ლარის კურსი

ვის გაურბის ლარი და სად არის ბოლო გაჩერება?

2591
(განახლებულია 11:13 10.02.2021)
ახალი წესები სავალუტო ბაზარზე. ვაჭრობის მეტი მონაწილე და კონკურენტუნარიანი გარემო. დაღმართზე შეყენებული ეროვნული ვალუტის პერსპექტივა...

სამსონ ხონელი

აუგი არ გვეთქმის, დაპირება შესრულდა! რას ამბობ, რომელი ერთი? − შესაძლოა, ჩამეძიოს მკითხველი სარკაზით სავსე ინტონაციით. ალბათ აქვს საფუძველი. ამჯერად რეპლიკას არ შევიმჩნევ და განვაგრძობ თხრობას. ჯერ კიდევ გასული წლის შემოდგომაზე ვწერდი, რომ 2021 წლიდან საფინანსო ბაზარზე სიახლე იგეგმებოდა. ასეც არის.

თებერვლიდან ეროვნული ვალუტის გაცვლითი კურსი მხოლოდ Bloomberg-ის სავალუტო სისტემის Bmatch-ის მეშვეობით დგინდება. აქამდე არსებული სისტემისგან განსხვავებით, ვაჭრობის პროცესში კომერციული ბანკებისა და მიკროსაფინანსო ორგანიზაციების გარდა, „პირდაპირი მონაწილის“ სტატუსით უკვე სხვა კომპანიებიც დაიშვებიან. საბანკო სფეროს სპეციალისტთა შეფასებით, სავალუტო ბაზარზე ახალი წესების შემოღებით, სავარაუდოდ, გაიზრდება როგორც ვაჭრობაში ჩართული პირების, ისე დღის განმავლობაში დადებული გარიგებების რაოდენობა. ახალი პლატფორმით კომერციულ ბანკებს შესაძლებლობა აქვთ – გარიგებების შეთავაზებები უშუალოდ კლიენტი კომპანიების სახელით გააკეთონ.

როგორ აისახება სიახლე ლარის კურსზე? ექსპერტ-ანალიტიკოსთა შეფასებით, სავალუტო ბაზარზე შექმნილი ვაჭრობის ახალი სისტემა ხელს შეუწყობს ეროვნული ვალუტის კურსის ჩამოყალიბებაში უფრო მეტი სუბიექტის მონაწილეობას. ბუნებრივია, მეტი კონკურენცია დადებითად უნდა აისახოს ვაჭრობის პროცესზე. ნაკლებად სავარაუდოა, რომ ამ სიახლეს უშუალოდ ლარის კურსზე რაიმე სახის გავლენა ჰქონდეს. ანალიტიკური წრეების შეფასებას ეროვნულ ბანკშიც იზიარებენ. როგორც კობა გვენეტაძის უწყებაში განმარტავენ, ვაჭრობის ახალი სისტემა სავალუტო ბაზარზე მონაწილეთა რაოდენობის ზრდას უზრუნველყოფს და, ბუნებრივია, მოიმატებს კონკურენციის დონეც. რამდენიმე დღის ანალიზმაც ცხადყო, რომ პლატფორმაზე შექმნილია ვაჭრობის კონკურენტული გარემო. მნიშვნელოვანია, რომ გარიგებები არ ხასიათდება დიდი მერყეობებით და, რაც მთავარია, სრულად შეესაბამება გარიგების დადების დროს ბაზარზე არსებულ რეალობას.

Bmatch პლატფორმა რამდენიმე მთავარ პირობას ემყარება: პირველი − გარიგებები იდება სტანდარტული პირობებით, ანუ ერთი და იმავე ანგარიშსწორების თარიღით და არსებობს გარიგების მინიმალური ოდენობა; მეორე − გარიგებები იდება ავტომატურად მყიდველისა და გამყიდველის კურსის თანხვედრის შემთხვევაში, რაც უზრუნველყოფს გარიგების დადებას კონკრეტულ მომენტში არსებული საუკეთესო კურსით; მესამე − პლატფორმაზე განთავსებული ყიდვა-გაყიდვის განაცხადები ანონიმურია, მანამ, სანამ პლატფორმის მიერ არ მოხდება გარიგების ავტომატური რეგისტრაცია; მეოთხე − პლატფორმის მონაწილეები თავადვე განსაზღვრავენ მათთან გარიგებაში დაშვებულ კონტრაგენტებსა და სავაჭრო ლიმიტებს.

