ბათუმის პორტი

კორონავირუსის ეპოქა: რას აწარმოებს საქართველო და ვინ ყიდულობს მის პროდუქციას

229
საზღვრებს გარეთ ადგილობრივი პროდუქციის გატანა საქართველოს ექსპორტისა და რეექსპორტის საერთო მოცულობის 72,3%-ს შეადგენს

თბილისი, 27 ივნისი - Sputnik. მსოფლიო ეკონომიკა კორონავირუსის პანდემიის გამო უდიდესი კრიზისის პირისპირ აღმოჩნდა. ეკონომიკის ზრდის ტემპები კატასტროფულად ეცემა მთელ მსოფლიოში, საერთაშორისო ორგანიზაციების ანგარიშები კი სულ უფრო პესიმისტურია.

პანდემიამ სერიოზული დარტყმა მიაყენა საქართველოსაც - კორონავირუსისგან დაზარალდა ეკონომიკის თითქმის ყველა სფერო, მათ შორის, ვაჭრობაც - საგარეო სავაჭრო ბრუნვა 2020 წლის დასაწყისიდან 16,8%-ით შემცირდა 2019 წლის იანვარ-მაისთან შედარებით. 

Sputnik-საქართველო დაინტერესდა, რას აწარმოებს საქართველო კორონავირუსის პანდემიის პირობებში, რომელი ქვეყნები ყიდულობენ ქართულ პროდუქციას კრიზისის პერიოდში და როგორ არის შესაძლებელი ექსპორტის წახალისება.

რას აწარმოებს საქართველო

საქართველოში საქონლის ფართო ასორტიმენტი იწარმოება — სპილენძის მადნები და კონცენტრატები, ფეროშენადნობები, ნატურალური ღვინო, სამკურნალო საშუალებები, მინერალური წყლები, ოქრო, თხილი და სხვ.

კორონავირუსის პანდემიისა და ქვეყნებს შორის სავაჭრო ოპერაციების შესუსტების ფონზე საქართველოდან ღვინის ექსპორტის მოცულობა, „საქსტატის“ მონაცემებით, იანვრიდან მაისამდე 11,3%-ით შემცირდა.

ქვეყნის მთავრობამ გადაწყვიტა, მხარში დაუდგეს დარგს ამ რთულ მომენტში და წელს 60 მილიონი ლარი გამოყოს რთვლის სუბსიდირებისთვის.

ღვინის ეროვნული სააგენტოს თავმჯდომარე ლევან მეხუზლამ განაცხადა, რომ სუბსიდია ალბათ მხოლოდ „რქაწითელის“ ჯიშის ყურძენზე გავრცელდება.

„ექსპორტის ძირითადი ნაწილი წითელ ღვინოზე მოდის და ამ მიმართულებით ჩვენ ალბათ არ დაგვჭირდება ჩარევა. დიდი იმედი გვაქვს, რომ „საფერავის“ ჯიში თავისუფალ ბაზარზე გაიყიდება“, - განაცხადა მეხუზლამ „პირველი არხის“ ეთერში.

სააგენტოს ხელმძღვანელმა აღნიშნა, რომ ყურძნის იშვიათი ჯიშები, რომლებიც მეტ-ნაკლებად პოპულარულია და კარგად იყიდება, ასევე არ იქნება სუბსიდირებული.

 „სუბსიდია, შეიძლება ითქვას, აუცილებელი იქნება „რქაწითელისთვის“, - განაცხადა მეხუზლამ.

საქართველოდან ექსპორტით გადის ასევე რქოსანი პირუტყვი, ცხვარი, ბოსტნეული და ხილი, მათ შორის, პომიდორი, კარტოფილი, ხახვი, ბულგარული წიწაკა, ბადრიჯანი, მწვანილი, მანდარინი, ვაშლი, მსხალი და ატამი.

მსოფლიო ბაზარზე პოზიციების გამყარებას, პანდემიის მიუხედავად, გეგმავენ თხილის ექსპორტიორებიც და კეთილსაიმედო კლიმატური პირობების შემთხვევაში, ივლისის ბოლოსთვის მოსავლის ასაღებად ემზადებიან.

