ვალუტის გაცვლის პუნქტი

პანდემია და არჩევნები საქართველოში: რა ხდება ლარის კურსთან დაკავშირებით

195
(განახლებულია 15:46 17.09.2020)
პანდემია სერიოზულად აისახა ლარის კურსზე. ჯერ ნავთობის, ხოლო შემდეგ მსოფლიო ეკონომიკური კრიზისი აისახა ვალუტის კურსზეც, რომელიც ანტირეკორდებს ამყარებს.

თბილისი, 17 სექტემბერი – Sputnik. ეროვნული ბანკი განაგრძობს ვალუტის გაყიდვას. მორიგ აუქციონზე მან, ლარის კურსის დასტაბილურების მიზნით, კიდევ 40 მილიონი აშშ დოლარი გაყიდა, ნათქვამია რეგულატორის განცხადებაში.

სავალუტო ბაზრის სტაბილიზებისთვის ნახევარ წელიწადში ეროვნულმა ბანკმა უკვე 12 აუქციონი ჩაატარა.

„სავალუტო ბაზარს ეროვნულმა ბანკმა უკვე მიაწოდა 380 მილიონი დოლარი. დღესაც 40 მილიონი დოლარის რესურსს გამოიტანს და გაყიდის ეროვნული ბანკი. არ მინდა წინ გავუსწრო მოვლენებს, მაგრამ, ვფიქრობ, იმხელა დანაკლისის პირობებში, რაც საქართველომ განიცადა და ამავე დროს რეზერვების დაგროვების საშუალებით, წლის ბოლომდე ბაზრისთვის მიწოდებული თანხა 200 მილიონ დოლარზე მეტი იქნება“, – განაცხადა ეროვნული ბანკის პრეზიდენტმა კობა გვენეტაძემ.

40 მლნ დოლარის გაყიდვის შემდეგ ლარის საშუალო შეწონილმა გაცვლითმა კურსმა დოლარის მიმართ 3,1547 GEL/$1 შეადგინა.

„აშშ დოლარის მიმართ ლარი დაახლოებით 2%-ით არის გაუფასურებული. ზოგადად, მზარდი ეკონომიკის ქვეყნებში წინასაარჩევნო პერიოდში, როგორც წესი, სავალუტო ბაზარზე არის დროებითი დაძაბულობა. ჩვენ არ ვფიქრობთ, რომ ამ დაძაბულობას ინფლაციასთან დაკავშირებით რამე მატერიალური შედეგი მოჰყვება. მოგეხსენებათ, ჩვენი მთავარი მანდატი ინფლაციაა“, – განაცხადა გვენეტაძემ.

როგორ იცვლებოდა ლარის კურსი არჩევნებამდე

  არჩევნებამდე 2 თვით ადრე არჩევნებამდე 1 კვირით ადრე
საპარლამენტო არჩევნები, 2016 წლის 8 ოქტომბერი 2,3060 GEL/$1 2,3297GEL/$1
ადგილობრივი არჩევნები, 2017 წლის 21 ოქტომბერი 2,4778 GEL/$1 2,4831 GEL/$1
საპრეზიდენტო არჩევნები, 2018 წლის 28 ოქტომბერი 2,6165 GEL/$1 2,7026 GEL/$1
გვენეტაძემ კიდევ ერთხელ აღნიშნა, რომ ეროვნული ბანკი ფასების სტაბილურობის უზრუნველსაყოფად მის ხელთ არსებულ ყველა შესაძლებლობას გამოიყენებს.
ეროვნული ბანკი წელს ინტერვენციისთვის კრედიტების ან გრანტების სახით საერთაშორისო საფინანსო ინსტიტუტებისგან მიღებულ ვალუტას იყენებს. თანხა საქართველოსთვის კორონავირუსის პანდემიის შედეგების გადალახვისთვის გამოიყო.
არის თუ არა სტაბილურობის საფრთხე
საქართველოს ფინანსთა მინისტრი ივანე მაჭავარიანი დარწმუნებულია, რომ ლარის სტაბილურობას არაფერი ემუქრება.
„ლარის სტაბილურობას არაფერი ემუქრება. არაერთხელ დაამტკიცა სებ-მა პანდემიის პირობებში, რომ აქვს მზაობა, უზრუნველყოს ლარის კურსის სტაბილურობა; შოკებიდან გამომდინარე ყოველგვარი ზედმეტი გაუფასურება მოასწოროს და მის ბუნებრივ ნიშნულზე ამყოფოს ლარი“, – განაცხადა მაჭავარიანმა.