ადრე უკვე დავწერე და კვლავაც ასე ვფიქრობ – ეროვნული კურსის ახალ პლატფორმაზე განსაზღვრისას მცირედით მაინც უნდა შემცირდეს კომერციული ბანკის ე.წ. ფასნამატის წილი, ანუ თუ კომერციული ბანკი სავალუტო ბაზარზე ადრე ერთ ამერიკულ დოლარს, პირობითად, 3.25 ლარად ყიდულობდა და დოლარის შეძენის მსურველ კომპანიაზე ერთი, ორი ან კიდევ უფრო მეტი ერთეულით ძვირად ყიდდა, ახლა ეს კომპანია თავად შეძლებს ივაჭროს და არ იყოს საბანკო სექტორის ნების შემხედვარე. ვცდები თუ არა, ამას უახლოესი მომავალი გვიჩვენებს. მანამდე კი ვნახოთ, ორი თვის გასაყარზე როგორ შეიცვალა ლარის კურსი, რა გზას დაადგა ეროვნული ვალუტა.

გასული კვირის დასაწყისში ბლუმბერგის სავაჭრო პლატფორმაზე 1 ამერიკული დოლარი 3.298 ლარად იყიდებოდა, თუმცა რამდენიმე დღეში ეროვნული ვალუტა 0.52 პროცენტით გაუფასურდა და უკვე კვირის ბოლოს 1 ამერიკული დოლარის ღირებულებამ 3.316 ლარი შეადგინა. ერთი სიტყვით, იანვრის მესამე დეკადაში ამერიკულ დოლართან მიმართებაში 0.05 პროცენტით გამყარებყლი ეროვნული ვალუტა კვლავ დაღმა დაეშვა. არ ვიცი, ვის და რამდენად განუგეშებთ, მაგრამ გეტყვით, რომ ერთთვიანი გამყარების შემდეგ, საანგარიშო პერიოდში ამერიკულ დოლართან მიმართებაში 0.60 პროცენტით გაუფასურდა სომხური დრამიც. სამხრეთ კავკასიის ორი სახელმწიფოს ეროვნულ ვალუტებს არც ევრო ჩამორჩა და დოლართან მიმართებაში კიდევ უფრო მეტით, 0.74 პროცენტით გაუფასურდა. ამავე პერიოდში საქართველოს უმსხვილესი სავაჭრო პარტნიორი ქვეყნების − უკრაინისა და თურქეთის ეროვნული ვალუტები თანაბარი მაჩვენებლით – 2.95 პროცენტით გამყარდა. თურქულ ლირას უკვე ზედიზედ ორი თვეა, რაც მკვეთრი გამყარების კურსი უჭირავს. იანვრის ბოლოს და თებერვლის დასაწყისში ლარი ყველაზე მეტით, 4.06 პროცენტით სწორედ თურქულ ლირასთან მიმართებაში გაუფასურდა. ლარი შედარებით ნაკლებით, 2.1 პროცენტით გაუფასურდა რუსულ რუბლთან მიმართებაშიც. უკრაინულ გრივნასთან მიმართებაში ეროვნული ვალუტის გაუფასურების მაჩვენებელი − 1.86 პროცენტია. ლარმა პოზიციები დათმო სომხურ დრამთანაც. გაუფასურების მაჩვენებელი 0.23 პროცენტია.

კიდევ ერთი ყურადსაღები ნიუანსი: როგორც ანალიტიკოსები მიანიშნებენ, თუ იანვარში ეროვნული ვალუტა გამყარებასთან ერთად მეტ-ნაკლები სტაბილურობით, ანუ დაბალი მერყეობით გამოირჩეოდა, თებერვლის პირველ კვირაში გაუფასურებასთან ერთად ლარის გაცვლითი კურსიც მკვეთრად მერყეობდა. კერძოდ, საანგარიშო პერიოდში საშუალოსთან მიმართებით გაცვლითი კურსის მერყეობა 0.17 პროცენტს აღწევდა.

