აშშ დოლარი

საქართველოში ფულადი გზავნილები იზრდება: რომელი ქვეყნები ლიდერობენ

50
(განახლებულია 13:16 16.10.2020)
კობა გვენეტაძის განცხადებით, ფულადი გადარიცხვების ზრდის მაჩვენებელზე იმოქმედა იმ ფაქტმაც, რომ პანდემიის საწყის ეტაპზე დაწესებული შეზღუდვების შემსუბუქების შემდეგ დაგროვილი გზავნილები მომდევნო თვეებში გამოიგზავნა.

თბილისი, 16 ოქტომბერი — Sputnik. საქართველოს კომერციულ ბანკებში 2020 წლის სექტემბერში ელექტრონული სისტემებით ფულადი გზავნილების მოცულობა 28,7%-ით გაიზარდა და 192,7 მლნ დოლარი შეადგინა, ნათქვამია საქართველოს ეროვნული ბანკის განცხადებაში. 

ყველაზე მეტი ვალუტა რუსეთიდან შემოვიდა. 2020 წლის სექტემბერში რუსეთიდან ფულადი გზავნილების მოცულობამ 35 მლნ დოლარზე მეტი შეადგინა – ელექტრონული სისტემების მეშვეობით საქართველოს კომერციულ ბანკებში ფულადი გზავნილების საერთო მოცულობის 18,2%.

თუმცა, ეს მაჩვენებელი 3,2%-ით ნაკლებია გასული წლის ანალოგიურ პერიოდთან შედარებით.

ლიდერი ქვეყნების ექვსეულში შედიან იტალია, საბერძნეთი, აშშ, ისრაელი და უკრაინა. უკრაინამ მიმდინარე წლის აგვისტოში უკან ჩამოიტოვა თურქეთი, რომელიც მრავალი წლის მანძილზე საქართველოში ფულადი გზავნილების მხრივ ლიდერი ქვეყნების ექვსეულში იყო.

უკრაინიდან სექტემბერში 13,2 მლნ დოლარზე მეტი შემოვიდა – თითქმის 209%-ით მეტი, ვიდრე გასული წლის ანალოგიურ პერიოდში. უკრაინიდან გადმორიცხული თანხა ელექტრონული სისტემების მეშვეობით საქართველოს კომერციულ ბანკებში ფულადი გზავნილების საერთო მოცულობის დაახლოებით 7,6%-ია.

რამდენი ვალუტა გადმოირიცხა საქართველოში

ელექტრონული სისტემების მეშვეობით საქართველოს კომერციულ ბანკებში ფულადი გზავნილების მოცულობა 2020 წლის იანვარი–სექტემბრის პერიოდში, გასული წლის ანალოგიურ პერიოდთან შედარებით, 6,2%-ით გაიზარდა და 1345 მლნ დოლარი შეადგინა. 

ფულადი გადმორიცხვების მოცულობით ლიდერობს რუსეთი – იანვარი–სექტემბერში რუსეთიდან საქართველოში გადმორიცხული თანხის მოცულობამ დაახლოებით 256,2 მილიონი დოლარი შეადგინა. ეს ქართულ კომერციულ ბანკებში ელექტრონული სისტემებით ფულადი გადარიცხვების 19,2%-ია. წლის დასაწყისიდან რუსეთიდან გადმოირიცხა 17,2%-ით ნაკლები თანხა, ვიდრე გასული წლის ანალოგიურ პერიოდში.

ლიდერი ქვეყნების ექვსეულში არიან იტალია, საბერძნეთი, აშშ, ისრაელი და თურქეთი.

ზრდის ტენდენცია გრძელდება

ფულადი გზავნილების ზრდის ტენდენცია გრძელდება – ივნისში 17,8%-იანი მატების შემდეგ ივლისში წლიურმა ზრდამ 22,1% შეადგინა, აგვისტოში – 25,8%, ხოლო სექტემბერში – 28,7%. 

