თბილისი

ვისი რამდენი გვმართებს და რატომ?

1079
(განახლებულია 20:08 19.11.2020)
საქართველოს სახელმწიფოს საგარეო ვალი იზრდება. საერთაშორისო საფინანსო ინსტიტუტებისა და კრედიტორი სახელმწიფოების მიმართ საკრედიტო ვალდებულებამ 6 მილიარდ დოლარს გადააჭარბა. რატომ და რაში იხარჯება ასეულობით მილიონი დოლარი?

სამსონ ხონელი

პატივცემულ მკითხველს, იმედია, მოეხსენება, საქართველოს საგარეო ვალი წლიდან წლამდე იზრდება, თუმცა ბოლო პერიოდში საგარეო საკრედიტო ვალდებულებების ზრდა უკვე არა წლებით, არამედ თვეებით იზომება. გამონაკლისი არც ღვინობისთვე იყო და გიორგობისთვეს საქართველო დამატებით 230 მილიონი დოლარით გაზრდილი საგარეო ვალით შეხვდა. როგორც ფინანსთა სამინისტროს მიერ გამოქვეყნებული მონაცემებით ირკვევა, ბოლო ერთი წლის განმავლობაში ქვეყნის საგარეო ვალი კიდევ 1,571 მილიარდი დოლარით გაიზარდა და ახლა 6,991 მილიარდ დოლარს შეადგენს. კი, მაგრამ რატომ, ანდა რაში იხარჯება მილიარდობითი დოლარი? − სავარაუდოდ, დაინტერესდება მკითხველი და წინამდებარე სტატიას სწორედ ამ საკითხზე მსჯელობას დავუთმობ.

არახალია, საერთაშორისო საფინანსო ინსტიტუტებიდან და ცალკეული სახელმწიფოებისგან მოზიდული საკრედიტო რესურსების უდიდესი ნაწილი ინფრასტრუქტურული პროექტების განხორციელებას ხმარდება, რაც მიზნად ისახავს საქართველოს სატრანზიტო ფუნქციისა და ტურისტული პოტენციალის განვითარებას. საკამათო არ არის, ქვეყნის ეკონომიკური ზრდის საშუალო ტემპი საშუალებას არ იძლევა, რომ ასეულობით დოლარის ღირებულების პროექტები სახელმწიფო ბიუჯეტმა დააფინანსოს. ექსპერტ-ანალიტიკოსთა შეფასებით, საგარეო ვალი ძირითადად ეკონომიკის სექტორული, ანუ ცალკეული დარგების ინსტიტუციონალური და ინფრასტრუქტურული განვითარებისთვის იხარჯება. მათი თქმით, ამ მიზნით საკრედიტო ვალდებულებების ზრდა გამართლებულია, მაგრამ საგარეო კრედიტების მოცულობა არ უნდა გადასცდეს კანონით დადგენილ მთლიანი შიდა პროდუქტის 60 პროცენტის ნიშნულს. არადა, საერთაშორისო სავალუტო ფონდის შეფასებით, დღევანდელი მდგომარეობით, სახელმწიფო ვალი უკვე მთლიანი შიდა პროდუქტის 58.6 პროცენტს შეადგენს.

მოგეხსენებათ, COVID-19-ის პანდემიამ სამყაროს დღის წესრიგი შეცვალა. გამონაკლისი არც ჩვენი ქვეყანაა. გლობალური კრიზისის შედეგად მცირე ეკონომიკა კიდევ უფრო დასუსტდა. ეკონომიკურ საქმიანობაზე დაწესებული მასშტაბური თუ წერტილოვანი შეზღუდვების გამო მცირე და საშუალო ბიზნესი ფაქტობრივად გაჩერდა და ათასობით მოქალაქემ შემოსავალი დაკარგა. შექმნილ ვითარებაში მთავრობა იძულებული გახდა უცხოელი კრედიტორებისგან მიმდინარე წლის განმავლობაში მოზიდული ასეულობით მილიონი დოლარი სოციალური რისკების დასაზღვევად და ეკონომიკური შოკის გავლენების შესამცირებლად წარემართა.

საქართველოში არსებული ეკონომიკური კრიზისის ფონზე მთავრობა მომდევნო წლებში იმაზე მეტი ვალის აღებას გეგმავს, ვიდრე პანდემიამდე პერიოდში იყო განსაზღვრული. ჯერ კიდევ მეცხრე მოწვევის პარლამენტში მომავალი წლის სახელმწიფო ბიუჯეტის პროექტის განხილვისას გაირკვა, რომ მთავრობა დამატებით ორ მილიარდზე მეტი ლარის მოცულობის ახალი საგარეო ვალის აღებას გეგმავს. ფინანსთა მინისტრს ივანე მაჭავარიანს არ დაუმალავს, რომ ახალი კრედიტების მობილიზების შედეგად საქართველოს სახელმწიფო ვალი კანონით განსაზღვრულ მშპ-ის 60%-იან ნიშნულს გადააჭარბებს. რას პროგნოზირებს საერთაშორისო სავალუტო ფონდი? − შესაძლოა ჩამეძიოს მკითხველი და, რა გაეწყობა, მოგახსენებთ. როგორც ავტორიტეტული, გავლენიანი საერთაშორისო საფინანსო ინსტიტუტი ვარაუდობს, მომავალ წელს ჩვენი სახელმწიფოს საგარეო ვალი მთლიანი შიდა პროდუქტის 62 პროცენტი იქნება...  