იმედია, ეროვნული ვალუტის ბედით დაინტერესებულ მკითხველს ემახსოვრება ქვეყნის პირველი ბანკირის კობა გვენეტაძის დაპირება, რომ მისი უწყება წელსაც გააგრძელებდა გასული წლის მარტში დაწყებულ ე.წ. ინტერვენციების პოლიტიკას. სიტყვა საქმედ იქცა. მიმდინარე წლის 6 იანვარს ეროვნულმა ბანკმა საფინანსო ბაზარზე პირველი ინტერვენცია განახორციელა, 40 მილიონი ამერიკული დოლარი გაყიდა. ორკვირიანი პაუზის შემდეგ, 27 იავარს კობა გვენეტაძის უწყებამ სავალუტო ბაზარს მორიგი 40 მილიონი ამერიკული დოლარი მიაწოდა. საგულისხმოა, რომ ლარის გაუფასურების მიუხედავად, საანგარიშო პერიოდში ეროვნულ ბანკს ბაზარზე უცხოური ვალუტა არ გაუყიდია.

ანალიტიკოსთა ნაწილი მიიჩნევს, რომ პირდაპირი სავალუტო ინტერვენციები შესაძლოა არაეფექტური იყოს. მათ შორის გახლავთ საპენსიო სააგენტოს ყოფილი ხელმძღვანელი და ფინანსისტი ლევან სურგულაძე. მისი შეფასებით, არსებულ ვითარებაში ეროვნული ბანკი სავალუტო ბაზრისთვის ჯამურად ასეულობით მილიონი დოლარის მიწოდებით ვერ მოაგვარებს სისტემურ პრობლემას. ეს არის შემცირებული სავალუტო ნაკადები.

„ინტერვენციებით შესაძლებელია მხოლოდ აჟიოტაჟური და ირაციონალური მოთხოვნის დაკმაყოფილება, რომელსაც არ აქვს საფუძველი. რაც შეეხება ხანგრძლივ და გრძელვადიან მოცემულობას, ის წელსაც გრძელდება, ჩვენ გვაქვს სისტემური პრობლემა − საქართველოს ეკონომიკა გამოიმუშავებს უფრო ნაკლებ დოლარს და ხარჯავს უფრო მეტს. სისტემური პრობლემაც სწორედ ეს არის. შემომავალი სავალუტო ნაკადები გამავალზე ნაკლებია. ეროვნული ბანკი ამ დეფიციტს საკუთარი რეზერვებიდან აფინანსებს. ასე რომ, სისტემურ პრობლემასთან ინტერვენციებით ბრძოლა პრაქტიკულად გადაყრილი ფულია. მცურავი კურსის მთავარი არსი არის ის, რომ დადგეს იმ ნიშნულზე, როდესაც იმპორტი გახდება იმ ზომის, რისი სავალუტო საშუალებებიც აქვს ეკონომიკას. პირდაპირი ინტერვენციები, რაც მიმდინარე წელსაც გრძელდება, მცურავი კურსის პრინციპს ეწინააღმდეგება“, − აცხადებს ფინანსისტი ლევან სურგულაძე. მისი თქმით, სისტემური პრობლემის მოგვარება ქვეყნის ეკონომიკაში წარმოების პოტენციალის გაზრდას უკავშირდება. „აუცილებელია იმპორტის ჩანაცვლებაზე ვიმუშაოთ, იქნება ეს სასოფლო-სამეურნეო პროდუქცია თუ ნებისმიერი სხვა დასახელების პროდუქტები, რათა შეძლებისდაგვარად ჩანაცვლდეს იმპორტი. არის კიდევ ერთი გამოსავალიც. გავუშვათ ლარი მცურავ რეჟიმში და ერთხანს ხელოვნურად არ შევაჩეროთ ეროვნული ვალუტის გაუფასურების პროცესი... გაგრძელდეს გაუფასურება. მოსახლეობის შემოსავალი ლარშია ნომინირებული. გაზრდილი კურსის შემთხვევაში მათ ნაკლები შესაძლებლობა ექნებათ, იყიდონ დოლარი. შესაბამისად, შემცირდება იმპორტიც და გაუმჯობესდება ჩვენი უარყოფითი სავაჭრო სალდო“, − აცხადებს ლევან სურგულაძე.

დასკვნითი სენტენცია აშკარად საკამათოა. პატივცემული ფინანსისტი არაფერს ამბობს, როგორ გაუმკლავდენ საბანკო ვალდებულებებს ის ფიზიკური თუ იურიდიული პირები, რომელთაც კრედიტები სწორედ უცხოურ ვალუტაში, ძირითადად ამერიკულ დოლარში აქვთ აღებული. ინფორმაციისთვის: საბანკო სექტორის მთლიანი საკრედიტო პორტფელის დოლარიზაციის მაჩვენებელი 55.5 პროცენტია!

