ნათია თურნავა

მიმზიდველი პირობები: რას სთავაზობენ უცხოურ კომპანიებს საქართველოში

101
(განახლებულია 16:28 24.06.2020)
ინვესტიციების საქართველოში პროაქტიური მოზიდვის ფარგლებში 400-ზე მეტ საერთაშორისო კომპანიასთან იგეგმება მოლაპარაკებები. ერთ-ერთან - კომპანია „ნესტლესთან" კონტაქტი უკვე არის

თბილისი, 24 ივნისი — Sputnik. საქართველოს მთავრობა უცხოურ კომპანიებს საკუთარი ბიზნესის საქართველოში გადმოტანას სთავაზობს.

გლობალური პანდემიის ფონზე საქართველო ერთ-ერთ მიმზიდველ ადგილს წარმოადგენს წარმოების გადმოტანისთვის, რამდენადაც ქვეყანაში დაბალი გადასახადები და ხელსაყრელი პირობებია ბიზნესის წარმოებისთვის, განაცხადა ეკონომიკისა და მდგრადი განვითარების მინისტრმა ნათია თურნავამ.

მთავრობის გეგმები: ერთ-ერთი წარმატებული პროექტი ფართოვდება>>

უცხოური ინვესტიციების პროაქტიური მოზიდვის სტრატეგია ითვალისწინებს მოლაპარაკებებს 400-ზე მეტ გლობალურ კომპანიასთან, რათა ისინი გაეცნონ საქართველოს ბიზნეს-შესაძლებლობებსა და მათ მიმზიდველი საინვესტიციო პირობები შესთავაზონ, ნათქვამია ეკონომიკის სამინისტროს განცხადებაში.

თურნავას განცხადებით, საქართველოს პლუსებში შედის ასევე სატრანსპორტო დერეფანი და მასშტაბური ინფრასტრუქტურული პროექტები, რომლებიც, მიუხედავად კორონავირუსისა, არ შეჩერებულა. მინისტრი მიიჩნევს, რომ ქვეყანამ პოტენციურ ინვესტორებს უფრო დეტალური და მათზე ორიენტირებული პირობები უნდა შესთავაზოს.

„აუცილებელია, რომ ამას ზევიდან დაემატოს კონკრეტული, ინდივიდუალური მუშაობა თითოეულ პოტენციურ კომპანიასთან, ვინც შეიძლება დივერსიფიკაციაზე (წამოვიდეს)... 400-ზე მეტია რეალურად მულტინაციონალური უცხოური კომპანია, რომელსაც პოტენციალი და ინტერესი გააჩნია, რომ მოხდეს დივერსიფიკაცია, შეიძლება დაინტერესდეს საქართველოში წარმოების გადმოტანით", - განაცხადა თურნავამ ტელეკომპანია Imedi-ს ეთერში და დასძინა, რომ ამ თემაზე მან კვირაში რამდენიმე ვიდეოშეხვედრა ჩაატარა.

უცხოური ინვესტიციების პროაქტიური მოზიდვის სტრატეგიის ფარგლებში ეკონომიკის მინისტრმა ონლაინ-შეხვედრა გამართა გლობალური კორპორაცია „ნესტლეს" ევრაზიაში რეგიონულ დირექტორ მარსიალ როლანთან და რეგიონულ მენეჯერებთან შეხვედრაში მონაწილეობდა სააგენტოს „აწარმოე საქართველოში" დირექტორი მიხეილ ხიდურელი

"ჩვენ ვაგრძელებთ საუბარს გლობალურ ბრენდებთან, მსხვილ კომპანიებთან, ვისაც, ვფიქრობთ, რომ შეიძლება წარმოების საქართველოში გადმოტანის, ან ახალი წარმოებების განვითარების სურვილი გაუჩნდეს. დღეს ჩვენ „ნესტლეს" რეგიონულ დირექტორს ვესაუბრეთ და გავაცანით საქართველოს შესაძლებლობები და უპირატესობები, რომლითაც ისინი შეძლებენ, ისარგებლონ, თუკი გარკვეულ წარმოებებს გადმოიტანენ", - განუცხადა თურნავამ ჟურნალისტებს შეხვედრის შემდეგ.

