პარლამენტის სხდომათა დარბაზი

ჩვენ გველის გაკოტრება?! ანუ რას გვპირდება ახალი კანონი

1155
(განახლებულია 19:29 29.01.2021)
გაზრდილი საკრედიტო პორტფელი, ვადაგადაცილებული სესხების მზარდი დინამიკა და დაგეგმილი საკანონმდებლო სიახლე...

სამსონ ხონელი

წინამდებარე სტატიის დასახელებამ არ უნდა შეგაშინოთ, სიახლეა. თანაც, რომ გაგიხარდებათ, ისეთი. იმედია, ამიერიდან არავინ დაიწუწუნებს, მთავრობა ჩემზე არ ზრუნავსო. კი, მაგრამ, რა ხდება ასეთი? − ჩამეძიება მკითხველი. ხუმრობა ხომ არ არის, კონსტიტუციით მონიჭებულ სხვა უამრავ უფლებას კიდევ ერთი დაემატება – მოქალაქეებს გაკოტრების უფლება კანონით მოგვეცემა. რაო, გაკოტრება?! რახანია ეს ჩვენი ჩვეული მდგომარეობაა! − შესაძლოა, ბრძანოს მკითხველმა. პოლემიკაში არ შევალ და განვაგრძობ თხრობას. ასეა თუ ისე, ფაქტია, რომ ჩვენი ქვეყნის კანონმდებლობა პერსონალური გაკოტრების ცნებას ჯერჯერობით არ იცნობს, თუმცა, როგორც ეს სამთავრობო პროგრამაშია აღნიშნული, დაგეგმილია შესაბამისი კანონის მიღება.

„განიხილება ფიზიკური პირის გაკოტრების ინსტიტუტის შემოღების საკითხი“, − ნათქვამია დოკუმენტში. იქვე ხაზგასმულია, რომ „პერსონალური გაკოტრების სტატუსი“ განვითარებულ ქვეყნებში უკვე დამკვიდრებულ ინსტრუმენტია.

საინტერესოა, რას გულისხმობს პერსონალური გაკოტრება? სპეციალისტების განმარტებით, ეს არის პროცესი, რომლის დროსაც მოქალაქეს, გაკოტრებულის სტატუსის მიღებით, შეუძლია ვალაუვალობით გამოწვეულ პრობლემებს უპასუხოს. კერძოდ, საერთაშორისო გამოცდილების თანახმად, პერსონალური გაკოტრების პროცესში ფიზიკურ პირს გადაუხდელი საკრედიტო ვალდებულებების სრული რესტრუქტურიზაცია შეუძლია და თანაც ისე, რომ ნაწილობრივ ან თითქმის სრულად შეინარჩუნოს უზრუნველყოფაში ჩადებული ქონება.

ცნობილია, რომ გაკოტრების პროცესი უფასო არ იქნება და ის მოქალაქეთათვის სასამართლო და სხვა სახის იურიდიულ ხარჯებთან იქნება დაკავშირებული. შესაბამისად, ვალაუვალობის ყველა შემთხვევაში შესაბამისი სტატუსის მოპოვებაზე ხელმისაწვდომობა, შესაძლოა, მაღალი არც იყოს. ამ ეტაპზე უცნობია, პერსონალური გაკოტრების პროცესის შედეგად რა სარგებელს მიიღებენ ჩვენი თანამოქალაქეები, რომლებიც ვალაუვალობის მდგომარეობაში იმყოფებიან. ჯერჯერობით ასევე უცნობია, როდის მიიღებს პარლამენტი შესაბამის კანონს და როდიდან შევა ის ძალაში. ასე რომ, უნდა ვიყოთ მოლოდინის რეჟიმში.