ექსპერტ-ანალიტიკოსთა შეფასებით, მზარდი საკრედიტო ვალდებულება ქვეყნის ისედაც სუსტ ეკონომიკას მძიმე ტვირთად დააწვება, არსებობს მნიშვნელოვანი რისკები. კერძოდ, საქართველოს სახელმწიფო საგარეო სესხს უცხოურ ვალუტაში იღებს. შესაბამისად, ის, ისევე, როგორც მოქალაქე, რომელსაც სესხი დოლარში აქვს აღებული, სავალუტო რისკის წინაშე დგას. „ლარის გაუფასურება ამ ვალს კიდევ უფრო გაზრდის და ბიუჯეტზე და, შესაბამისად, მოსახლეობაზე წნეხი კიდევ უფრო დიდი იქნება. შემოსავალი და ეკონომიკა ლარში გვაქვს, ვალი დოლარშია და ეროვნული ვალუტის გაუფასურების მორიგი ტალღის შემთხვევაში საკრედიტო ვალდებულებების გასასტუმრებლად ბიუჯეტიდან მეტი თანხა დაიხარჯება და სოციალური და სხვადასხვა ინფრასტრუქტურული პროექტების დასაფინანსებლად ნაკლები დარჩება“, − აცხადებს ანალიტიკოსი გიორგი მჟავანაძე. მისივე თქმით, როდესაც საგარეო კრედიტების მთლიან შიდა პროდუქტთან შეფარდება სწრაფად იზრდება, მაშინ ის ქვეყანა უცხოელი კრედიტორებისთვის უფრო არასანდო ხდება, ანუ ფულის სესხება შემდეგ სულ უფრო გართულდება, პირობები გაუარესდება, იგულისხმება მაღალი საკრედიტო განაკვეთი.

ამ კონტექსტში გასათვალისწინებელია, გაზრდილ საგარეო საკრედიტო ვალდებულებასთან დაკავშირებით რა პრობლემებს ხედავს საერთაშორისო სარეიტინგო სააგენტო Fitch Raitings, რომელიც სწორედ საგარეო ვალის მზარდ მაჩვენებელს მიიჩნევს საქართველოს სუვერენული რეიტინგის სუსტ წერტილად. სააგენტო მთავრობას დონორებისგან მოზიდული სახსრების ნაწილის დეპოზიტებში განთავსებას ურჩევს, რაც ქვეყანას ფისკალურ ბუფერს შეუქმნის ეკონომიკის ზრდის დამატებითი სტიმულისა თუ მომავალში დაბალპროცენტიანი ახალი ვალის ასაღებად.

მნიშნვნელოვანია, როგორ გამოიყენებს სახელმწიფო საკრედიტო რესურსებს. ფაქტია, რომ სოციალური მიმართულებით პროექტები წარმატებულად განხორციელდა, თუმცა ბიზნესის მხარდასაჭერად გამიზნული სუბსიდირების, მიკროგრანტებისა და სხვადასხვა პროგრამები დაახლოებით 50 პროცენტით სრულდება. სახელმწიფომ ეს თანხები ვერ დახარჯა, ანუ ზოგი პაკეტი არაეფექტიანი აღმოჩნდა და ბიზნესმა არ ან ვერ ისარგებლა. 

მაშ ასე, 6.991 მილიარდი დოლარის მოცულობის საგარეო ვალი! არის თუ არა ეს საგანგაშო? ექსპერტ-ანალიტიკოსთა შეფასებით, თავისთავად ვალი არ არის კატასტროფა, ადამიანებიც და ქვეყნებიც ვალებთან ერთად ცხოვრობენ, თუმცა აქ მნიშვნელოვანი ის არის, თუ რამდენია ეს ვალი შემოსავალთან მიმართებაში. მდიდარ ქვეყნებს, გამომდინარე იქიდან, რომ მაღალი შემოსავალი აქვთ, მეტის გადახდა შეუძლიათ და ყოველთვიური გადასახადი, ისევე, როგორც ეს ადამიანების პირადი ვალის შემთხვევაშია, მათ ნაკლებად აწვებათ. „სახელმწიფო საგარეო ვალს იმისთვის იღებს, რომ ქვეყანა გაჭირვებიდან ამოვიდეს და უფრო გადახდისუნარიანი გახდეს. ძალიან მნიშვნელოვანია, საზოგადოება რაღაც ფორმით აკონტროლებდეს, თუ რაში იხარჯება საგარეო ვალი და ხმარდება თუ არა ის მიზანს... ასევე მოქალაქეში უნდა იყოს შეგრძნება, რომ ბიუჯეტის ფული − ეს მათი ფულია და, შესაბამისად, ბიუჯეტის ვალიც მათი ვალია, რადგან ბიუჯეტი სწორედ მათ მიერ გადახდილი გადასახადებით ფორმირდება. ასევე განცხადებები, რომ „მთავრობამ წინასაარჩევნოდ დახმარებები დაარიგა“, სწორი არ არის! არ არსებობს ეს დახმარებები, ეს ჩვენი ფულია“, − აცხადებს ანალიტიკოსი სოსო ბერიკაშვილი.

გაითვალისწინებს თუ არა ხალხი ანალიტიკოსის მოსაზრებას, დრო გვიჩვენებს, მანამდე კი გაგაცნობთ ვისი რამდენი მართებს საქართველოს სახელმწიფოს. ქვეყანას მთლიანობაში საერთაშორისო ინსტიტუტების, ორმხრივი კრედიტორი სახელმწიფოებისა და სახელმწიფო ფასიანი ქაღალდების გაყიდვით მიღებული ვალდებულებები გააჩნია. ჩამონათვალი ძალზე ვრცელია, თუმცა თქვენს ყურადღებას რამდენიმე მონაცემზე გავამახვილებ. კრედიტორების სრულ ჩამონათვალს არსებული ვალდებულებების მითითებით თავად შეგიძლიათ გაეცნოთ „საქსტატისა“ და ეროვნული ბანკის ვებ-გვერდებზე განთავსებულ მონაცემებში.