მისი თქმით, „ნესტლეს", სხვა პოტენციური ინვესტორების მსგავსად, რომლებიც პოსტპანდემიის პერიოდში საქართველოში შემოსვლასა და ბიზნესის დაწყებას გადაწყვეტენ, მაქსიმალური ხელშეწყობა და მხარდაჭერა ექნება.

მინისტრმა აღნიშნა, რომ შემდგომი მოლაპარაკებები "ნესტლესთან" თანამშრომლობის პერსპექტივებზე სამუშაო რეჟიმში გაგრძელდება. ერთ-ერთი მიმართულება, რომელიც ქართულმა მხარემ პოტენციურ ინვესტორს შესთავაზა, ესაა კვებისა და უალკოჰოლო სასმელების პროდუქციის წარმოება.

გახარია: ეკონომიკის სამინისტროს ქართული წარმოების განახლებაზე აქცენტის გაკეთება ევალება>>

„მე დარწმუნებული ვარ, რომ ეს გამოიღებს შედეგს, თუმცა მარტივი არ არის. ბევრი ქვეყანა ხედავს იმავე შესაძლებლობას. ეს შესაძლებლობები არის ლიმიტირებული დროში, ანუ ჩვენ უნდა ვიჩქაროთ. ჩვენ ყველაფერს გავაკეთებთ, რომ რამდენიმე კომპანიის ახალი პროექტის შესახებ უკვე უახლოეს მომავალში გაიგოთ", - განაცხადა თურნავამ.

აწარმოე საქართველოში

სამთავრობო პროგრამა „აწარმოე საქართველოში" 2014 წლის ზაფხულიდან ამოქმედდა. ის მიზნად ისახავს ქვეყანაში ადგილობრივი წარმოების წახალისებას. 2017 წლის აპრილში შეიქმნა იმავე სახელწოდების სააგენტო, რომელმაც გააერთიანა ყველა სახელმწიფო პროგრამა, მიმართული ბიზნეს–სექტორის ხელშეწყობისა და ეკონომიკური განვითარებისკენ.

2019 წელს დამტკიცდა სააგენტოს სტრატეგია ინვესტიციების გასაზრდელად. სააგენტოს დახმარებით, 2019 წელს ქვეყანაში გაჩნდა ხუთი ახალი საინვესტიციო პროექტი, რომელიც ქვეყანას 83 მლნ დოლარს მოუტანს პირდაპირი ინვესტიციების სახით და შეიქმნება 850 ახალი სამუშაო ადგილი, განაცხადა უფრო ადრე სააგენტოს დირექტორმა მიხეილ ხიდურელმა.

სააგენტო „აწარმოე საქართველოში" სამი ძირითადი მიმართულებით მუშაობს: ბიზნესის განვითარება, ექსპორტის მხარდაჭერა და ინვესტიციების მოზიდვა.

პროგრამის ფარგლებში სააგენტომ მხარი დაუჭირა 359 სამეწარმეო პროექტს, რომელთა შედეგად ქვეყანაში 13 ათასზე მეტი სამუშაო ადგილი გაჩნდა. მათ შორის, გასულ წელს დაფინანსდა 85 პროექტი, რაც 31%-ით მეტია 2018 წელთან შედარებით. 19%-ით გაიზარდა ინვესტიციები კერძო სექტორის მხრიდან.

თურნავა: საქართველოში საუკეთესო ბიზნეს გარემოა შექმნილი>>

გარდა ამისა, მთავრობამ მხარი დაუჭირა 136 სასტუმრო პროექტს, რამაც 3,3 ათასზე მეტი სამუშაო ადგილი შექმნა. 2019 წელს მხარდაჭერა მიიღო 59-მა სასტუმრომ, რაც 48%-ით მეტია 2018 წელთან შედარებით.

სააგენტო გეგმაშია პროგრამის წარმატებით განხორციელების გაგრძელება, მეტი ბიზნესმენის მოზიდვა და მათთვის სხვადასხვა პროექტში მონაწილეობისას თანადაფინანსების მისაღებად პირობების შემსუბუქება.