მან ასევე აღნიშნა, რომ საქართველოში ინფლაციის დონე მცირდება, რაც იმედს იძლევა, რომ წლის ბოლომდე ის თავის მიზნობრივ დონეს – 3%-ს დაუბრუნდება.

ლარის სტაბილურობისთვის საფრთხეს ვერ ხედავს ასევე ეკონომიკის მინისტრი ნათია თურნავა.

„ვფიქრობ, არანაირი მაკროეკონომიკური ნიშანი არ არსებობს, რომ ლარის კურსთან დაკავშირებით ნეგატიური ტენდენცია უფრო გაღრმავდეს. ნეგატიური მოლოდინები, რა თქმა უნდა, ნეგატიურ ზეგავლენას ახდენს ლარის კურსზე და ინფიცირებულთა ზრდის პარალელურად შეიძლება გაჩნდა მოლოდინები, რომ მთავრობა საყოველთაო შეზღუდვებს მიმართავს, მაგრამ ღიად ვსაუბრობთ, რომ ეს არ მოხდება“, – განაცხადა თურნავამ.

ექსპერტმა ეკონომიკის საკითხებში ნიკა შენგელიამ „Sputnik–საქართველოსთან“ ინტერვიუში აღნიშნა, რომ თუ ეროვნული ბანკი არ ჩაერევა, ლარის კურსის ვარდნა გაგრძელდება.

მისი აზრით, ოქტომბრის დასაწყისისთვის ლარი 3,3 GEL/$1-მდე დაეცემა, თუ ეროვნული ბანკი არ ჩაერევა. თუმცა ეროვნულ ბანკს აქვს შესაძლებლობა, ლარის კურსი თუნდაც არჩევნებამდე შეაკავოს.

ხუთშაბათს ლარის კურსია 3,1547 GEL/$1. არჩევნებამდე ორი თვით ადრე კურსი შეადგენდა 3,0714 GEL/$1.

დოლარის მიმართ ლარის ოფიციალური გაცვლითი კურსი 2009 წლის მაისიდან Bloomberg-ის სავაჭრო სისტემის ბანკთაშორის ბაზარზე გარიგებების აგრეგირების მეშვეობით განისაზღვრება.

195
თემები:
ლარის კურსის დაცემა (33)
ვაშლი

საქართველოდან ვაშლის ექსპორტი წელს თითქმის 5-ჯერ გაიზარდა

34
(განახლებულია 12:42 26.09.2020)
წელს საქართველოდან ვაშლის ექსპორტის უდიდესი ნაწილი - 94% - რუსეთის ფედერაციაშიაზე მოდის. უმნიშვნელო რაოდენობით ვაშლი გადის ყაზახეთში, სომხეთში და სხვა ქვეყნებში

თბილისი, 20 სექტემბერი - Sputnik. 24 სექტემბრის მონაცემებით, საქართველოდან 1054 ტონა ვაშლია ექსპორტირებული, ინფორმაციას გარემოს დაცვისა და სოფლის მეურნეობის სამინისტრო ავრცელებს.

სახელმწიფო პროგრამის „დანერგე მომავალი“ ფარგლებში გაშენებულ ბაღებში მოსავლის აღება მიმდინარეობს.

ვაშლის ექსპორტი წინა წლის ანალოგიურ პერიოდს 832 ტონით აღემატება. ხოლო, ექსპორტირებული ვაშლით მიღებული შემოსავალი 321 ათასი აშშ დოლარით აღემატება წინა წლის ანალოგიურ მაჩვენებელს.

ქართული ვაშლის ექსპორტის მაჩვენებელი ქვეყნების მიხედვით ასეთია: რუსეთის ფედერაცია (990.5 ტონა - რაც მთლიანი იმპორტის თითქმის 94%-ს შეადგენს), ყაზახეთის რესპუბლიკა (59.9 ტონა), სომხეთის რესპუბლიკა (3.6 ტონა), დანარჩენი ქვეყნები (0,10 ტონა).

