ლარის კუპიურები

ვირთხის ნაკბენი, ანუ ლარის ერთწლიანი თავგადასავალი...

1087
(განახლებულია 16:22 04.01.2021)
რეკორდები და ანტირეკორდები, სავალუტო აუქციონზე გაყიდული 873.222 მილიონი ამერიკული დოლარი და 14 პროცენტით გაუფასურებული ლარი, მეოთხედით გაძვირებული ევრო და სამხრეთ კავკასიის ქვეყნების ვალუტებთან დაკარგული პოზიციები...

სამსონ ხონელი

წამზომი ახალი წლის პირველ დღეებს ითვლის, ჩვენ კი ისევ ვირთხის ნაკვალევს მივუყვებით და გასული წლის შედეგებს ვაჯამებთ. ქვეყნის მაკროეკონომიკური პარამეტრებიდან ფულად გზავნილებზე უკვე მოგახსენეთ, გავიხსენე ტურიზმის, ავიაციის, სარესტორნო ბიზნესისა თუ სამშენებლო სფეროში და უძრავი ქონების ბაზარზე განვითარებული მოვლენები. გასაკვირი არ უნდა იყოს, თუ პროცესები COVID-19-ის პანდემიით გამოწვეული მწვავე ეკონომიკური კრიზისის კონტექსტში გავაანალიზე. ვფიქრობ, ურიგოდ არ გავრჯილვარ. თუმცა, გასული წლის შედეგების შეჯამება სრულყოფილი არ იქნება, თუ ეროვნული ვალუტის თავგადასავალი არ გიამბეთ.

არაფერი საამაყო, ვერაფრით გაგვახარებ! - ბრძანებს მკითხველი და მართალიც იქნება. 2020 წელს ლარმა გაუფასურების ანტირეკორდი რამდენჯერმე დაამყარა. მკითხველს შევახსენებ: თავისი არსებობის მეოთხედსაუკუნოვანი ისტორიის განმავლობაში ეროვნული ვალუტის გაცვლითი კურსი ამერიკული დოლარის და ევროს მიმართ ისტორიულ მინიმუმამდე დაეცა. კერძოდ, 1 ამერიკული დოლარისა და 1 ევროს ღირებულება პირველად სწორედ გასულ წელს გადასცდა, შესაბამისად, 3.00 და 4.00 ლარს. ეროვნული ვალუტის ერთი წლის აღმა-დაღმა სვლას თანმიმდევრულად მივყვეთ.

გასული წლის დასაწყისში 1 ამერიკული დოლარი 2.87 ლარი ღირდა და არაფერი მოასწავებდა, რომ ეროვნულ ვალუტას პერსპექტივაში უმძიმესი დღეები ელოდა. მეტიც, ლარის გაცვლითი კურსი, მართალია, ნელა, მაგრამ სტაბილურად მყარდებოდა. ფაქტია, რომ უკვე მარტის თვის პირველი დეკადის ბოლოს დოლარის ფასი 2.77 ლარამდე შემცირდა. ეს მაჩვენებელი კი ორი თეთრით ნაკლებია 26 თებერვლის, ანუ იმ დღის ფასთან შედარებით, როდესაც საქართველოში COVID-19-ით ინფიცირების პირველი შემთხვევა დაფიქსირდა.

