ეროვნული ბანკის შენობა

რას ითხოვენ კომერციული ბანკები, ანუ დაირღვა თუ არა პირობა?

1080
(განახლებულია 18:59 05.08.2020)
კომერციული ბანკები საშეღავათო პერიოდის დასრულების შემდეგ თანხის გადახდას ერთიანად ითხოვენ. რატომ? როგორია ეროვნული ბანკის პოზიცია, რას ამბობენ ექსპერტ-ანალიტიკოსები, ირღვევა თუ არა მომხმარებლის უფლებები?

სამსონ ხონელი

სხვაგვარად არის!.. არადა, აშკარად სხვაგვარად უნდა ყოფილიყო, თუმცა ეს პირველი შემთხვევა როდია, როცა ისე არ არის, როგორი მოლოდინიც გვქონდა. რას გულისხმობ? - ჩამეძიება მკითხველი და, რა გაეწყობა, განვმარტავ:

შეგახსენებთ, COVID-19-ის პანდემიის გამო ქვეყანაში ჯერ კიდევ გაზაფხულზე ეკონომიკურ საქმიანობაზე შეზღუდვები დაწესდა. მალევე საგანგებო მდგომარეობა გამოცხადდა. შედეგად – მოქალაქეების ერთი ნაწილი შემოსავლების გარეშე დარჩა, კიდევ ერთ ნაწილს შემოსავლები მნიშვნელოვნად შეუმცირდა. ერთი სიტყვით, მოსახლეობის ფინანსური მდგომარეობა საგრძნობლად გაუარესდა.

ხელისუფლებამ კრიზისის მართვის საგანგებო გეგმა შეიმუშავა, რომელიც სხვა საკითხებთან ერთად კომერციული ბანკების დებიტორი მოქალაქეების საკრედიტო ტვირთის დროებით გადავადებას ითვალისწინებდა. საბანკო სექტორისა და მთავრობის გადაწყვეტილებით, უკლებლივ ყველა კომერციულმა ბანკმა მსესხებლებს სამთვიანი საშეღავათო პერიოდი დაუწესა. საგანგებო მდგომარეობის ჯერ გახანგრძლივების და შემდეგ დასრულების პარალელურად ეკონომიკის მთელი დატვირთვით ამუშავება ვერ მოხერხდა და, შესაბამისად, საბანკო სექტორის დებიტორთა დიდი ნაწილი კვლავ ფინანსური პრობლემების წინაშე აღმოჩნდა. ამიტომაც კომერციულმა ბანკებმა ზაფხულის დასაწყისში საშეღავათო პერიოდი კიდევ ერთხელ გაახანგრძლივეს. ეს დროც უკვე იწურება და, როგორც მსესხებლების ერთი ნაწილი სოციალურ ქსელში წერს, გადახდის ინდივიდუალური რეჟიმის შემუშავების ნაცვლად, ბანკების ნაწილმა დარიცხული პროცენტის ერთიანად გადახდა მოითხოვა.

საბანკო ასოციაციაში აცხადებენ, რომ მსგავსი პრობლემით უწყებას ამ დრომდე არავინ დაკავშირებია. კომერციულ ბანკებს კი, მათი საქმიანობის ფარგლებში, უფლება აქვთ საკუთარი ინტერესისამებრ მოსთხოვონ მომხმარებელს გადახდა, თუ თავიდანვე გააცნეს დეტალური ინფორმაცია პირობებზე.

საბანკო ასოციაციის ხელმძღვანელი ალექსანდრე ძნელაძე: „ჩვენ კომერციული ბანკებისგან, კანონის თანახმად, ვერ მივიღებთ კონკრეტულ ინფორმაციას მსესხებლებზე, მათ კი არ მოუმართავთ ინდივიდუალური საჩივრით ან თხოვნით. ვიცი, რომ გარკვეულ შემთხვევებში იყო ტექნიკური ხარვეზი პროგრამულ უზრუნველყოფასთან მიმართებით. საერთოდ კი, კომერციული ბანკის დისკრეციაა – როგორ და რა ფორმით მოითხოვს სესხის დაბრუნებას, მაგრამ ეს უნდა იყოს კლიენტისთვის წინასწარ მიწოდებული ინფორმაცია, როგორ და რა ფორმით გადაუვადდათ კრედიტი“.

