 34% და 6% შეადგინა.

ინვესტიციების შემცირების ტენდენცია წელს შერბილდება. რესპონდენტების ნახევარზე მეტი გეგმავს ვაჭრობაში დაბანდების გაზრდას. მსგავსი სიტუაციაა სამრეწველო და მომსახურების სექტორებში.

გამოკითხვა 2021 წლის პირველი კვარტლის შუა პერიოდში ჩატარდა, როდესაც ბიზნესის მოლოდინი განსაკუთრებით პოზიტიური იყო ეკონომიკური შეზღუდვების შერბილების ფონზე. თუმცა შეზღუდვების მორიგი გამკაცრების შემთხვევაში მიმდინარე გეგმების ცვლილებაა მოსალოდნელი.

მაგალითად, 2019 წლის ბოლოს ჩატარებული გამოკითხვის თანახმად, რესპონდენტების 59% გეგმავდა 2020 წელს ინვესტიციების გაზრდას. თუმცა პანდემიის პირობებში 2020 წელს ინვესტიციები რესპონდენტების მხოლოდ 35%-ს გაეზარდა, ნათქვამია ასოციაციის შეფასებაში.

46
თემები:
საქართველოს ეკონომიკა (980)
ფაბრიკა ანაბეჭდი

ადგილობრივი კომპანიებისთვის უნიფორმებს საქართველოში შეკერავენ

28
(განახლებულია 11:01 14.04.2021)
„ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს.

თბილისი, 14 აპრილი – Sputnik. ქართული სამკერვალო საწარმო „ანაბეჭდი“, რომელიც ქვეყანაში წამყვან ბრენდულ კომპანიებს უნიფორმებით ამარაგებს, სახელმწიფო სააგენტო „აწარმოე საქართველოში“ ფინანსური მხარდაჭერით გაფართოვდა. 

„ანაბეჭდი“ სააგენტოს ინდუსტრიული მიმართულების კომპონენტის ფარგლებში ფინანსური მხარდაჭერით სარგებლობს. აღნიშნული მხარდაჭერით  საწარმო აღიჭურვა სპეციალური და უნივერსალური საკერავი მანქანა-დანადგარებით. შედეგად, წარმოების პროცესი უფრო სწრაფი გახდა, პროდუქცია კი - მეტად ხარისხიანი.

წარმოების პროცესს ეკონომიკისა და მდგრადი განვითარების მინისტრი ნათია თურნავა, სააგენტოს „აწარმოე საქართველოში“ დირექტორ მიხეილ ხიდურელთან ერთად, ადგილზე გაეცნო.

 „კომპანიას გაფართოების ძალიან კარგი გეგმები აქვს.  შეიძინეს დანადგარები პროგრამა „აწარმოე საქართველოში“ დახმარებით, უნიკალურ პროდუქციას უშვებენ და ამარაგებენ ბაზრის 90%-ს - მათ შორის, უნიფორმებით. ეს არის ადგილობრივი წარმოების განვითარების ერთ-ერთი შედეგი, რასაც ჩვენ ყოველთვის შევუწყობთ ხელს“, - აღნიშნა ნათია თურნავამ.

 „ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს. კომპანია უნიფორმებს ქმნის ისეთი ბრენდებისთვის, როგორიცაა Agrohub, Goodwill, Elit Electronics, Carrefour, Domino, East Point და ა.შ. 

ფაბრიკაში ამ ეტაპზე 100–მდე ადამიანი მუშაობს. კომპანია ძალისხმევას არ იშურებს დასაქმებულთა პროფესიული განვითარებისთვის, ამიტომაც ისინი პერიოდულად გადამზადების კურსს გადიან.

აღნიშნული პროექტის მთლიანი საინვესტიციო მოცულობა 3,7 მლნ ლარზე მეტს შეადგენს.

კომპანიის გეგმებშია ქსოვილების წარმოების დაწყება, რამდენადაც ამ ეტაპზე იგი უცხოეთიდან შემოაქვთ. ეს კომპანიას თანამშრომელთა შტატის გაზრდისა და პროდუქციის ხარისხის ამაღლების შესაძლებლობას მისცემს

 „აწარმოე საქართველოში“ – საქართველოს ხელისუფლების ერთ-ერთი მთავარი პროექტია, რომელიც მიზნად ისახავს ქვეყანაში ადგილობრივი წარმოების განვითარებას. სააგენტო აერთიანებს ყველა სახელმწიფო პროგრამას, მიმართულს ბიზნეს-სექტორის ხელშეწყობისა და ქვეყნის ეკონომიკური განვითარებისკენ.