მაშ ასე, საქართველოს სახელმწიფოს ყველაზე მსხვილ კრედიტორებს შორის 1.415 მილიარდი დოლარით აზიის განვითარების ბანკი (ADB) ლიდერობს. მეორე პოზიცია რეკონსტრუქციისა და განვითარების საერთაშორისო ბანკს (IBRD) უკავია − 1.073 მილიარდი დოლარით. პირველ სამეულშია მსოფლიო ბანკის განვითარების საერთაშორისო ასოციაცია (IDA), რომლისაც 909.480 მილიონი დოლარი გვმართებს. ორმხრივი კრედიტორი ქვეყნებიდან კი გერმანია ლიდერობს, რომლის მიმართაც საქართველოს სახელმწიფო საგარეო ვალი 2.278 მილიარდი ლარი იყო, მას მოსდევს საფრანგეთი 1.791 მილიარდი ლარით. მესამე პოზიცია კი იაპონიას უკავია − 703.817 მილიონი ლარით. კრედიტორ სახელმწიფოთა ჩამონათვალიდან სამეულს გავცდები და გეტყვით, რომ მეზობელი სახელმწიფოებისაც გვმართებს. კერძოდ: რუსეთის ფედერაციის − 139.440 მილიონი ლარი; თურქეთის – 35.426 მილიონი ლარი; სომხეთის – 19.247 მილიონი ლარი და ბოლოს აზერბაიჯანის – 18.377 მილიონი ლარი.

როგორი იქნება უახლოესი მომავლის ტენდენცია, რა მოცულობის საგარეო ვალით შეხვდება ქვეყანა მომავალ წელს, მალე ვნახავთ, თუმცა ფაქტია, დროის ამ მოკლე მონაკვეთში საგარეო საკრედიტო ვალდებულება არ შემცირდება, ის შეიძლება მხოლოდ გაიზარდოს...

 

1079
ნათია თურნავა

ნათია თურნავა: „ზამთრის კურორტები აგენერირებს ძალიან დიდ მობილობას“

26
ეკონომიკის მინისტრ ნათია თურნავას განცხადებით, ზამთრის კურორტებზე შეზღუდვების დაწესება აუცილებელი იყო, რადგან იქ ეპიდაფეთქების საფრთხე არსებობდა.

თბილისი, 30 ნოემბერი – Sputnik. იმ დროს, როდესაც ახალი კორონავირუსით მოსახლეობის დღიური ინფიცირების მაჩვენებელი თუნდაც თბილისში აჭარბებს 1000 ადამიანს, წარმოუდგენელია, რომ ზამთრის კურორტებზე არ მოხდეს ეპიდემიის აფეთქება, განაცხადა საქართველოს ეკონომიკისა და მდგრადი განვითარების მინისტრმა ნათია თურნავამ ტელეკომპანია „რუსტავი 2“-ის ეთერში.

ახალი კორონავირუსის გავრცელების პრევენციის მიზნით, 28 ნოემბრიდან საქართველოს ზამთრის კურორტებმა მუშაობა შეწყვიტეს, სასტუმროებს კლიენტების მიღება აეკრძალათ, ხოლო საბაგიროები, სათხილამურო ტრასები, რესტორნები და კაფეები დაიკეტა.

„ზამთრის კურორტები აგენერირებს ძალიან დიდ მობილობას. ზამთარში ყველაზე მეტი დამსვენებელი სტუმრობს ბაკურიანს, გუდაურს. ეს არის არა უბრალოდ ოჯახები, ვინც გადის დასასვენებლად, არამედ მოთხილამურეები თავის ოჯახებთან ერთად დამატებითი კონტინგენტია და აქედან გამომდინარე, არანაირი გარანტია, რომ იქ არ გავრცელდება ვირუსი, არ არსებობს“, - აღნიშნა მინისტრმა.

თურნავას თქმით, ბევრი მაგალითი არსებობს ევროპული ქვეყნების, სადაც ინფიცირების ახალი ტალღა პერიოდულად სწორედ ზამთრის კურორტებიდან მოდიოდა, ამიტომაც ინფექციის გავრცელების რისკი საქართველოს ზამთრის კურორტებზეც არსებობს.

მინისტრმა აქვე ისიც აღნიშნა, რომ ტურისტულ ინდუსტრიას მთავრობის მხრიდან უპრეცედენტო დახმარება  გაეწია.

„ახლა, ბოლო პაკეტი რაც არის ტურისტული ინდუსტრიის დახმარების, ეს არის ის, რომ 4 თვის ქონების გადასახადი, რომელიც გადავუვადეთ 2020 წელს ჩამოეწერათ, მთელი 2021 წელი ეპატიათ უკვე წინასწარ ქონების გადასახადი, გარდა ამისა, მოქმედებს ჩვენი პროგრამა, რომელიც 12 თვის განმავლობაში ბანკის სესხის პროცენტის სუბსიდირებას ითვალისწინებს. ახლა გავაფართოვეთ პროგრამა და რესტორნებიც ჩავრთეთ“, - აღნიშნა თურნავამ.

მინისტრის თქმით, ეს არ არის ჩანაცვლება სრულფასოვანი სეზონის, მაგრამ სრულფასოვანი ზამთრის ტურისტული სეზონი პანდემიის პირობებში ვერ ჩატარდებოდა და ეს ძალიან კარგად ესმით თავადაც სასტუმროებსაც. თუმცა, მისი თქმით, სასტუმროების მეპატრონეებთან დიალოგის რეჟიმი გაგრძელდება.