და ბოლოს, COVID-19-ის პანდემიის გამო ეკონომიკურ საქმიანობაზე დაწესებული მკაცრი შეზღუდვები თანდათან იხსნება. სავარაუდოდ, მალე ვაქცინაციის პროცესიც დაიწყება. არც ის დღეა შორს, როცა ქვეყანაში ტურისტებიც შემოვლენ. ეს ყველაფერი, ბუნებრივია, ეროვნული ვალუტის კურსზე პოზიტიურად აისახება, მაგრამ რამდენით – ამას უკვე დრო გვიჩვენებს...

2591
ვალუტის გადამცვლელი პუნქტი

ლარის კურსი 10 აპრილს

109
(განახლებულია 08:54 10.04.2021)
წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0126 ლარით გაუფასურდა.

თბილისი, 10 აპრილი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,4260 GEL/$1 ნიშნულზე დაადგინა. 

წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0126 ლარით გაუფასურდა.

ლარის კურსი 10 აპრილს
ლარის კურსი 10 აპრილს
109
სოფელი

ვეფხია გიორგაძე: მთავრობამ მიწის ბაზრის ჩამოყალიბებაზე ფიქრი დაიწყო

116
(განახლებულია 21:57 09.04.2021)
„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის გაფართოების შესახებ გუშინ საქართველოს პრემიერ-მინისტრმა ისაუბრა.

თბილისი, 9 აპრილი – Sputnik. საქართველოს მთავრობის გადაწყვეტილება „სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის გაფართოების შესახებ ქვეყანაში მიწის ბაზრის ჩამოყალიბებას შეუწყობს ხელს, განაცხადა ეკონომისტმა ვეფხია გიორგაძემ „Sputnik-საქართველოსთან“ საუბრისას.

მთავრობის გადაწყვეტილებით, უქმდება მიწის ფართობებზე დაწესებული ზედა ზღვარი – თუ აქამდე ნებადართული იყო მხოლოდ 10 ჰექტრამდე იჯარით გაცემული სასოფლო-სამეურნეო მიწის ნაკვეთის შესყიდვა, ახლა ეს რაოდენობრივი შეზღუდვა საერთოდ მოიხსნება. გარდა ამისა, გამოსყიდვის უფლება, იჯარით გაცემული „სახნავი“ კატეგორიის მიწების გარდა, გავრცელდება „სათიბ“ კატეგორიაზეც.

ამასთან, საქართველოში მოიჯარეები შეძლებენ სახელმწიფოსგან გამოისყიდონ 2021 წლის 31 მარტის მდგომარეობით იჯარით გაცემული სახნავი და სათიბი მიწის ნაკვეთები, აქამდე ეს უფლება მხოლოდ 2020 წლის 23 იანვრამდე იჯარით გაცემულ ნაკვეთებზე ვრცელდებოდა. 

„კარგია, რომ მთავრობამ დაიწყო ფიქრი მიწის ბაზრის ჩამოყალიბებაზე, რადგან ის ერთ-ერთი მნიშვნელოვანი ფაქტორია და მის გარეშე სოფლის მეურნეობის განვითარება შეუძლებელია“, – მიაჩნია ვეფხია გიორგაძეს.

მისი თქმით, მიწის ბაზარი მანამდე არ ჩამოყალიბდება, სანამ სახელმწიფოს საკუთრებაში არსებული დაახლოებით 1.5 მლნ ჰა მიწის ფართობი კერძო მესაკუთრეების ხელში არ გადაინაცვლებს. ამისათვის კი პირველ რიგში უფასო პრივატიზაციაა საჭირო.

„იმის გამო, რომ მიწის ფასს ბაზარი ვერ განსაზღვრავს, ფერმერები ვერ ახერხებენ ბანკებსა თუ სხვა საფინანსო ინსტიტუტებში სასოფლო–სამეურნეო პროდუქციის მოსაყვანად საჭირო სახსრების მოძიებას, შესაბამისად, ვერც დოვლათი იქმნება და ცდება მიწაც“, – აღნიშნა გიორგაძემ.

ეკონომისტის თქმით, დღეს საშუალოდ ერთი ჰექტარი სასოფლო-სამეურნეო მიწის ნაკვეთი 3-4 ათასი დოლარის ეკვივალენტი ღირს ეროვნულ ვალუტაში.

