თბილისი

საქართველოში სოციალური დახმარებისა და კომპენსაციების გაცემა მაისის ბოლოდან დაიწყება

127
(განახლებულია 09:23 21.05.2020)
კორონავირუსის შედეგად დაზარალებულ საქართველოს მოქალაქეებს ხელისუფლება ანტიკრიზისული გეგმის ფარგლებში უწევს დახმარებას.

თბილისი, 21 მაისი — Sputnik. კორონავირუსის პანდემიის შედეგად უმუშევრად დარჩენილთა სოციალური დახმარებისა და  კომპენსაციის გაცემა მაისის ბოლოს დაიწყება, ნათქვამია საქართველოს მთავრობის Facebook–გვერდზე. 

კორონავირუსის შედეგად დაზარალებულ საქართველოს მოქალაქეებს ხელისუფლება ანტიკრიზისული გეგმის ფარგლებში უწევს დახმარებას. იგი სხვადასხვა კატეგორიის მოქალაქეებისთვის კომპენსაციის გადახდას ითვალისწინებს.

 „მთავრობის ანტიკრიზისული გეგმით გათვალისწინებული სოციალური დახმარებების გაცემა მაისის ბოლოდან, ეტაპობრივად დაიწყება“, – ნათქვამია მთავრობის განცხადებაში. 

ვინ მიიღებს დახმარებას

სახელმწიფოსგან ნახევარი წლის განმავლობაში 200 ლარის ოდენობით დახმარებას მიიღებენ დეკრეტულ შვებულებაში მყოფი და კორონავირუსის პანდემიის გამო სამსახურდაკარგული  და კონტრაქტით დასაქმებული პირები. ამ დროისთვის სულ დარეგისტრირებულია 78 ათასი ადამიანი, რომელთათვისაც გათვალისწინებულია აღნიშნული დახმარება.

ერთჯერად 300–ლარიან დახმარებას მიიღებენ ის თვითდასაქმებულები, რომლებიც შეძლებენ ცნობის წარდგენას, რომ კორონავირუსის პერიოდში შემოსავლის გარეშე დარჩნენ. დღეისთვის აღნიშნული დახმარების მსურველი დაახლოებით 29,6 ადამიანია დარეგისტრირებული.

გარდა ამისა, დახმარებას მიიღებენ სოციალურად დაუცველი ოჯახების მონაცემთა ერთიან ბაზაში რეგისტრირებული ოჯახები, რომელთა სარეიტინგო ქულა მეტია 65 ათასზე და ნაკლებია 100 ათასზე. აღნიშნულ დახმარებას ნახევარი წლის განმავლობაში 190 ათასი ადამიანი მიიღებს.

ექვსი თვის განმავლობაში დახმარების ოდენობა დამოკიდებული იქნება ოჯახის წევრების რაოდენობაზე:

ოჯახის წევრების რაოდენობა დახმარების მოცულობა
1 70 ლარი
2 90 ლარი
3 105 ლარი
4 140 ლარი
5 175 ლარი
6 210 ლარი
7 245 ლარი
8 280ლარი
9 315 ლარი
10 385 ლარი

რაც შეეხება მონაცემთა ბაზაში რეგისტრირებულ 100 ათას სარეიტინგო ქულამდე მქონე ოჯახებს, რომელთაც ჰყავთ სამი ან სამზე მეტი შვილი, 100 ლარის ოდენობის კომპენსაციას  ექვსი თვის განმავლობაში  მიიღებენ – სულ 130 ათასი ოჯახი.

დახმარებას მიიღებენ ასევე შეზღუდული შესაძლებლობის მქონე (შშმ) პირები, რომლებიც ნახევარი წლის განმავლობაში 100 ლარის ოდენობით შემწეობას მიიღებენ – დაახლოებით 40 ათასი ადამიანი.

127
თემები:
სოციალური სფერო საქართველოში (215)
პრემიერი გიორგი გახარია

საქართველოში ბიზნესისთვის მიკროგრანტების მოცულობა გაიზარდა

31
(განახლებულია 09:22 18.09.2020)
ბიზნესის სფერო პანდემიის ფონზე ეკონომიკური კრიზისის გამო ყველაზე მეტად დაზარალდა, ამიტომ მთავრობის პრიორიტეტი ამ სექტორის დახმარებაა

თბილისი, 18 სექტემბერი – Sputnik. საქართველოში 5 ოქტომბრიდან ბიზნესისთვის მიკროგრანტების გაზრდილი მოცულობის გაცემა დაიწყება, განაცხადა საქართველოს პრემიერ–მინისტრმა გიორგი გახარიამ.

მიკროგრანტების მიღებას ბიზნესის წარმომადგენლები პროგრამის „აწარმოე საქართველოში“ ფარგლებში შეძლებენ. მიკროგრანტის მაქსიმალური მოცულობაა 20 ათასი ლარი.