„თუმცა, რა თქმა უნდა, კარგად გვესმის, რომ ზამთრის კურორტებზე მდებარე სასტუმროებს მეტი დახმარება და თანადგომა დასჭირდებათ და მათთან ერთად დიალოგის რეჟიმში გამოვკვეთავთ იმ პრობლემატიკას, რაზეც შეიძლება ცალკე ვიმსჯელოთ და გადავწყვიტოთ“, - აღნიშნა ნათია თურნავამ.

საქართველოში ზამთრის კურორტები ოთხ რეგიონში მდებარეობს: გუდაურში (მცხეთა-მთიანეთი), თეთნულდი და ჰაწვალი (სვანეთი), ბაკურიანი და კოხტა მიტარბი (სამცხე-ჯავახეთი), გოდერძი (აჭარა). ამ კურორტებზე ტურისტული სეზონი დეკემბრის დასაწყისში იხსნება და მარტის ბოლომდე გრძელდება.

26
თემები:
COVID-19 საქართველოში
ნათია თურნავა

სავაჭრო ცენტრებმა უნდა დაგვარწმუნონ, რომ აჟიოტაჟური მოთხოვნის მართვა შეუძლიათ თურნავა

53
(განახლებულია 20:43 30.11.2020)
ეკონომიკის და მდგრადი განვითარების მინისტრის განცხადებით, სავაჭრო ცენტრების დაკეტვა მთლიანად ეკონომიკის პრობლემაა.

თბილისი, 30 ნოემბერი – Sputnik. მოლებმა უნდა შეძლონ პასუხისმგებლობის აღება და ფასდაკლებებისგან გამოწვეული აჟიოტაჟის მართვა, განაცხადა ეკონომიკის და მდგრადი განვითარების მინისტრმა ნათია თურნავამ ბრიფინგზე.

სავაჭრო ცენტრები: მოგვეცით საშუალება 15 დეკემბრიდან 3 იანვრამდე ვიმუშაოთ>>

თბილისში მდებარე ხუთი სავაჭრო ცენტრის ხელმძღვანელებმა მთავრობას საგანგებო განცხადებით მიმართეს და სთხოვეს, მუშაობის საშუალება მიეცეთ არა 24 დეკემბრიდან, არამედ 15 დეკემბრიდან 3 იანვრამდე პერიოდში. 

„ჩვენ მოლების პრობლემები გავითვალისწინეთ და ეს არ არის მხოლოდ მათი პრობლემა, ეს არის ეკონომიკის, ანუ ჩვენი პრობლემაც. მათ ვაძლევთ საშუალებას, რომ იმუშაონ 24 დეკემბრიდან. ჩვენ ვნახეთ, რა ხდებოდა წინა დღეს მოლებში, ეს ეპიდემიოლოგიურად საშიში სურათი იყო. ამიტომ ჩვენ მათ უნდა დაგვარწმუნონ, რომ აჟიოტაჟური მოთხოვნის მართვა შეუძლიათ, რომელიც შეიძლება ფასდაკლებამაც გამოიწვიოს“, – აღნიშნა ნათია თურნავამ.

მინისტრის თქმით, ამ ვითარებამ კიდევ ერთხელ გვაჩვენა, რომ მოლები ქმნიან ადამიანების დიდ მობილობას და ამაზე მთელი მსოფლიო თანხმდება.

„ჩვენ უნდა დავინახოთ, რომ ისინი პასუხისმგებლიანად უდგებიან ამ საკითხს", – აღნიშნა თურნავამ.

უწყებათშორისმა საკოორდინაციო საბჭომ ქვეყანაში მოქმედი რეგულაციები უფრო გაამკაცრა. ახალი შეზღუდვების მიხედვით, დიდ ქალაქებსა და ზამთრის კურორტებზე სავაჭრო ობიექტები (გარდა სურსათის, ცხოველების საკვების, აფთიაქების, ვეტაფთიაქების, საყოფაცხოვრებო ქიმიისა და ჰიგიენის მაღაზიებისა და პრესის ჯიხურებისა) იმუშავებენ მხოლოდ დისტანციურ რეჟიმში, ხოლო 24 დეკემბრიდან 15 იანვრამდე პერიოდში მათთვის შეზღუდვები მოიხსნება. 16-დან 31 იანვრამდე პერიოდში კი სავაჭრო ცენტრები არ იმუშავებენ შაბათ-კვირას.

ხუთი სავაჭრო ცენტრის წარმომადგენლებმა რამდენიმე დღის წინ ერთობლივ პრესკონფერენციაზე განაცხადეს, რომ წერტილოვანი შეზღუდვების ფარგლებში სავაჭრო მოლების დახურვის აუცილებლობა არ არსებობს, რადგან ვირუსის გავრცელების საწინააღმდეგო ღონისძიებების ფარგლებში ისინი ინარჩუნებდნენ სამუშაო ადგილებს და სავაჭრო ცენტრები არასდროს გამხდარა ვირუსის გავრცელების ცხელი წერტილი.

სავაჭრო ობიექტების ხელმძღვანელების განცხადებით, ხუთი სავაჭრო ცენტრისთვის ყოველი დაკეტილი დღე ნიშნავს 10 მლნ ლარამდე ზარალს, ამ ცენტრებში კი დასაქმებულია დაახლოებით 15 ათასი ადამიანი, რომლებიც სავაჭრო ცენტრებში არსებული ობიექტების დაკეტვის შემთხვევაში რჩებიან უმუშევრად.

ამასთან, მათი განცხადებით, სავაჭრო ცენტრების ფუნქციონირება 15 დეკემბრიდან 3 იანვრის ჩათვლით პერიოდში მნიშვნელოვნად შეამცირებს მასობრივი თავყრილობების რისკს (მომხმარებლის დროში გადანაწილების თვალსაზრისით) და ინფექციის გავრცელების ალბათობას. 