ფულადი გზავნილების გარკვეული ნაწილი, დაახლოებით 8%, ქვეყანაში პანდემიამდე შემოდიოდა არასაბანკო არხებით – ვიზიტორების მეშვეობით. საერთაშორისო მოგზაურობის შეზღუდვის გამო ფულადი გზავნილების ეს ნაწილი საბანკო სექტორში გადავიდა და, შედეგად, ფულადი გზავნილების აღნიშნულ ზრდაშიც შეიტანა წვლილი, განაცხადა ადრე საქართველოს ეროვნული ბანკის პრეზიდენტმა კობა გვენეტაძემ.

ფულადი გზავნილები აპრილში 42,3%-ით შემცირდა, მაისში კი მხოლოდ 9,6%-ით.

გვენეტაძე ვარაუდობს, რომ ფულადი გადარიცხვების ზრდის მაჩვენებელზე იმოქმედა იმ ფაქტმაც, რომ პანდემიის საწყის ეტაპზე დაწესებული შეზღუდვების შემსუბუქების შემდეგ დაგროვილი გზავნილები მომდევნო თვეებში გამოიგზავნა.

რამდენი ვალუტა გაიგზავნა საქართველოდან

სექტემბერში საქართველოდან საზღვარგარეთ დაახლოებით 25,1 მლნ დოლარზე მეტი გადაირიცხა, რაც გასული წლის იმავე პერიოდის მაჩვენებელზე 22,4%-ით მეტია.

2020 წლის დასაწყისიდან საქართველოდან საზღვარგარეთ დაახლოებით 176,5 მლნ დოლარი გადაირიცხა, რაც 5,3%-ით მეტია 2019 წლის ანალოგიურ პერიოდთან შედარებით.

50
თემები:
საქართველოს ეკონომიკა (780)
ღამის თბილისი

როგორია საქართველოში ბიზნესის განწყობა ბიზნეს-ასოციაციამ ახალი კვლევა გამოაქვეყნა

15
(განახლებულია 19:19 21.10.2020)
BAG ინდექსი ყოველკვარტალურად მზადდება და ის საქართველოში ბიზნეს-კლიმატის შეფასების ინდიკატორს წარმოადგენს.

თბილისი, 21 ოქტომბერი – Sputnik. საქართველოს ბიზნეს-ასოციაციამ (BAG) ქვეყანაში ბიზნესის განწყობის განახლებული ინდექსი გამოაქვეყნა, სადაც აღნიშნულია, რომ 2020 წლის მესამე კვარტალში ორგანიზაციის წევრებმა თავიანთი მიმდინარე მდგომარეობა უარყოფითად, ხოლო მომდევნო ექვსი თვის მოლოდინი დადებითად შეაფასეს.

BAG ინდექსი წარმოადგენს საქართველოში ბიზნეს-კლიმატის შეფასების ინდიკატორს, რომელსაც საქართველოს ბიზნეს-ასოციაცია და PMCG კვლევითი ცენტრი ყოველკვარტლურად აწარმოებს ეკონომიკური კვლევების გერმანული ინსტიტუტის IFO-ს მეთოდოლოგიაზე დაყრდნობით.

კვლევა რამდენიმე ნაწილისგან შედგება. ესენია: BAG ბიზნეს-კლიმატი, BAG დასაქმების ბარომეტრი და შრომითი რესურსების საჭიროების კვლევა.

BAG ბიზნეს-კლიმატის მაჩვენებელი გამოითვლება BAG-ის წევრების გამოკითხვის საფუძველზე. BAG-ის წევრი კომპანიები აფასებენ თავიანთ მიმდინარე მდგომარეობას და მომდევნო ექვსი თვის მოლოდინს.

ბიზნეს-ასოციაციის მიერ გამოქვეყნებული დოკუმენტის თანახმად, 2020 წლის III კვარტალში სექტორებს შორის BAG ბიზნეს-კლიმატის მაჩვენებელი ყველა სექტორისთვის დადებითია მომსახურების სექტორის გარდა.

  • „მომსახურების სექტორში ბიზნეს-კლიმატის მაჩვენებელი მცირედ უარყოფითია, რაც მიმდინარე მდგომარეობის მკვეთრად უარყოფითმა შეფასებამ განაპირობა. ამასთან, მომსახურების სექტორის მომდევნო ექვსი თვის მოლოდინი ოპტიმისტურია“, – ნათქვამია გამოქვეყნებულ კვლევაში.