მაისიდან ივნისამდე თხილის მწარმოებლები, როგორც წესი, გეგმებს ათანხმებენ და პროგნოზს ადგენენ ახალი სეზონისთვის, რომელიც, წინასწარი მონაცემებით, 2020 წელს 50 ათას ტონას მიაღწევს.

 „მსოფლიო ტენდენციების გათვალისწინებით, წელს უკეთეს ვითარებას ველით. თავის მხრივ, საერთაშორისო ბაზარს საუკეთესო ხარისხიანი თხილით მოვამარაგებთ. მოსალოდნელია, რომ ბოლო წლებში ყველაზე დიდი და ყველაზე ხარისხიანი მოსავალი გვექნება“, - განუცხადა გარემოს დაცვისა და სოფლის მეურნეობის მინისტრის მოადგილე გელა ხანიშვილმა „რეზონანსს“.

წინასწარი შეფასებით, თხილის მოსავალი თურქეთში 2020 წელს 620 ათას ტონას შეადგენს, რაც 15%-ით ნაკლებია შარშანდელ მაჩვენებელზე - საქართველოსთვის ეს მსოფლიო ბაზარზე პოზიციების განმტკიცების კარგი შესაძლებლობაა.

რომელი ქვეყნები ყიდულობენ ქართულ პროდუქციას კრიზისის დროს

კორონავირუსის პანდემიით გამოწვეულმა კრიზისმა ქართულ ეკონომიკას სერიოზული დარტყმა მიაყენა. „საქსტატის“ მონაცემებით, იანვარ-მაისში საქართველოდან 1,2 მილიარდი დოლარის ღირებულების პროდუქცია გავიდა, რაც 2019 წლის იმავე პერიოდის მაჩვენებელზე 16,2%-ით ნაკლებია. ექსპორტი რეექსპორტის გარეშე წლის დასაწყისიდან 4%-ით შემცირდა და 894 მილიონი დოლარი შეადგინა.

როდესაც საერთაშორისიო ორგანიზაციების ანგარიშები სულ უფრო პესიმისტური ხდება, ჩვენ ზრდის მოლოდინი შეიძლება გვქონდეს, აღნიშნა ეკონომიკურ საკითხთა ექსპერტმა, პროფესორმა იოსებ არჩვაძემ.

„ბუნებრივია, საქართველო ვერ იქნება გამონაკლისი პანდემიისგან დაზარალებულთა შორის. ჩვენ სავაჭრო ურთიერთობა გვაქვს მსოფლიოს 130 ქვეყანასთან და თუ იქ მოთხოვნილება კლებულობს, ბუნებრივია, ეს ჩვენზეც აისახება. საქართველომ მოიგო ბრძოლა ერთ სამედიცინო ფლანგზე და ეს უნდა გადავიტანოთ ეკონომიკაზე, თუმცა აქ ვითარება საკმაოდ დრამატულია“, - განუცხადა არჩვაძემ „რეზონანსს“.

მისი სიტყვებით, განვითარებული ეკონომიკის ქვეყნები ძალიან ცუდი სცენარისთვის ემზადებიან და ამბობენ, რომ 2019 წლის მაჩვენებლებს მომავალ წელსაც ვერ დაუბრუნდებიან, რომ არაფერი ითქვას 2020 წლის მეორე ნახევარზე.

„ჩვენ, ტრადიციულად, შეგვიძლია იმ პროდუქციის გატანა, რომელიც მეზობელ ქვეყნებში პოპულარულია და რაზეც მოთხოვნილება არსებობს. საერთო ჯამში, ყველაფერი გლობალურ ეკონომიკაზეა დამოკიდებული“, - აღნიშნა არჩვაძემ.

კრიზისის დროს ქართულ პროდუქციას ყიდულობდნენ ჩინეთი, რუსეთი, ბულგარეთი, თურქეთი და უკრაინა.

იმ ქვეყნების ათეულში, სადაც პანდემიის დროს საქართველოდან საქონელი გადიოდა, შედიან ასევე შვეიცარია, აშშ, ესპანეთი, სომხეთი და აზერბაიჯანი. ყველა ეს ქვეყანა, ესპანეთისა და შვეიცარიის გარდა, საქართველოს მთავარი სავაჭრო პარტნიორების ათეულში შედის.