კომერციული ბანკები ამ საკითხზე კომენტარს არ აკეთებენ, ეროვნულ ბანკის განმარტებით კი, სესხის პირობებისა და ვალდებულებების განსაზღვრა, მათ შორის შეღავათებიც, მხოლოდ და მხოლოდ საკრედიტო ხელშეკრულების მხარეთა შეთანხმების საკითხია.

საქართველოს ეროვნული ბანკი მოკლებულია შესაძლებლობას, რომელიმე ფინანსურ ორგანიზაციას მოსთხოვოს სესხებზე/კრედიტებზე საშეღავათო პერიოდის გავრცელება ან კონკრეტული შეღავათიანი პირობების დაწესება. ამდენად, სესხზე საშეღავათო პერიოდის გავრცელებასთან დაკავშირებით გადაწყვეტილებას იღებს და შეღავათიან პირობებს ადგენს უშუალოდ კრედიტორი – საფინანსო ორგანიზაცია.

ეროვნული ბანკის პრეზიდენტის 2016 წლის 23 დეკემბრის №151/04 ბრძანებით დამტკიცებული წესის მე-3 მუხლის პირველი პუნქტის მიხედვით: „ფინანსურმა ორგანიზაციამ უნდა უზრუნველყოს მომხმარებლისათვის საფინანსო პროდუქტის პირობების შესახებ უტყუარი, გასაგები და გადაწყვეტილების მიღებისათვის აუცილებელი, წინასწარ ცნობილი და მის ხელთ არსებული სრული ინფორმაციის დროულად მიწოდება. მათ შორის, პროდუქტის ნებისმიერი არხით შეთავაზებისას ხელშეკრულების გაფორმებამდე, რომელიც მომხმარებელს არ უბიძგებს ისეთი გადაწყვეტილების მიღებისაკენ, რომელსაც იგი არ მიიღებდა უტყუარი და სრული ინფორმაციის ფლობის პირობებში. ამასთან, აუცილებელია, სესხის გამცემმა ორგანიზაციებმა, მათ შორის - კომერციულმა ბანკებმა, დაიცვან „ფიზიკური პირის დაკრედიტების შესახებ დებულების“ ძირითადი პრინციპები". ასეთია ეროვნული ბანკის პოზიცია.

ამასობაში კომერციულ ბანკებს მწვავე ბრალდებას უყენებს ანალიტიკოსთა ერთი ნაწილი, რომელიც პირდაპირ აცხადებს, რომ საბანკო სექტორი არ ასრულებს სახელმწიფოსთან დადებულ შეთანხმებას და მომხმარებელს ატყუებს.

ანალიტიკოსი ვახტანგ ჭარაია: „სამწუხაროდ, პროცენტის გადავადების ნაწილში ბანკები მომხმარებლებს ატყუებენ. ეს ხდება მასობრივად, როგორც დედაქალაქში, ასევე რეგიონებში. სახელმწიფოსა და საბანკო სექტორს შორის მიღწეული შეთანხმების თანახმად, კომერციულ ბანკებს კლიენტებისთვის საშეღავათო პერიოდი უნდა დაეწესებინათ, რაც სამთვიან მორატორიუმს გულისხმობდა. საბოლოოდ, მოსახლეობისთვის უმძიმეს პერიოდში კომერციული ბანკები მხოლოდ პროცენტის გადავადებას დათანხმდნენ. დაიდო პირობა, რომ სამი თვის დარიცხული პროცენტი სესხის დარჩენილ პერიოდზე გადანაწილდებოდა და თითოეული დებიტორი უმტკივნეულოდ გადაიხდიდა ამ პროცენტს. დღეს რა ხდება? პირობა დაირღვა! ბანკები კლიენტებს ეუბნებიან – სრულად გადაიხადონ ამ სამი თვის განმავლობაში დაგროვილი პროცენტი. ხშირ შემთხვევაში ეს არცთუ ისე მცირე თანხაა. ამას ჰქვია კლიენტების მოტყუება, რაზეც მარეგულირებელი უწყება – ეროვნული ბანკი უნდა რეაგირებდეს".