  • „სასოფლო-სამეურნეო მიწის ნაკვეთები, გარდა იმისა, რომ იაფია, ძნელადაც იყიდება, ამიტომ ბანკები ერიდებიან ამ ტიპის ქონებით უზრუველყოფილი კრედიტების გაცემას, მიწის ბაზრის ჩამოყალიბების შემდეგ კი ფერმერები სასოფლო-სამეურნეო პროდუქციის მოსაყვანად საჭირო ფინანსების მოძიებას უფრო იოლად შეძლებენ“, – თქვა გიორგაძემ.

ვეფხია გიორგაძე მიიჩნევს, რომ მიწის კერძო მფლობელობაში გადასვლის შემდეგ გაჩნდება მასზე თავისუფალი მოთხოვნა–მიწოდება, ჩამოყალიბდება საბაზრო წონასწორობა და აისახება ფასზე, ის შეიძენს სრულფასოვანი უზრუნველყოფის სახეს და გახდება ერთ-ერთი მნიშვნელოვანი მდგენელი სოფლის მეურნეობის განვითარების.

სახელმწიფო პროგრამის გაფართოებაზე გუშინ საქართველოს პრემიერ-მინტრმა ირაკლი ღარიბაშვილმა მთავრობის სხდომაზე ისაუბრა.

„ამ ინიციატივით საქართველოს მოქალაქეებს საშუალება ექნებათ კერძო საკუთრებაში დაირეგისტრირონ დაახლოებით 11 ათას ჰექტრამდე სახნავი მიწა, რომლის ჯამური ღირებულება შეადგენს დაახლოებით 100 მილიონ ლარს“, – თქვა ირაკლი ღარიბაშვილმა.

„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამა საქართველოს მთავრობამ 2020 წლის ივლისში დამტკიცდა და მისი მიზანია სახელმწიფო საკუთრებაში არსებული სასოფლო-სამეურნეო დანიშნულების მიწის რესურსების რაციონალურად გამოყენებისა და სამოქალაქო ბრუნვაში ჩართვის ხელშეწყობა – მოიჯარეებისთვის იჯარის უფლებით გადაცემული უძრავი ნივთების პირდაპირი მიყიდვის ფორმით საკუთრებაში გადაცემის გზით.

ნატა პატარაია

116
თემები:
საქართველოს სოფლის მეურნეობა
სამძებრო ოპერაცია რიონზე

კარვები აღებულია: რა ვითარებაა „ნამახვან ჰესის“ წინააღმდეგ მიმდინარე საპროტესტო აქციაზე

0
(განახლებულია 00:55 12.04.2021)
აქციის მონაწილეები მოითხოვენ, მიეცეთ უფლება გააგრძელონ მშვიდობიანი პროტესტი სოფელ ნამოხვანის ტერიტორიაზე, ხოლო სამართალდამცველები მათ ალტერნატიულ ლოკაციად სოფელ გუმათს სთავაზობენ

თბილისი, 11 აპრილი – Sputnik. რიონის ხეობაში, სოფელ ნამოხვანის მიმდებარე ტერიტორიიდან საპროტესტო აქციის მონაწილეთა კარვების აღებამ შედარებით მშვიდობიანად ჩაიარა და აქციის ორგანიზატორებს კარვების სოფელ გუმათში ჩატანა შესთავაზეს, ამის შესახებ იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის უფროსმა სულხან თამაზაშვილმა განაცხადა.

მან კიდევ ერთხელ განმარტა, რომ კარვების აღება სოფელ ნამოხვანში მდინარე რიონის მოსალოდნელ ადიდებას უკავშირდება.

„მეტეოროლოგები გვიწინასწარმეტყველებენ ამინდის კიდევ უფრო გაუარესებას, მოსალოდნელია მდინარის კალაპოტიდან გადმოსვლა, დავდექით აუცილებლობის წინაშე, რომ კარვები იქედან აგვეღო. ამის ლეგიტიმაციას ჩვენ გვაძლევს კანონი პოლიციის შესახებ, 26-ე მუხლი. ამ დროისთვის კარვები არის მანქანებზე დალაგებული და შევთავაზეთ, რომ გუმათში ჩავიტანდით, სადაც ერთი კარავი უკვე დგას. მიმდებარე ტერიტორიაზე შეუძლიათ დადგან ეს კარვები და მშვიდობიან ვითარებაში გააგრძელონ პროტესტი“, - განაცხადა თამაზაშვილმა.

