სავალუტო ჯიხური

სად მთავრდება დაღმართი, ანუ ვინ დაიჭერს გაქცეულ ლარს?

1113
(განახლებულია 22:43 01.04.2021)
ეროვნული ვალუტის ახალი ანტირეკორდი. ლარი ყოველდღიურად უფასურდება, სავალუტო ბაზარზე ეროვნული ბანკის ინტერვენციები საკმარისი არ არის. ამ ტემპით წლის ბოლოს დოლარის მიმართ ლარის კურსი შესაძლოა ოთხიან ნიშნულს გაუტოლდეს.

სამსონ ხონელი

პესიმისტების პროგნოზი გამართლდა. ოპტიმისტები იხტიბარს არ იტეხენ, უკეთესი მომავლის მოლოდინში არიან.  საინტერესოა, რას ფიქრობენ რეალისტები? არ გამიკვირდება, მკითხველმა ბრძანოს − მომდევნო სტრიქონები კონკრეტიკას დაუთმე! რა გაეწყობა, მოწოდებას ყურად ვიღებ და განვაგრძობ თხრობას.

მარტის მესამე დეკადიდან მოყოლებული ეროვნული ვალუტა დაღმა ეშვება. ბოლო ათი დღის განმავლობაში ლარი შვიდი თეთრით გაუფასურდა. ახალი ნიშნული, რომელზეც ეროვნული ვალუტა ამ დღეებში მერყეობს, ლარის მეოთხედსაუკუნოვანი არსებობის განმავლობაში მორიგი ისტორიული ანტირეკორდია. ახალ-ახალი „სიმაღლეების დაპყრობით“ ეროვნული ვალუტა უკვე რამდენიმე წელია გვანებრივებს და აღარც ის გვიკვირს, რომ ხშირად მომდევნო დღეს, ლარის კურსის შემხედვარეს, წინა დღე შედარებით ტკბილად გვახსენდება. ასე თანდათან ვიქეცით ეროვნული ვალუტის „მიღწევების“ მემატიანეებად. საინტერესოა, ამჯერად რა მოხდა, რამ მისცა ბიძგი ლარის სწრაფი ტემპით გაუფასურებას, ეს პროცესი დროებითია თუ საშუალო- და გრძელვადიან პერიოდშიც გაგრძელდება?

ანალიტიკოსთა დიდი უმრავლესობის შეფასებით, ლარის გაუფასურება მას შემდეგ დაიწყო, რაც თურქული ლირის კურსი დაეცა. მეზობელ სახელმწიფოში ეროვნული ვალუტის გაუფასურებას ადგილობრივი მედია, ექსპერტების შეფასებებზე დაყრდნობით, რეჯეფ თაიფ ერდოღანის მიერ 20 მარტს ცენტრალური ბანკის პრეზიდენტის თანამდებობიდან გათავისუფლებას უკავშირებს. ნაჯი აგბალის მოხსნის განკარგულებას თურქეთის პრეზიდენტმა შაბათს, მას შემდეგ მოაწერა ხელი, რაც ნაჯი აგბალმა საპროცენტო განაკვეთის 17 პროცენტიდან 19 პროცენტამდე გაზრდის გადაწყვეტილება მიიღო. ფაქტია, რომ მარტის თვის მეორე დეკადის მიწურულს, ვიდრე ნაჯი აბგალს თანამდებობიდან გაათავისუფლებდნენ, ერთი ამერიკული დოლარი 7.26 ლირა ღირდა, უკვე ერთი კვირის შემდეგ კი ოფიციალური კურსით ერთი დოლარის ღირებულება 7.98 ლირას გაუტოლდა.

ამერიკულ დოლართან მიმართებაში პოზიციები დათმეს ჩვენი მეზობელი სხვა სახელმწიფოების ეროვნულმა ვალუტებმაც. მცირედით გაუფასურდნენ რუსული რუბლი და სომხური დრამი. გამონაკლისია აზერბაიჯანული მანათი, რომელიც დღემდე მყარ პოზიციებს ინარჩუნებს. ჩვენ ჩვენი მკვდარი ვიტიროთ, წარუმატებლობის მიზეზის მუდმივად სხვაგან ძიებას, ეგება საკუთარ თავშიც ვეძიოთ? − მიმანიშნებს მკითხველი და, რა გაეწყობა, ვეცდები ლარის გაუფასურების შესაძლო შიდა ფაქტორებზეც მოგახსენოთ.

ანალიტიკოსთა ერთი ნაწილის შეფასებით, პირველი კვარტლის ბოლოს ეროვნული ვალუტის გაუფასურება არანაირ კავშირში არ არის თურქული ლირის, რუსული რუბლისა თუ სომხური დრამის გაუფასურებასთან. „დაახლოებით ერთი თვის წინ ვაცხადებდი, რომ მარტის თვის ბოლოს ლარი გაუფასურებას დაიწყებდა. რატომ? აპრილის თვის პირველ რიცხვებში ქვეყანამ საგარეო ვალის ნაწილი, დაახლოებით მეოთხედი მილიარდი დოლარი უნდა გაისტუმროს და ძალიან ადვილად პროგნოზირებადი იყო, რომ ვალის გასტუმრების წინა პერიოდში დოლარზე მოთხოვნა გაიზრდებოდა. ასეც მოხდა.

ამ მომენტისთვის ეროვნული ვალუტის კურსზე გავლენა არც რეფინანსირების განაკვეთის საპროცენტო მაჩვენებელს ჰქონდა, 7 პროცენტი იქნებოდა ის თუ 10 პროცენტი, ამით ლარის კურსთან მიმართებაში არსებითად არაფერი შეიცვლებოდა, ეს მხოლოდ ინფლაციის მაჩვენებელზე აისახებოდა. რაკი ინფლაცია ვახსენე, ისიც უნდა ითქვას, რომ 2010 წლიდან დღემდე სამომხმარებლო ფასების ინდექსი 120 პროცენტით გაიზარდა, რაც იმაზე მეტყველებს, რომ ეროვნული ბანკი ფასების სტაბილურობას თავს ვერ ართმევს. ახალი არ არის, რომ წლების განმავლობაში ვაკრიტიკებდი ეროვნული ბანკის ფულად-საკრედიტო და

მონეტარულ პოლიტიკას, მთავრობის ეკონომიკური გუნდის პოზიციას. არ შეიძლება ტურიზმი ქვეყნის ეკონომიკის პრიორიტეტად აქციო, ლარი ემიგრანტების შრომას ჩამოკიდო“, – აცხადებს ფინანსისტი ნიკა შენგელია. მისი თქმით, თუ უახლოეს დღეებში ბიზნესი ეროვნული ვალუტის სტაბილიზაციას არ იგრძნობს, უახლოეს დღეებში ფასების გაძვირება გარდაუვალი იქნება. ეროვნული ვალუტის გაუფასურებას ბიზნესისთვის დამღუპველი ეფექტი აქვს. ლარის კურსი მცირე და საშუალო ბიზნესს კი არა მსხვილ ბიზნესსაც ისე ურტყამს, რომ უკვე გაუსაძლისია. უსწრაფესად უნდა მოხდეს რაღაც ნიშნულზე მისი დასტაბილურება.

ამასობაში, როგორც ბიზნესმენთა ერთი ნაწილი აცხადებს, დღევანდელ მოცემულობაში ლარის კურსის გასაუმჯობესებლად წინაპირობები არ არსებობს და არ არის გამორიცხული, ეროვნული ვალუტა კიდევ უფრო გაუფასურდეს.

„მძიმე ვითარებაში, როცა ეროვნული ვალუტის სტაბილურობის ხუთი ძირითადი ფაქტორიდან (უცხოური ინვესტიციები, ტურიზმი, ექსპორტი, ფულადი გზავნილები საზღვარგარეთიდან და კრედიტები) ოთხი ფაქტობრივად გაჩერებულია, ქვეყანაში კი მორიგი „ლოკდაუნის“ პროგნოზი კეთდება, არ არის გამორიცხული, ლარის კურსმა ამერიკულ დოლართან მიმართებაში ოთხსაც მიუკაკუნოს“, − განაცხადა ბიზნესმენმა ლევან ყარალაშვილმა.

შეეძლო თუ არა ეროვნულ ბანკს ლარის მორიგი გაუფასურების თავიდან აცილება? 2021 წლის დასაწყისიდან დღემდე ეროვნულმა ბანკმა სავალუტო ბაზარს სულ 160 მილიონი ამერიკული დოლარი მიაწოდა. ფაქტია, ეროვნული ვალუტის კურსის ვარდნის შესაჩერებლად ეს საკმარისი არ აღმოჩნდა. ამ ვითარებაში, პარლამენტის საფინანსო-საბიუჯეტო კომიტეტის თავმჯდომარის ირაკლი კოვზანაძის მოსაზრებით, კობა გვენეტაძის უწყებამ კიდევ უფრო უნდა იაქტიუროს.

„ბიუჯეტისა და ფულად-საკრედიტო პოლიტიკის განხილვისას ვთქვი, რომ ბიუჯეტის მაღალი დეფიციტის პირობებში ეროვნულ ბანკს მეტი ინტერვენციების გაკეთება და რეფინანსირების განაკვეთის გაზრდა მოუწევდა. ეროვნულმა ბანკმა მის ხელთ არსებული ორივე ინსტრუმენტი გამოიყენა და მომავალშიც მოუწევს. მინდა გითხრათ, ეროვნული ბანკი უფრო მეტად თამამი და აქტიური უნდა იყოს ბაზარზე მოქმედებისთვის. მე ყოველთვის მოვუწოდებ ეროვნულ ბანკს, რომ ზოგჯერ წინმსწრებად იმოქმედოს, მოვლენების პროგნოზირება აკეთოს, რომ სავალუტო ბაზარზე რყევები აიცილოს“, − განაცხადა ირაკლი კოვზანაძემ.

საპარლამენტო კომიტეტის თავმჯდომარის პოზიციას ბიზნესმენი ლაშა პაპაშვილიც იზიარებს. მისი თქმით, ამჟამად სავალუტო რეზერვები ისტორიულ მაქსიმუმზეა და ლარის გამყარება სწორედ რეზერვების გაყიდვის გზით უნდა მოხდეს. „მე არ ვიცი, რისთვის აგროვებს ეროვნული ბანკი რეზერვებს, როცა ახლა გვჭირდება“, − განაცხადა ლაშა პაპაშვილმა.

ლარის სტაბილურობის სავალუტო რეზერვებით უზრუნველყოფის საკითხზე პროფესიულ და ანალიტიკურ წრეებში განსხვავებული მოსაზრებებიც არსებობს. ფინანსისტთა ერთი ნაწილი ვარაუდობს, რომ ეროვნული ბანკის მიერ გაღებული ინტერვენციები ეროვნულ ვალუტას ვერ ასტაბილურებს.

„ეს თანხა „გადაყრილი ფულია“. ორ კვირაში ერთხელ 40-40 მილიონი დოლარის გაღება იგივეა, წახვიდე და ეს ფული მტკვარში გადაყარო. ლარს არა ეროვნული ბანკის ინტერვენციამ, არამედ ეკონიმიკის ამუშავებამ უნდა უშველოს“, − აცხადებს ფინანსისტი დავით წიქარიძე.

„თიბისი ბანკის“ გენერალური დირექტორის ვახტანგ ბუცხრიკიძის შეფასებით, ეროვნული ვალუტის სტაბილურობა და მისი კურსის პროგნოზი შესაძლებელი იქნება მხოლოდ მას შემდეგ, რაც პოზიტიური ქმედებები დაიწყება ქართულ ეკონომიკაში.

ქართული ეკონომიკა ვახსენე და გეტყვით, „საქსტატის“ მონაცემებით, იანვრის რეკორდული, 11.5 პროცენტით შემცირების შემდეგ თებერვალში საქართველოს ეკონომიკა 5.1 პროცენტით შემცირდა. პროგრესი არის, თუმცა ადვილად დათვლადია, რომ ეროვნული ვალუტის კურსის სტაბილურობისთვის ეს ძალიან უმნიშვნელოა. როგორც ანალიტიკოსები აღნიშნავენ, ერთნიშნა შემცირება ორნიშნა ზრდამ უნდა ჩაანაცვლოს.

აქ ვაპირებდი წერტილის დასმას, როცა შევიტყვე, რომ ვიცე-პრემიერი და ფინანსთა მინისტრი ივანე მაჭავარიანი თანამდებობიდან გადადგა. არ განუმარტავს – რატომ. მხოლოდ მადლობებით შემოიფარგლა. მადლობის ადრესატები კი მრავლად იყვნენ. მომავალი ფინანსთა მინისტრის ნამდვილად არ მშურს, სხვა მრავალ გამოწვევასთან ერთად მას ხომ მოუწევს თვალი გაუსწოროს ეროვნული ვალუტის დევალვაციას...

 

1113
ფაბრიკა ანაბეჭდი

ადგილობრივი კომპანიებისთვის უნიფორმებს საქართველოში შეკერავენ

26
(განახლებულია 11:01 14.04.2021)
„ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს.

თბილისი, 14 აპრილი – Sputnik. ქართული სამკერვალო საწარმო „ანაბეჭდი“, რომელიც ქვეყანაში წამყვან ბრენდულ კომპანიებს უნიფორმებით ამარაგებს, სახელმწიფო სააგენტო „აწარმოე საქართველოში“ ფინანსური მხარდაჭერით გაფართოვდა. 

„ანაბეჭდი“ სააგენტოს ინდუსტრიული მიმართულების კომპონენტის ფარგლებში ფინანსური მხარდაჭერით სარგებლობს. აღნიშნული მხარდაჭერით  საწარმო აღიჭურვა სპეციალური და უნივერსალური საკერავი მანქანა-დანადგარებით. შედეგად, წარმოების პროცესი უფრო სწრაფი გახდა, პროდუქცია კი - მეტად ხარისხიანი.

წარმოების პროცესს ეკონომიკისა და მდგრადი განვითარების მინისტრი ნათია თურნავა, სააგენტოს „აწარმოე საქართველოში“ დირექტორ მიხეილ ხიდურელთან ერთად, ადგილზე გაეცნო.

 „კომპანიას გაფართოების ძალიან კარგი გეგმები აქვს.  შეიძინეს დანადგარები პროგრამა „აწარმოე საქართველოში“ დახმარებით, უნიკალურ პროდუქციას უშვებენ და ამარაგებენ ბაზრის 90%-ს - მათ შორის, უნიფორმებით. ეს არის ადგილობრივი წარმოების განვითარების ერთ-ერთი შედეგი, რასაც ჩვენ ყოველთვის შევუწყობთ ხელს“, - აღნიშნა ნათია თურნავამ.

 „ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს. კომპანია უნიფორმებს ქმნის ისეთი ბრენდებისთვის, როგორიცაა Agrohub, Goodwill, Elit Electronics, Carrefour, Domino, East Point და ა.შ. 

ფაბრიკაში ამ ეტაპზე 100–მდე ადამიანი მუშაობს. კომპანია ძალისხმევას არ იშურებს დასაქმებულთა პროფესიული განვითარებისთვის, ამიტომაც ისინი პერიოდულად გადამზადების კურსს გადიან.

აღნიშნული პროექტის მთლიანი საინვესტიციო მოცულობა 3,7 მლნ ლარზე მეტს შეადგენს.

კომპანიის გეგმებშია ქსოვილების წარმოების დაწყება, რამდენადაც ამ ეტაპზე იგი უცხოეთიდან შემოაქვთ. ეს კომპანიას თანამშრომელთა შტატის გაზრდისა და პროდუქციის ხარისხის ამაღლების შესაძლებლობას მისცემს

 „აწარმოე საქართველოში“ – საქართველოს ხელისუფლების ერთ-ერთი მთავარი პროექტია, რომელიც მიზნად ისახავს ქვეყანაში ადგილობრივი წარმოების განვითარებას. სააგენტო აერთიანებს ყველა სახელმწიფო პროგრამას, მიმართულს ბიზნეს-სექტორის ხელშეწყობისა და ქვეყნის ეკონომიკური განვითარებისკენ.

პროგრამა მიმართულია მიკრო და მცირე ბიზნესის განვითარების, თანამედროვე სამეწარმეო კულტურის დამკვიდრების და ახალი სამუშაო ადგილების შექმნისკენ. პროგრამა ასევე ხელს შეუწყობს კორონავირუსის პანდემიით გამოწვეული ნეგატიური ეკონომიკური შედეგების შემცირებას.

საუბარია სესხების სუბსიდირებასა და უზრუნველყოფაზე, რომლებიც მოიცავს 200-ზე მეტი სახის საქმიანობას და მიკროგრანტებს, რომლებიც ეხება 300-ზე მეტი სახის საქმიანობას.

 

პროგრამის ფარგლებში უკვე დაფინანსებულია 6.212 პროექტი, რომელთა ინვესტიციის საერთო მოცულობამ 61 მლნ ლარზე მეტი შეადგინა.

26
თემები:
სამთავრობო პროგრამა „აწარმოე საქართველოში“
ნათია თურნავა

თურნავა: თუ ინვესტორი ვალდებულებებს ვერ შეასრულებს, მას გადაცემული მიწა ჩამოერთმევა

58
(განახლებულია 11:01 14.04.2021)
როგორც ნათია თურნავამ აღნიშნა, ვრცელდება მოსაზრება, თითქოს ამ მიწაზე თურქები უნდა ჩამოასახლონ, რაც არ შეესაბამება სიმართლეს.

 

თბილისი, 14 აპრილი – Sputnik. „ნამახვანჰესი“ არა თურქული ან ნორვეგიული, არამედ ქართული ჰიდროელექტროსადგურია, განაცხადა საქართველოს ეკონომიკისა და მდგრადი განვითარების მინისტრმა ნათია თურნავამ  ტელეკომპანია „იმედის“ ეთერში. 

საქართველოს მთავრობამ „ნამახვანჰესის“ პროექტის შემუშავების, მშენებლობის, მფლობელობისა და მისი კასკადის ექსპლუატაციის უფლება 2019 წელს ნორვეგიულ კომპანია Clean Energy Group-ს გადასცა, რომელმაც, თავის მხრივ, მშენებარე კომპანიად თურქული ENKA მოიწვია. საინჟინრო ნაგებობა ერთბაშად ორი მუნიციპალიტეტის – ცაგერისა და წყალტუბოს ტერიტორიებს დაიკავებს.

„ნამახვანჰესის“ კასკადის მშენებლობის პროექტის წინააღმდეგ პროტესტი 6 თვის წინ დაიწყო. აქციის მონაწილეები მშენებლობის შეწყვეტას და თურქული კომპანია ENKA-სთან გაფორმებული კონტრაქტის მოშლას მოითხოვენ. მომიტინგეები მიიჩნევენ, რომ ჰესი გარემოზე დამანგრეველ ზემოქმედებას მოახდენს. ხელისუფლება აცხადებს, რომ პროექტის ძირითადი სამუშაოები 6 თვით შეჩერდება, რათა პროექტის ხელახალი გადამოწმება მოხდეს, მაგრამ კონტრაქტის გაწყვეტას არ აპირებს.