როგორ ებრძვის მთავრობა კრიზისს

კორონავირუსის პანდემია საქართველოს ეკონომიკისა და მთავრობის წინაშე ახალ ამოცანებს სახავს - ხელისუფლებამ იმპორტის ჩანაცვლების ამბიციურ გეგმებზე ისაუბრა. ამიტომ სოფლის მეურნეობის დარგებისა და ფერმერების დახმარება პრიორიტეტი გახდა.

საქართველოს პრემიერ-მინისტრი გიორგი გახარია ფიქრობს, რომ ქვეყანაში სოფლის მეურნეობა ის დარგია, რომელსაც გარკვეული მიმართულებით არა მარტო ქვეყნის გამოკვება შეუძლია, არამედ საექსპორტო პოტენციალიც გააჩნია. ამისათვის კი საჭიროა სოფლის მეურნეობის ინდუსტრიალიზაცია.

სოფლის მეურნეობის დახმარების პროგრამა მიმართულია ფერმერული მეურნეობების განვითარებისკენ, რომლებიც ფლობენ რეგისტრირებულ მიწას. პროგრამის წყალობით, 200 ათასამდე ფერმერი უკვე სარგებლობს დამატებითი შეღავათებით.

დღეს ქვეყანაში შემდეგი სახელმწიფო პროექტები ხორციელდება: შეღავათიანი აგროკრედიტის პროექტი, საწარმოების თანადაფინანსება, აგროდაზღვევა, მომავლის დანერგვა, საგაზაფხულო სამუშაოების ჩატარებაში ფერმერების ხელშეწყობის პროექტი, ქართული ჩაი. ზოგიერთი მათგანი კრიზისთან დაკავშირებით შეიცვლება.

ეკონომისტი სოსო სიმონიშვილი ფიქრობს, რომ ხელისუფლებამ გარკვეული, მით უფრო, ამბიციური გეგმების ხორცშესასხმელად ძირფესვიანი ეკონომიკური რეფორმები უნდა გაატაროს.

„იმისათვის, რომ იფიქრო იმპორტის ჩანაცვლებაზე, ექსპორტის სტიმულირებაზე, საჭიროა, პირველ რიგში, მაკროეკონომიკური მონაცემების მოწესრიგება, მაკროეკონომიკური რეგულირება, ამას კი ჯერ ცენტრალური ბანკის ფულადი-საკრედიტო პოლიტიკისთვის შესაბამისი საკანონმდებლო ბაზის შექმნა სჭირდება“, - განუცხადა სოსო სიმონიშვილმა Sputnik-საქართველოს.

მისი სიტყვებით, არავითარი მნიშვნელობა არა აქვს, როგორი საექსპორტო პოტენციალი გაგაჩნია, და მაგალითის სახით მოიშველია იაპონია, რომელსაც წიაღში არაფერი აქვს: „ის ყველაფერს ყიდულობს, გადაამუშავებს, აქცევს ბრწყინვალე პროდუქტად და ყიდის“.

ეკონომისტს მიაჩნია, რომ თუ მთავრობა სახელმწიფოსა და ხალხის კეთილდღეობაზე ზრუნვას არ დაიწყებს, ყველა მისი წამოწყება წარუმატებელი იქნება.

„თუ ხელში არ ავიღებთ მაკროეკონომიკის ბერკეტებს, ვერავითარ პროგრესს ვერ მივაღწევთ“, - აღნიშნა სიმონიშვილმა.

როგორ შეიძლება ექსპორტის წახალისება?

ექსპორტის წახალისება შესაძლებელია, თუ საქართველოს ეკონომიკა 2020 წლის იანვრის დონეს დაუბრუნდება, რომელზეც ის პანდემიის საინფორმაციო ფონის დაწყებამდე იმყოფებოდა, ფიქრობს საერთაშორისო პროგნოზირებისა და კვლევების ცენტრის ვიცეპრეზიდენტი ნიკა შენგელია.

