დოლარის კუპიურები

ფულადი გზავნილები: რამდენი გადმოირიცხა საქართველოში

76
(განახლებულია 16:10 18.12.2020)
ფულადი გადმორიცხვების მოცულობით ლიდერობს რუსეთი: იანვარი–ნოემბერში რუსეთიდან საქართველოში გადმორიცხული თანხის მოცულობამ დაახლოებით 323,3 მილიონი დოლარი შეადგინა.

თბილისი, 18 დეკემბერი – Sputnik. საქართველოს კომერციულ ბანკებში 2020 წლის ნოემბერში ელექტრონული სისტემებით ფულადი გზავნილების მოცულობა 12,5%-ით გაიზარდა და 169,9 მლნ აშშ დოლარი შეადგინა, ნათქვამია საქართველოს ეროვნული ბანკის განცხადებაში. 

ყველაზე მეტი ვალუტა რუსეთიდან შემოვიდა. 2020 წლის ნოემბერში რუსეთიდან ფულადი გზავნილების მოცულობამ 31,8 მლნ დოლარზე მეტი შეადგინა – ელექტრონული სისტემების მეშვეობით საქართველოს კომერციულ ბანკებში ფულადი გზავნილების საერთო მოცულობის 19%. თუმცა, ეს მაჩვენებელი 16%-ით ნაკლებია გასული წლის ანალოგიურ პერიოდთან შედარებით.

ლიდერი ქვეყნების ხუთეულში ასევე შედიან იტალია, საბერძნეთი, აშშ, ისრაელი და უკრაინა.

რამდენი ვალუტა გადმოირიცხა საქართველოში

ელექტრონული სისტემების მეშვეობით საქართველოს კომერციულ ბანკებში ფულადი გზავნილების მოცულობა 2020 წლის იანვარი–ნოემბრის პერიოდში, გასული წლის ანალოგიურ პერიოდთან შედარებით, 8%-ით გაიზარდა და 1.696,3 მლნ დოლარი შეადგინა. 

 

ფულადი გადმორიცხვების მოცულობით ლიდერობს რუსეთი – იანვარი–ნოემბერში რუსეთიდან საქართველოში გადმორიცხული თანხის მოცულობამ დაახლოებით 323,2 მილიონი დოლარი შეადგინა. ეს ქართულ კომერციულ ბანკებში ელექტრონული სისტემებით ფულადი გადარიცხვების 19,2%-ია. წლის დასაწყისიდან რუსეთიდან გადმოირიცხა 16,1%-ით ნაკლები თანხა, ვიდრე გასული წლის ანალოგიურ პერიოდში.

ლიდერი ქვეყნების ექვსეულში არიან აგრეთვე იტალია, საბერძნეთი, აშშ, ისრაელი და თურქეთი.

ზრდის ტემპი შენელდა

ფულადი გზავნილების ზრდის ტენდენცია გრძელდება, თუმცა ტემპმა იკლო. ივნისში 17,8%-იანი მატების შემდეგ ივლისში წლიურმა ზრდამ 22,1% შეადგინა, აგვისტოში – 25,8%, სექტემბერში – 28,7%, ოქტომბერში ზრდის ტემპმა იკლო და 18,6%, ნოემბერში კი 12,5% შეადგინა. 

ფულადი გზავნილების გარკვეული ნაწილი, დაახლოებით 8%, ქვეყანაში პანდემიამდე შემოდიოდა არასაბანკო არხებით – ვიზიტორების მეშვეობით. საერთაშორისო მოგზაურობის შეზღუდვის გამო ფულადი გზავნილების ეს ნაწილი საბანკო სექტორში გადავიდა და, შედეგად, ფულადი გზავნილების აღნიშნულ ზრდაშიც შეიტანა წვლილი, განაცხადა ადრე საქართველოს ეროვნული ბანკის პრეზიდენტმა კობა გვენეტაძემ.

„საერთაშორისო პროგნოზირებისა და კვლევების ცენტრის“ ვიცე-პრეზიდენტმა ნიკა შენგელიამ საქართველოში ფულადი გზავნილების მოცულობის ზრდის ორი მიზეზი დაასახელა.