ანალიტიკოსის პოზიციას იზიარებს საბანკო სფეროს ექსპერტი გიორგი ცუცქირიძე, რომელიც აცხადებს, რომ საშეღავათო პერიოდზე დარიცხული პროცენტის ერთიანად გადახდის მოთხოვნა მომხმარებლის უფლებების დარღვევაა, რაზეც პასუხისმგებლობა პირველ რიგში ეროვნულ ბანკს ეკისრება.

„მსურს განვმარტო, რომ საშეღავათო პერიოდში, მით უმეტეს კრიზისისას, მსგავსი გადაწყვეტილება არა თუ XXI საუკუნეში, არამედ გასულ საუკუნეებშიც კი უპრეცედენტოა თავისი უტიფრობით, ფინანსური თაღლითობით და არაჰუმანურობით! და თუ ეს ასე არ არის, დებატებში ვიწვევ, ნებისმიერ ეთერში, ყველა იმ ბანკის დირექტორს, ვინც მსგავსი გადაწყვეტილება მიიღო! საქართველოში ამ მართლა მახინჯი და ოლიგოპოლიური საბანკო სისტემის დიქტატი უნდა დამთავრდეს! მიუხედავად იმისა, რომ ანტიკრიზისული მენეჯმენტის პრიორიტეტებისას საქართველოს მთავრობამ ფაქტიურად ყველა პირობა შეუქმნა საბანკო სექტორს, რომ ლიკვიდობის პრობლემები არ ჰქონოდა, შეეხიდა სხვადასხვა სახელმწიფო პროგრამების თანადაფინანსების ნაწილში, მათ შორის იპოთეკური დაკრედიტების მხარდასაჭერად, აღარაფერს ვიტყვი საპენსიო სააგენტოს თანხების საბანკო დეპოზიტებზე განთავსებაზე, არსებული ოლიგოპოლია, რომელიც წარმოგენილია სამი უმსხვილესი, სისტემფორმირებადი ბანკის სახით, გადადის ღია საბოტაჟის რეჟიმზე! არ გამოვა წინასაარჩევნოდ თქვენთვის სასურველი სცენარის განხორციელება ხელისუფლების რეიტინგის მიზნობრივად დასაწევად. ყველა სხვა დანარჩენი არგუმენტი ამ მართლა უპასუხისმგებლო და დესოციალური გადაწყვეტილების გასამართლებლად არის განწირული. მივმართავ ეროვნული ბანკის პრეზიდენტს, ბატონ კობა გვენეტაძეს – ან განმარტოს ამ გადაწყვეტილების სამართლიანობა, ან პირდაპირ გადადგეს დაკავებული თანამდებობიდან. პასუხისმგებლობა პირველ რიგში ეროვნულ ბანკს აკისრია! არა ხალხის გაღატაკებას და არა საბოტაჟს!" – წერს გიორგი ცუცქირიძე სოციალურ ქსელში.

საინტერესოა, რა შედეგი მოჰყვება ექსპერტ-ანალიტიკოსთა ხმამაღალ განცხადებებს, გაითვალისწინებს თუ არა საბანკო სექტორი გამოთქმულ შენიშვნებს და როგორი იქნება კობა გვენეტაძის უწყების პოზიცია? საკამათო არ არის, რომ წინასაარჩევნოდ კომერციული ბანკების მხრიდან პირობების გაუარესება მმართველი პარტიისთვის დივიდენდების მომტანი არ იქნება...