„ჩვენი აზრით, იმ მაჩვენებლებს, რომლებიც პანდემიამდე გვქონდა, ქვეყანა დაუბრუნდება, სავარაუდოდ, თუ ასე გაგრძელდება, მომავალი წლის ამ პერიოდისთვის. მანამდე, არა მგონია, დაბრუნება შევძლოთ. დაველოდოთ ივნისის მაჩვენებლებს, რათა დავინახოთ, რა პროცესები მიმდინარეობს მსოფლიო ეკონომიკაში და აქედან გამომდინარე ნათელი გახდება, რა გველის უკვე შემოდგომასა და ზამთარში“, - განუცხადა შენგელიამ Sputnik-საქართველოს.

იმისათვის, რომ ექსპორტი პანდემიამდე არსებულ მაჩვენებელს დაუბრუნდეს, საჭიროა ნიშის პოვნა საერთაშორისო ბაზარზე, ფიქრობს ეკონომიკურ საკითხთა ექსპერტი აკაკი ცომაია.

„საკუთარი კონკურენტუნარიანობით ჩვენ ნიშას ვერ ვიპოვით, ამიტომ უნდა მოვიზიდოთ უცხოელი ინვესტორები. მათ მოსაზიდად კი საჭიროა სწორი ინსტიტუციონალური რეფორმები... მათი დახმარებით, მათთან მოლაპარაკების გზით შევძლებთ საერთაშორისო ბაზრებზე გასვლას და გარკვეული ნიშის დაკავებას. სხვა შემთხვევაში, პერსპექტივა არ გვაქვს“, - განუცხადა ცომაიამ Sputnik-საქართველოს.

მისი სიტყვებით, ეკონომიკა არ ვითარდება მხოლოდ პომიდორის, მწვანილისა და ფერადი ლითონის ექსპორტის ხარჯზე.

„ჩვენი განვითარების გზა ეფუძნება მაღალი ტექნოლოგიების პროდუქციის წარმოებას. ამისათვის კი საჭიროა უცხოური ინვესტიციები“, - განაცხადა ცომაიამ.

229
თემები:
საქართველოს ეკონომიკა (1015)
ბათუმი

ბათუმს ახალი ბულვარი ექნება

68
(განახლებულია 21:28 08.05.2021)
ადგილს ახალი ბულვარისთვის ბათუმში ისევე, როგორც სხვა ობიექტებისთვის აჭარაში,  სპეციალური კომისია განსაზღვრავს

თბილისი, 8 მაისი – Sputnik. საქართველოს ხელისუფლება ბათუმში ახალი ბულვარის აშენებას გეგმავს, განაცხადა რეგიონული განვითარებისა და ინფრასტრუქტურის მინისტრმა ირაკლი ქარსელაძემ.

პროგრამა „განახლებული რეგიონები“ გურიაში: რისი გაკეთება იგეგმება>>

მინისტრის თქმით, კიდევ ერთი ბულვარის მშენებლობა ბათუმში სახელმწიფო პროგრამა „განახლებული რეგიონების“ ფარგლებში განხორციელდება. სულ ამ პროგრამის ფარგლებში პროექტების განხორციელებაზე ხელისუფლებამ უკვე გამოაცხადა ტენდერი 20 მლნ ლარზე.

ადგილს როგორც ახალი ბულვარისთვის ბათუმში, ისე ასევე სხვა ობიექტებისთვის აჭარაში,  სპეციალური კომისია განსაზღვრავს.

როგორც ქარსელაძემ აღნიშნა, ბათუმში ახალი ბულვარი და მწვანე სივრცე ხელს შეუწყობს ქალაქის განაშენიანებების განვითარებას.

„ბათუმში შეიქმნება ახალი ბულვარი და მოეწყობა  მწვანე სივრცე, რაც ხელს შეუწყობს როგორც არსებული განაშენიანებების რეკრეაციული კუთხით უზრუნველყოფას, ასევე  ახალი განაშენიანებების კიდევ უფრო ინტენსიურად განვითარებას“, – განაცხადა ქარსელაძემ.

ბათუმის შემოვლითი გზის მშენებლობა წლის ბოლოს დასრულდება>>

ბათუმი საქართველოს ერთ–ერთი ყველაზე განვითარებადი ქალაქი. ადგილობრივი სადილერო კომპანიების ინფორმაციით, ქალაქში 2023 წლისთვის ექსპლუატაციაში შევა 135 საცხოვრებელი კომპლექსი ათასობით ბინით.