ეროვნული ვალუტის გაცვლითი კურსის სწრაფი ტემპით გაუფასურება ჯანდაცვის მსოფლიო ორგანიზაციის მიერ COVID-19-ის პანდემიის გამოცხადებამდე ერთი დღით ადრე დაიწყო და ერთი კვირის შემდეგ ეროვნულმა ვალუტამ მანამდე არსებული ყველა ანტირეკორდი მოხსნა. 1 ამერიკული დოლარის ფასმა 3.01 ლარს მიაღწია. ლარმა ფსიქოლოგიური ბარიერი გადალახა და უკვე ათი დღის შემდეგ მორიგი ანტირეკორდი დაამყარა. 27 მარტს 1 ამერიკული დოლარის ღირებულება 3.48 ლარს გაუტოლდა. ერთი სიტყვით, ეროვნულმა ვალუტამ ფსკერზე დაშვება მაშინ დაიწყო, როდესაც ძირითადი მაკროეკონომიკური პარამეტრები ჯერ კიდევ წესრიგში იყო. რატომ? ექსპერტ-ანალიტიკოსთა შეფასებით, მარტის თვეში ლარის სწრაფი გაუფასურება სავალუტო ბაზარზე არსებული პანიკის შედეგი იყო. გაურკვევლობა ერთ კვირაში დასრულდა და 32 თეთრით გაიაფებული დოლარის ფასი 3.16 ლარის ნიშნულზე დაფიქსირდა. მოვლენათა ამგვარი განვითარება პირველადი დასკვნის საფუძველს იძლევა. მართალია, ლარი 2015 წლის თებერვლიდან მოყოლებული ხან ნელი და ხანაც საშუალო ტემპით უფასურდებოდა, მაგრამ COVID-19-ის პანდემიის შედეგად სავალუტო ბაზარზე გაურკვევლობით გამოწვეული პანიკა რომ არა, ეროვნული ვალუტა, სავარაუდოდ, რყევების პანდემიამდე არსებულ ამპლიტუდას შეინარჩუნებდა და, მაღალი ალბათობით, სამიან ნიშნულს არ გადასცდებოდა.

გასული წლის პირველი ნახევრის მიწურულს მძიმედ სნეულმა ლარმა ხუთი დღით მოიხედა, ამერიკულ დოლართან მიმართებაში ეროვნული ვალუტის გაცვლითი კურსი 2.96 ლარამდე გამყარდა. ზაფხულის თვეებში კურსი საშუალოდ 2.95-3.05 ლარის ფარგლებში მოძრაობდა.

ეროვნულ ვალუტას მორიგი განსაცდელი მესამე კვარტალში ელოდა. შემოდგომაზე ქვეყანაში COVID-19-ით ინფიცირებულთა რაოდენობის მატებასთან ერთად ამერიკული დოლარის ფასი ისევ საგრძნობლად გაიზარდა. თავად განსაჯეთ: თუ სექტემბრის პირველ დღეს ამერიკული დოლარი 3.08 ლარი ღირდა, უკვე ოცი დღის შემდეგ გაძვირდა და ღირებულებამ 3.28 ლარი შეადგინა. თორმეტპუნქტიანი ნახტომი კი 6 ნოემბერს დაფიქსირდა, როდესაც 1 ამერიკული დოლარის ფასი 3.40 ლარს გაუტოლდა. მეოთხე კვარტალში და წლის მიწურულსაც ეროვნული ვალუტის გაცვლითი კურსი 3.27-3.35 ლარის ფარგლებში მერყეობდა.

ერთი სიტყვით, გასული წლის განმავლობაში ლარი ამერიკული დოლარის მიმართ სულ 14 პროცენტით გაუფასურდა. თუმცა დოლარი არ ყოფილა ის ერთადერთი უცხოური ვალუტა, რომელთანაც ლარმა პოზიციები დათმო. 25 პროცენტით გაძვირდა ევრო, ხოლო ბრიტანული ფუნტი − 17 პროცენტით. შესაძლოა, მკითხველს მოეხსენება, თუ არა და ის ახლა შეიტყობს, რომ ეროვნული ბანკი ლარის ოფიციალურ გაცვლით კურსს 43 ვალუტასთან ადგენს, ამ 43-დან 36-ის მიმართ ლარი გაუფასურდა. ჩამონათვალი ვრცელია, მათ შორის რეგიონის ქვეყნებიდან არის სომხური დრამი და აზერბაიჯანული მანათიც. ლარი გამყარდა თურქულ ლირასთან, რუსულ რუბლთან, ბელარუსულ რუბლთან, უკრაინულ გრივნასთან, ყირგიზულ სომთან, ტაჯიკურ სომონთან და ბრაზილიურ რიალთან მიმართებაში...