101
თემები:
საქართველოს ეკონომიკა (980)
საერთაშორისო საავტომობილო მიმოსვლის შესახებ შეთანხმებას  ხელი მოაწერეს საქართველოს ეკონომიკის მინისტრმა ნათია თურნავამ და ტაჯიკეთის ტრანსპორტის მინისტრმა აზიმ იბრაგიმმა.

საქართველოსა და ტაჯიკეთს შორის საავტომობილო მიმოსვლის შესახებ შეთანხმება გაფორმდა

32
დოკუმენტს თბილისში ხელი მოაწერეს საქართველოს ეკონომიკის მინისტრმა ნათია თურნავამ და ტაჯიკეთის ტრანსპორტის მინისტრმა აზიმ იბრაგიმმა

თბილისი, 14 აპრილი - Sputnik. საქართველომ და ტაჯიკეთმა სავაჭრო-ეკონომიკური თანამშრომლობის გაღრმავების მიზნით საერთაშორისო საავტომობილო მიმოსვლის შესახებ შეთანხმებას მოაწერეს ხელი.

როგორც საქართველოს ეკონომიკისა და მდგრადი განვითარების სამინისტროს განცხადებაშია აღნიშნული, დოკუმენტს ხელი მოაწერეს საქართველოს ეკონომიკის მინისტრმა ნათია თურნავამ და ტაჯიკეთის ტრანსპორტის მინისტრმა აზიმ იბრაგიმმა.

საქართველოს ეკონომიკის სამინისტროს ინფორმაციით, შეთანხმების გაფორმება ხელს შეუწყობს მხარეთა შორის საავტომობილო მიმოსვლისა და ურთიერთსასარგებლო ეკონომიკური თანამშრომლობის შემდგომ განვითარებას.

დოკუმენტით განსაზღვრულია სატვირთო გადაზიდვების განხორციელება ორმხრივ, სატრანზიტო ან მესამე ქვეყნებში/ქვეყნებიდან მიმოსვლაში კვოტირებული ნებართვების საფუძველზე, რომელთა რაოდენობასაც მხარეები ყოველწლიურად განსაზღვრავენ შეთანხმების საფუძველზე.

შეთანხმება ასევე ითვალისწინებს მხარეებს შორის საავტომობილო გადაყვანა/გადაზიდვასთან დაკავშირებული სამართლებრივი საკითხების დარეგულირებას, რაც ხელს შეუწყობს ორივე ქვეყნის გადამზიდველებს მათი საქმიანობის პროცესში.

ტაჯიკეთის რესპუბლიკასთან ამ დრომდე არ იყო გაფორმებული საავტომობილო მიმოსვლის შესახებ მთავრობათაშორისი შეთანხმება, თუმცა საავტომობილო მიმოსვლაში შეფერხებების თავიდან არიდების მიზნით საქართველოსა და ტაჯიკეთის რესპუბლიკის შესაბამის უწყებებს შორის იცვლებოდა საერთაშორისო საავტომობილო სატვირთო გადაზიდვის ნებართვის ბლანკები და ქვეყნებს შორის საავტომობილო მიმოსვლის სფეროში თანამშრომლობის მრავალწლიანი გამოცდილება დაგროვდა.

დღეიდან ეს თანამშრომლობა უკვე ოფიციალური შეთანხმებით გამყარდება, რაც ხელს შეუწყობს ორ ქვეყანას შორის სავაჭრო-ეკონომიკური თანამშრომლობის განვითარებას.

საქართველოსა და ტაჯიკეთს შორის დიპლომატიური ურთიერთობები 1994 წლის 4 აგვისტოდან არსებობს.

ქვეყნები თანამშრომლობენ TRACECA-ს („ახალი აბრეშუმის გზა“) პროგრამის ფარგლებში, რომელიც ევროპა-კავკასია-აზიის სატრანსპორტო დერეფნის განვითარებას ისახავს მიზნად. საქართველოს ტაჯიკეთში გააქვს კვების პროდუქტები, წამლები, ხე-ტყე, ელექტრომოწყობილობა და ავეჯი.

 

32
ფაბრიკა ანაბეჭდი

ადგილობრივი კომპანიებისთვის უნიფორმებს საქართველოში შეკერავენ

36
(განახლებულია 17:46 14.04.2021)
„ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს.