2020 წლის III კვარტალში ბიზნეს-საქმიანობისთვის ყველაზე მეტად ხელის შემშლელად შემდეგი ოთხი ფაქტორი დასახელდა: პროდუქციასა თუ მომსახურებაზე მოთხოვნის სიმცირე, სამართლებრივი და ადმინისტრაციული ბარიერები, სპეციალისტების ნაკლებობა და შეზღუდული ფინანსური რესურსები.

რაც შეეხება ეროვნული ვალუტის აშშ დოლარის მიმართ გაცვლით კურსთან დაკავშირებულ მოლოდინს, ის სრულ თანხვედრაშია იმ დინამიკასთან, რაც თავად გაცვლით კურსს აქვს. კერძოდ, 2020 წლის III კვარტალში, 2020 წლის II კვარტალთან შედარებით, გამოკითხული კომპანიების წილი, რომელთაც ეროვნული ვალუტის გაუფასურების მოლოდინი ჰქონდათ, გაიზარდა 41%-დან 67%-მდე. შესაბამისად, იმ კომპანიების პროცენტული წილი, რომლებიც ფიქრობენ, რომ ლარის გაცვლითი კურსი დოლარის მიმართ არ შეიცვლება, შემცირდა 52%-დან 28%-მდე.

დოკუმენტში ასევე მოცემულია ის მოლოდინები, რომლებიც კომპანიებს მოკლევადიან პერიოდში გააჩნიათ.

მაგალითად, გამოკითხული კომპანიების 21.1% 2020 წლის IV კვარტალში, III კვარტალთან შედარებით, მოელის გაყიდვების ფასების ზრდას, მაშინ, როცა 64.9% არ ელოდება ამ მაჩვენებლის ცვლილებას, ხოლო 14%-ის მოლოდინია, რომ ფასები დაიკლებს. გამოკითხული BAG-ის წევრების 12.3% ასევე მოელის დაქირავებულთა რაოდენობის გაზრდას, მაშინ, როცა 82.4% არ ელოდება ამ მაჩვენებლის ცვლილებას, ხოლო 5.3% კლებას ვარაუდობს.

კვლევაში BAG დასაქმების ბარომეტრის მაჩვენებლის მისაღებად კომპანიები აფასებენ მომავალ სამ თვეში დასაქმების სავარაუდო ცვლილებას.

2020 წლის III კვარტალში BAG-ის გამოკითხულმა წევრებმა დასაქმების ცვლილების მოლოდინი დადებითად შეაფასეს. სექტორების მიხედვით, 2020 წლის III კვარტალში BAG-ის გამოკითხული წევრების მიერ დასაქმებასთან მიმართებით ნეგატიური მოლოდინი მხოლოდ მომსახურების სექტორში დაფიქსირდა.

BAG ინდექსის მესამე კვარტლის კვლევის ფარგლებში ასოციაციის წევრი კომპანიები ასევე გამოიკითხა შრომითი რესურსების საჭიროებებთან დაკავშირებით.

  • გამოკითხვის უმთავრეს შედეგს წარმოადგენს ფაქტი, რომ გამოკითხულ კომპანიათა 75%-ზე მეტი სირთულეებს აწყდება საჭირო კადრების მოძიებისას. ამასთან, აღნიშნულ პრობლემას ყველაზე მწვავედ მომსახურებისა და მრეწველობის სექტორში განიცდიან, სადაც კომპანიათა 80%-ზე მეტი სირთულეებს აწყდება პერსონალის მოძიებისას.

სხვა სექტორებთან შედარებით, კადრების მოძიების სირთულე ყველაზე ნაკლებად მშენებლობის სექტორში იგრძნობა, თუმცა აქაც გამოკითხულთა 43% აღნიშნულ საკითხს პრობლემურად ასახელებს.

სამუშაო არის, მაგრამ კვალიფიციური კადრები – არა>>

რაც შეეხება კონკრეტულ პროფესიებს, გამოკითხვის თანახმად, განსაკუთრებულ სირთულეს წარმოადგენს ტექნიკური პერსონალის, ტექნოლოგების, დეველოპერებისა და საინფორმაციო ტექნოლოგიების სპეციალისტების, ინჟინრების, ოპერატორებისა და აგრონომების მოძიება.