ინტენსიური და ნახევრად ინტენსიური ვაშლის ბაღები, საქართველოს მასშტაბით, სახელმწიფო პროგრამის „დანერგე მომავალი“ ფარგლებში, 1 128 ჰექტარზე გაშენდა. სახელმწიფოს თანადაფინანსებამ კი, 9 მლნ ლარზე მეტი შეადგინა.

პროგრამას „დანერგე მომავალი“ სოფლის განვითარების სააგენტო 2015 წლიდან ახორციელებს. სოფლის განვითარების სააგენტოს პროგრამები გათვლილია გრძელვადიან განვითარებაზე და მათი მიზანია ისეთი გარემოს შექმნა, რომელიც ხელს შეუწყობს მაღალხარისხიანი პროდუქციის წარმოების სტაბილურ ზრდას და სურსათის უვნებლობის საერთაშორისო სტანდარტების დანერგვას.

34
თემები:
საქართველოს სოფლის მეურნეობა
თხილის წარმოება საქართველოში

საქართველოდან თხილის ექსპორტი კვლავ იზრდება

26
(განახლებულია 10:55 26.09.2020)
კორონავირუსის პანდემიით გამოწვეული სირთულეების მიუხედავად, მიმდინარეობს უცხოურ ბაზრებზე ქართული თხილის ორგანიზებული მიწოდება

თბილისი, 26 სექტემბერი — Sputnik. საქართველოდან ამ დროისთვის უკვე 4 436 ტონა თხილია ექსპორტირებული, რაც 74%-ით აღემატება წინა წლის ანალოგიური პერიოდის მაჩვენებელს, იუწყება საქართველოს გარემოს დაცვისა და სოფლის მეურნეობის სამინისტრო.

„კორონავირუსის პანდემიით შექმნილი ვითარების მიუხედავად, ექსპორტიორებთან და თხილის მწარმოებელთა ასოციაციებთან აქტიური მუშაობის შედეგად, საექსპორტო ბაზრებზე ხარისხიანი პროდუქციის მიწოდება ორგანიზებულად მიმდინარეობს“, - აცხადებენ სამინისტროში.

video : Sputnik / Anna Anastasiadi, Vladimir Umikashvili
“ოქროს მოსავალი“ - საქართველოში თხილის ტრიუმფალური კრეფა დაიწყო

უწყების ინფორმაციით, ქართული თხილის ექსპორტი ძირითადად ევროპის ქვეყნებში ხორციელდება.

კერძოდ, გერმანიაში (1392,9 ტონა), იტალიაში (808,8 ტონა), ჩეხეთში (280,3 ტონა), ესპანეთში (165 ტონა), პოლონეთში (192 ტონა), საფრანგეთში (125 ტონა), ლიეტუვაში (143.7 ტონა), საბერძნეთში (34,7 ტონა), ავსტრიაში (22 ტონა), ესტონეთში (22 ტონა) და ლატვიაში (21 ტონა).

ქართული თხილი ექსპორტზე გადის ასევე შემდეგ ქვეყნებში: სომხეთი (255,8 ტონა), რუსეთი (268.0 ტონა), უკრაინა (83,7 ტონა), ბელარუსი (102.5 ტონა), ბრაზილია (74,0 ტონა), მექსიკა (53,0 ტონა) და დიდი ბრიტანეთი (22 ტონა).

უწყების ინფორმაციით, წელს თხილის დაბინავების პროცესში ჩართულია 30-ზე მეტი საწარმო.

26
თემები:
საქართველოს სოფლის მეურნეობა
კომპიუტერის მომხმარებელი

ბაჩალიაშვილის საქმე: სკანდალური ფოტოების გამომგზავნი პატიმრობაშია

0
ბრალდების ვერსიით, ფურცხვანიძემ ადვოკატისგან შემთხვევის ადგილის კოორდინატები შეიტყო, მოიპოვა ძველი სატელიტური ფოტოები და მათი გადაღების თარიღი გააყალბა.