კიდევ ერთხელ, ამჯერად უკვე წლის შემაჯამებელ სტატიაში დავუბრუნდეთ კითხვას, რამ გამოიწვია ლარის ასეთი გაუფასურება? გლობალური პანდემია და ეკონომიკური რეცესია − შესაძლოა, ბრძანოს მკითხველმა. თუმცა ყურადღებას ერთ გარემოებას მივაპყრობ. COVID-19-ის პანდემია მსოფლიოშია და არა მხოლოდ ჩვენში. ევროპაში ეკონომიკური ვარდნის მაჩვენებელი კი საქართველოს ანალოგიურ მონაცემს აჭარბებს. ასე რომ, ამ ორი არგუმენტით აპელირება დასმულ კითხვაზე პასუხს ვერ მოგვცემს.  

უნდა გავითვალისწინოთ, მკვეთრად შემცირდა შემოდინებები, განსაკუთრებით, ტურიზმის სფეროში. დანაკლისმა 3 მილიარდ დოლარს მიაღწია. გასულ წელს 2019 წელთან შედარებით საერთაშორისო მოგზაურების რაოდენობა 5.35-ჯერ, ხოლო ტურისტების რაოდენობა 7.06-ჯერ შემცირდა და გასული საუკუნის მიწურულის მაჩვენებელს დაუბრუნდა.

მაკროეკონომიკურ პარამეტრებს შორის შედარებით უკეთესი ვითარებაა საგარეო ვაჭრობაში. მეტიც, თუ 2019 წლის 11 თვეში იმპორტის უფრო მეტად შემცირების ხარჯზე უარყოფითი სავაჭრო სალდო 5.141 მილიარდ დოლარს შეადგენდა, 2020 წლის იანვარ-ნოემბერში ის 4.170 მილიარდ დოლარამდე შემცირდა. სხვა საკითხია, რომ იმპორტის კლება განაპირობა არა მისი ადგილობრივი პროდუქციით ჩანაცვლებამ, არამედ მსოფლიო ბაზარზე ნავთობის გაიაფებამ, რეექსპორტზე მოთხოვნის შემცირებამ და, რაც კიდევ უფრო არსებითია, ადგილობრივ ბაზარზე მოსახლეობის მსყიდველუნარიანობის შემცირებამ.

არახალია, წლის განმავლობაში რამდენჯერმე ვივარაუდე, რომ თუ რადიკალურად არაფერი შეიცვლებოდა, პირდაპირი უცხოური ინვესტიციების მოცულობა წლის ბოლოს უკანასკნელი ათი წლის განმავლობაში ისტორიულ მინიმუმამდე შემცირდებოდა. სამწუხაროდ, პროგნოზი გამართლდა. თუ 2019 წლის სამ კვარტალში ინვესტიციების მოცულობამ სულ 946 მილიონი დოლარი შეადგინა, გასულ წელს ის 719 მილიონ დოლარამდე შემცირდა.

სამაგიეროდ, ფულადი გზავნილების მოცულობა ხომ გაიზარდა? − ჩამეძიება მკითხველი. რა გაეწყობა, დავადასტურებ, ნამდვილად ასეა. მეტიც, დავძენ, გასული წლის თერთმეტი თვის მონაცემებით ფულადი გზავნილების მოცულობა 125 მილიონი დოლარით გაიზარდა. თუმცა აქ მკითხველის ყურადღებას ექსპერტთა მოსაზრებაზე გავამახვილებ. კერძოდ, მათი შეფასებით, 2020 წელს ფულადი გზავნილების ნომინალური მოცულობის ზრდა არა ჩვენი ემიგრანტების განსაკუთრებული ეკონომიკური აქტიურობის, არამედ დიდწილად ამ ფულადი გზავნილების მთლიანად ოფიციალურ სისტემაში გადასვლის შედეგია. გასული წლის ბოლოს ვწერდი, რომ COVID-19-ის პანდემიის გამო საზღვრების ჩაკეტვის, სახმელეთო და საჰაერო ტრანსპორტზე დაწესებული შეზღუდვების შედეგად ადრესატისთვის ნაღდი ფულის ნებისმიერი ფორმით მიწოდება პრაქტიკულად შეუძლებელი გახდა. სხვა გზა არ იყო – ნაღდი ფული ოფიციალურ გზავნილებში გადამისამართდა და რაკი ეროვნული ბანკის სტატისტიკა მხოლოდ ფულადი გზავნილების ოფიციალური სისტემების მონაცემებს მოიცავს, 2020 წლის სტატისტიკამ ასახა ფულადი გზავნილების ის მოცულობა, რაც წინა წლებში სტატისტიკის მიღმა რჩებოდა. 