თბილისი, 14 აპრილი – Sputnik. ქართული სამკერვალო საწარმო „ანაბეჭდი“, რომელიც ქვეყანაში წამყვან ბრენდულ კომპანიებს უნიფორმებით ამარაგებს, სახელმწიფო სააგენტოს „აწარმოე საქართველოში“ ფინანსური მხარდაჭერით გაფართოვდა. 

„ანაბეჭდი“ სააგენტოს ინდუსტრიული მიმართულების კომპონენტის ფარგლებში ფინანსური მხარდაჭერით სარგებლობს. აღნიშნული მხარდაჭერით საწარმო აღიჭურვა სპეციალური და უნივერსალური საკერავი მანქანა-დანადგარებით. შედეგად – წარმოების პროცესი უფრო სწრაფი გახდა, პროდუქცია კი მეტად ხარისხიანი.

წარმოების პროცესს ეკონომიკისა და მდგრადი განვითარების მინისტრი ნათია თურნავა სააგენტოს „აწარმოე საქართველოში“ დირექტორ მიხეილ ხიდურელთან ერთად ადგილზე გაეცნო.

„კომპანიას გაფართოების ძალიან კარგი გეგმები აქვს. შეიძინეს დანადგარები პროგრამის „აწარმოე საქართველოში“ დახმარებით, უნიკალურ პროდუქციას უშვებენ და ამარაგებენ ბაზრის 90%-ს, მათ შორის, უნიფორმებით. ეს არის ადგილობრივი წარმოების განვითარების ერთ-ერთი შედეგი, რასაც ჩვენ ყოველთვის შევუწყობთ ხელს“, – აღნიშნა ნათია თურნავამ.

„ანაბეჭდი“ წლის განმავლობაში 300 ათასზე მეტ უნიფორმას კერავს, რომლის რეალიზაციასაც ადგილობრივ ბაზარზე ახდენს. კომპანია უნიფორმებს ქმნის ისეთი ბრენდებისთვის, როგორებიცაა Agrohub, Goodwill, Elit Electronics, Carrefour, Domino, East Point და ა.შ. 

ფაბრიკაში ამ ეტაპზე 100-მდე ადამიანი მუშაობს. კომპანია ძალისხმევას არ იშურებს დასაქმებულთა პროფესიული განვითარებისთვის, ამიტომაც ისინი პერიოდულად გადამზადების კურსს გადიან.

აღნიშნული პროექტის მთლიანი საინვესტიციო მოცულობა 3,7 მლნ ლარზე მეტს შეადგენს.

კომპანიის გეგმებშია ქსოვილების წარმოების დაწყება, რამდენადაც ამ ეტაპზე იგი უცხოეთიდან შემოაქვთ. საკუთარი ქსოვილების წარმოება კომპანიას თანამშრომელთა შტატის გაზრდისა და პროდუქციის ხარისხის ამაღლების შესაძლებლობას მისცემს.

„აწარმოე საქართველოში“ – საქართველოს ხელისუფლების ერთ-ერთი მთავარი პროექტია, რომელიც მიზნად ისახავს ქვეყანაში ადგილობრივი წარმოების განვითარებას. სააგენტო აერთიანებს ყველა სახელმწიფო პროგრამას, მიმართულს ბიზნეს-სექტორის ხელშეწყობისა და ქვეყნის ეკონომიკური განვითარებისკენ.

პროგრამა მიმართულია მიკრო და მცირე ბიზნესის განვითარების, თანამედროვე სამეწარმეო კულტურის დამკვიდრების და ახალი სამუშაო ადგილების შექმნისკენ. პროგრამა ასევე ხელს შეუწყობს კორონავირუსის პანდემიით გამოწვეული ნეგატიური ეკონომიკური შედეგების შემცირებას.

საუბარია სესხების სუბსიდირებასა და უზრუნველყოფაზე, რაც მოიცავს 200-ზე მეტი სახის საქმიანობას და მიკროგრანტებს, რომლებიც ეხება 300-ზე მეტი სახის საქმიანობას.

პროგრამის ფარგლებში უკვე დაფინანსებულია 6.212 პროექტი, რომელთა ინვესტიციის საერთო მოცულობამ 61 მლნ ლარზე მეტი შეადგინა.