რას აცხადებენ საქართველოს ბიზნეს–ასოციაციაში ახალი ლოკდაუნის შესახებ>>

სექტემბრის დასაწყისიდან ქვეყანაში ინფიცირების მკვეთრი მატება დაიწყო. საქართველოში ახალი კორონავირუსით დაავადებულთა რაოდენობა ბოლო დღე-ღამეში 3.216-ით გაიზარდა და ინფიცირებულთა საერთო რიცხვმა 135.584-ს მიაღწია.

საქართველოში ახალი კორონავირუსის პირველი შემთხვევა 26 თებერვალს დაფიქსირდა.

53
თემები:
COVID-19 საქართველოში
ტყე

დეკემბრის ასტროლოგიური პროგნოზი ზოდიაქოს ნიშნებისთვის

0
(განახლებულია 11:55 30.11.2020)
სტრესული და დრამატული ვითარებებისგან თავისუფალი თვე გველოდება. მისი მთავარი მახასიათებელი მონოტონურობა იქნება. წინასაახალწლო განწყობა კი, შესაძლოა, რამდენადმე ბანალური იყოს და არ ეტყობოდეს ის საყოველთაო მხიარულება, რაც ზოგადად ამ პერიოდს ახასიათებს

ორი სიტყვით რომ ვთქვათ, ზამთარი ემოციური სიცივისა და ამაღლებული მერკანტილიზმის პირობებში დაიწყება.

რაც შეეხება ცალკეულ სტიქიებს, მიწის სტიქიის წარმომადგენლებს – თხის რქებს, ქალწულებსა და კუროებს ვენერა გაუწევს მფარველობას. მათთვის უსიამოვნებები პიროვნულ ურთიერთობებში მოსალოდნელი არ არის.

წყლის სტიქიის წარმომადგენლებს – კირჩხიბებს, მორიელებსა და თევზებს სატურნი გაუწევს მფარველობას და ყველაფერს გააკეთებს იმისთვის, რომ მაქსიმალურად ეფექტურად გამოიყენონ ბუნებით ბოძებული ინტუიცია.

ცეცხლის სტიქიის ნიშნებს – ლომებს, ქალწულებსა და ვერძებს ძალიან აქტიურად არა, მაგრამ მაინც დაეხმარება მზე. ზამთრის დასაწყისში ნაკლებად სავარაუდოა იმუნიტეტის დაქვეითებასთან და ავადმყოფობასთან დაკავშირებული პრობლემები.

რაც შეეხება ჰაერის ნიშნებს – ტყუპებს, სასწორებსა და მერწყულებს, დეკემბერში მათი მხარდამჭერი მთვარე იქნება. მათი ინტუიცია კიდევ უფრო გამძაფრდება, რაც საუკეთესო დამხმარე იქნება საქმიანობაში.

2021 წლის ჰოროსკოპი: ფინანსები, სიყვარული, ჯანმრთელობა – ვერძი>>

ვერძი

ვერძებს რამდენადმე ქაოტური თვე გელოდებათ. სხვადასხვა სურვილს შორის „გაიხლიჩებით“: მოგზაურობა, სამუშაოს შეცვლა, საკუთარი ბიზნესის წამოწყება, დაქორწინება... ერთი უკიდურესობიდან მეორეში შეიძლება გადავარდეთ, ამიტომ გონივრული მოქმედებებია საჭირო. დეკემბერი სურვილების განხორციელებისთვის ძალზე ხელსაყრელი თვეა, მაგრამ სანამ ნაბიჯს გადადგამთ, კარგად უნდა დაფიქრდეთ.

ვარსკვლავები გირჩევენ, წელიწადი ვალებისა და შეუსრულებელი დაპირებების გარეშე დაასრულოთ, ნუ გაიყოლებთ „კუდებს“ მომავალი წლისთვის. ურთიერთობებში არ გამოავლინოთ აგრესია, მოერიდეთ კონფლიქტებს ახლობლებთან. წინასაახალწლოდ სასიამოვნო სიურბრიზები გელოდებათ. ფინანსური თვალსაზრისით მომგებიანი თვის ბოლო კვირა იქნება.

კურო

კუროებისთვის ძალზე სასიამოვნო დრო დგება. შეძლებთ მიმდინარე პროექტების წარმატებით დასრულებას, მომგებიანი კონტრაქტების გაფორმებას. ფორტუნა თქვენ გვერდით იდგება ყველა სფეროში – სიყვარულში, საქმიანობაში, ოჯახურ საქმეებში. მიუხედავად იმისა, რომ ყველაფერს იოლად გაუმკლავდებით, ვარსკვლავები გირჩევენ, არ მოდუნდეთ, რადგან მიმდინარე მოვლენებზე პასუხისგებლობის აღება საკუთარ თავზე მოგიწევთ.

მარტოხელებისთვის ამ თვეში სიყვარულის პოვნის პერსპექტივა არ ჩანს. ჯანმრთელობას რაც შეეხება, დეკემბერში მას მეტი ყურადღება უნდა მიაქციოთ. იმუნიტეტი დაქვეითებული გექნებათ, ასევე პრობლემები შეიძლება იყოს ემოციური თვალსაზრისით. ასტროლოგები გირჩევენ, უარყოფით ვითარებებს შეძლებისდაგვარად არ მიაქციოთ ყურადღება. წაგადგებათ რეგულარული ფიზიკური ვარჯიში. ფინანსების მხრივ წარმატებული თვის ბოლო დეკადა იქნება.