„პროგრამის ბიუჯეტი გავზარდეთ 40 მილიონამდე, ასევე გავზარდეთ ერთჯერადი დაფინანსების მოცულობაც, იყო 20 000 ლარი და დღეს გახდება 30 000 ლარი. ეს არის გრანტის სახით ჩვენი მოქალაქეების დახმარება, რომლებსაც შეუძლიათ გადადგან პირველი ნაბიჯი, დაიწყონ საკუთარი ბიზნესი, საკუთარი საქმე“, – განაცხადა პრემიერმა.

მისი თქმით, მიკროგრანტის პროგრამით ამ დროისთვის უკვე ისარგებლა 9 ათასმა ადამიანმა.

„აწარმოე საქართველოში“ – საქართველოს მთავრობის ერთ-ერთი წარმატებული პროექტია, რომელიც მიზნად ისახავს ქვეყანაში ადგილობრივი წარმოების წახალისებას. სააგენტო აერთიანებს ყველა სახელმწიფო პროგრამას, რომელიც ბიზნეს-სექტორისა და ქვეყნის ეკონომიკური განვითარების ხელშეწყობისკენაა მიმართული. კორონავირუსის პანდემიით გამოწვეული კრიზისის პირობებში მეწარმეთა დახმარების მიზნით გადაწყდა პროგრამის გაფართოება.

საუბარია კრედიტების სუბსიდირებაზე, რომლებიც 200-ზე მეტი სახის საქმიანობას მოიცავს, და მიკროგრანტებზე, რომლებიც 300-ზე მეტი სახის საქმიანობას ეხება.

31
თემები:
საქართველოს ეკონომიკა
თბილისი

საქართველოს მთავრობა COVID-19–ის პერიოდში ბიზნესის დახმარებას გააგრძელებს

53
(განახლებულია 09:47 18.09.2020)
ღონისძიებების ორგანიზატორები ქვეყანაში მოქმედი შეზღუდვების გამო ერთ–ერთი ყველაზე დაუცველი ჯგუფები აღმოჩნდნენ

თბილისი, 18 სექტემბერი – Sputnik. საქართველოს მთავრობამ ღონისძიებების ორგანიზატორი კომპანიების წარმომადგენლებთან კორონავირუსის პანდემიის პერიოდში დარგის შემდგომი დახმარებისთვის მოქმედებების გეგმა განიხილა, ნათქვამია ეკონომიკისა და მდგრადი განვითარების სამინისტროს განცხადებაში.

პანდემია და ეკონომიკა: OECD-მ დათვალა, რამდენს იზარალებს მსოფლიო>>

COVID-19–ის პანდემიის ფონზე ეკონომიკური კრიზისის გამო ბიზნესის სფერო ყველაზე მეტად დაზარალდა. საქართველოში ამჟამად ბიზნესის დახმარების რამდენიმე პროგრამა მოქმედებს: სახელმწიფოს, როგორც დაკრედიტების განარტორის მონაწილეობის პროგრამა, იაფი კრედიტები მცირე ბიზნესისთვის, ასევე სახელმწიფოს თანამონაწილეობა ბიზნესის გაფართოებისთვის საშუალებების შეძენაში.

„საქართველოს მთავრობა ახორციელებს თანმიმდევრულ ანტიკრიზისულ პოლიტიკას, რომლის ფარგლებშიც ბოლო პერიოდის განმავლობაში განხორციელდა და მიმდინარეობს არაერთი სახელმწიფო პროგრამა, რომლებიც გამიზნულია ბიზნესის სექტორის მხარდაჭერასა და დახმარებაზე. ამ ეტაპზე შეხვედრა შედგა ღონისძიებების ორგანიზატორ კომპანიებთან, რომლებიც ასევე წარმოადგენენ ერთ-ერთ მოწყვლად ჯგუფს იმ რეგულაციებიდან გამომდინარე, რაც დღეს ქვეყანაში მოქმედებს“, – განაცხადა ეკონომიკის მინისტრის მოადგილე ირაკლი ნადარეიშვილმა.

ღონისძიებების ორგანიზატორ კომპანიებთან შეხვედრა ნადარეიშვილმა გამართა. შეხვედრაზე კორონავირუსის პანდემიის პირობებში დარგში არსებული ვითარება და პრობლემები განიხილეს.

„ვისაუბრეთ იმ პრობლემატიკაზე, კონკრეტულ საკითხებზე, რომლებიც ამ ინდუსტრიას განსაკუთრებით აწუხებს – ეს არის როგორც ფინანსური, ასევე რეგულაციური საკითხები. შევთანხმდით გარკვეულ სამოქმედო გეგმაზე იმისათვის, რომ ეს პროცესი გადავიყვანოთ სამუშაო გარემოში და, საბოლოოდ, შევჯერდეთ იმ ფორმაზე, იმ პროგრამის დიზაინზე, რითაც შეიძლება სახელმწიფო დამატებით ამ ინდუსტრიას, ამ ბიზნესს მხარში დაუდგეს „კოვიდის“ პერიოდში“, – განაცხადა ნადარეიშვილმა.