საკამათო არ არის, რომ ყოველი ჩვენგანის პერსონალური გაკოტრების საფუძველი შეიძლება ვალაუვალობა იყოს. ეს კი ის შემთხვევაა, როდესაც შემოსავლები არსებული საბანკო თუ სხვა სახის საკრედიტო ვალდებულებების გასტუმრებას არ ჰყოფნის. შეგახსენებთ, რომ ჯერ კიდევ 2017 წლის მიწურულს ხელისუფლებამ მოქალაქეთა ჭარბვალიანობა უმწვავეს პრობლემად შეაფასა. მომდევნო წლიდან კი მთავრობისა და ეროვნული ბანკის ინიციატივით ქვეყანაში ე.წ. პასუხისმგებლიანი დაკრედიტების პოლიტიკის ეტაპობრივად განხორციელება დაიწყო. უკვე 2019 წლიდან საბანკო რეგულაციათა პაკეტი სრულად ამოქმედდა და საკრედიტო რესურსის ხელმისაწვდომობაც გართულდა. მაშინ დარგის სპეციალისტები, ექსპერტები და ანალიტიკოსები საფინანსო ბაზარზე მოსალოდნელ საკრედიტო შიმშილზე ალაპარაკდნენ. მათი ვარაუდით, საგრძნობლად შემცირდებოდა კომერციული ბანკების საკრედიტო პორტფელი, შესაბამისად – შემოსავლები და მოგებაც. პროგნოზი არ გამართლდა. სამართლიანობისთვის უნდა ითქვას, რომ პასუხისმგებლიანი დაკრედიტების სისტემის ამოქმედებას კომერციული ბანკების ფინანსურ მაჩვენებლებზე უარყოფითი ეფექტი მართლაც ჰქონდა, თუმცა არა მასშტაბური, როგორც ამას ახალი საკრედიტო პოლიტიკის ოპონენტები აცხადებდნენ.

2018 წლის ბოლოს საქართველოს კომერციული ბანკების საკრედიტო პორტფელის მოცულობამ 26.6 მილიარდ ლარს მიაღწია. ეს კი წინა წლის ანალოგიურ მაჩვენებელზე 4.3 მილიარდი ლარით მეტია. კრედიტების გაცემის წესების გამკაცრების მიუხედავად, 2019 წელს საკრედიტო პორტფელის მოცულობა თითქმის 6 მილიარდი ლარით გაიზარდა და 32.2 მილიარდი ლარი შეადგინა. რაც შეეხება 2020 წლის მაჩვენებელს, შესაძლოა გაგიკვირდეთ, მაგრამ ფაქტია, COVID-19-ის პანდემიით გამოწვეული გლობალური კრიზისისა და ქვეყანაში ეკონომიკურ საქმიანობაზე დაწესებული შეზღუდვების პირობებშიც კი, როდესაც ბიზნეს-სუბიექტების 75 პროცენტი უბრალოდ გაჩერებული იყო, საბანკო სექტორის საკრედიტო პორტფელის მოცულობა კიდევ 6.6 მილიარდი ლარით გაიზარდა და 38.8 მილიარდ ლარს გაუტოლდა. როგორც ექსპერტ-ანალიტიკოსები აღნიშნავენ, საკრედიტო პორტფელის ზრდა იპოთეკური სესხების სუბსიდირების სამთავრობო პროგრამის შედეგია. ამ პროგრამის ფარგლებში, როგორც ეს ფინანსთა მინისტრმა ივანე მაჭავარიანმა განაცხადა, წლის განმავლობაში 760 მილიონ ლარზე მეტი გაიცა.

შევაფასოთ, როგორი იყო პასუხისმგებლიანი დაკრედიტების სისტემის ამოქმედების გავლენა საბანკო სექტორის მოგებაზე. 2018 წელს კომერციული ბანკების მოგებამ 915 მილიონი ლარი შეადგინა, რაც წინა წლის მაჩვენებელზე 45 მილიონი ლარით მეტია. უკვე 2019 წელს საბანკო სექტორის მოგება 953.63 მილიონ ლარს გაუტოლდა, რაც წინა წლის ანალოგიურ მაჩვენებელს 38.6 მილიონი ლარით აღემატება. ასე რომ, წლიური მოგების მოცულობა 6.37 მილიონი ლარით შემცირდა. არადა, შეგახსენებთ, რომ იმავე 2019 წელს საკრედიტო პორტფელი 5.6 მილიარდი ლარით გაიზარდა. რაც შეეხება 2020 წელს, საბანკო სექტორის მოგება მხოლოდ 99.26 მილიონი ლარია, ანუ წინა წლის მაჩვენებელზე 854.37 მილიონი ლარით ნაკლები. არადა, საკრედიტო პორტფელი 2020 წელსაც საგრძნობლად გაიზარდა. შეგვიძლია დავასკვნათ: გადაჭარბებულია მოსაზრება, რომ საბანკო სექტორის მოგებას, თუნდაც დიდწილად, საკრედიტო შემოსავლები განსაზღვრავს.