 

1080
ღვინის სექციაა

ცნობადობის გაზრდა: რამდენს ხარჯავს საქართველო ღვინის ბაზრების ათვისებაზე

43
(განახლებულია 20:29 25.09.2020)
ქართული მეღვინეობა კორონავირუსის პანდემიისა და ქვეყნებს შორის სავაჭრო ოპერაციების შემცირების გამო ზარალს განიცდის.

თბილისი, 25 სექტემბერი – Sputnik. საქართველო ახალი საექსპორტო ბაზრების ასათვისებლად წელიწადში დაახლოებით 9 მილიონ ლარს ხარჯავს, ამასთან, არც ერთი თეთრი არ დახარჯულა რუსულ ბაზარზე ქართული ღვინის პოპულარიზაციაზე, განაცხადა საქართველოს გარემოს დაცვისა და სოფლის მეურნეობის მინისტრმა ლევან დავითაშვილმა.

მინისტრის თქმით, როდესაც მან 2012 წელს ღვინის ეროვნულ სააგენტოში დაიწყო მუშაობა, მარკეტინგული ბიუჯეტი შეადგენდა დაახლოებით 1,5 მლნ ლარს, რომლის მხოლოდ მესამედი იქნა გამოყენებული. 

„ახალი ბაზრების ასათვისებლად დღეს ჩვენ დაახლოებით 9 მილიონ ლარს ვხარჯავთ. ეს არის სახელმწიფოს დანახარჯი, რომელსაც, რა თქმა უნდა, ემატება კერძო კომპანიების მარკეტინგული აქტივობა და არც ერთი თეთრი არ დახარჯულა რუსეთის ბაზარზე ქართული ღვინის პრომოციაზე“, – განაცხადა მინისტრმა ტელეარხ „იმედის“ ეთერში.

სტატისტიკური მონაცემებით, ქართული ღვინო ყველაზე დიდი რაოდენობით რუსეთში გადის – 2019 წელს ქართული ღვინის მთელი ექსპორტის 62,1%-ზე მეტი რუსეთში გავიდა.

„ყველა დანახარჯი რუსული ბაზრის მიღმაა, იმისთვის, რომ ქართული ღვინის ცნობადობა სხვა ქვეყნებშიც გაიზარდოს“, – განაცხადა ლევან დავითაშვილმა.

ამასთან მინისტრმა დასძინა, რომ დიდი პროგრესის მიუხედავად, ჯერ კიდევ ძალიან ბევრი საქმეა გასაკეთებელი.

„არ მინდა საზოგადოებას შთაბეჭდილება შეექმნას, რომ ჩვენ კმაყოფილი ვართ ჩვენი შედეგებით და ვამბობთ, რომ ყველაფერი კარგად არის. არც სოფლის მეურნეობაში და არც ერთი სხვა მიმართულებით არ ვართ კმაყოფილი და ძალიან ბევრია გასაკეთებელი, თუმცა, არ შეიძლება, პროგრესი არ დავინახოთ“, – აღნიშნა დავითაშვილმა.

მისი აზრით, სოფლის მეურნეობა განვითარების გზის დასაწყისშია და ეს მეღვინეობის სექტორსაც ეხება.

„ჩვენ ვსაუბრობთ განვითარების დინამიკაზე და არა იმაზე, რომ სასურველ შედეგს მივაღწიეთ. მაგალითად, ჩემი მოლოდინია, რომ ღვინო მილიარდის შემომტანი იყოს საქართველოსთვის. ამის პოტენციალი ამ ქვეყანას გააჩნია, თუმცა ამას მრავალწლიანი, თანმიმდევრული მუშაობა სჭირდება“, – განაცხადა დავითაშვილმა.