„პირველი მდგომარეობს იმაში, რომ პანდემიისა და ეკონომიკური საქმიანობის შეზღუდვებიდან გამომდინარე, ხალხი უფრო გაღარიბდა, არ მუშაობს ტრანსპორტი, დაკეტილია სავაჭრო ცენტრები, გარდა სასურსათო და ფარმაცევტული ობიექტებისა. და უცხოეთში მყოფი ჩვენი თანამოქალაქეები უფრო მეტ თანხას გზავნიან. დავუშვათ, თუ 200 დოლარს რიცხავდნენ, ახლა 300 დოლარს რიცხავენ“, – განაცხადა შენგელიამ „Sputnik-საქართველოსთან“ ინტერვიუში.

მისი აზრით, მეორე მიზეზი მდგომარეობს იმაში, რომ სამშენებლო ბიზნესის დახმარების მიზნით დეკემბრის ჩათვლით მთავრობამ იპოთეკური სესხების 4%-ით სუბსიდირების გადაწყვეტილება მიიღო.

„ყველა, ვისაც ახლა საშუალება აქვს, ცდილობს ამ შეთავაზებით ისარგებლოს და ამიტომაც გაიზარდა საქართველოში უცხოეთიდან ტრანზაქციები. თუ 2021 წელს მთავრობა იპოთეკური სესხების სუბსიდირებას გააგრძელებს და ადამიანები ბინებს შეიძენენ, პირველ კვარტალში გადმორიცხების მოცულობა ისევ გაიზრდება“, – განაცხადა შენგელიამ.

რამდენი ვალუტა გაიგზავნა საქართველოდან

2020 წლის ნოემბერში საქართველოდან საზღვარგარეთ დაახლოებით 21,9 მლნ დოლარზე მეტი გადაირიცხა, რაც გასული წლის იმავე პერიოდის მაჩვენებელზე 0,1%-ით ნაკლებია.

2020 წლის დასაწყისიდან საქართველოდან საზღვარგარეთ დაახლოებით 222,2 მლნ დოლარი გადაირიცხა, რაც 4,9%-ით მეტია 2019 წლის ანალოგიურ პერიოდთან შედარებით.

76
თემები:
საქართველოს ეკონომიკა (908)
პური

თბილისში პურის ახალი ქარხანა შენდება

41
(განახლებულია 16:58 27.01.2021)
საწარმოს პროდუქციის ნაწილი ექსპორტზე გავა, პირველ რიგში, აზერბაიჯანში, შემდგომში კი, შესაძლოა, რუსეთშიც.

თბილისი, 27 იანვარი – Sputnik. ფასტფუდის რესტორნების ქსელი თბილისში პურის ახალ ქარხანას აშენებს, განაცხადა ქართველმა ბიზნესმენმა, კომპანია „მაკდონალდს საქართველოს“ დამფუძნებელმა თემურ ჭყონიამ.

როგორც ჭყონიამ ტელეარხ Formula-ს ეთერში განაცხადა, თებერვლის ბოლოს ან მარტის დასაწყისში სპეციალურად „მაკდონალდსისთვის“ ულტრათანამედროვე პურის ქარხანა გაიხსნება, რომელიც მსოფლიოში მეოთხე იქნება იმ რეცეპტებითა და ტექნოლოგიებით, რომლებსაც ისინი საქართველოში ნერგავენ. ინვესტიციების მოცულობა დაახლოებით 6 მლნ ევროს შეადგენს.

მისი თქმით, პროდუქციას ექსპორტზეც გაიტანენ.

ესაა საექსპორტო პროდუქცია, რომელიც უნდა მივაწოდოთ აზერბაიჯანს, სადაც 22 რესტორანია და, შესაძლოა, სამხრეთ რუსეთშიც გავიტანოთ, აღნიშნა ჭყონიამ.

ჭყონიამ McDonald's-ის ცნობილი ქსელის პირველი რესტორანი 1990-იან წლებში გახსნა. ამჟამად საქართველოში McDonald's-ის სწრაფი კვების რამდენიმე რესტორანი მუშაობს. ამას გარდა ბიზნესმენი ფლობს Coca-Cola-ს ქარხანას და სხვა საწარმოებს საქართველოში.