შეხვედრას ეკონომიკის სამინისტროში ესწრებოდნენ ოცამდე სხვადასხვა კომპანიის წარმომადგენლები, ასევე ბიზნესომბუდსმენის მოადგილე ნინო კვეტენაძე, სააგენტოს „აწარმოე საქართველოში“ ხელმძღვანელი მიხეილ ხიდურელი.

ბიზნესი პრიორიტეტშია

„აწარმოე საქართველოში“ – საქართველოს მთავრობის ერთ-ერთი წარმატებული პროექტია, რომელიც მიზნად ისახავს ქვეყანაში ადგილობრივი წარმოების წახალისებას. სააგენტო აერთიანებს ყველა სახელმწიფო პროგრამას, რომელიც ბიზნეს-სექტორისა და ქვეყნის ეკონომიკური განვითარების ხელშეწყობისკენაა მიმართული. კორონავირუსის პანდემიით გამოწვეული კრიზისის პირობებში მეწარმეთა დახმარების მიზნით გადაწყდა პროგრამის გაფართოება.

საუბარია კრედიტების სუბსიდირებაზე, რომლებიც 200-ზე მეტი სახის საქმიანობას მოიცავს, და მიკროგრანტებზე, რომლებიც 300-ზე მეტი სახის საქმიანობას ეხება.

პროგრამაში მონაწილეობისთვის დაწესებული საკრედიტო ლიმიტი შემცირდა 50 ათას ლარამდე, მაქსიმალური მოცულობა კი გაიზარდა 10 მილიონ ლარამდე.

ადგილობრივი, არასაერთაშორისო ბრენდების შემთხვევაში კრედიტის მაქსიმალური მოცულობა 4 მლნ ლარს შეადგენს, საერთაშორისო ბრენდებისა და სხვადასხვა ტურისტული მომსახურების შემთხვევაში – 10 მლნ ლარს.

სახელმწიფოს მონაწილეობის დრო 24-დან 36 თვემდე გაიზარდა. მოიმატა ასევე სახელმწიფოს თანამონაწილეობის პროცენტმა. მაგალითად, 13%-იანი ვალის შემთხვევაში 1,5%-ს სახელმწიფო გაისტუმრებს, რაც კომპანიას გამოუთავისუფლებს სახსრებს ბიზნესის წარმოებისთვის.

53
თემები:
საქართველოს ეკონომიკა
ვიკა ბუკია

„ორივე ფილტვის ანთება გვაქვს... ვერაფრით ვმალავ შიშს“- ჟურნალისტი განცხადებას ავრცელებს

0
(განახლებულია 13:41 18.09.2020)
ჟურნალისტ ვიკა ბუკიასა და მისი მეუღლეს, დეპუტატ ლევან გოგიჩაიშვილს კორონავირუსის დიაგნოზი 16 სექტემბერს დაუსვეს

თბილისი, 18 სექტემბერი — Sputnik. ჟურნალისტი ვიკა ბუკია მისი და მეუღლის, პოლიტიკოს ლევან გოგიჩაიშვილის ჯანმრთელობის მდგომარეობის შესახებ ახალ ინფორმაციას ავრცელებს.

როგორც ჟურნალისტი წერს, მასაც და მის მეუღლესაც ორივე ფილტვზე ანთება, ხანდახან 39 გრადუსი ტემპერატურა აქვთ.

„მაფრთხილებდნენ, რომ ეს მოსალოდნელი იყო, მიუხედავად ამისა, ძალიან გამიჭირდა ამ რეალობის მიღება. პანიკას მაინც არ ავყვები. ვერაფრით ვერ ვმალავ შიშს. 39 რომ ვუყურებ თერმომეტრზე. და თან რატომღაც დარწმუნებული ვიყავი ამსიგრძე გოგოს ვერაფრით ვერ დამაგდებდა ეს ვირუსი“, - წერს ჟურნალისტი.

შეგახსენებთ, ჟურნალისტ ვიკა ბუკიასა და მისი მეუღლეს, დეპუტატ ლევან გოგიჩაიშვილს კორონავირუსის დიაგნოზი 16 სექტემბერს დაუსვეს.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 182-ით გაიზარდა და 3119-ს მიაღწია, გამოჯანმრთელებულთა რაოდენობას 13 ადამიანი შეემატა, აღნიშნულია საქართველოს მთავრობის სპეციალურ ვებ-გვერდზე stopcov.ge.

ამ დროისათვის სულ გამოჯანმრთელდა 1435 ადამიანი. გარდაიცვალა – 19, კარანტინის რეჟიმში იმყოფება 6633, ხოლო სტაციონარებში ექიმების დაკვირვების ქვეშ 836 პაციენტია.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში