დაკეტილი კაფეები და რესტორნები

კვების ობიექტების შიდა სივრცეებისთვის ახალი წესები მუშავდება

75
საქართველოს მასშტაბით კვების ობიექტებმა და რესტორნებმა მუშაობა ღია სივრცეში 15 თებერვლიდან განაახლეს. შიდა სივრცეების გახსნის თარიღი ჯერჯერობით უცნობია

თბილისი, 17 თებერვალი - Sputnik. კვების ობიექტების შიდა სივრცეებისთვის მუშაობის ახალ წესებზე აქტიური მსჯელობა მიმდინარეობს.

გასული წლის ზაფხულში, კორონავირუსის პირველი ტალღის შემდეგ რესტორნებისთვის შემუშავდა მუშაობის წესები. თუმცა ამჟამად ეს წესები კიდევ უფრო გამკაცრდება, რადგან მიიჩნევა, რომ რესტორანი „მაღალი რისკის შემცველი ობიექტია“.

„ჩვენ ვმსჯელობთ, რომ კიდევ უფრო გავამკაცროთ ერთ მაგიდასთან ადამიანთა რაოდენობა და თუ ეს იყო ექვსი ადამიანი, ახლა შეიძლება იყოს შიდა სივრცეში ოთხი ადამიანი, ხოლო გარე სივრცეში ექვსი ადამიანი“, - განაცხადა შრომის პირობების ინსპექტირების დეპარტამენტის უფროსმა, ბექა ფერაძემ ეკონომიკის სამინისტროში სარესტორნო ბიზნესთან შეხვედრის დასრულების შემდეგ.

ფერაძის განცხადებით, მსჯელობა მიმდინარეობს იმაზეც, რომ კვების ობიექტებში ადამიანთა მაქსიმალური რაოდენობის დაშვება განისაზღვროს ობიექტის ფართობის მიხედვით. მისი თქმით, ზედა ზღვრის დაწესება მნიშვნელოვანია, რათა რესტორნებში არ გაიმართოს სოციალური ღონისძიებები.

გარდა ამისა, კვების ობიექტებს, ბაზრობებისა და მოლების მსგავსად, თანამშრომელთა ტესტირება მოუწევთ. შეხვედრაზე იმსჯელეს, რა დოზით შეიძლება იყოს ჩართული სახელმწიფო ამ საკითხში.

შრომის პირობების ინსპექტირების დეპარტამენტის უფროსის განცხადებით, მკაცრად გაკონტროლდება კვების ობიექტებში რეგულაციების დაცვა, რათა კვლავ შეზღუდვების დაწესება არ გახდეს საჭირო. ამ რეგულაციებში მოიაზრება სიცხის გაზომვა, ხელების დამუშავება, ერთჯერადი მენიუ ან მისი ელექტრონული ვერსია. 

საქართველოს მთავრობამ 28 ნოემბრიდან მოქმედი კოვიდ-შეზღუდვების ეტაპობრივი მოხსნის გადაწყვეტილება დაგეგმილ ვადაზე ადრე მიიღო. საქართველოში და, მათ შორის, თბილისში, რუსთავსა და ქუთაისში 15 თებერვლიდან კვების ობიექტები გაიხსნა. ისინი სტუმრებს მაქსიმუმ 21:00 საათამდე და მხოლოდ ღია სივრცეში უმასპინძლდებიან. შაბათ-კვირას კვების ობიექტები არ მუშაობენ.

ჯერჯერობით უცნობია, როდის შეძლებენ კვების ობიექტები შიდა სივრცეების გახსნას. კორონავირუსის პანდემიის გამო დაწესებული შეზღუდვების მოხსნა ეტაპობრივად მიმდინარეობს.

75
მიწის დამუშავება

დევნილებს სასოფლო-სამეურნეო ტექნიკა გადაეცათ

50
პროგრამის მიზანს წარმოადგენს მოწყვლადი დევნილების თვითდასაქმების/დასაქმების ხელშეწყობა მათი ეკონომიკური მდგომარეობის გაუმჯობესებაზე ორიენტირებული ინიციატივების მხარდაჭერის გზით.

თბილისი, 6 მარტი – Sputnik. სასოფლო-სამეურნეო საქმიანობის ხელშეწყობის მიზნით 27 დევნილს ხელის ტრაქტორი გადაეცა. ინფორმაციას დევნილთა, ეკომიგრანტთა და საარსებო წყაროებით უზრუნველყოფის სააგენტო ავრცელებს.

დევნილებს ტექნიკა „დევნილთა ინიციატივების მხარდაჭერის პროგრამის“ ფარგლებში გადაეცათ. პროგრამის მიზანს იძულებით გადაადგილებულ პირთა სოციალურ-ეკონომიკური მდგომარეობის გაუმჯობესება და მათთვის შემოსავლის წყაროს გაჩენა წარმოადგენს.

უწყების ინფორმაციით, ბოლო ერთი წლის განმავლობაში, დევნილთა სააგენტომ, საარსებო წყაროებით უზრუნველყოფის პროგრამების ფარგლებში, 400-ზე მეტი იძულებით გადაადგილებული პირი დააფინანსა.

„დევნილთა ინიციატივების მხარდაჭერის საგრანტო პროგრამა“ გათვლილია მოწყვლად დევნილებზე, რომლებიც არიან სოციალურად დაუცველი ოჯახების მონაცემთა ერთიან ბაზაში რეგისტრირებული და მათი ოჯახის სარეიტინგო ქულა 65.001-100.001-ს ფარგლებში მერყეობს.

დევნილები მხარდაჭერას გრანტის სახით ორი მიმართულებით:

1. სასოფლო-სამეურნეო ინიციატივები;

2. თვითდასაქმებაზე ორიენტირებული არასასოფლო-სამეურნეო ინიციატივები.

მხარდაჭერა გულისხმობს ტექნიკა/დანადგარების შეძენას არაუმეტეს 2 500 ლარის ფარგლებში. ამასთანავე, შესაძლებელია ერთი განმცხადებლის მიერ მოთხოვნილი იქნეს არაუმეტეს 3 ნივთი. თითო ნივთის ღირებულება უნდა იყოს არანაკლებ 150 ლარი.

მხარდაჭერა შესაძლებელია როგორც საქმიანობის დამწყებთათვის, ასევე უკვე არსებულის გაძლიერების მიზნით.

50
თბილისის აეროპორტი

შუა აზიის ქვეყნების მოქალაქეებისთვის საქართველოში შემოსვლა გამარტივდა

33
ქვეყანაში შემოსვლა შემსუბუქდება მხოლოდ მათთვის, ვინც ავიარეისებით ჩამოვა. სახმელეთო და საზღვაო საზღვრები კვლავ დაკეტილია.

თბილისი, 6 მარტი – Sputnik. თურქმენეთის, ტაჯიკეთის, ყირგიზეთისა და უზბეკეთის მოქალაქეებს საქართველოში ჩამოსვლა ვაქცინაციის გარეშე შეუძლიათ. ამის შესახებ ეკონომიკისა და მდგრადი განვითარების მინისტრმა ნათია თურნავამ განაცხადა.

საქართველოს მთავრობის გადაწყვეტილებით, ამ ქვეყნების მოქალაქეებმა საქართველოში ჩამოფრენისას თან უნდა იქონიონ PCR-ტესტის უარყოფითი პასუხი.

საქართველოს ხელისუფლებამ საჰაერო საზღვრები უცხოელებისთვის 1 თებერვლიდან გახსნა. სახმელეთო და საზღვაო საზღვრები კვლავ დაკეტილია.

მინისტრმა განსაკუთრებული ყურადღება გაამახვილა უზბეკეთზე, რომელთანაც პანდემიამდე პირდაპირი ავიამიმოსვლა მოქმედებდა.

„ჩვენ განსაკუთრებით დიდ ნაკადებს ველოდებით უზბეკეთიდან. შემოსვლის რეჟიმის შემსუბუქების პარალელურად, ვფიქრობთ, რომ ფრენები ამ ქვეყანასთან გააქტიურდება“, – განაცხადა ნათია თურნავამ.

აქამდე კორონავირუსზე უარყოფითი შედეგის ამსახველი ცნობით საქართველოში შემოსვლა შეეძლოთ ევროკავშირის ქვეყნების მოქალაქეებსა და რეზიდენტებს, ისრაელის, შვეიცარიის, ნორვეგიის, აშშ-ის, დიდი ბრიტანეთის, კატარის, არაბთა გაერთიანებული საამიროების, ბაჰრეინისა და თურქეთის მოქალაქეებს, ასევე რუსეთის, სომხეთის, აზერბაიჯანის, ბელარუსის, უკრაინისა და ყაზახეთის მოქალაქეებს.

საქართველოს საგარეო საქმეთა სამინისტროში აღნიშნავენ, რომ მოგზაურებმა უნდა გაითვალისწინონ შემდეგი:

  • საქართველოში ამ ქვეყნებიდან უნდა ჩამოვიდნენ საჰაერო გზით, დასაშვებია ტრანზიტი მესამე ქვეყნების გავლით;
  • საზღვარზე უნდა წარმოადგინონ ბოლო 72 საათში ჩატარებული PCR-ტესტის უარყოფითი პასუხი;
  • საქართველოში ჩამოსვლიდან მესამე დღეს უცხოეთის მოქალაქეებმა საკუთარი ხარჯით უნდა ჩაიტარონ განმეორებითი PCR–ტესტი;
  • სახელმწიფო საზღვრის გადაკვეთის წინ საჭიროა სპეციალური ფორმის შევსება, სადაც მითითებული უნდა იყოს ბოლო 14 დღის მოგზაურობის ისტორია და საკუთარი საკონტაქტო მონაცემები (მისამართი, ტელეფონის ნომერი, ელექტრონული ფოსტა და ა.შ.).

იმ პირებმა, რომლებიც ბოლო 14 დღის განმავლობაში იმყოფებოდნენ დიდ ბრიტანეთში, აუცილებლად უნდა გაიარონ 12-დღიანი კარანტინი. ამ შემთხვევაში აღარ არის აუცილებელი PCR–ტესტის უარყოფითი პასუხის წარდგენა საზღვარზე, ასევე ტესტის განმეორებით ჩატარება მესამე დღეს.

33
თბილისი

დღის ასტროპროგნოზი ზოდიაქოს ნიშნებისთვის: 7 მარტი

0
(განახლებულია 20:31 06.03.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 7 მარტია, კვირა. კლებადი მთვარე თხის რქის ნიშანშია. ამ დღეს პლანეტა მზე მფარველობს.

მთელი დღე კამათის განწყობა იქნება, თუმცა ეს დრო არანაირად არ შეესატყვისება არანაირ დავას. კონფლიქტური სიტუაციები თავიდან რომ აიცილოთ, ნუ შეცდებით ოპონენტების რამეში გადარწმუნებას. ზოგადად, დღეს კამათში გაიმარჯვებს ის, ვინც მასში მონაწილეობას არ მიიღებს. რაც შეეხება სხვა საკითხებს, კარგი დღეა ისეთი საქმიანობისთვის, რომელიც კონკრეტიკას, სიზუსტესა და პრაქტიკულობას მოითხოვს, ანუ არჩევანმა თუ მოგიწიათ პოეზიასა და მათემატიკას შორის, ეს უკანასკნელი არჩიეთ.

საუკეთესო კოლეგები ზოდიაქოს ნიშნის მიხედვით>>

ვერძი: მოქმედების დრო დადგა. რამდენი გეგმაც არ უნდა დააწყოთ, ოდესმე მისი განხორციელება მოგიწევთ. შესაძლოა, ვერ ბედავდით რამე პროექტის დაწყებას, გრძნობებში გამოტყდომას, საგზურის აღებას სადმე წასასვლელად, ან საოცნებო ნივთის ყიდვას. დღეს სწორედ რომ ის დროა, როცა უნდა მოიკრიბოთ ნებისყოფა და მოქმედება დაიწყოთ. თუნდაც წინ დიდი გზა გქონდეთ გასავლელი, არაფერს შეუშინდეთ – ნებისმიერი გზა პირველი ნაბიჯით იწყება.

კურო: დღეს გაქვთ შესაძლებლობა, რომ რამე შეცდომა გამოასწოროთ. ეს შეიძლება შეეხებოდეს როგორც ყოფით, ისე სამუშაო მომენტებს, ან, სულაც, რაღაც უფრო გლობალურს, მაგალითად, ახლობელ ადამიანთან ურთიერთობის გამორკვევას. რა თქმა უნდა, ადვილი არ არის, გამოუტყდეთ საკუთარ თავსა და გარშემომყოფებს, რომ მართალი არ ხართ და შეცდომა დაუშვით, მაგრამ თუ ამას გააკეთებთ, არ ინანებთ – მხრებიდან მძიმე ტვირთს მოიშორებთ და წინ ახალი პერსპექტივები გამოჩნდება.

ტყუპი: დღეს უკომპრომისო ხართ მათ მიმართ, ვინც თქვენთვის ხელის შეშლას, თქვენი საქმეების დამუხრუჭებას ან ღიად შეწინააღმდეგებას გადაწყვეტს. ამასთან, მრისხანება შეიძლება დაატყდეს იმასაც, ვინც თქვენს მეგობრებსა და ახლობლებს, გინდაც უცხოებს უსამართლოდ გაანაწყენებს. ასეთი კატეგორიული დამოკიდებულება, ერთი მხრივ, მოგცემთ საშუალებას, რომ „გააცამტვეროთ“ ოპონენტები, ხოლო მეორე მხრივ, საღამოს შეიძლება აღმოაჩინოთ, რომ რამდენიმე ახალი მტერი შეიძინეთ, ან, შესაძლოა, მეგობარიც.

კირჩხიბი: დღეს ვარსკვლავები გირჩევენ, არ იაროთ „ორღობეებით“ იქ, სადაც პირდაპირი მოსწორებული გზა არსებობს. პირდაპირი გზა ყველაზე მოკლეა, მაგრამ ეს ხშირად გვავიწყდება. თქვენი წარმატებული სტრატეგია მარტივია: არანაირი ეშმაკობა, მოტყუება და რამის დამალვის მცდელობა. ცხოვრების ყველა სფეროში – მეგობრობაშიც, სამუშაოზე, სიყვარულშიც მხოლოდ გულწრფელობა და პატიოსნება დაგეხმარებათ. თუ პრობლემები გაქვთ, ილაპარაკეთ ამის შესახებ. რამის მიღწევა გსურთ? – ილაპარაკეთ. მკაფიოდ ჩამოყალიბებული მიზანი თქვენ წინაშე ახალ შესაძლებლობებს გახსნის.

ლომი: ნებისმიერი წვრილმანი დღეს თქვენ თვალში, შესაძლოა, სპილოდ იქცეს. ამის გამო პრიორიტეტების განაწილება გაგიჭირდებათ – რა საქმეა გასაკეთებელი პირველ რიგში და რისი გადადება შეიძლება. ყველაფერი ერთნაირად მნიშვნელოვანი მოგეჩვენებათ. შედეგად შეიძლება ყველაფერს ერთდროულად წაეპოტინოთ, ასე კი ვერაფერს ვერ მოასწრებთ. დღემ რომ უაზრო რბოლაში არ ჩაიაროს, შეახსენთ საკუთარ თავს, რომ ბედნიერება სადღაც თავისუფლებასა და დისციპლინას შორისაა. ცოტაოდენი დისციპლინა ფიქრებსა და საქმეებში ნამდვილად არ გაწყენთ.

ქალწული: დღეს შეიძლება ვინმე გაანაწყენოთ, თან ისე, რომ ეს სულაც არ გინდოდეთ. რატომღაც ჯერ ლაპარაკობთ და შემდეგ ფიქრობთ, რა შედეგი შეიძლება მოიტანოს ამან. ემოციების გავლენით შეიძლება ვინმეს საიდუმლო წამოგცდეთ, ან თანამოსაუბრეს არცთუ სასიამოვნო სიმართლე პირში მიახალოთ. გაუგებრობებს რომ თავი აარიდოთ, ორი გზა გაქვთ – ან განმარტოვდეთ, ან ისეთ ადგილას წახვიდეთ, სადაც ერთობიან, ცეკვავენ და მუსიკა ხმამაღლა უკრავს, ანუ სადაც არავის აქვს ზედმეტი ლაპარაკის განწყობა და ამისთვის არავის სცალია.

სასწორი: დღეს ურთიერთობებში და განსაკუთრებით ახლობლებთან, სიფრთხილე გმართებთ. შესაძლოა, არატაქტიანად იმოქმედოთ იქ, სადაც ფაქიზი დამოკიდებულებაა საჭირო. ასევე შეიძლება კრიტიკულად განეწყოთ გარშემომყოფების მიმართ და საკუთარ უკმაყოფილებაზე ხმამაღლა ისაუბროთ. ახლობლებთან რომ ურთიერთობები არ გაიფუჭოთ, აჯობებს, თუ საუბარში არ შეეხებით მტკივნეულ და დელიკატურ თემებს – პრობლემას მაინც ვერ მოაგვარებთ და მისი გამწვავება კი იოლად შეგიძლიათ.