პროგრამა მიმართულია მიკრო და მცირე ბიზნესის განვითარების, თანამედროვე სამეწარმეო კულტურის დამკვიდრების და ახალი სამუშაო ადგილების შექმნისკენ. პროგრამა ასევე ხელს შეუწყობს კორონავირუსის პანდემიით გამოწვეული ნეგატიური ეკონომიკური შედეგების შემცირებას.

საუბარია სესხების სუბსიდირებასა და უზრუნველყოფაზე, რომლებიც მოიცავს 200-ზე მეტი სახის საქმიანობას და მიკროგრანტებს, რომლებიც ეხება 300-ზე მეტი სახის საქმიანობას.

 

პროგრამის ფარგლებში უკვე დაფინანსებულია 6.212 პროექტი, რომელთა ინვესტიციის საერთო მოცულობამ 61 მლნ ლარზე მეტი შეადგინა.

28
თემები:
სამთავრობო პროგრამა „აწარმოე საქართველოში“
ნათია თურნავა

თურნავა: თუ ინვესტორი ვალდებულებებს ვერ შეასრულებს, მას გადაცემული მიწა ჩამოერთმევა

72
(განახლებულია 11:01 14.04.2021)
როგორც ნათია თურნავამ აღნიშნა, ვრცელდება მოსაზრება, თითქოს ამ მიწაზე თურქები უნდა ჩამოასახლონ, რაც არ შეესაბამება სიმართლეს.

 

თბილისი, 14 აპრილი – Sputnik. „ნამახვანჰესი“ არა თურქული ან ნორვეგიული, არამედ ქართული ჰიდროელექტროსადგურია, განაცხადა საქართველოს ეკონომიკისა და მდგრადი განვითარების მინისტრმა ნათია თურნავამ  ტელეკომპანია „იმედის“ ეთერში. 

საქართველოს მთავრობამ „ნამახვანჰესის“ პროექტის შემუშავების, მშენებლობის, მფლობელობისა და მისი კასკადის ექსპლუატაციის უფლება 2019 წელს ნორვეგიულ კომპანია Clean Energy Group-ს გადასცა, რომელმაც, თავის მხრივ, მშენებარე კომპანიად თურქული ENKA მოიწვია. საინჟინრო ნაგებობა ერთბაშად ორი მუნიციპალიტეტის – ცაგერისა და წყალტუბოს ტერიტორიებს დაიკავებს.

„ნამახვანჰესის“ კასკადის მშენებლობის პროექტის წინააღმდეგ პროტესტი 6 თვის წინ დაიწყო. აქციის მონაწილეები მშენებლობის შეწყვეტას და თურქული კომპანია ENKA-სთან გაფორმებული კონტრაქტის მოშლას მოითხოვენ. მომიტინგეები მიიჩნევენ, რომ ჰესი გარემოზე დამანგრეველ ზემოქმედებას მოახდენს. ხელისუფლება აცხადებს, რომ პროექტის ძირითადი სამუშაოები 6 თვით შეჩერდება, რათა პროექტის ხელახალი გადამოწმება მოხდეს, მაგრამ კონტრაქტის გაწყვეტას არ აპირებს.

თურნავას განცხადებით,  მიწა კომპანიისთვის უფასოდ არ გადაცემულა და ინვესტორი  830 მილიონ დოლარს იხდის.

„ინვესტორმა უკვე გადაუხადა 34 მილიონი ლარი 270 ადგილობრივ ოჯახს – თითო ოჯახს საშუალოდ 125 ათასი ლარი შეხვდა იმ მიწის სანაცვლოდ, რომელიც იურიდიულად სახელმწიფოს ეკუთვნოდა, მაგრამ ვინაიდან ეს ოჯახები იქ სახლობდნენ და საქმიანობდნენ, სახელმწიფომ მოითხოვა ამ კომპენსაციების გაცემა“, - განაცხადა თურნავამ. 

ამასთან მინისტრმა აღნიშნა, რომ ეს არის ძალიან მკაცრად გაკონტროლებული, მიზნობრივად გადაცემული მიწის რესურსი, რომელზეც ინვესტორს უფლება აქვს, მხოლოდ პროექტის მიხედვით ააშენოს ჰესის ნაგებობები.

„თუ ინვესტორმა ვერ შეასრულა თავისი ვალდებულებები და ვერ ააშენა შესაბამის ვადებში კონკრეტული სიმძლავრის ჰიდროსადგური ან დაარღვია ნებართვით დაკისრებული უფლებები, მას ეს მიწა ჩამოერთმევა. ეს არის პირობადებული საკუთრება, რომლის საფასურიც ინვესტორმა გადაუხადა არა სახელმწიფოს, არამედ ადგილობრივ მოსახლეობას“, - აღნიშნა თურნავამ.

რიონის ხეობაში საპროტესტო აქციები ამ დრომდე არ წყდება. გუშინ,  აქტივისტებმა თურქული კომპანია „ენკას“ ბაზასთან მისასვლელი გზა გადაკეტეს  და განაცხადეს, რომ კომპანია „ენკას“ მანქანებს არ გაატარებდნენ. მომიტინგეებსა და აქციის მონაწილეებს შორის დაპირისპირებაც სწორედ კომპანიის მანქანების გამოჩენას მოჰყვა. პოლიცია გზის გათავისუფლებას შეეცადა, რასაც დაპირისპირება მოჰყვა. შედეგად სამართალდამცველებმა სოფელ გუმათში გამართული აქციის დროს ექვსი აქტივისტი დააკავეს. 

მანამდე აქციის მონაწილეებს კარვები ჰქონდათ გაშლილი სოფელ ნამოხვანში, ორი დღის წინ კი პოლიციამ აიღო კარვები და ნამოხვანისკენ გზა გადაკეტა. ამის შემდეგ მომიტინგეებმა კარვები სოფელ გუმათში გაშალეს, „ნამახვანჰესის“ სამშენებლო ტერიტორიიდან უფრო მოშორებით. მომიტინგეები მოითხოვენ, მიეცეთ შესაძლებლობა პროტესტი კვლავ ნამოხვანში გააგრძელონ.

პოლიციამ კარვების აღების მიზეზად რიონის მოსალოდნელი ადიდება დაასახელა, რაც მომიტინგეებს საფრთხეს შეუქმნიდა. გარდა ამისა, 10 აპრილს რიონში აქციის ერთ-ერთი მონაწილე გაუჩინარდა, რომლის სამძებრო სამუშაოები დღემდე მიმდინარეობს. პოლიციამ ისიც განაცხადა, რომ კარვები მათ საძიებო სამუშაოების განხორციელებაში ხელს უშლიდა.

პოლიციის თქმით, აქტივისტები კომპანია ENKA-ს თანამშრომლებისთვის საფრთხეს წარმოადგენენ.

„ნამახვანის ჰესების კასკადის“ პროექტი მდინარე რიონზე გააერთიანებს ორ ჰესს - „ქვემო ნამახვანს“ და „ზემო ნამახვანს“, საერთო 433 მეგავატი დადგმული სიმძლავრით. პროექტის სავარაუდო ღირებულება 750 მლნ დოლარს შეადგენს. პროექტის დასრულების შემდეგ საქართველოში ელექტროენერგიის წარმოება 15%–ით გაიზრდება.

72
მართლმსაჯულება

სასამართლომ დავით კოდუას პატიმრობა შეუფარდა

0
(განახლებულია 14:44 14.04.2021)
პროკურატურამ ოჯახის წევრების მიმართ ფიზიკური ძალადობის ფაქტზე ბიზნესმენს  ბრალი 13 აპრილს წარუდგინა.

თბილისი, 14 აპრილი - Sputnik. თბილისის საქალაქო სასამართლომ ბიზნესმენ დავით კოდუას აღკვეთის ღონისძიების სახით პატიმრობა შეუფარდა, იუწყება „პირველი არხი“.

პოლიციამ საქართველოს შსს-ს სპეციალური ოპერატიული დეპარტამენტის ყოფილი ხელმძღვანელის, ერეკლე კოდუას ძმა, ბიზნესმენი დავით კოდუა 12 აპრილს, მეუღლის შეტყობინების საფუძველზე დააკავა. 

სასამართლო სხდომაზე დაცვის მხარე აღკვეთის ღონისძიების ნაცვლად გირაოს შეფარდებას, ბრალდების მხარე კი დაკავებულის პატიმრობას ითხოვდა, რაც მოსამართლემ სრულად გაიზიარა.

როგორც ბრალდებულმა დავით კოდუამ სასამართლო სხდომაზე განაცხადა, ოჯახურ ძალადობას ადგილი არ ჰქონია. მისი თქმით, კონფლიქტი მისმა მეუღლემ დაიწყო, თავად კი კონფლიქტისგან თავის არიდებას ცდილობდა.

„არ მინდოდა კონფლიქტი და გამოვედი. ოთხი შვილის მამა, შვილიშვილის ბაბუა ვარ, ემოციებით დატვირთული ქალი იყო და ეჭვიანობის ნიადაგზე გაუგებრობა მოხდა“, - განაცხადა კოდუამ.

მომხდარზე გამოძიება საქართველოს სსკ-ის 126-ე პრიმა მუხლით მიმდინარეობს, რაც ოჯახში ძალადობას გულისხმობს.

0
თემები:
კრიმინალი საქართველოში