41
თემები:
საქართველოს ეკონომიკა (908)

სიღარიბე ვირუსზე საშიშია: თბილისი საპროტესტო აქციების ტალღამ მოიცვა

51
(განახლებულია 16:53 27.01.2021)
თბილისში კოვიდ-შეზღუდვების გამო პროტესტის ტალღამ იფეთქა. განსაკუთრებით მკაცრი აკრძალვები მოქმედებს დიდ ქალაქებში. იხილეთ „Sputnik-საქართველოს“ ვიდეო, რას მოითხოვენ მომიტინგეები.

საპროტესტო ტალღა 22 იანვარს დაიწყო, როდესაც ქვეყნის ვიცე-პრემიერმა მაია ცქიტიშვილმა განაცხადა, რომ 1 თებერვლიდან ქვეყანაში შეზღუდვების ნაწილი გაუქმდება, თუმცა თბილისში, რუსთავსა და ქუთაისში აკრძალვები 1 მარტამდე შენარჩუნდება. ამან დიდი უკმაყოფილება გამოიწვია საზოგადოებაში, რადგან დიდი ქალაქების მკვიდრების ერთ-ერთი მთავარი პრობლემა საზოგადოებრივი ტრანსპორტის გაჩერებაა. 

თბილისში ყოველდღიურად იმართება საპროტესტო აქციები მოქმედი შეზღუდვების მოხსნის მოთხოვნით. თუმცა, როგორც მთავრობაში აცხადებენ, საკოორდინაციო საბჭო საკუთარ გადაწყვეტილებას მხოლოდ იმ შემთხვევაში გადახედავს, თუ დადებითობის ეპიდემიოლოგიური მაჩვენებელი 4%-მდე დაეცემა და 7 დღის განმავლობაში შენარჩუნდება. ამ მომენტისათვის ეს მაჩვენებელი 6%-ს შეადგენს.

ამავდროულად საპროტესტო აქციების მონაწილეები აცხადებენ, რომ საქართველოს მთავრობას ქვეყნის საკონსტიტუციო სასამართლოში უჩივლებენ.

51
მეათე მოწვევის პარლამენტი

ქართველ ოპოზიციონერ დეპუტატებს უფლებამოსილებას გაუზრდიან

0
საქართველოში შექმნილი პოლიტიკური კრიზისის ფონზე დამოუკიდებელი დეპუტატები მეტ უფლებამოსილებას მიიღებენ

თბილისი, 27 იანვარი - Sputnik. საქართველოს პარლამენტმა პირველი მოსმენით დაამტკიცა შესწორებები პარლამენტის რეგლამენტში, რომლებიც საკანონმდებლო ორგანოში ოპოზიციონერთა მცირე ჯგუფის უფლებებს აფართოებს.

პოლიტიკური კრიზისის ფონზე პარლამენტში ოპოზიცია წარმოდგენილი იქნება ცხრა დამოუკიდებელი დეპუტატით, თავად საკანონმდებლო ორგანოს კი შეზღუდული უფლებამოსილებები ექნება.

შესწორებების თანახმად, დამოუკიდებელ დეპუტატებს ვიცესპიკერის, ასევე, კომიტეტების თავმჯდომარეების მოადგილეების წარდგენის უფლება ექნებათ.

გარდა ამისა, დებატების დროს ან კანონპროექტის განხილვისას მათ ფრაქციისთვის ანალოგიურ დროს გამოუყოფენ.

შესწორებების მიზეზი გახდა დამოუკიდებელი დეპუტატების შეზღუდული უფლებამოსილებები, რომელთაც დღემდე არა აქვთ შესაძლებლობა, სრულფასოვნად მიიღონ მონაწილეობა პარლამენტის მუშაობაში და დაიკავონ ხელმძღვანელი თანამდებობები.