პერსონალური გაკოტრების საკითხს დავუბრუნდეთ... იმედია, დამეთანხმებით, მოქალაქეთა ვალაუვალობის მთავარი ინდიკატორი ვადაგადაცილებული, ე.წ. პრობლემური კრედიტების მოცულობაა. ჯერ კიდევ 2018 წლის ბოლოს ვადაგადაცილებული სესხების წილი საკრედიტო პორტფელის 2.7 პროცენტს შეადგენდა. საკრედიტო რეგულაციების გამკაცრების შედეგად ეს მაჩვენებელი 1.96 პროცენტამდე შემცირდა. 2020 წლის განმავლობაში ვადაგადაცილებული სესხების მოცულობა 46 პროცენტით გაიზარდა და 533 მილიონი ლარი შეადგინა. თუ ერთი წლის წინ პრობლემური სესხების მოცულობა პორტფელის 1.13 პროცენტს შეადგენდა, დღეს ის უკვე 1.37 პროცენტის ტოლია. ზრდის მიუხედავად, სპეციალისტები და ანალიტიკოსები მდგომარეობას საგანგაშოდ არ მიიჩნევენ. მათი თქმით, ეროვნული ბანკი კომერციულ ბანკებს გაცემული სესხების 2 პროცენტის დარეზერვებას ავალდებულებს, რაც ვადაგადაცილებული სესხების ამჟამინდელ მაჩვენებელზე თითქმის 1.5-ჯერ მეტია. საბანკო ასოციაციაში ვარაუდობენ, რომ 2021 წლის ბოლოსთვის ვადაგადაცილებული სესხების წილი საკრედიტო პორტფელის 10 პროცენტს მიაღწევს.  

„ვადაგადაცილებების რეალურ სურათს დავინახავთ 2021 წლის ბოლოს, თუ, რა თქმა უნდა, დამატებითი პრობლემები არ გამოიკვეთა და კომერციული ბანკების წინაშე გლობალური რესტრუქტურიზაციის აუცილებლობა არ დადგა... ამ ეტაპზე საბანკო სექტორი საკრედიტო ვალდებულებების მასშტაბურად გადავადების საკითს არ განიხილავს“, − განაცხადა საბანკო ასოციაციის ხელმძღვანელმა ალექსანდრე ძნელაძემ.

და, ბოლოს, თქვენს ყურადღებას კიდევ ერთ გარემოებაზე გავამახვილებ: ეროვნული ბანკის მონაცემებით, გასულ წელს კომერციული ბანკების მიერ დასაკუთრებული ქონების ჯამურმა მოცულობამ 248.6 მილიონი ლარი შეადგინა. ერთი წლის განმავლობაში ზრდა 37.7 მილიონი ლარია. მოგეხსენებათ, უძრავ თუ მოძრავ ქონებას კომერციული ბანკი ან ნებისმიერი სხვა საფინანსო-საკრედიტო დაწესებულება მაშინ ისაკუთრებს, როდესაც დებიტორი კრედიტორის წინაშე არსებულ ვალდებულებებს ვეღარ ისტუმრებს და ხელშეკრულებით მსესხებლის მიერ ნაკისრი ფინანსური ვალდებულებების გარანტიად კონკრეტული უძრავი ან მოძრავი ქონებაა გათვალისწინებული.

შეგახსენებთ ზემოთ ნათქვამს, რომ პერსონალური გაკოტრების პროცესში სწორედ გადაუხდელი საკრედიტო ვალდებულებების სრულ რესტრუქტურიზაციას შევძლებთ და თანაც ისე, რომ ნაწილობრივ ან თითქმის სრულად შევინარჩუნებთ უზრუნველყოფაში ჩადებულ ქონებას. ეს მომავალში, მანამდე კი ვეცადოთ, არ დავდგეთ გაკოტრების სტატუსის მაძიებელობის აუცილებლობის წინაშე...    