36
თემები:
სამთავრობო პროგრამა „აწარმოე საქართველოში“
სვეტიცხოველი მცხეთაში

საეკლესიო კალენდარი: 15 აპრილი

0
(განახლებულია 21:52 14.04.2021)
საქართველოს მართლმადიდებელი ეკლესია15 აპრილს წმინდა გიორგი მაწყვერელის, ღირსი ტიტე საკვირველმოქმედის, მოწამეთა: ამფიანესი და ედესის, ასევე მოწამე პოლიკარპეს ხსენების დღეს აღნიშნავს.  

„Sputnik საქართველო" მოგითხრობთ ვინ იყვნენ ეს წმინდანები და რატომ არიან მოხსენიებულნი საეკლესიო კალენდარში.

გიორგი მაწყვერელი

საეკლესიო კალენდარში 15 აპრილი წმიდა გიორგი მაწყვერელის (IX-X) ხსენების დღეა.

გიორგი მაწყვერელი  აწყურის ეპისკოპოსი იყო. ცნობილ მწერალს და საეკლესიო მოღვწეს კარგად იცნობდა მისი თანამედროვე საქართველო, თუმც მის ლიტერატურულ მემკვიდრეობას ჩვენამდე არ მოუღწევია. 

ცნობები წმიდა გიორგი მაწყვერელის შესახებ შემოგვინახა გიორგი მერჩულისა და ბასილი ზარზმელის ნაწარმოებებმა.

გიორგი მერჩულე: „გრიგოლ ხანძთელის ცხოვრებაში“ წერს: „ვჰგონებდ ცხოვრებასა ამას დაწერად ბრძენთაგან და სრულთა მამათა, რომელნიცა იყვნეს ჟამთა ჩუენთა“, შემდგომ ჩამოთვლის ცნობილ საეკლესიო მწერალთა სახელებს, რომელთაგანაც თანამედროვენი მოელოდნენ ღირსი გრიგოლ ხანძთელის ცხოვრების აღწერას და მათ შორის ასახელებს ღირს გიორგი მაწყვერელს. ბასილი ზარზმელის თქმით, გიორგი მაწყვერელი, სამცხის საეკლესიო ცხოვრების მეთაური, „აღმოსცენდა ჴევისაგან შუარტყლისა, მშობელთაგან წარჩინებულთა და ღმრთისმოშიშთა; ხოლო აღიზარდა იგი განთქმულსა მას უდაბნოსა ოპიზას“.

უმთავრესი ცნობები ღირსი სერაპიონ ზარზმელის  შესახებ ბასილისთვის მიუწოდებია გიორგი მაწყვერელს

ღირსი გიორგი მაწყვერელი მეტად დაახლოებული ყოფილა წმიდა სერაპიონ ზარზმელთან დასწრებია მის დასაფლავებას და დიდად შეუწყვია ხელი მისი ცხოვრების დაწერისთვისაც.

ღირსმა გიორგიმ აწყურის კათედრა დაიკავა სამცხის დიდი ფეოდალის, გიორგი ჩორჩანელის გარდაცვალების მეოთხე წელს, როდესაც ჩორჩანელთა გვარში და სახლეულობაში, და საერთოდ, მთელ სამცხეში დიდი მღელვარება, მტრობა და ძმათაკვლა იყო გაჩაღებული მისი მემკვიდრეობის გამო. ამ განუკითხაობის ჟამს ღირსმა გიორგი მაწყვერელმა „ხელთიდვა განგებაჲ სამცხისაჲ“ და „დააწყნარა ყოველი საბრძანებელი თჳსი“, ვითარცა წეს იყო და დაიპყრა ყოველი მამული და ეკლესიანი პირველთა მათ მეშფოთეთანი“. 

ღირსი გიორგი მაწყვერელი მშვიდობით აღესრულა X ს-ის პირველ მეოთხედში.

ტიტე საკვირველთმოქმედი

საეკლესიო კალენდარში 15 აპრილი ღირსი ტიტე საკვირველთმოქმედის (IX) ხსენების დღეა.