ორიოდე სიტყვა ეროვნული ბანკის მისამართით უნდა ითქვას. მოგეხსენებათ, ლარის კურსისა და ფასების სტაბილურობაზე სწორედ ეს უწყებაა პასუხისმგებელი. უნდა ითქვას, რომ ლარის გაუფასურების გამო ეროვნული ბანკის მისამართით კრიტიკა მთელი წლის განმავლობაში არ ცხრებოდა. ისმოდა მოსაზრებები, რომ კობა გვენეტაძის უწყება მის ხელთ არსებულ ბერკეტებს არაეფექტურად იყენებდა. ქვეყნის მთავარ ბანკირს საყვედურობდნენ, რომ სავალუტო ბაზარს დოლარი დაგვიანებით მიაწოდა. კრიტიკოსების აზრით, ინტერვენციები გაცილებით ადრე უნდა დაწყებულიყო და არა მაშინ, როცა ამერიკული დოლარის კურსი 3.50 ლარს გაუტოლდა.

ასეა თუ ისეა, სწორედ გასულ წელს ეროვნულმა ბანკმა სავალუტო აუქციონებზე გაყიდული თანხის მოცულობის ათწლიანი რეკორდი მოხსნა. როცა 22 ოქტომბერს სავალუტო ბაზარს მორიგი 40 მილიონი დოლარი მიაწოდა, უკვე მაშინ სავალუტო აუქციონებზე კობა გვენეტაძის უწყების მიერ გაყიდული თანხის ჯამურმა მოცულობამ 569.65 მილიონი დოლარი შეადგინა, რაც 2010 წლის ანალოგიურ მაჩვენებელს 278.55 მილიონი დოლარით აღემატებოდა. ეროვნულმა ბანკმა 2020 წლის განმავლობაში სულ 877.222 მილიონი ამერიკული დოლარი გაყიდა. მიუხედავად მოცულობითი ინტერვენციისა, ლარის გაცვლითი კურსის დასტაბილურება ვერ მოხერხდა.

და, ბოლოს, გასული წლის მიწურულს ქვეყნის მთავარმა ბანკირმა კიდევ ერთხელ გვითხრა, რომ ჩვენში თავისუფალი მცურავი კურსია, თანაც თავისუფალი ხელოვნური ჩარევებისგან. რაც შეეხება ეროვნულ ბანკს, მისი მიზანი ფასების სტაბილურობაზე ზრუნვაა. ამაშია საქმე! რა გინდა რომ ქნა, როცა მკაფიოდ ჩანს, რომ ფასების ზრდის, ცხოვრების გაძვირების მთავარი ფაქტორი, სხვა მრავალ „სიკეთესთან“ ერთად, გაუფასურებული ლარია?!.

 

1087
აშშ-ის დოლარები

ფულადი გზავნილები: რამდენი გადმოირიცხა საქართველოში 2020 წელს

445
(განახლებულია 12:53 16.01.2021)
2020 წელს რუსეთიდან ფულადი გზავნილების მოცულობამ 364 მლნ დოლარზე მეტი შეადგინა –საერთო მოცულობის 19,3%.

თბილისი, 16 იანვარი – Sputnik. საქართველოს კომერციულ ბანკებში 2020 წელს ელექტრონული სისტემებით ფულადი გზავნილების მოცულობა 2019 წელთან შედარებით 8,8%-ით გაიზარდა და 1 866 მლნ აშშ დოლარი შეადგინა, ნათქვამია საქართველოს ეროვნული ბანკის განცხადებაში

ყველაზე მეტი ვალუტა რუსეთიდან შემოვიდა. 2020 წელს რუსეთიდან ფულადი გზავნილების მოცულობამ 364 მლნ დოლარზე მეტი შეადგინა – ელექტრონული სისტემების მეშვეობით საქართველოს კომერციულ ბანკებში ფულადი გზავნილების საერთო მოცულობის 19,3%. თუმცა, ეს მაჩვენებელი 15,1%-ით ნაკლებია 2019 წელთან შედარებით.

ლიდერი ქვეყნების ხუთეულში ასევე შედიან იტალია, საბერძნეთი, აშშ და ისრაელი.