აქციის მონაწილეები თანახმა არიან, პროტესტი გადაიტანონ სხვა ადგილას, მაგრამ არა სოფელ გუმათში, როგორც ამას შსს სთავაზობს, არამედ სოფელ ნამოხვანთან. მათი მტკიცებით, იმ ადგილას, სადაც კარვები იყო გაშლილი, რიონის ადიდება არ ხდება, რადგან ამაღლებული ადგილია და მდინარის ადიდება უბრალო საბაბია კარვების ასაღებად. პოლიციას უკვე რამდენიმე დღეა გზა გადაკეტილი ჰქონდა და აქციის მონაწილეებს ნამოხვანში კარვებთან არ უშვებდა.

ამ დროისათვის აქციის მონაწილეები (დაახლოებით 400 ადამიანი) სოფელ გუმათთან „გუმათ ჰესის“ მიმდებარე ტერიტორიაზე არიან შეკრებულები და მათ ნამოხვანიდან ქუთაისის მიმართულებით გზა პროტესტის ნიშნად საკუთარი ავტომობილებით გადაკეტეს.

„მოვუწოდებ ყველას, რომ მოვიდნენ აქ... ჩვენ ყველამ უნდა შევძლოთ, ერთმანეთის მხარში დგომით ეს პრობლემა გადავჭრათ. მოვუწოდებთ მშვიდობიანად, ჩვენ არ მოვუწოდებთ, რომ მოვიდნენ და გადავიდეთ ხელჩართულ ბრძოლაზე. უბრალოდ, გვჭირდება ადამიანების სიმრავლე“, – განაცხადა აქციის ერთ-ერთმა ორგანიზატორმა, „რიონის ხეობის მცველმა“ ვარლამ გოლეთიანმა.

დღეს აქციაზე იმყოფებოდა სახალხო დამცველის წარმომადგენელი, რომელიც ასევე ესწრებოდ კარვების აღების პროცესს.

„დაუყოვნებლივ მიეცეთ აქციის მონაწილეებს მათ მიერ შეთავაზებულ ალტერნატიულ ადგილზე შეკრების გაგრძელების შესაძლებლობა, ხოლო თუ აღნიშნულზე არსებობს დასაბუთებული უარის საფუძველი, აქციის გაგრძელებისთვის გამოეყოთ ალტერნატიული ადგილი სასურველთან ახლომდებარე ლოკაციაზე, რომლის ადგილმდებარეობაც არსს არ დაუკარგავს მოქალაქეთა თავშეყრის მიზანს“, - განაცხადა სახალხო დამცველმა ნინო ლომჯარიამ.

პარალელურად რიონში მიმდინარეობს აქციის ერთ-ერთი მონაწილის, ნიკა ანთიძის ძებნა, რომელიც შაბათ საღამოს მდინარეში შევიდა და გაუჩინარდა. აქციის მონაწილეებმა სცადეს მისი გადარჩენა, მაგრამ უშედეგოდ, ის დინებამ წაიღო. მის ძებნაში მყვინთავები არიან ჩართული.

დღეს გავრცელდა ინფორმაცია, რომ კარვების აღება მათ შორის ამ ინციდენტსაც უკავშირდება - თითქოს კარვები სამძებრო ოპერაციას ხელს უშლიდა.

სამოქალაქო აქტივისტების, ადგილობრივი მცხოვრებლების, არასამთავრობო ორგანიზაციების წარმომადგენლებისა და სასულიერო პირების პროტესტი რიონის ხეობაში „ნამახვან ჰესის“ მშენებლობის წინააღმდეგ 168-ე დღე გრძელდება. მთელი ეს პერიოდი აქციის მონაწილეები ღამეებს ნამოხვანში გაშლილ კარვებში ათენებდნენ. ამაღამ ისინი საკუთარ ავტომობილებში გუმათში გაათენებენ.

აქციის მონაწილეები მოითხოვენ, რათა ჰესის მშენებლობა შეწყდეს, ხელისუფლებამ კი თურქულ კომპანია Enka-სთან კონტრაქტი მოშალოს. თავისი პოზიციის გასამყარებლად მომიტინგეები საუბრობენ ჰესის დამანგრეველ ზემოქმედებაზე გარემოზე და საეჭვო გარიგებაზე ინვესტორთან. „რიონის ხეობის მცველებმა“ ქუთაისში უკვე ორი მრავალათასიანი მიტინგი გამართეს. ისინი ასევე მოითხოვენ, თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა.

0