ტიტე საკვირველთმოქმედი სიყრმიდან ბერული ცხოვრებით მოღვაწეობდა სტუდიონის მონასტერში, კონსტანტინეპოლთან ახლოს. მარხვით, წმიდა ცხოვრებით და სიმდაბლით ღირსმა ტიტემ ძმათა შორის საყოველთაო სიყვარული მოიპოვა და, მათივე თხოვნით, ხელდასხმულ იქნა პრესვიტერად, ხატმებრძოლთა ერესის მძვინვარების დროს ღირსი ტიტე მტკიცედ იცავდა წმიდა ხატთა თაყვანისცემის მართლმადიდებლურ წესს. სათნო ცხოვრებისათვის უფლისაგან სასწაულთქმედების ნიჭი მიიღო. მიიცვალა ღრმა მოხუცებულობაში. 

მოწამეები მფიანე და ედესი

საეკლესიო კალენდარში 15 აპრილი მოწამეების ამფიანე და ედესის (+306) ხსენების დღეა.

ამფიანე და ედესი  ძმები იყვნენ. ცხოვრობდნენ პატრაში (ლუკიის პროვინცია), ქალაქის კერპთაყვანისმცემელი მმართველის ოჯახში. ისინი წარმართული სიბრძნის დასაუფლებლად ქალაქ ბირითში გაგზავნეს. აქ ძმები ქრისტეს სჯულზე მოექცნენ და მისი მხურვალე მიმდევრები გახდნენ, შემდეგ წარმართი მშობლები დატოვეს და წავიდნენ კესარიაში, სადაც ნახეს მოძღვარი, პრესვიტერი პამფიოლე და მისი ხელმძღვანელობით დაიწყეს მოღვაწეობა.
იმ დროს, იმპერატორ მაქსიმიანეს (+305-313) ბრძანებით, კესარიის ყველა მცხოვრებს მსხვერპლი უნდა შეეწირა კერპებისათვის. ბევრი ქრისტიანი გაექცა კერპთაყვანისცემის საცდურს და მივარდნილ ადგილებში გაიხიზნა. გაიხიზნენ წმიდა ამფიანე და ედესიც, მაგრამ ერთხელ, როდესაც ქალაქის მმართველი ტაძარში მსხვერპლშეწირვაზე შევიდა, ამფიანე მას თამამად მიეახლა და ურჩია, ცრუმსახურებისთვის თავი დაენებებინა და ქრისტეს სჯულზე მოქცეულიყო. მმართველის ბრძანებით ამფიანე შეიპყრეს, სასტიკად გვემეს და საკანში ჩააგდეს. ორი დღე ტანჯავდნენ ჭაბუკ მოწამეს, რკინის ჯოხით ცემდნენ, ზეთში ამოვლებული სელით უწვავდნენ სხეულს, ბოლოს კი ყელზე ქვა დაკიდეს და ზღვაში გადააგდეს. მოწამის გვამი ტალღებმა ნაპირზე გამორიყა. ქრისტიანებმა ის პატივით მიაბარეს მიწას. 


ედესიც სასტიკად აწამეს, შემდეგ კი სპილენძის მაღაროებში გაგზავნეს სამუშაოდ. რამდენიმე წლის შემდეგ გაანთავისუფლეს და ალექსანდრიაში გადაასახლეს. აქ მან ქალაქის მმართველი, იეროკლე ამხილა ქრისტიანთა მიმართ უზომო სიმკაცრეში, რისთვისაც სასტიკად აწამეს და ძმის მსგავსად ზღვაში დაახრჩვეს.

მოწამე პოლიკარპე 

საეკლესიო კალენდარში 15 აპრილი წმიდა მოწამე პოლიკარპეს (IV) ხსენების დღეა.

პოლიკარპე  იმპერატორ მაქსიმიანეს (+305-313) მხილებისათვის ეწამა, რომელმაც უდანაშაულო ქრისტიანთა სისხლი დაღვარა ალექსანდრიაში.

მან საჯაროდ აღიარა ქრისტე და ნებაყოფლობით წავიდა სატანჯველად. ხანგრძლივი წამების შემდეგ წმიდა მოწამეს თავი მოჰკვეთეს.

მასალა მომზადებულია ღია წყაროებზე დაყრდნობით.

0
თემები:
საეკლესიო კალენდარი