2021 წლის ჰოროსკოპი: ფინანსები, სიყვარული, ჯანმრთელობა – კურო>>

ტყუპი

მთლიანობაში სტაბილური თვე გელოდებათ, თუმცა გარკვეული ემოციური დაძაბულობები მაინც იქნება. მოგიწევთ ამტანობისა და სტრესისადმი მდგრადობის გამოჩენა. პრობლემებია მოსალოდნელი სამსახურშიც. მაგრამ ასტროლოგები როგორც ამბობენ, ამ ყველაფერს შესანიშნავად გაუმკლავდებით, თუ სიმშვიდეს შეინარჩუნებთ და ნებისმიერ წვრილმანზე არ მოიშლით ნერვებს.

სიყვარულსა და ურთიერთობებში კარგი იქნება, თუ ჩხუბსა და აყალმაყალს მოერიდებით. სამუშაოზე თვის შუა პერიოდში ინტრიგები და ჭორებია მოსალოდნელი, მაგრამ წლის ბოლოს ყველაფრის გარკვევასა და გამოსწორებას შეძლებთ. არ არის გამორიცხული დაუგეგმავი ხარჯები და ზოგადად, არასტაბილური ფინანსური მდგომარეობა. თქვენი ფიზიკური მდგომარეობა დეკემბერში სტაბილური იქნება. ყურადღება გმართებთ ემოციური ფონისადმი – უნდა შეივსოთ პოზიტიური ენერგიით. ამაში ახლობელი ადამიანები დაგეხმარებიან.

2021 წლის ჰოროსკოპი: ფინანსები, სიყვარული, ჯანმრთელობა – ტყუპი>>

კირჩხიბი

კირჩხიბებმა წლის ბოლოს სამსახურთან დაკავშირებით ნაჩქარევი გადაწყვეტილებები არ უნდა მიიღოთ. სანამ კონტრაქტს დადებთ ან საკუთარ ბიზნესს დაიწყებთ, გაიარეთ კონსულტაცია იურისტთან. ვარსკვლავები გირჩევენ, შეწყვიტოთ ყველასა და ყველაფერში ეჭვის შეტანა, დატკბეთ იმით, რაც გაქვთ.

თვის პირველ ნახევარში სიყვარულის სფეროში მრავალი სასიამოვნო რამ გელოდებათ: საჩუქრები, სიყვარულში გამოტყდომა, რომანტიკული ნაცნობობა. მარტოხელებს ექსპერტები აფრთხილებენ, რომ ხანგრძლივ და სტაბილურ ურთიერთობებზე იმედების დამყარება ჯერ ადრეა, ხანმოკლე მსუბუქი ფლირტი კი მრავალი დადებითი ემოციით აგავსებთ. ჯანმრთელობის მხრივ სიფრთხილე გმართებთ დეკემბრის მეორე ნახევარში. რაც შეეხება საქმიანობასა და ფინანსებს, აქ ასტროლოგები გირჩევენ, მნიშვნელოვან საქმეებს თვის მეორე ნახევარში შეუდგეთ.

2021 წლის ჰოროსკოპი: კირჩხიბი – ფინანსები, სიყვარული, ჯანმრთელობა>>

ლომი

დეკემბერში გექნებათ შეგრძნება, რომ ომის ველზე იმყოფებით და თითქოს მთელი სამყარო თქვენ წინააღმდეგ ამხედრდა. ამის გამო დიდი აქტიურობა თვის პირველ ნახევარში ძალების გამოფიტვამდე მიგიყვანთ. ასტროლოგები გირჩევენ, მიუხედავად ყველაფრისა, ოპტიმიზმი შეინარჩუნოთ. სამუშაოს გამო დეკემბერში ბევრი საზრუნავი გექნებათ, მაგრამ პირად ცხოვრებაში უსიამოვნო სიურპრიზები არ გელოდებათ.

მთელი თვე რომანტიკული განწყობით იქნებით განმსჭვალული, ცოლიან ლომებს ვარსკვლავები გირჩევენ, არ მოიტყუოთ და გარეთ რომანი არ გააბათ – ეს ძალიან სარისკოა. ზოგადად, სასიყვარულო ასპარეზზე დიდი წარმატებები გელოდებათ. მიუხედავად რომანტიკული განწყობისა, მუშაობა ბევრი მოგიწევთ. თვის ბოლოს ფინანსური პრობლემები შეიძლება გამწვავდეს. იფრთხილეთ ამ კუთხით – მოსალოდნელია ფინანსური დანაკარგები.

2021 წლის ჰოროსკოპი: ლომი – ფინანსები, სიყვარული, ჯანმრთელობა>>

ქალწული

ქალწულებს თვის პირველი ნახევარი რამდენადმე დაძაბული გექნებათ, მოსალოდნელია ჯანმრთელობის მხრივ პრობლემები და მეტოქეებისა და მოშურნეების ფარული ინტრიგები. მაგრამ დეკემბრის ბოლოს უკვე ბედი გაგიღიმებთ, დადგება მშვიდი პერიოდი. გაგიტაცებთ ყოფითი საკითხები, როგორიცაა, მაგალითად, რემონტის გაკეთება, ბინის გადაწყობა და ა.შ. სანამ „საშინაო რევულუციას“ დაიწყებთ, მოიშორეთ თავიდან ყველაფერი უსარგებლო, გათავისუფლდით ძველმანებისგან. ეს ეხება თქვენს ფიქრებსაც – არ გაიკაროთ ნეგატიური აზრები.