თურნავას განცხადებით,  მიწა კომპანიისთვის უფასოდ არ გადაცემულა და ინვესტორი  830 მილიონ დოლარს იხდის.

„ინვესტორმა უკვე გადაუხადა 34 მილიონი ლარი 270 ადგილობრივ ოჯახს – თითო ოჯახს საშუალოდ 125 ათასი ლარი შეხვდა იმ მიწის სანაცვლოდ, რომელიც იურიდიულად სახელმწიფოს ეკუთვნოდა, მაგრამ ვინაიდან ეს ოჯახები იქ სახლობდნენ და საქმიანობდნენ, სახელმწიფომ მოითხოვა ამ კომპენსაციების გაცემა“, - განაცხადა თურნავამ. 

ამასთან მინისტრმა აღნიშნა, რომ ეს არის ძალიან მკაცრად გაკონტროლებული, მიზნობრივად გადაცემული მიწის რესურსი, რომელზეც ინვესტორს უფლება აქვს, მხოლოდ პროექტის მიხედვით ააშენოს ჰესის ნაგებობები.

„თუ ინვესტორმა ვერ შეასრულა თავისი ვალდებულებები და ვერ ააშენა შესაბამის ვადებში კონკრეტული სიმძლავრის ჰიდროსადგური ან დაარღვია ნებართვით დაკისრებული უფლებები, მას ეს მიწა ჩამოერთმევა. ეს არის პირობადებული საკუთრება, რომლის საფასურიც ინვესტორმა გადაუხადა არა სახელმწიფოს, არამედ ადგილობრივ მოსახლეობას“, - აღნიშნა თურნავამ.

რიონის ხეობაში საპროტესტო აქციები ამ დრომდე არ წყდება. გუშინ,  აქტივისტებმა თურქული კომპანია „ენკას“ ბაზასთან მისასვლელი გზა გადაკეტეს  და განაცხადეს, რომ კომპანია „ენკას“ მანქანებს არ გაატარებდნენ. მომიტინგეებსა და აქციის მონაწილეებს შორის დაპირისპირებაც სწორედ კომპანიის მანქანების გამოჩენას მოჰყვა. პოლიცია გზის გათავისუფლებას შეეცადა, რასაც დაპირისპირება მოჰყვა. შედეგად სამართალდამცველებმა სოფელ გუმათში გამართული აქციის დროს ექვსი აქტივისტი დააკავეს. 

მანამდე აქციის მონაწილეებს კარვები ჰქონდათ გაშლილი სოფელ ნამოხვანში, ორი დღის წინ კი პოლიციამ აიღო კარვები და ნამოხვანისკენ გზა გადაკეტა. ამის შემდეგ მომიტინგეებმა კარვები სოფელ გუმათში გაშალეს, „ნამახვანჰესის“ სამშენებლო ტერიტორიიდან უფრო მოშორებით. მომიტინგეები მოითხოვენ, მიეცეთ შესაძლებლობა პროტესტი კვლავ ნამოხვანში გააგრძელონ.

პოლიციამ კარვების აღების მიზეზად რიონის მოსალოდნელი ადიდება დაასახელა, რაც მომიტინგეებს საფრთხეს შეუქმნიდა. გარდა ამისა, 10 აპრილს რიონში აქციის ერთ-ერთი მონაწილე გაუჩინარდა, რომლის სამძებრო სამუშაოები დღემდე მიმდინარეობს. პოლიციამ ისიც განაცხადა, რომ კარვები მათ საძიებო სამუშაოების განხორციელებაში ხელს უშლიდა.