2020 წლის დეკემბერში ფულადი გზავნილები 15,9%-ით გაიზარდა და 199,7 მლნ დოლარი შეადგინა.

ყველაზე მეტი მოცულობის ვალუტა შემოვიდა რუსეთიდან. 2020 წლის დეკემბერში რუსეთიდან ფულადი გზავნილების მოცულობამ 40,7 მლნ დოლარზე მეტი შეადგინა – ელექტრონული სისტემების მეშვეობით საქართველოს კომერციულ ბანკებში ფულადი გზავნილების საერთო მოცულობის 20,4%. თუმცა, ეს მაჩვენებელი 7,1%-ით ნაკლებია 2019 წლის ანალოგიურ პერიოდთან შედარებით.

ლიდერი ქვეყნების ხუთეულში ასევე შედიან იტალია, საბერძნეთი, აშშ და ისრაელი.

დეკემბერში ლიდერთა ქვეყნებს შორის მეექვსე ადგილი დაიბრუნა თურქეთმა და გაუსწრო უკრაინას, რომელმაც მაც 2020 წლის აგვისტოში აჯობა.

ზრდის ტემპები აჩქარდა

ფულადი გზავნილების ზრდის ტენდენცია გრძელდება, თუმცა მისი ტემპები კვლავ დაბალია. ივნისში 17,8%-იანი მატების შემდეგ ივლისში წლიურმა ზრდამ 22,1% შეადგინა, აგვისტოში – 25,8%, სექტემბერში – 28,7%, ოქტომბერში ზრდის ტემპმა იკლო და 18,6% შეადგინა, ნოემბერში -12,5%, ხოლო დეკემბერში კვლავ აჩქარდა და 15,9% შეადგინა.

ფულადი გზავნილების გარკვეული ნაწილი, დაახლოებით 8%, ქვეყანაში პანდემიამდე შემოდიოდა არასაბანკო არხებით – ვიზიტორების მეშვეობით. საერთაშორისო მოგზაურობის შეზღუდვის გამო ფულადი გზავნილების ეს ნაწილი საბანკო სექტორში გადავიდა და, შედეგად, ფულადი გზავნილების აღნიშნულ ზრდაშიც შეიტანა წვლილი, განაცხადა ადრე საქართველოს ეროვნული ბანკის პრეზიდენტმა კობა გვენეტაძემ.

„საერთაშორისო პროგნოზირებისა და კვლევების ცენტრის“ ვიცე-პრეზიდენტმა ნიკა შენგელიამ საქართველოში ფულადი გზავნილების მოცულობის ზრდის ორი მიზეზი დაასახელა.

„პირველი მდგომარეობს იმაში, რომ პანდემიისა და ეკონომიკური საქმიანობის შეზღუდვებიდან გამომდინარე, ხალხი უფრო გაღარიბდა, არ მუშაობს ტრანსპორტი, დაკეტილია სავაჭრო ცენტრები, გარდა სასურსათო და ფარმაცევტული ობიექტებისა. და უცხოეთში მყოფი ჩვენი თანამოქალაქეები უფრო მეტ თანხას გზავნიან. დავუშვათ, თუ 200 დოლარს რიცხავდნენ, ახლა 300 დოლარს რიცხავენ“, – განაცხადა შენგელიამ „Sputnik-საქართველოსთან“ ინტერვიუში.

საქართველოს ეკონომიკის ვარდნის ტემპები გაიზარდა

მისი აზრით, მეორე მიზეზი მდგომარეობს იმაში, რომ სამშენებლო ბიზნესის დახმარების მიზნით დეკემბრის ჩათვლით მთავრობამ იპოთეკური სესხების 4%-ით სუბსიდირების გადაწყვეტილება მიიღო.

„ყველა, ვისაც ახლა საშუალება აქვს, ცდილობს ამ შეთავაზებით ისარგებლოს და ამიტომაც გაიზარდა საქართველოში უცხოეთიდან ტრანზაქციები. თუ 2021 წელს მთავრობა იპოთეკური სესხების სუბსიდირებას გააგრძელებს და ადამიანები ბინებს შეიძენენ, პირველ კვარტალში გადმორიცხვების მოცულობა ისევ გაიზრდება“, – განაცხადა შენგელიამ.