სიყვარულსა და ურთიერთობებში ყველაფერი კარგად იქნება. მარტოხელებმა, შესაძლოა, დაქორწინებაც გადაწყვიტონ. ჯანმრთელობას კი უნდა მიხედოთ აუცილებლად, ოღონდ თვითმკურნალობის გარეშე – მიაკითხეთ სპეციალისტს. იმუნიტეტის ამაღლებაში ფიზიკური ვარჯიშები დაგეხმარებათ. წარმატებებია მოსალოდნელი სამუშაოზე, თუმცა თვის შუა პერიოდში კონფლიქტებია სავარაუდო, მაგრამ ყველაფერი კარგად დამთავრდება, თუ საქმის გარჩევასა და ურთიერთობების გამორკვევაზე დროს არ დახარჯავთ. თვის მეორე ნახევარში დამატებითი შემოსავალი გელოდებათ.

2021 წლის ჰოროსკოპი: ქალწული – ფინანსები, სიყვარული, ჯანმრთელობა>>

სასწორი

წლის ბოლო თვეში სასწორებს არ გელოდებათ არც განსაკუთრებული წარმატებები და არც განსაკუთრებული ცვლილებები. ამ თვეში, სჯობს, უარი თქვათ შორეულ მგზავრობაზე, ყურადღებით იყოთ ახალ ნაცნობებთან, რათა თაღლითობის მსხვერპლი არ გახდეთ. თვის პირველ ნახევარში მოსალოდნელია საშინაო საქმეებში გარკვეული ორომტრიალი, ფინანსური პრობლემები, მაგრამ, სავარაუდოდ, გაჩნდება შემოსავლების მოულოდნელი წყარო და პრობლემას გაუმკლავდებით.

თვის დასაწყისი კარგი დროა სერიოზული ურთიერთობების დაწყებისთვის. დაოჯახებულებს კი შუა რიცხვებში ოჯახური კონფლიქტი ელოდება. თუ ეგოისტურად და ჯიუტად მოიქცევით, არაა გამორიცხული, რომ კავშირი გაწყდეს. ამიტომ ასტროლოგები გირჩევენ, იყოთ უფრო მოქნილი და ეძებოთ კომპრომისი და გამოსავალი შექმნილი ვითარებიდან. რაც შეეხება სამუშაოს, დეკემბრის ბოლოს ახალი იდეები გაგიჩნდებათ, გაიცნობთ საინტერესო ადამიანებს, ცხოვრება დინამიკურად განვითარდება.

მორიელი

დეკემბერში მორიელებს საზრუნავი ახლობლების ჯანმრთელობის მხრივ გაგიჩნდებათ, რაც ემოციურად და სულიერად დაგღლით. სამუშაოზე, სჯობს, გაღიზიანება არ გამოავლინოთ. წლის ბოლო კვირები ოჯახთან ერთად გაატარეთ, უარი თქვით შორეულ მგზავრობაზე, შეამცირეთ საქმიანი აქტიურობა, წინააღმდეგ შემთხვევაში, არ არის გამორიცხული, რომ ჯანმრთელობის პრობლემები შეგექმნათ. დეკემბრის ბოლოს დაისვენეთ, ხოლო იანვრიდან უკვე ენერგიულად შეუდექით საქმიანობას.

დაოჯახებულ მორიელებს შესაძლოა პრობლემები გაგიჩნდეთ ბავშვებთან ურთიერთობებში, მოგიწევთ ავტორიტეტის მოპოვება. მარტოხელებს გაგიმძაფრდებათ სასიყვარულო და საქმიანი გმირობისადმი მიდრეკილება, მათ შორის, არაა გამორიცხული სარისკო რომანების გაბმა. რაც შეეხება ქალ მორიელებს, მათ შესანიშნავი შანსი აქვთ დაორსულების. რაც შეეხება ჯანმრთელობას, ასტროლოგების რჩევაა, პირველ რიგში ნერვულ სისტემას გაუფრთხილდეთ, ასევე არის ტრავმების მიღების ალბათობა, ხოლო სამუშაოსა და ფინანსების მხრივ ცვლილებები შუა თვეშია მოსალოდნელი ცვლილებები პროფესიული კუთხით დადებითი იქნება, ფინანსების მხრივ გაურკვეველი ვითარება ჩამოყალიბდება, ამიტომ, სჯობს, ხარჯები შეამციროთ.

ეგვიპტური ჰოროსკოპი – დაინახეთ თქვენი თავი განსხვავებულად>>

მშვილდოსანი

ასტროლოგები გირჩევენ, რომ დეკემბერში სიფრთხილე გამოიჩინოთ საქმიანობისა და მგზავრობის დროს. მგზავრობა სჯობს, თვის ბოლოსთვის გადაიტანოთ. ამ პერიოდში არ არის გამორიცხული, რომ სხვისი გავლენის ქვეშ მოექცეთ და რამე სარისკო პროექტში ჩაებათ. შუა რიცხვებში პირად საქმეებში შესაძლოა, წყენა და ბრაზი გაჩნდეს, მაგრამ გეყოფათ საიმისო ძალა, რომ ურთიერთობები მოაგვაროთ. ასევე შუა რიცხვებში ფინანსური პრობლემებია მოსალოდნელი.

ოჯახურ ურთიერთობებში იყავით გულწრფელი, გაატარეთ მეტი დრო საყვარელ ადამიანთან. ბევრ თქვენგანს გარეგნობაში სიახლეების შეტანის სურვილი გაუჩნდება – ეწვიეთ სილამაზის სალონს, განაახლეთ გარდერობი, არ შეუშინდეთ ცვლილებებს. რაც შეეხება სამუშაოს, აქ პრობლემებია მოსალოდნელი, მაგრამ პანიკაზე აყოლა არაფერს გარგებთ, შეხედეთ ყველაფერს ფხიზელი გონებით. ამასთან, თვის შუა რიცხვებში ახალი სამსახურის პერსპექტივა შეიძლება გამოჩნდეს, რომელიც კარგ შემოსავალს გპირდებათ. წლის ბოლო იდეალური დროა რამე ახალი საქმის დასაწყებად.