მორიელი: გარშემომყოფებმა შეიძლება კამათში, რამე თემის უაზრო განხილვაში ან კონფლიქტში ჩაგითრიონ. არ არის გამორიცხული, ისიც იგრძნოთ, რომ ვიღაც თქვენი ემოციებით „იკვებება“, ანუ ენერგეტიკული ვამპირია. ვარსკვლავები გირჩევენ, რომ თუ თავს არაკომფორტულად იგრძნობთ, მაშინვე გაეცალოთ იქაურობას. სჯობს, პოლემიკას თავი აარიდოთ, ვიდრე შემდეგ გამოწურული ლიმონივით იგრძნოთ თავი. ასე ენერგოვამპირებს შანსს წაართმევთ, რომ თქვენი ენერგიით იკვებონ.

მშვილდოსანი: დღეს თქვენი წარმატების გასაღები სიმტკიცეა. შეგიძლიათ თამამი ნაბიჯი გადადგათ, ოღონდ ეს ნაბიჯი კარგად უნდა იყოს გათვლილი. ასე რომ, თუ გაქვთ გეგმა, რომლის განხორციელებისთვის გამბედაობა არ გყოფნიდათ, დღეს სწორედ მოქმედებების დაწყების დროა. ცუდი იქნება, თუ რამე საქმეს სპონტანურად, რამე სურვილს ან ემოციას აყოლილი დაიწყებთ. ასე დიდია შეცდომის დაშვების ალბათობა.

თხის რქა: დღეს თქვენ და დელიკატურობა ძალიან შორიშორს იქნებით ერთმანეთისგან. გაქვთ სურვილი, რომ პირდაპირ თქვათ, ადამიანებს პირში მიახალოთ ყველაფერი, რისი თქმაც საჭიროდ მიგაჩნიათ. ამასთან თქვენი ლოგიკა მარტივი იქნება – „ვიცი, როგორ აჯობებს“, „ჩემი მოსაზრება სწორია“. თქვენი ამგვარი საქციელი კამათის საფუძველი რომ არ გახდეს, ვარსკვლავები გირჩევენ, საკუთარი ვნებები მშვიდობიან კალაპოტში მოაქციოთ. ანუ გააკეთოთ საქმე, სადაც გარშემომყოფები „ფეხებში არ მოგედებიან“.

მერწყული: სჯობს, დღეს ხელმძღვანელობას თვალში არ მოხვდეთ. ეს ასევე ეხება ზოგადად იმ ადამიანებს, რომლებზეც რაღაცაში ხართ დამოკიდებული, ან ვისაც თქვენზე გავლენა აქვს, იქნება ეს მშობელი, საყვარელი ადამიანი, მეგობრები. ვარსკვლავები ამბობენ, რომ დღეს დიდია რისკი, რომ ვინმეს „ცხელ გულზე“ ხელში თქვენ მოხვდეთ. დღემ რომ ექსცესების გარეშე ჩაიაროს, გარშემომყოფებთან მომხიბვლელობისა და იუმორის „ტყვიაგაუმტარი“ ფარი უნდა აღმართოთ.

თევზები: მოემზადეთ იმისთვის, რომ დღეს შესაძლოა საკუთარი ინტერესების დაცვა დაგჭირდეთ. საუბარი შეიძლება იყოს სასამართლო გარჩევაზე, ფულთან დაკავშირებულ დავაზე ან ბრალდებებზე თქვენი მისამართით. ამასთან, დიდია ალბათობა, რომ სადავო ვითარებიდან გამარჯვებული ვერ გამოხვალთ და ვერ შეძლებთ საკუთარი სიმართლის დამტკიცებას. თუნდაც ხელში რკინისებრი არგუმენტები გეკავოთ, ასტროლოგები მაინც გირჩევენ, მოიცადოთ. საკუთარი კოზირის ჩვენება სხვა დღეს სჯობს, როდესაც ბევრად ხელსაყრელი დღე გექნებათ.

0