თბილისი, 25 სექტემბერი – Sputnik. თბილისის საქალაქო სასამართლომ შეუფარდა პატიმრობა დავით ფურცხვანიძეს, რომელსაც ბრალად ედება გარდაცვლილი პროგრამისტის, თამარ ბაჩალიაშვილის საქმის სამხილების გაყალბება და კომპიუტერულ სისტემაში უკანონო შეღწევა, იუწყება პირველი არხი.

სასამართლომ სრულად დააკმაყოფილა პროკურატურის შუამდგომლობა, რომელიც აცხადებდა, რომ თავისუფლებაზე მყოფმა დაკავებულმა შეიძლება ქვეყანა დატოვოს, რადგან მას აქვს ნაყიდი ავიაბილეთი და უცხოურ ბანკში ანგარიშზე თანხაც გააჩნია.

ადვოკატები გირაოს მოითხოვდნენ და აცხადებდნენ, რომ ფურცხვანიძე აპირებდა წასვლას მივლინებაში, და არა სამუდამოდ.

ფურცხვანიძე პარასკევს დააკავეს. იყო დაღუპული პროგრამისტის თამარ ბაჩალიაშვილის ოჯახის ადვოკატის მიხეილ რამიშვილის წყარო. საუბარია ე.წ. სატელიტურ ფოტოებზე, რომლებიც რამიშვილმა გაავრცელა. ფოტოებზე, რომლებიც 19–22 ივლისითაა დათარიღებული, ჩანს, რომ გოგონას ავტომობილი იმ ადგილზე არ იდგა, სადაც გარდაცვლილი 22 ივლისს აღმოაჩინეს.

დაკითხვა საპროტესტო აქციის ფონზე - სკანდალი ბაჩალიაშვილის საქმის ირგვლივ არ წყდება >>

პროკურატურამ დაადგინა, რომ ფურცხვანიძემ, რომელიც ხელმძღვანელობს არასამთავრობო ორგანიზაცია „უსაფრთხოების პრობლემების ანტიკრიზისულ ცენტრს“, საკუთარი ორგანიზაციის რეკლამირებისა და დაფინანსების მიღების მიზნით გააყალბა მტკიცებულებები, რომლებიც გაამყარებდა ოჯახის ვერსიას იმის შესახებ, რომ დაღუპული გოგონას ავტომობილი იმ ადგილზე იმ დღეს მიიყვანეს, როცა გარდაცვლილი იპოვეს.

ბრალდების ვერსიით, ფურცხვანიძე დაუკავშირდა რამიშვილს და სთხოვა შემთხვევის ადგილის კოორდინატების მიწოდება. 7 სექტემბერს დავით ფურცხვანიძემ სოციალურ ქსელ „სკაიპის” მეშვეობით მიიღო პროგრამა zoom.earth-ის 2019 წლის ნოემბრის შესაბამისი კოორდინატების სატელიტური ფოტოსურათები და განიზრახა აღნიშნული ფოტოების გაყალბება.

ამ მიზნით ზემოხსენებული ფოტოები ელექტრონული ფოსტის გამოყენებით გადაუგზავნა თავის შვილს და სთხოვა დაემუშავებინა ისე, რომ შთაბეჭდილება შექმნილიყო, თითქოსდა აღნიშნული სატელიტური ფოტო გადაღებულია 2020 წლის 19 ივლისს და მასზე თამარ ბაჩალიაშვილის ავტომანქანა არ არის ასახული. 

დაკავებულმა გაყალბებული სურათები სოციალურ ქსელ WhatsApp-ის საშუალებით გადაუგზავნა მიხეილ რამიშვილს, რომელმაც, თავის მხრივ, აღნიშნული ფოტოები წარუდგინა გამოძიებას მტკიცებულების სახით.

დაკითხვისას ფურცხვანიძემ განაცხადა, რომ ეს ფოტოები ავთენტურია, თუმცა ექსპერტიზამ მათი გაყალბების ფაქტი დაადგინა.

ახლა მას 2-დან 6 წლამდე ვადით თავისუფლების აღკვეთა ემუქრება.

 

0
თემები:
გახმაურებული სასამართლო პროცესები