საქართველოს სოფლის მეურნეობის ფლაგმანი

სოფლის მეურნეობის მინისტრის აზრით, მეღვინეობას ეკონომიკურად მნიშვნელოვანი პოზიცია უჭირავს, რადგან ღვინის ექსპორტი ქვეყნის საერთო ექსპორტის თითქმის 10%-ს შეადგენს და უამრავი ადამიანია დაკავშირებული და ჩართული ღვინის ინდუსტრიაში, რომელიც სწრაფად იზრდება.

მისი თქმით, ღვინო საქართველოს იდენტობის ნაწილია და სახელმწიფო ყველა ღონეს ხმარობს ამ სექტორის შესანარჩუნებლად.

„ჩვენ ყველას გვესმის, რომ 2020 წელს კორონავირუსმა მთელ მსოფლიოში, განსაკუთრებით, საქართველოში დააზარალა ღვინის სექტორი, რადგანაც ის გაყიდვის ძირითადი არხი, რომელიც უკავშირდებოდა სასტუმროებს, რესტორნებს, ბარებს, მთელი გაზაფხულის მანძილზე იყო დაკეტილი და თუ ყველა სხვა სექტორში ჩვენ გვაქვს ზრდა, მიუხედავად პრობლემებისა, ღვინის სექტორში ძალიან მძიმე სიტუაცია იყო“, – აღნიშნა მინისტრმა. 

მისი სიტყვებით, სახელმწიფოს ამიტომაც მოუწია დიდი თანხის გამოყოფა ქართული ღვინის კომპანიების მსყიდველობითი უნარის ასამაღლებლად. მათ შორის არის სახელმწიფო კომპანიაც, რომელიც ჭარბ მოსავალს იბარებს ბაზარზე ფერმერების მდგომარეობის შესანარჩუნებლად.

„თუ დარგს ზურგს შევაქცევთ, ერთ წელიწადში ისეთ ზიანს მივიღებთ, რომლის გამოსწორება ძალიან რთული იქნება. ამიტომ დარგისთვის მდგრადობის შენარჩუნება არის აუცილებელი და მჯერა, რომ ღვინის სექტორი საქართველოს სოფლის მეურნეობის ფლაგმანია და იქნება მომავალში და ძალიან დიდ როლს შეასრულებს“, – განაცხადა ლევან დავითაშვილმა.

ქართული მეღვინეობა კორონავირუსის პანდემიისა და ქვეყნებს შორის სავაჭრო ოპერაციების შემცირების გამო ზარალს განიცდის. საქართველოდან ღვინის ექსპორტი ბოლო წლების განმავლობაში პირველად შემცირდა. „საქსტატის“ მონაცემებით, ღვინის ექსპორტი 2020 წლის იანვრიდან აგვისტოს ჩათვლით, გასული წლის ანალოგიურ პერიოდთან შედარებით, 8,6%-ით დაეცა.

კორონავირუსამდე

საქართველოდან 2019 წელს ღვინის რეკორდული რაოდენობის ექსპორტი განხორციელდა – მსოფლიოს 53 ქვეყანაში 94 მლნ ბოთლი გავიდა, რაც 9%-ით აღემატება 2018 წლის ანალოგიურ მაჩვენებელს და ამავდროულად ყველაზე მაღალი მაჩვენებელია დამოუკიდებელი საქართველოს ისტორიაში, აცხადებდა საქართველოს ღვინის ეროვნული სააგენტო. 

2019 წელს ექსპორტირებული ღვინის ღირებულებამ 240 მლნ დოლარს მიაღწია – 17%-ით მეტი 2018 წლის მაჩვენებელზე. 2019 წელს საზღვარგარეთ ღვინო 341-მა კომპანიამ გაიტანა.

2019 წელს ყველაზე მეტი ღვინო რუსეთში გავიდა. ლიდერი ქვეყნების ხუთეულში მოხვდნენ ასევე უკრაინა, ჩინეთი, პოლონეთი და ყაზახეთი.