 

1155
ვალუტის გადამცვლელი პუნქტი

ლარის კურსი 10 აპრილს

109
(განახლებულია 08:54 10.04.2021)
წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0126 ლარით გაუფასურდა.

თბილისი, 10 აპრილი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,4260 GEL/$1 ნიშნულზე დაადგინა. 

წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0126 ლარით გაუფასურდა.

ლარის კურსი 10 აპრილს
ლარის კურსი 10 აპრილს
109
სოფელი

ვეფხია გიორგაძე: მთავრობამ მიწის ბაზრის ჩამოყალიბებაზე ფიქრი დაიწყო

116
(განახლებულია 21:57 09.04.2021)
„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის გაფართოების შესახებ გუშინ საქართველოს პრემიერ-მინისტრმა ისაუბრა.

თბილისი, 9 აპრილი – Sputnik. საქართველოს მთავრობის გადაწყვეტილება „სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის გაფართოების შესახებ ქვეყანაში მიწის ბაზრის ჩამოყალიბებას შეუწყობს ხელს, განაცხადა ეკონომისტმა ვეფხია გიორგაძემ „Sputnik-საქართველოსთან“ საუბრისას.

მთავრობის გადაწყვეტილებით, უქმდება მიწის ფართობებზე დაწესებული ზედა ზღვარი – თუ აქამდე ნებადართული იყო მხოლოდ 10 ჰექტრამდე იჯარით გაცემული სასოფლო-სამეურნეო მიწის ნაკვეთის შესყიდვა, ახლა ეს რაოდენობრივი შეზღუდვა საერთოდ მოიხსნება. გარდა ამისა, გამოსყიდვის უფლება, იჯარით გაცემული „სახნავი“ კატეგორიის მიწების გარდა, გავრცელდება „სათიბ“ კატეგორიაზეც.

ამასთან, საქართველოში მოიჯარეები შეძლებენ სახელმწიფოსგან გამოისყიდონ 2021 წლის 31 მარტის მდგომარეობით იჯარით გაცემული სახნავი და სათიბი მიწის ნაკვეთები, აქამდე ეს უფლება მხოლოდ 2020 წლის 23 იანვრამდე იჯარით გაცემულ ნაკვეთებზე ვრცელდებოდა. 

„კარგია, რომ მთავრობამ დაიწყო ფიქრი მიწის ბაზრის ჩამოყალიბებაზე, რადგან ის ერთ-ერთი მნიშვნელოვანი ფაქტორია და მის გარეშე სოფლის მეურნეობის განვითარება შეუძლებელია“, – მიაჩნია ვეფხია გიორგაძეს.

მისი თქმით, მიწის ბაზარი მანამდე არ ჩამოყალიბდება, სანამ სახელმწიფოს საკუთრებაში არსებული დაახლოებით 1.5 მლნ ჰა მიწის ფართობი კერძო მესაკუთრეების ხელში არ გადაინაცვლებს. ამისათვის კი პირველ რიგში უფასო პრივატიზაციაა საჭირო.

„იმის გამო, რომ მიწის ფასს ბაზარი ვერ განსაზღვრავს, ფერმერები ვერ ახერხებენ ბანკებსა თუ სხვა საფინანსო ინსტიტუტებში სასოფლო–სამეურნეო პროდუქციის მოსაყვანად საჭირო სახსრების მოძიებას, შესაბამისად, ვერც დოვლათი იქმნება და ცდება მიწაც“, – აღნიშნა გიორგაძემ.

ეკონომისტის თქმით, დღეს საშუალოდ ერთი ჰექტარი სასოფლო-სამეურნეო მიწის ნაკვეთი 3-4 ათასი დოლარის ეკვივალენტი ღირს ეროვნულ ვალუტაში.

  • „სასოფლო-სამეურნეო მიწის ნაკვეთები, გარდა იმისა, რომ იაფია, ძნელადაც იყიდება, ამიტომ ბანკები ერიდებიან ამ ტიპის ქონებით უზრუველყოფილი კრედიტების გაცემას, მიწის ბაზრის ჩამოყალიბების შემდეგ კი ფერმერები სასოფლო-სამეურნეო პროდუქციის მოსაყვანად საჭირო ფინანსების მოძიებას უფრო იოლად შეძლებენ“, – თქვა გიორგაძემ.