68
თემები:
საქართველოს რეგიონები
შემოვლითი გზის მშენებლობა

ბათუმის შემოვლითი გზის მშენებლობა წლის ბოლოს დასრულდება

43
(განახლებულია 20:12 08.05.2021)
ბათუმის შემოვლითი გზა 13-კილომეტრიანი მონაკვეთს მოიცავს. აშენდება ორზოლიანი ასფალტ-ბეტონის გზა, 19 სახიდე გადასასვლელი, ოთხი სატრანსპორტო კვანძი, ხუთი გვირაბი და 57 წყალგამტარი მილი.

თბილისი, 8 მაისი — Sputnik. ბათუმის შემოვლითი გზის მშენებლობა ინტენსიურ რეჟიმში მიმდინარეობს და წლის ბოლოს დასრულდება. იუწყება აჭარის მთავრობის პრესსამსახური.

ბათუმის შემოვლითი გზა 13-კილომეტრიანი მონაკვეთს მოიცავს. ამ ეტაპზე, სამშენებლო სამუშაოები 11 ხიდზე მიმდინარეობს, ხოლო შვიდ ხიდზე ძირითადი სამუშაოები დასრულებულია. ძირითადი სამუშაოები დასრულებულია ერთ გვირაბზე, გაჭრილია ორი გვირაბი და მიმდინარეობს ორი გვირაბის მშენებლობა.

პროექტის ფარგლებში აშენდება ორზოლიანი ასფალტ-ბეტონის გზა, 19 სახიდე გადასასვლელი, ოთხი სატრანსპორტო კვანძი, ხუთი გვირაბი და 57 წყალგამტარი მილი.

ახალი შემოვლითი გზა, რომლის სამშენებლო სამუშაოები 2018 წელს დაიწყო, გაივლის: მახინჯაურს, განთიადს, კაპრეშუმს, სალიბაურს, ფერიას, მახვილაურსა და ხელვაჩაურს.

პროექტი აზიის განვითარების ბანკისა (ADB) და აზიის ინფრასტრუქტურის საინვესტიციო ბანკის (AIIB) მიერ ფინანსდება. მისი სახელშეკრულებო ღირებულება 329 630 734 ლარია.

8 წუთი ბათუმიდან ქობულეთამდე: ბათუმის შემოვლითი გზის მშენებლობა აქტიურად მიმდინარეობს>>

სამშენებლო სამუშაების მიმდინარეობას დღეს აჭარის მთავრობის თავმჯდომარე თორნიკე რიჟვაძე და რეგიონული განვითარებისა და ინფრასტრუქტურის მინისტრი ირაკლი ქარსელაძე ადგილზე გაეცნენ.

43
თემები:
ტრანსპორტი საქართველოში
მთები

დღის ასტროპროგნოზი ზოდიაქოს ნიშნებისთვის: 9 მაისი

0
(განახლებულია 09:21 08.05.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 9 მაისია, კვირა. კლებადი მთვარე ვერძის ნიშანშია. ამ დღეს პლანეტა მზე მფარველობს.

ეს დღე სიყვარულს უნდა მიუძღვნათ და არა ომსა და მტრობას. გრძნობები გამძაფრებული იქნება, რაც სიყვარულისთვის ძალიან კარგია, მაგრამ კამათისა და ჩხუბისთვის, რა თქმა უნდა – არა. ნებისმიერმა გაუფრთხილებელმა სიტყვამ თუ საქციელმა დიდი წყენა შეიძლება მოიტანოს. გადაწყვეტილებებს დღეს გული მიიღებს, რომელსაც რეალური გრძნობები სჭირდება, და არა – გონება.

როგორ იკლებენ წონაში ზოდიაქოს ნიშნები>>

ვერძი: საზღვარი „საჭიროასა“ და „მინდას“ შორის შეიძლება დაირღვეს. მოგინდებათ გრძნობებზე აყოლა, მაგრამ ვარსკვლავები ამას არ გირჩევენ. ყველაფერი იოლად არ გამოგივათ, ხანდახან სერიოზული წინაღობების გადალახვა მოგიწევთ. მიუხედავად ამისა, პოზიტიური ტენდენციები ბევრ სფეროშია შესამჩნევი. იყავით შეუპოვარი და ეცადეთ, არ დაკარგოთ საკუთარი ძალების რწმენა. თუ ხელებს არ ჩამოუშვებთ პირველივე ბარიერის დანახვისას, ყველაფერი გამოგივათ.