ვინაიდან მმართველი პარტია „ქართული ოცნება“ 2 თებერვალს დააკმაყოფილებს ოპოზიციის წარმომადგენელთა დიდი ნაწილის უარს მანდატებზე, ოპოზიციური ფრთა პარლამენტში წარმოდგენილი იქნება „ევროპელი სოციალისტების“ ოთხი, პარტია „მოქალაქეების“ ორი და პარტია „ახალი პოლიტიკური ცენტრი - გირჩის“ სამი დეპუტატით. ამასთან, პარტია „გირჩი“ არ აპირებს სხდომებში მონაწილეობას და აგრძელებს ბოიკოტს.

უფრო მეტი უფლებამოსილება?

შესწორებების განხილვისას მმართველი პარტიის წარმომადგენელმა ბეჟან კახაძემ კოლეგებს შესთავაზა, დამოუკიდებელ დეპუტატებს სამწევრიანი ფრაქციის შექმნისა და ბიუროს სხდომაზე დასწრების შესაძლებლობა მიეცათ.

ამასთან დაკავშირებით პარლამენტის თავმჯდომარე არჩილ თალაკვაძემ განმარტა, რომ არსებობს კონსტიტუციის ჩარჩოები, რომლებიც მკაცრად განსაზღვრავს პარლამენტის ბიუროს შემადგენლობას, ასევე ფრაქციების შესაძლებლობებსა და შემადგენლობას.

პროექტის ავტორმა ლევან მგალობლიშვილმა კი აღნიშნა, რომ დამოუკიდებელი დეპუტატების უფლებამოსილება შესაძლოა გაფართოვდეს რეგლამენტის შესაძლებლობების გათვალისწინებით, ისე რომ არ დაზარალდეს კონსტიტუცია.

„ჩვენ არ წავალთ კონსტიტუციის წინააღმდეგ, რომელიც პარლამენტის ფრაქციების შესაძლებლობებს განსაზღვრავს, მათ შორის, სახელმწიფო თანამდებობებზე გარკვეულ პირთა დანიშვნისას, მაგრამ ჩვენ შეგვიძლია რეგლამენტის ფარგლებში ოპოზიციონერებს მეტი შესაძლებლობა მივცეთ“, - განაცხადა მგალობლიშვილმა.

მისი თქმით, კანონპროექტი მეორე მოსმენისთვის დამუშავდება და განსახილველად იქნება წარდგენილი.

რატომ „გაღარიბდა“ პარლამენტი

საქართველოს პარლამენტში არჩევნების შედეგად 60 ოპოზიციონერი და 90 მმართველი პარტიის დეპუტატი მოხვდა. თუმცა ოპოზიციონერების უმრავლესობა დღემდე უარს აცხადებს არჩევნების შედეგების აღიარებაზე და ამბობს, რომ ისინი „ქართული ოცნების“ სასარგებლოდ გაყალბდა.

პარლამენტში მოხვედრილმა დეპუტატებმა პარტიებიდან - „ერთიანი ნაციონალური მოძრაობა“, „ევროპული საქართველო“, „ლელო“, „სტრატეგია აღმაშენებელი“, „საქართველოს პატრიოტთა ალიანსი“ და „გირჩი - მეტი თავისუფლება“ - პროტესტის ნიშნად პარლამენტის დატოვება გადაწყვიტეს.

ექვსიდან ხუთმა სუბიექტმა გააუქმა პარტიული სიები, რათა თავიანთი პარტიებიდან უფრო ლოიალური წარმომადგენლებით მათი ჩანაცვლების შესაძლებლობა მოესპო.

ერთადერთი, ვინც ეს არ გააკეთა, პარტია „პატრიოტთა ალიანსია“, რის წყალობითაც პარლამენტში მისი ოთხი ყოფილი წარმომადგენელი მოხვდა. მათ „პატრიოტების“ ადგილები დაიკავეს და შექმნეს საკუთარი პარტია „ევროპელი სოციალისტები“.

პარლამენტის შემცირებული შემადგენლობა საქართველოს პარლამენტს კონსტიტუციის შეცვლის, კონსტიტუციური კანონების მიღებისა და მიწის შესახებ კანონის შეცვლის შესაძლებლობას უკარგავს.

0