მან აღნიშნა, რომ დეკემბრის ჩათვლით პროგრამა ძალაშია. ამიტომ უცხოეთში მომუშავე ადამიანები ჩქარობენ ისარგებლონ ნაკლები პროცენტის გადახდის შესაძლებლობით და აქტიურად ყიდულობენ ბინებს, რადგან ადრე მათ იპოთეკურ კრედიტზე 13-14%-ის გადახდა უწევდათ.

რამდენი ვალუტა გაიგზავნა საქართველოდან

2020 წლის დეკემბერში საქართველოდან საზღვარგარეთ დაახლოებით 24,7 მლნ დოლარზე მეტი გადაირიცხა, რაც 2019 წლის იმავე პერიოდის მაჩვენებელზე 3,4%-ით ნაკლებია.

2020 წელს საქართველოდან საზღვარგარეთ დაახლოებით 246,9 მლნ დოლარი გადაირიცხა, რაც 4%-ით მეტია 2019 წელთან შედარებით.

445
თემები:
საქართველოს ეკონომიკა
ვალუტის გადამცვლელი პუნქტი

ლარის კურსი 16 იანვარს

2488
(განახლებულია 12:53 16.01.2021)
წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0052 ლარით გაუფასურდა.

თბილისი, 16 იანვარი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,2987 GEL/$1 ნიშნულზე დაადგინა.

წინა ნიშნულთან შედარებით, ქართული ეროვნული ვალუტის კურსი აშშ დოლარის მიმართ 0,0052 ლარით გაუფასურდა.

ლარის კურსი 16 იანვარს
ლარის კურსი 16 იანვარს
2488
თემები:
ლარის კურსი დღეს
მხედარი მთაში

დღის ასტროპროგნოზი ზოდიაქოს ნიშნებისთვის: 17 იანვარი

0
(განახლებულია 12:08 16.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 17 იანვარია, კვირა. მზარდი მთვარე თევზების ნიშანშია. ამ დღეს პლანეტა მზე მფარველობს.

დღეს დიდი მოთმინებისა და გულისყურის გამოჩენაა საჭირო. ამ მხრივ გაურთულდებათ საქმე იმ ადამიანებს, ვისი პროფესიაც დიდ ყურადღებას მოითხოვს, მაგალითად, ბუღალტრებს, პროგრამისტებს. მათ მოუწევთ მოქმედება დევიზით „ასჯერ გაზომე და ერთხელ გაჭერი“.ზოგადად, ამ დღეს ლოგიკა მეორე პლანზე გადაიწევს, ხოლო შრომისუნარიანობა – მესამეზე. წინა პლანზე გამოვა გაღიზიანება, გონებაგაფანტულობა, ემოციებზე აყოლა თავისი „ჩაკირკიტებებით“, კონფლიქტები... დღეს მნიშვნელოვანი გადაწყვეტილების მიღება არ ღირს. იფიქრეთ პოზიტიურზე, გაერთეთ, დაისვენეთ – ესაა მთავარი რეკომენდაცია ამ დღისთვის.

ზოდიაქოს რომელ ნიშნებს გაუმართლებს 2021 წელს>>

ვერძი: საკუთარი ემოციების გაკონტროლება და დამალვა, შესაძლოა, ეფექტური ხერხია, რომ ცივსისხლიანი და გონებამოკრებილი ადამიანის შთაბეჭდილება დატოვოთ, მაგრამ ასევე ძალზე მნიშვნელოვანია, გამონახოთ დრო და გრძნობებს გასაქანი მისცეთ, ასევე ამისგან გაკვეთილიც მიიღოთ. თუ ვინმემ ძალიან გაგაბედნიერათ ან ძალიან გაწყენინათ, საკუთარი გრძნობების ჩვენების გამოხატვის ხერხი უნდა იპოვოთ. ამ ადამიანმა სიმართლე უნდა იცოდეს – თქვენ რას განიცდით. საკუთარ თავში ჩაკეტვით წინსვლას ვერანაირად ვერ შეუწყობთ ხელს.