კურო: საჭიროა თანამიმდევრულად მოქმედება და ქაოსისთვის თავის არიდება. აჩქარება შეცდომების მიზეზი შეიძლება გახდეს. დრო უნდა გამონახოთ სიტუაციაში გასარკვევად და სხვადასხვა ვარიანტის განსახილველად. მოუსმინეთ გამოცდილი ადამიანების რჩევებს. ასე შეძლებთ მოსალოდნელი ხარვეზებისთვის გვერდის ავლას. საღამოს დაისვენეთ და ისეთი რამ გააკეთეთ, რაც განწყობას აგიმაღლებთ.

ტყუპი: დღეს მაქსიმალურად გაძლიერდება შემოქმედებითი მისწრაფებები და თუნდაც არ იყოთ ხელოვნების სფეროში დაკავებული ადამიანი, ეს პოტენციალი თქვენში აუცილებლად გაიღვიძებს. ამას გარდა, მოსალოდნელია ურთიერთობები ძალზე საინტერესო ადამიანებთან და საინტერესო თემებზე. ასევე ხელსაყრელი დროა რომანტიკული შეხვედრისთვის, განსაკუთრებით დღის მეორე ნახევარი. ეს დიდ პოზიტიურ ემოციებს მოგიტანთ.

კირჩხიბი: საინტერესო იდეები გაგიჩნდებათ, რაც კარგად აისახება როგორც თქვენს კარიერაზე, ასევე ცხოვრებაზე ზოგადად. ასევე სასარგებლო იდეის მაგივრად შესაძლებელია ძალიან საინტერესო ნაცნობობა. ნაკლებად სავარაუდოა, რომ რომანტიკული შეხვედრა იყოს, მაგრამ მატერიალური თვალსაზრისით ეს ძალზე პერსპექტიული აღმოჩნდება. ნებისმიერ შემთხვევაში, ძალიან კარგი დღე გელოდებათ და ამიტომ ყურადღებით უნდა იყოთ, რომ შანსი ხელიდან არ გაუშვათ.

ლომი: დღეს ახალი საინტერესო შეხვედრებისა და ნაცნობობის შესაძლებლობა გექნებათ. არაა გამორიცხული, რომ ერთ–ერთი ასეთი შეხვედრა ან გაცნობა რომანტიკული ხასიათისა აღმოჩნდეს, თუმცა ნაკლებად სავარაუდოა, რომ მას სერიოზული გაგრძელება მოჰყვეს. მთლიანობაში დღე ძალზე მრავალფეროვანი და საინტერესო გელოდებათ. ხოლო იმისთვის, რომ საჭირო დროს საჭირო ადგილზე აღმოჩნდეთ, ენდეთ ინტუიციას, რომელიც დღეს საკმაოდ გამძაფრებული გექნებათ.

ქალწული: დღეს თქვენი მთავარი ძალა და იარაღი თქვენი სისუსტეები იქნება. ამ სისუსტეების გამოყენებით, შეიძლება ითქვას, რომ გარშემომყოფებს „დაატერორებთ“, უნარი, რომ მიზანს ყველანაირი გზით მიაღწიოთ, აპოგეას მიაღწევს. ამასთან, თავად თქვენ მოგეჩვენებათ, რომ არაფერი განსაკუთრებული და უჩვეულო არ ხდება და გარშემომყოფების გრძნობებზე თამაში სრულიად ბუნებრივი რამაა. თუ ასე გააგრძელებთ, მალე ტირანად შეიძლება იქცეთ ოჯახში.