15
თემები:
საქართველოს ეკონომიკა (780)
მშენებლობა რიკოთის უღელტეხილზე

საქართველო ინფრასტრუქტურულ პროექტებზე 20 მილიარდამდე ლარს დახარჯავს

29
(განახლებულია 14:33 21.10.2020)
საქართველოში 2024 წლისთვის აშენდება საერთაშორისო მნიშვნელობის გზების 95% და სრულად გარემონტდება შიდა მნიშვნელობის გზების 85%, აღნიშნა მაია ცქიტიშვილმა.

თბილისი, 21 ოქტომბერი – Sputnik. საქართველოს რეგიონებში 2021–2024 წლებში მუნიციპალური და სხვა საბაზისო ინფრასტრუქტურის განვითარებისთვის 20 მილიარდ ლარამდე გამოიყოფა, განაცხადა ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა. 

„კვლავაც განსაკუთრებულ ყურადღებას დავუთმობთ მაღალმთიანეთის სოფლებს, გაგრძელდება ქალაქების მუნიციპალური ტრანსპორტით უზრუნველყოფა. 2024 წლამდე განხორციელდება დამატებით 400 დასახლების გაზიფიცირება, შედეგად 1,4 მილიონამდე ოჯახი ისარგებლებს ბუნებრივი აირით. ქვეყნის გაზიფიკაციის დონე კი 90%-ს გადააჭარბებს, დამატებით 1000 დასახლებულ პუნქტებში მცხოვრებ 500 ათას ადამიანს ექნება წვდომა სწრაფ ინტერნეტზე“, – განაცხადა ცქიტიშვილმა რუსთავში „ქართული ოცნების“ მდგრადი განვითარების პროგრამის პრეზენტაციაზე.

ცქიტიშვილის თქმით, რეგიონებში ახალი შესაძლებლობების შექმნის მიზნით გაგრძელდება დასახლებული პუნქტების კომპლექსური განახლების პროექტები, რომლებიც მიზნად ისახავს ახალი მიზიდულობის ცენტრების შექმნას და განვითარებას.

2021-2024 წლებში დასრულდება აბასთუმნის განვითარების პროექტი, წყალტუბოს რეაბილიტაციის პროექტი, ბაკურიანის ურბანული განახლება. მესტიაში ლაღამის დაბის რეკონსტრუქცია და უშგულის თემში კოშკების აღდგენა, თელავის და ველისციხის ცენტრის ურბანული განახლება, კობისა და თრუსოს ხეობის განვითარება და დუშეთის ურბანული განახლების პროექტები.

გზების მშენებლობა

საქართველოში 2024 წლისთვის აშენდება საერთაშორისო მნიშვნელობის გზების 95% და სრულად გარემონტდება შიდა მნიშვნელობის გზების 85%, აღნიშნა ცქიტიშვილმა. 

„ქვეყანაში ჩქაროსნული ავტომაგისტრალების მშენებლობის ტემპები სამჯერ გაიზარდა. 2013-2020 წლებში აშენდა 198 კმ ჩქაროსნული მაგისტრალი და ეს არის გზები, რომლითაც ვუკავშირდებით ჩვენი რეგიონის, ევროპულ და აზიის ბაზრებს, რაც გვაძლევს საშუალებას შევასრულოთ მნიშვნელოვანი ლოჯისტიკური როლი“, – განაცხადა ცქიტიშვილმა.

მისი თქმით, მარტო 2020 წელს ექსპლუატაციაში შევიდა 70 კილომეტრი ჩქაროსნული მაგისტრალი.

„უკვე რეალიზებული პროექტების დასრულების შედეგად 2021-2024 წლებში საერთაშორისო მნიშვნელობის ავტომაგისტრალის მოცულობა გაიზრდება 200 კილომეტრით, აშენდება 200-ზე მეტი ხიდი და 70 გვირაბი, ეტაპობრივად დასრულდება რიკოთის ჩქაროსნული და აღმოსავლეთი–დასავლეთის მაგისტრალის სხვა მონაკვეთების მშენებლობა, რაც საშუალებას მოგვცემს თბილისიდან ბათუმში მგზავრობის დრო შევამციროთ 3,5 საათამდე“, – განაცხადა ვიცე-პრემიერმა. 