კურო: დღეს ვარსკვლავები ვირტუალური რეალობის ფანტასტიკურ სამყაროში ჩაძირვას გირჩევენ. ამისთვის საკმარისია, საინტერესო წიგნი გადაშალოთ ან ფილმს უყუროთ. დანარჩენს თქვენი მდიდარი წარმოსახვა გააკეთებს. ეს დაგეხმარებათ, რომ დაისვენოთ ყოველდღიური საქმეებისგან და პოზიტიური ენერგიით დაიმუხტოთ იმის გათვალისწინებით, რომ ეს დღე კონკრეტული ამოცანების გადასაჭრელად მაინც არახელსაყრელია.

ტყუპი: დღეს აჯობებს, თუ ხელს არ მოჰკიდებთ ისეთ საქმეს, სადაც იძულებული ხართ, სხვების იმედზე იყოთ. გარშემომყოფებმა, ნებსით თუ უნებლიეთ, შესაძლოა, დაგაღალატონ. ეს ნებისმიერ საკითხს შეეხება, იქნება ეს სამუშაო თუ პირადი საქმე. დღის განმავლობაში რომ ყველაფერი სათანადოდ წარიმართოს, მხოლოდ ერთი ადამიანის იმედი უნდა გქონდეთ და ეს თქვენი საკუთარი თავია. პროექტები, რომლებიც გუნდურ მუშაობას მოითხოვს, სჯობს, სამომავლოდ გადადოთ.

კირჩხიბი: დღეს არის საფრთხე იმისა, რომ გარშემომყოფების მხრიდან თავდასხმების ობიექტი გახდეთ. ეს, პირველ რიგში, არაახლობელ ადამიანებსა და კოლეგებს ეხება, თუმცა, არაა გამორიცხული, რომ კრიტიკა თქვენი საყვარელი ადამიანის ან ახლო მეგობრისგანაც მოისმინოთ. შესაძლოა, ვინმეს თქვენი სიტყვა არ მოეწონოს, გარეგნობა, არაპროდუქტიულობა მუშაობაში. ვინც არ უნდა იყოს, ამას აუცილებლად ინანებს – თქვენი გაბრაზება მას ძვირი დაუჯდება, საკადრის პასუხს მიიღებს.

ლომი: შესანიშნავი დღე გელოდებათ, როდესაც შეგიძლიათ წარმოაჩინოთ ლიდერის თვისებები და გამარჯვების განწყობა. ამასთან, რაც მეტ წინააღმდეგობას შეხვდებით გზაზე, მით უკეთესი – შეხვალთ საბრძოლო აზარტში და მეტი აქტიურობით გადალახავთ ყველა ბარიერს. ვარსკვლავები გირჩევენ, არ „დაწვრილმანდეთ“ და ხელი იმ საქმეებს მოჰკიდოთ, რომლებშიც ყველაზე მეტ პოტენციალს ხედავთ. თქვენი ენერგიულობა და მიზანსწრაფულობა წარმატებისკენ გიბიძგებთ.

ქალწული: დღეს თქვენში თავდაჯერებულობა მოიკლებს და უსასრულო მერყეობა დაგეუფლებათ. ასეთი განწყობის გამო ნებისმიერი გადაწყვეტილების მიღება გაგიჭირდებათ, თუნდაც ეს, მაგალითად, ჩასაცმელს ეხებოდეს – ორიდან ერთის არჩევაც კი გართულდება. თუ ვითარება თქვენგან სწრაფ მოქმედებებს მოითხოვს, არის საშიშროება, რომ დაუფიქრებელი ნაბიჯი გადადგათ. ეს რომ არ მოხდეს, ცივი გონება უნდა შეინარჩუნოთ და უფრო კარგი იქნება – თავი აარიდოთ ნებისმიერ საპასუხისმგებლო ნაბიჯს.

სასწორი: დღეს სიტუაციამ შეიძლება გაიძულოთ, რომ თქვენს რომელიმე გეგმაზე უარი თქვათ. საუბარი ნებისმიერ რამეზე შეიძლება იყოს – საღამოს გეგმაზე, შვებულებაზე, პაემანზე, რემონტზე... თუ ასე მოხდა, ვარსკვლავები შეგუებას გირჩევენ. ასე დროთა განმავლობაში უფრო მოახერხებთ მიზანთან მიახლოებას და წარმატების გარანტიას. რაც ნამდვილად არ უნდა გააკეთოთ, ეს წუწუნია საკუთარ პრობლემებზე გარშემომყოფებთან. გახსოვდეთ, რომ ადამიანების უმრავლესობას თქვენი პრობლემები საერთოდ არ აინტერესებთ, ხოლო დანარჩენებს ეს გაახარებს კიდეც.