თხის რქა

დეკემბერში თხის რქებს უამრავი დადებითი და უარყოფითი ემოცია გელოდებათ. საკმაოდ წარმატებული დროა რომანტიკული და სამუშაო კავშირების განვითარებისთვის, მაგრამ, ამავე დროს, დაძაბული სამუშაო გრაფიკი მოდუნებისა და ახალი წლისთვის მომზადების საშუალებას არ მოგცემთ. თვის ბოლოს დიდი ფინანსური ხარჯები გელოდებათ. ამ პერიოდში შეანელეთ სამუშაო ტემპები და მოერიდეთ რთულ პრობლემებს. 20 დეკემბერის შემდეგ თქვენი განწყობა გაუმჯობესდება.

საოჯახო საქმეების მოსაგვარებლად ბევრი დრო დაგჭირდებათ. ვარსკვლავები გირჩევენ, წლის ბოლო დაუთმოთ საკუთარ პიროვნებას, ფასეულობათა გადახედვას, პრიორიტეტების განაწილებასა და მომავლის დაგეგმვას. მარტოხელებს საბედისწერო შეხვედრა გელოდებათ, რომელიც, შესაძლოა, მტკიცე და ხანგრძლივ ურთიერთობაში გადაიზარდოს. ბოლო ხანს გადატვირთული სამუშაო გრაფიკის გამო თქვენი განწყობა ცვალებადი იქნება. აუცილებლად გჭირდებათ დასვენება, სუფთა ჰაერზე სეირნობა და ისეთ ადამიანებთან ურთიერთობები, რომლებიც თქვენში გაღიზიანებას არ იწვევენ. ფინანსური კუთხით გარკვეული პრობლემებია მოსალოდნელი შუა რიცხვებში, მაგრამ ყველაფერი მოგვარდება და წლის ბოლოს „ბედნიერი ბილეთის“ მფლობელი გახდებით.

ბუმერანგის პრინციპი ზოდიაქოს ნიშნებისთვის>>

მერწყული

მერწყულებს დეკემბერში ფულთან დაკავშირებული სირთულეების გადალახვა მოგიწევთ. არ მიიღოთ ნაჩქარევი გადაწყვეტილებები. შემთხვევებს, რომლებიც ცხოვრებას გირთულებთ, ფილოსოფიურად შეხედეთ. არ ღირს ყველაფრის გულთან ახლოს მიტანა. ყურადღება მიაქციეთ ჯანმრთელობას და განწყობას, რათა ირგვლივ მყოფ ადამიანებს პრობლემები არ შეუქმნათ.

პირად ცხოვრებაში საკუთარი შეცდომების გამოსწორება მოგიწევთ. მეტი დრო დაუთმეთ ოჯახის წევრებს, ეცადეთ და ყველაფერი გამოგივათ. მარტოხელებს ძალიან საინტერესო შეხვედრა გელოდებათ. დროთა განმავლობაში მიხვდებით, რომ ეს სწორედ ის ადამიანი, რომელსაც ეძებდით. დეკემბრის მეორე ნახევარს, კარგი იქნება, თუ დასვენებასა და შემოქმედებას მიუძღვნით, ზედმეტად არ გადაიღალოთ. ფინანსების კუთხით დეკემბერში დიდი მოლოდინები გაქვთ, მაგრამ ნაკლებად სავარაუდოა, რომ ეს იმედები ახდეს. თვის შუა რიცხვებში ეცადეთ, არ ჩაებათ ავანტიურაში, როგორი მომგებიანიც არ უნდა გეჩვენებოდეთ ის. მოსალოდნელია დიდი ხარჯები, მაგრამ თვის ბოლოს, თქვენი სიმტკიცისა და ინიციატივების წყალობით, წარმატებას მიაღწევთ და მოგებასაც მიიღებთ.

თევზები

წლის ბოლო თვე თევზებისთვის ზოგიერთი საყოფაცხოვრებო და ფინანსური პრობლემის გადაჭრისთვის საკმაოდ ხელსაყრელი იქნება. ეცადეთ, ამ პერიოდში საკუთარ სურვილებს ხორცი შეასხათ. თუ წლის ბოლომდე ყველა საქმეს გაუმკლავდებით, 2021 წელს თქვენი მდგომარეობა მხოლოდ გაუმჯობესდება. თვის ბოლოს დროს ნუ დაკარგავთ მნიშვნელოვანი საქმეების დაგეგმვასა და რეალიზებაზე, სჯობს, პერიოდი მთლიანად ოჯახს მიუძღვნათ.

მოერიდეთ ჩხუბსა და კამათს ოჯახშიცა და სამუშაოზეც. დაოჯახებულ თევზებს ჰარმონიული ურთიერთობები გელოდებათ საყვარელ ადამიანთან, ხოლო მარტოხელებს წლის მიწურულს – დიდ სიყვარულთან შეხვედრა. ემოციური თვალსაზრისით თვის ბოლოს განწყობის ხშირი ცვლაა მოსალოდნელი, ამიტომ გაუფრთხილდით თავს და ყველაფერზე ნუ ინერვიულებთ. რაც შეეხება სამუშაოს, აქ ასტროლოგები გირჩევენ, ყურადღებით იყოთ კოლეგებთან და საქმიან პარტნიორებთან. მათთან მიმართებით იმპულსური ნაბიჯების გადადგმა არ ღირს. ფინანსური თვალსაზრისით საკმაოდ კარგი თვე გელოდებათ.

0