საზღვარგარეთ ყველაზე პოპულარული ქართული ღვინო ნახევრადტკბილი „ქინძმარაულია“ – 2019 წელს საქართველოდან 17,4 მილიონი ბოთლი „ქინძმარაული“ გავიდა. ყველაზე პოპულარული ქართული ღვინოების ხუთეულშია ასევე „მუკუზანი“, „წინანდალი“, „ახაშენი“ და „ხვანჭკარა“.

43
თემები:
ღვინის კულტურა და მეღვინეობა
რთველი

რთველი 2020: ფერმერებმა 170 ათასი ტონა ყურძენი ჩააბარეს

90
(განახლებულია 19:57 25.09.2020)
საქართველოს მთავრობამ წელს COVID-19-ის პანდემიის შედეგად დაზარალებული მევენახეობა-მეღვინეობის დარგის მხარდასაჭერად „რქაწითელისა“ და „კახური მწვანეს“ ჯიშის ყურძნის სუბსიდირება გადაწყვიტა.

თბილისი, 25 სექტემბერი – Sputnik. საქართველოში „რთველი 2020“-ის ფარგლებში ამ დროისათვის დაახლოებით 170 ათასი ტონა ყურძენია გადამუშავებული, იუწყება ღვინის ეროვნული სააგენტო.

კახეთში ყურძნის მოსავლის აღების სეზონი 22 აგვისტოს დაიწყო. გადამუშავების პროცესში 60-ზე მეტი ღვინის საწარმოა ჩართული. ჩაბარებული ყურძნის ღირებულება ამ დროისათვის 172 მილიონ ლარზე მეტს შეადგენს. 

25 სექტემბრის მონაცემებით, კახეთის რეგიონში გადამუშავებულია 123 ათასი ტონა „რქაწითელი“, 39 ათასი ტონა „საფერავი“, 2,8 ათასი ტონა „კახური მწვანე“ და სხვადასხვა ჯიშის ყურძენი.

მოსავლის დაბინავება კახეთის ყველა მუნიციპალიტეტში მიმდინარეობს.

მიმდინარე წელს COVID-19 პანდემიის შედეგად დაზარალებული მევენახეობა-მეღვინეობის დარგის მხარდასაჭერად, საქართველოს მთავრობის გადაწყვეტილებით, „რქაწითელისა“ და „კახური მწვანეს“ ჯიშის ყურძნის სუბსიდირება განხორციელდება.

სუბსიდიას მიიღებს ღვინის კომპანია, რომელიც შეისყიდის და გადაამუშავებს კახეთის რეგიონში მოწეულ, არანაკლებ 1000 ტონა „რქაწითელის“ ან „კახური მწვანეს“ ჯიშის ყურძენს. ამასთან, შესყიდულ 1 კგ ყურძენში ყურძნის ჩამბარებელს გადაუხდის არანაკლებ 0,80 ლარს. 1 კგ ყურძნის შესყიდვისას ღვინის კომპანიებზე გაიცემა სუბსიდია – 1 კგ „რქაწითელზე“ ან „კახურ მწვანეზე“ – 0,30 ლარი.

90
თემები:
საქართველოს სოფლის მეურნეობა
კორონავირუსის ეპიდემია. ჟურნალისტები პირბადეებით

ვინ და როგორ აშუქებს არჩევნებს? სპეციალისტებმა ქართული მასმედია გააანალიზეს

0
ყველაზე კრიტიკული ტონი მთავრობის მიმართ ჰქონდა :მთავარ არხს“ – 72%, ხოლო ყველაზე დადებითი Postv–ს – 33%

თბილისი, 26 სექტემბერი - Sputnik. ქართული მასმედია ყველაზე მეტ ყურადღებას უთმობს მმართველი პარტია „ქართული ოცნება – დემოკრატიული საქართველოს“ საქმიანობის გაშუქებას. შემდეგ მოდიან ოპოზიციური პარტიები „ერთიანი ნაციონალური მოძრაობა“ და „ევროპული საქართველო“.