ვეფხია გიორგაძე მიიჩნევს, რომ მიწის კერძო მფლობელობაში გადასვლის შემდეგ გაჩნდება მასზე თავისუფალი მოთხოვნა–მიწოდება, ჩამოყალიბდება საბაზრო წონასწორობა და აისახება ფასზე, ის შეიძენს სრულფასოვანი უზრუნველყოფის სახეს და გახდება ერთ-ერთი მნიშვნელოვანი მდგენელი სოფლის მეურნეობის განვითარების.

სახელმწიფო პროგრამის გაფართოებაზე გუშინ საქართველოს პრემიერ-მინტრმა ირაკლი ღარიბაშვილმა მთავრობის სხდომაზე ისაუბრა.

„ამ ინიციატივით საქართველოს მოქალაქეებს საშუალება ექნებათ კერძო საკუთრებაში დაირეგისტრირონ დაახლოებით 11 ათას ჰექტრამდე სახნავი მიწა, რომლის ჯამური ღირებულება შეადგენს დაახლოებით 100 მილიონ ლარს“, – თქვა ირაკლი ღარიბაშვილმა.

„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამა საქართველოს მთავრობამ 2020 წლის ივლისში დამტკიცდა და მისი მიზანია სახელმწიფო საკუთრებაში არსებული სასოფლო-სამეურნეო დანიშნულების მიწის რესურსების რაციონალურად გამოყენებისა და სამოქალაქო ბრუნვაში ჩართვის ხელშეწყობა – მოიჯარეებისთვის იჯარის უფლებით გადაცემული უძრავი ნივთების პირდაპირი მიყიდვის ფორმით საკუთრებაში გადაცემის გზით.

ნატა პატარაია

116
თემები:
საქართველოს სოფლის მეურნეობა
სამძებრო ოპერაცია რიონზე

კარვები აღებულია: რა ვითარებაა „ნამახვან ჰესის“ წინააღმდეგ მიმდინარე საპროტესტო აქციაზე

0
(განახლებულია 00:55 12.04.2021)
აქციის მონაწილეები მოითხოვენ, მიეცეთ უფლება გააგრძელონ მშვიდობიანი პროტესტი სოფელ ნამოხვანის ტერიტორიაზე, ხოლო სამართალდამცველები მათ ალტერნატიულ ლოკაციად სოფელ გუმათს სთავაზობენ

თბილისი, 11 აპრილი – Sputnik. რიონის ხეობაში, სოფელ ნამოხვანის მიმდებარე ტერიტორიიდან საპროტესტო აქციის მონაწილეთა კარვების აღებამ შედარებით მშვიდობიანად ჩაიარა და აქციის ორგანიზატორებს კარვების სოფელ გუმათში ჩატანა შესთავაზეს, ამის შესახებ იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის უფროსმა სულხან თამაზაშვილმა განაცხადა.

მან კიდევ ერთხელ განმარტა, რომ კარვების აღება სოფელ ნამოხვანში მდინარე რიონის მოსალოდნელ ადიდებას უკავშირდება.

„მეტეოროლოგები გვიწინასწარმეტყველებენ ამინდის კიდევ უფრო გაუარესებას, მოსალოდნელია მდინარის კალაპოტიდან გადმოსვლა, დავდექით აუცილებლობის წინაშე, რომ კარვები იქედან აგვეღო. ამის ლეგიტიმაციას ჩვენ გვაძლევს კანონი პოლიციის შესახებ, 26-ე მუხლი. ამ დროისთვის კარვები არის მანქანებზე დალაგებული და შევთავაზეთ, რომ გუმათში ჩავიტანდით, სადაც ერთი კარავი უკვე დგას. მიმდებარე ტერიტორიაზე შეუძლიათ დადგან ეს კარვები და მშვიდობიან ვითარებაში გააგრძელონ პროტესტი“, - განაცხადა თამაზაშვილმა.