მორიელი: დღეს თქვენში შინაგანი წონასწორობა სჭარბობს. გაქვთ სურვილი, რომ პოზიტივი სხვებსაც გაუზიაროთ. ამის წყალობით გვერდით მყოფების მიმართ მეტ მზრუნველობას გამოიჩენთ. შესაძლოა, ვინმეზე მეურვეობაც აიღოთ, მოუსმინოთ მას, დაეხმაროთ საქმეში ან კეთილი და სასარგებლო რჩევა მისცეთ. გარშემომყოფები მადლიერი დაგრჩებიან და ამაღლდებით როგორც მათ, ისე საკუთარ თვალში.

მშვილდოსანი: დღეს შესაძლოა გაკვირვებული დარჩეთ იმით, რომ გარშემომყოფები ფარულად ან აშკარად თქვენით მანიპულირებას ცდილობენ. მეგობრები, კოლეგები და საყვარელი ადამიანიც კი (შესაძლოა, მხოლოდ კეთილი ზრახვებით), თქვენზე მბრძანებლობას შეეცდებიან. თქვენი განწყობა კი იმგვარი იქნება, რომ ამისთვის წინააღმდეგობის გაწევა ჩვეულებრივზე მეტად გაგიჭირდებათ. მზად ხართ, ინიციატივა საკუთარი ხელიდან გაუშვათ. თუ ეს პერსპექტივა არ გხიბლავთ, მაშინ სიმტკიცე გამოიჩინეთ და „კისერზე წამოსკუპების“ უფლებას ნურავის მისცემთ.

თხის რქა: დღეს ბობოქარი საქმიანობის სურვილი გაგიჩნდებათ, მაგრამ თავშეკავება აუცილებელია – ზედმეტი არ მოგივიდეთ. სწორედ დღეს ძალიან ადვილია, გზას ასცდეთ და რამე სავალალო შეცდომა დაუშვათ. უფრო მეტიც, შეცდომა, შესაძლოა, სულ მარტივ საკითხშიც დაუშვათ, რომელიც ხუთი თითივით იცით. სწორედ ამიტომ, პრობლემები რომ თავიდან აიცილოთ, ექსპერტები გირჩევენ, ტაიმ–აუტი აიღოთ და დაისვენოთ, საქმეები მოიცდის.

მერწყული: ვარსკვლავები გირჩევენ, დღეს დრო დაუთმოთ საკუთარ თავს, ყველაფერს, რაც მოგწონთ: ჰობის, ფიტნესს, სპა–სალონს, საკვებს, შოპინგს... ეს თქვენზე ძალიან კარგად იმოქმედებს – მოდუნდებით და იგრძნობთ ჰარმონიას გარე და შინაგან სამყაროსთან. ხალხმრავლობა კი სულ არ მოგეწონებათ, გინდაც ირგვლივ მხოლოდ ახლობელი ადამიანები შეიკრიბონ. დღეს აჯობებს, თუ ორომტრიალს გაერიდებით და საკუთარ თავთან, ან საყვარელ ადამიანთან მარტო დარჩებით.

თევზები: დღეს თქვენი საქციელი ბევრად იქნება იმაზე დამოკიდებული, თუ როგორ განვითარდება მოვლენები. დღეს ფარული ენერგიის უხვი მარაგი გაქვთ, თუმცა მისგან გათავისუფლება მხოლოდ ავრალურ რეჟიმშია შესაძლებელი. ასე რომ, თუ დღეს არანაირი ზეამოცანა არ გექნებათ, შესაძლებელია, რომ აპათია და სიზარმაცე დაგეუფლოთ. თუმცა, საკმარისია, რამე გაუთვალისწინებელი მოხდეს და აჩვენებთ, რისი გაკეთებაც შეგიძლიათ.

0