პოლიციის თქმით, აქტივისტები კომპანია ENKA-ს თანამშრომლებისთვის საფრთხეს წარმოადგენენ.

„ნამახვანის ჰესების კასკადის“ პროექტი მდინარე რიონზე გააერთიანებს ორ ჰესს - „ქვემო ნამახვანს“ და „ზემო ნამახვანს“, საერთო 433 მეგავატი დადგმული სიმძლავრით. პროექტის სავარაუდო ღირებულება 750 მლნ დოლარს შეადგენს. პროექტის დასრულების შემდეგ საქართველოში ელექტროენერგიის წარმოება 15%–ით გაიზრდება.

58
პოლიცია

პროტესტი გრძელდება: რიონის ხეობაში რკინის ბარიკადები აღმართეს

0
(განახლებულია 14:08 14.04.2021)
რიონის ხეობაში საპროტესტო აქციები არ წყდება, მომიტინგეებს დღეს სამართალდამცველებმა გზა ჩაუხერგეს.

თბილისი, 14 აპრილი – Sputnik. სამართალდამცველებმა  რიონის ხეობაში „გუმათჰესთან“ რკინის ღობე აღმართეს, იუწყება „Sputnik-საქართველოს“ კორესპონდენტი შემთხვევის ადგილიდან.

ძალოვანებმა ამ ფორმით გადაუკეტეს გზა დემონსტრანტებს, რომლებიც „ნამახვანჰესის“ კასკადის მშენებლობის წინააღმდეგ გამოდიან. აქტივისტები „გუმათჰესიდან“ სოფელ ნამოხვანისკენ მსვლელობის მოწყობას გეგმავდნენ, რათა იქ მიმდინარე სამუშაებისთვის ხელი შეეშალათ. ახლა პროტესტის ნიშნად აქტივისტები რკინის ღობეებს მუშტებს ურტყამენ. 

წყალტუბოს მუნიციპალიტეტში რამდენიმე დღე გადაუღებლად წვიმდა. რადგანაც გამოიდარა, აქტივისტები დღეს უფრო მასშტაბურ აქციას გვპირდებიან და მათ, შესაძლოა, სხვა რეგიონებიდან ჩამოსული ადამიანებიც შეუერთდნენ.

გასულ ღამეს რიონის ხეობაში „ნამახვანჰესის“ მშენებლობის მოწინააღმდეგეებმა ინვესტორი კომპანია ENKA-ს ერთ-ერთი ოფისისკენ მიმავალი გზა გადაკეტეს. მოხდა დაპირისპირება, შედეგად დაკავებულია ექვსი  ადამიანი.

„ნამახვანჰესის“ მშენებლობის წინააღმდეგ საპროტესტო აქციები ნახევარი წლის წინ დაიწყო. აქციის მონაწილეები მოითხოვენ, შეწყდეს ჰესის მშენებლობა, ხელისუფლებამ კი თურქულ კომპანია Enka-სთან კონტრაქტი გააუქმოს. საკუთარი პოზიციის გასამყარებლად მომიტინგეები საუბრობენ გარემოზე ჰესის დამანგრეველ ზემოქმედებასა და საეჭვო გარიგებაზე ინვესტორთან. პასუხად საქართველოს ხელისუფლებამ განაცხადა, რიმ მშენებლობას ექვსი თვით შეაჩერებენ, რათა კიდევ ერთხელ მოხდეს პროექტის გადამოწმება, თუმცა კონტრაქტის გაუქმებას არ აპირებენ.

თავის მხრივ, კომპანია ENKA-ს წარმომადგენლები აცხადებენ, რომ „ნამახვანჰესის“ კასკადის პროექტი სრულიად უსაფრთხოა, გარდა ამისა, თურქული კომპანიის წარმომადგენელმა ელენე გუბიანურმა განაცხადა, რომ პროექტზე 1600 ადგილობრივი მაცხოვრებელი დასაქმდება.

0