აქციის მონაწილეები თანახმა არიან, პროტესტი გადაიტანონ სხვა ადგილას, მაგრამ არა სოფელ გუმათში, როგორც ამას შსს სთავაზობს, არამედ სოფელ ნამოხვანთან. მათი მტკიცებით, იმ ადგილას, სადაც კარვები იყო გაშლილი, რიონის ადიდება არ ხდება, რადგან ამაღლებული ადგილია და მდინარის ადიდება უბრალო საბაბია კარვების ასაღებად. პოლიციას უკვე რამდენიმე დღეა გზა გადაკეტილი ჰქონდა და აქციის მონაწილეებს ნამოხვანში კარვებთან არ უშვებდა.

ამ დროისათვის აქციის მონაწილეები (დაახლოებით 400 ადამიანი) სოფელ გუმათთან „გუმათ ჰესის“ მიმდებარე ტერიტორიაზე არიან შეკრებულები და მათ ნამოხვანიდან ქუთაისის მიმართულებით გზა პროტესტის ნიშნად საკუთარი ავტომობილებით გადაკეტეს.

„მოვუწოდებ ყველას, რომ მოვიდნენ აქ... ჩვენ ყველამ უნდა შევძლოთ, ერთმანეთის მხარში დგომით ეს პრობლემა გადავჭრათ. მოვუწოდებთ მშვიდობიანად, ჩვენ არ მოვუწოდებთ, რომ მოვიდნენ და გადავიდეთ ხელჩართულ ბრძოლაზე. უბრალოდ, გვჭირდება ადამიანების სიმრავლე“, – განაცხადა აქციის ერთ-ერთმა ორგანიზატორმა, „რიონის ხეობის მცველმა“ ვარლამ გოლეთიანმა.

დღეს აქციაზე იმყოფებოდა სახალხო დამცველის წარმომადგენელი, რომელიც ასევე ესწრებოდ კარვების აღების პროცესს.

„დაუყოვნებლივ მიეცეთ აქციის მონაწილეებს მათ მიერ შეთავაზებულ ალტერნატიულ ადგილზე შეკრების გაგრძელების შესაძლებლობა, ხოლო თუ აღნიშნულზე არსებობს დასაბუთებული უარის საფუძველი, აქციის გაგრძელებისთვის გამოეყოთ ალტერნატიული ადგილი სასურველთან ახლომდებარე ლოკაციაზე, რომლის ადგილმდებარეობაც არსს არ დაუკარგავს მოქალაქეთა თავშეყრის მიზანს“, - განაცხადა სახალხო დამცველმა ნინო ლომჯარიამ.

პარალელურად რიონში მიმდინარეობს აქციის ერთ-ერთი მონაწილის, ნიკა ანთიძის ძებნა, რომელიც შაბათ საღამოს მდინარეში შევიდა და გაუჩინარდა. აქციის მონაწილეებმა სცადეს მისი გადარჩენა, მაგრამ უშედეგოდ, ის დინებამ წაიღო. მის ძებნაში მყვინთავები არიან ჩართული.

დღეს გავრცელდა ინფორმაცია, რომ კარვების აღება მათ შორის ამ ინციდენტსაც უკავშირდება - თითქოს კარვები სამძებრო ოპერაციას ხელს უშლიდა.

სამოქალაქო აქტივისტების, ადგილობრივი მცხოვრებლების, არასამთავრობო ორგანიზაციების წარმომადგენლებისა და სასულიერო პირების პროტესტი რიონის ხეობაში „ნამახვან ჰესის“ მშენებლობის წინააღმდეგ 168-ე დღე გრძელდება. მთელი ეს პერიოდი აქციის მონაწილეები ღამეებს ნამოხვანში გაშლილ კარვებში ათენებდნენ. ამაღამ ისინი საკუთარ ავტომობილებში გუმათში გაათენებენ.

აქციის მონაწილეები მოითხოვენ, რათა ჰესის მშენებლობა შეწყდეს, ხელისუფლებამ კი თურქულ კომპანია Enka-სთან კონტრაქტი მოშალოს. თავისი პოზიციის გასამყარებლად მომიტინგეები საუბრობენ ჰესის დამანგრეველ ზემოქმედებაზე გარემოზე და საეჭვო გარიგებაზე ინვესტორთან. „რიონის ხეობის მცველებმა“ ქუთაისში უკვე ორი მრავალათასიანი მიტინგი გამართეს. ისინი ასევე მოითხოვენ, თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა.

0