აღმოსავლეთი–დასავლეთის ავტომაგისტრალი, ანუ ევროპული სატრანზიტო გზა Е-60 სიდიდით მეორე ევროპული სატრანზიტო დერეფანია, რომელიც იწყება ბრესტში (საფრანგეთი) და მთავრდება ირკეშტამში (ყირგიზეთი). საქართველოში Е-60 ფოთთან ახლოს იწყება და აზერბაიჯანთან საზღვარზე მთავრდება. საქართველოში დერეფნის სიგრძე 392 კილომეტრს შეადგენს.

რეგიონული განვითარებისა და ინფრასტრუქტურის მინისტრმა საქართველოს სხვადასხვა რეგიონში ავტომაგისტრალების მშენებლობის მნიშვნელობაზე ისაუბრა. 

„წელს დასრულდება გურჯაანის შემოვლითი გზა, მომავალ წელს კი დავიწყებთ თბილისი–საგარეჯოს ჩქაროსნული მაგისტრალის მშენებლობას, ხოლო შემდეგ – ბაკურციხე-წნორის მიმართულებით. 2024 წლისთვის ჩქაროსნული მაგისტრალების მშენებლობის თვალსაზრისით ყველა სასაზღვრო პუნქტთან გვექნება ხელშესახები პროგრესი, მათ შორისაა ქვეშეთი–კობის 23-კილომეტრიანი მონაკვეთი, საიდანაც 9 კილომეტრი უნიკალური გვირაბია“, – განაცხადა ცქიტიშვილმა.

მისი განმარტებით, მარტო ინფრასტრუქტურულ პროექტებში დღეისთვის ჩართულია 1200 ქართული კომპანია და 30 ათასზე მეტი ადამიანი.

როგორც ვიცე-პრემიერმა აღნიშნა, ეტაპობრივად განახლდება ქუთაისის, ზესტაფონის, ზუგდიდის, ფოთის შიდა საგზაო ინფრასტრუქტურა, რეაბილიტაცია ჩაუტარდება ასევე მუნიციპალური მნიშვნელობის და სოფლის გზებს, რის შედეგადაც 2024 წლისთვის შიდასახელმწიფოებრივი მნიშვნელობის გზების 85% სრულად მოწესრიგდება.

29
თემები:
საქართველოს ეკონომიკა (780)
სპეცოპერაცია ზუგდიდში

ზუგდიდში თავდამსხმელმა მძევლად აყვანილი კიდევ ორი პირი გაათავისუფლა

0
ამ დროისთვის შემთხვევის ადგილზე მობილიზებული არიან სამართალდამცველები მიმდინარეობს დამნაშავის გაუვნებელყოფის ოპერაცია.

თბილისი, 21 ოქტომბერი - Sputnik. ზუგდიდში „საქართველოს ბანკზე“ თავდამსხმელმა კიდევ ორი მძევალი გაათავისუფლა.

ამ დროისთვის ზუგდიდში იმყოფება შინაგან საქმეთა მინისტრი ვახტანგ გომელაური, რომელიც უშუალოდ არის ჩართული საპოლიციო მოქმედებებში.

მანამდე თავდამსხმელმა ეტაპობრივად ხუთი მძევალი გაათავისუფლა, მათ შორის ორსული ქალი.

რამდენიმე საათის წინ ზუგდიდში, ზვიად გამსახურდიას გამზირზე მდებარე „საქართველოს ბანკის“ ფილიალზე თავდასხმა მოხდა. შეიარაღებულ პირს მძევლად ოცამდე ადამიანი – ბანკის თანამშრომლები და კლიენტები ჰყავს აყვანილი.

გავრცელებული ინფორმაციით, თავდამსხმელი 500 ათას დოლარს და შენობიდან უსაფრთხოდ გასვლას ითხოვს.

შემთხვევის ადგილზე მობილიზებულია საპატრულო პოლიციისა და სპეციალური დანიშნულების რაზმები. სპეცოპერაცია ზუგდიდის ცენტრში ამ დრომდე გრძელდება. პოლიციამ მიმდებარე ტერიტორიიდან ადამიანების ევაკუაცია განახორციელა.

0
თემები:
კრიმინალი საქართველოში