ამაზე მეტყველებს საპარლამენტო არჩევნების შუალედური მედიამონიტორინგის შედეგები. მედიამონიტორინგმა მასობრივი ინფორმაციის 43 საშუალება მოიცვა: 12 ტელეარხი, 10 რადიო, რვა გაზეთი და 13 ონლაინ–გამოცემა. კვლევა 15 ივნისიდან 31 აგვისტოს ჩათვლით პერიოდში ჩატარდა.

არჩევნები 2020: „ოდირმა“ საქართველოში სადამკვირვებლო მისია გახსნა>>

მედიამონიტორინგი ხორციელდება ევროკავშირისა და გაეროს განვითარების პროგრამის (UNDP) მხარდაჭერით და სამ არასამთავრობო ორგანიზაციასთან – საქართველოს ჟურნალისტური ეთიკის ქარტია, Internews Georgia და CRRC–საქართველო – თანამშრომლობით. მონიტორინგი2020 წლის დეკემბერში დასრულდება.

მონიტორინგის პირველი შედეგები

„ქართული ოცნება უფრო დადებით კონტექსტში გააშუქა ტელეარხმა „იმედი“ (29%), ხოლო ნეგატიურად – ოპოზიციურმა ტელეარხმა „მთავარი არხი“ (72%).

 „ერთიანი ნაციონალური მოძრაობა“ ყველაზე დადებითად გააშუქა „მთავარმა არხმა“ (6%), ხოლო ნეგატიურად – ტელეარხმა „ობიექტივმა (79%).

ოპოზიციურ საპარლამენტო პარტია „ევროპულ საქართველოს“ ყველაზე მეტი დრო დაუთმა ტელეარხმა „ფორმულამ“. დადებითი გაშუქება შეადგენდა მთელი დროის 1%–ზე ოდნავ მეტს. ყველაზე მეტად პარტიას დადებითად იხსენებდა „TV პირველი“ და „კავკასია (2%). ყველაზე ნეგატიურად ეს პარტია გააშუქეს „იმედის“ ეთერში.

პარტიას „ლელო საქართველოსთვის“ ყველაზე მეტი დრო დაუთმო „TV პირველმა“. დადებითი გაშუქება შეადგენდა მხოლოდ 3%–ს. ყველაე მეტად დადებითად პარტია გააშუქა ტელეარხმა „კავკასია“ (21%).

ექს–პრეზიდენტ მიხეილ სააკაშვილს ყველაზე მეტი დრო დაუთმო „იმედმა“. ნეგატიური გაშუქება შეადგენდა 74%–ს.

მთავრობის მიმართ ყველაზე კრიტიკული ტონი ჰქონდა „მთავარ არხს“ – 72%, ხოლო ყველაზე დადებითი – Postv–ს – 33%.

„წინა წლების მსგავსად თითქმის ყველა არხზე პრობლემად რჩება სიღრმისეული, მოკვლევითი სიუჟეტების სიმცირე, რომლებიც დაკავშირებული იქნება საარჩევნო თემატიკასთან და ამომრჩეველს მეტად დაეხმარება ინფორმირებული არჩევანის გაკეთებაში“, – აღნიშნავენ დოკუმენტის ავტორები.

მედიამონიტორინგმა ასევე აჩვენა, რომ წინა წლებთან შედარებით გაიზარდა ეთიკური დარღვევების ფაქტები. როგორც წინა წლებში, თითქმის ყველა არხზე პრობლემას წარმოადგენს გენდერული სტერეოტიპები. როგორც დოკუმენტშია აღნიშნული, მთელი პერიოდის განმავლობაში დაფიქსირდა სექსისტური განცხადებების ტირაჟირების რამდენიმე შემთხვევა. სექსისტური განცხადების ავტორი პოლიტიკოსებთან ერთად ჟურნალისტებიც იყვნენ.

0
თემები:
საქართველოს საპარლამენტო არჩევნები 2020