სასწორი: მთელი დღის განმავლობაში განწყობა შეიძლება ათასჯერ შეგეცვალოთ – მხიარულება მოულოდნელად „მოქუფრულმა“ ფიქრებმა ჩაანაცვლოს, თუმცა ერთი–ორ წუთში ამ ღრუბლებიდან ისევ მზემ გამოანათოს. მოკლედ რომ ვთქვათ, დღეს ემოციებისთვის განსაკუთრებული ყურადღების მიქცევა არ ღირს. ასევე აჯობებს, თუ მნიშვნელოვანი საქმეების გაკეთებას გადადებთ, ან გადააბარებთ იმას, რომლის განწყობა დღეს ჭირვეულობით არ გამოირჩევა.

მორიელი: დღეს თქვენში ტალანტი გაიღვიძებს: ნებისმიერი ბუზი, რომელიც გვერდით ჩაგიფრენთ, სპილოდ აქციოთ. მთელი დღის განმავლობაში ხან რა გაგაღიზიანებთ და ხან – რა. თუ არ გინდათ, ბუზღუნასა და აბეზარას სახელი დაგერქვათ, ნაკლები ყურადღება უნდა მიაქციოთ ნეგატივს, გარშემომყოფების ნაკლოვანებებს. სამაგიეროდ შესანიშნავად გაართმევთ თავს იმ საქმეებს, რომლებშიც წვრილმანებისადმი ყურადღებაა საჭირო – სჯობს, სწორედ ასეთ საქმეებს დაუთმოთ დრო.

მშვილდოსანი: დღეს გული დიდი და ხმაურიანი კომპანიებისკენ გაგიწევთ, რომ თუნდაც სულ ცოტა ხნით აღმოჩნდეთ ყურადღების ცენტრში. ყოველ შემთხვვაში, თუ ასეთ ადგილას არ აღმოჩნდებით და ვერც ყურადღების ცენტრში მოექცევით, იოცნებოთ მაინც ამაზე. ამაში ცუდი არაფერია, მაგრამ ეცადეთ ზედმეტი არ მოგივიდეთ და გარშემომყოფები არ გააღიზიანოთ, თან იმის გათვალისწინებით, რომ თქვენი რეაქცია ირგვლივ მყოფების მხრიდან გამოსროლილ ირონიულ შენიშვნებზე ორმაგად მწვავე იქნება.

თხის რქა: მუდმივად მოგიწევთ სახლის საქმეებზე და საზრუნავზე ყურადღების გადატანა. ეს კარგიცაა – დროა, მიხედოთ საშინაო საქმეებს და სხვა საკითხები კი გადადოთ. მაინც არ გელოდებათ რამე გრანდიოზული გარღვევები და შედეგები საქმიანობაში. მაგრამ ვარსკვლავები გირჩევენ, ზედმეტი ყურადღება არ დაუთმოთ წვრილმანებს, მცირე უსიამოვნებებს, წინააღმდეგ შემთხვევაში შემდეგ რამდენიმე დღე ამაზე მოგიწევთ „ჩაციკლვა“.

მერწყული: გაუგებრობებით სავსე დღეა და ამის მიზეზი თვითონ თქვენი არათანმიმდევრულობა იქნება. დღეს გაცნობიერებულად მოგინდებათ წესების დარღვევა, შეიძლება სხვადასხვა წვრილმანმა მიიქციოს თქვენ ყურადღება, ისეთმა, რომელსაც სხვა დროს საერთოდ არ მიაქცევდით ყურადღებას. ამან შეიძლება ისე გაგიტაცოთ, რომ გასაკეთებელი საქმეები საერთოდ დაგავიწყდეთ, ამით კი თქვენი გეგმები დაირღვევა და კალაპოტიდან ამოვარდებით.

თევზები: თქვენში ყველაფერ მშვენიერსა და ლამაზზე განსაკუთრებული ალღო გაიღვიძებს და ეს მშვენირი, პირველ რიგში, ფულია. ძალიან დიდია დღეს იმის ალბათობა, რომ თუ საგაძური, არა, რამე ძველი ყუთი მაინც იპოვოთ და ამან დაგაინტერესოთ. შემოსავლებთან დაკავშირებით სასიამოვნო სიურპრიზი გელოდებათ. ერთადერთი, რაშიც უნდა იფრთხილოთ, ეს საკვებია – არის დიდი შანსი, რომ გაძლიერებული მადის გამო ფიგურას ზიანი მიაყენოთ.

0