ვალუტის გადამცვლელი პუნქტი

ვალუტის გადამცვლელი პუნქტები საგანგებო მდგომარეობის დასრულების შემდეგ გაიხსნება

1635
(განახლებულია 15:03 19.05.2020)
მოქალაქეებს ვალუტის გადაცვლა ბანკებსა და მიკროსაფინანსო ორგანიზაციებში შეუძლიათ, რომელთა საქმიანობაც საგანგებო მდგომარეობის პერიოდში ნებადართულია.

თბილისი, 19 მაისი — Sputnik. საქართველოში ვალუტის გადამცვლელი პუნქტები საგანგებო მდგომარეობის გაუქმების შემდეგ განაახლებენ მუშაობას, განაცხადა პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ რომან კაკულიამ ჟურნალისტებთან. 

კორონავირუსის გავრცელების პრევენციის მიზნით საქართველოში 21 მარტიდან საგანგებო მდგომარეობა გამოცხადდა. 10 დღის შემდეგ ხელისუფლებამ ზომები გაამკაცრა. შეზღუდვები შეეხო ვალუტის გადამცვლელ პუნქტებსაც, რომლებმაც მთელი ქვეყნის მასშტაბით მუშაობა 31 მარტიდან შეაჩერეს. მოქალაქეებს ვალუტის გადაცვლა ბანკებსა და მიკროსაფინანსო ორგანიზაციებში შეუძლიათ, რომელთა საქმიანობაც საგანგებო მდგომარეობის პერიოდში ნებადართულია.

„ზუსტი დღე შეიძლება ვერ დაგისახელოთ, მაგრამ ცხადია, ეს ბიზნესიც და ეს შესაძლებლობაც დაბრუნდება ჩვეულ რეჟიმში, როგორც იყო ადრე. ახლა კონკრეტულ დღეს ვერ დაგისახელებთ, მაგრამ როგორც კი საგანგებო მდგომარეობა დასრულდება, ვფიქრობ, რომ ძალიან მალე“, - აღნიშნა რომან კაკულიამ.

ქვეყანაში საგანგებო მდგომარეობა 22 მაისამდე გახანგრძლივდა. გარდა ამისა, ქვეყანაში მოქმედებს კომენდანტის საათი 21:00 საათიდან 06:00 საათამდე.

საქართველოს მთავრობამ შეზღუდვების მოხსნის ექვსეტაპიანი გეგმა შეიმუშავა, რომლის განხორციელებაც ქვეყანაში ეპიდსიტუაციაზეა დამოკიდებული.

ანტიკრიზისული გეგმის თანახმად, შეზღუდვები სრულად 6 ივლისისთვის მოიხსნება და თითოეული ეტაპი ორი კვირის შუალედით განხორციელდება.

დახურულ სივრცეში სამედიცინო პირბადის ტარება აუცილებელი გახდა – აღნიშნული მოთხოვნის შესრულებაზე პასუხისმგებელი იურიდიული პირები არიან.

ადრე პრემიერ-მინისტრმა გიორგი გახარიამ განაცხადა, რომ საგანგებო მდგომარეობა არ გაგრძელდება, თუმცა, რიგი შეზღუდვები კვლავ იმოქმედებს.

1635
თემები:
საქართველოს ეკონომიკა (838)
ელიავას ბაზრობა

საქართველოში სამრეწველო პროდუქციაზე ფასები იზრდება

25
(განახლებულია 08:36 27.11.2020)
ერთ წელიწადში ფასები ძირითადად გადამამუშავებელი და სამთო მრეწველობის, ასევე კვების პროდუქტებზე გაიზარდა.

თბილისი, 27 ნოემბერი – Sputnik.  2020 წლის ოქტომბერში სამრეწველო პროდუქციის მწარმოებელთა ფასები ინდექსი 2019 წლის ანალოგიურ პერიოდთან შედარებით, 8%-ით გაიზარდა, ნათქვამია საქართველოს სტატისტიკის ეროვნული სამსახურის „საქსტატის“ მასალებში. 

ინდექსის ფორმირებაზე ძირითადად გავლენა იქონია ფასების ზრდამ გადამამუშავებელ მრეწველობაში – 7,4%-ით, მათ შორის, კვების პროდუქტებზე – 10,6%-ით და სამთო-მომპოვებელ მრეწველობაში – 20,4%-ით.

სექტემბერთან შედარებით, ოქტომბერში სამრეწველო პროდუქციაზე ფასები 1,7%-ით გაიზარდა.

ადგილობრივი წარმოება

ოქტომბერში, 2019 წლის ანალოგიურ პერიოდთან შედარებით, საქართველოში წარმოებულ პროდუქციაზე ფასები 6,5%-ით გაიზარდა.

ყველაზე მეტად ფასები გაიზარდა გადამამუშავებელ მრეწველობაში – 7,9%-ით, მათ შორის კვების პროდუქტებზე – 7,7%-ით.

ექსპორტი და იმპორტი

ექსპორტზე გატანილი სამრეწველო პროდუქციის ფასების ინდექსი ოქტომბერში, გასული წლის ანალოგიურ პერიოდთან შედარებით, 11,4%-ით გაიზარდა. 

სამთო-მომპოვებელი მრეწველობის პროდუქციაზე ფასები 36,6%-ით გაიზარდა. გადამამუშავებელი მრეწველობის ექსპორტირებულ პროდუქციაზე ფასები გაიზარდა 7,7%-ით, მათ შორის კვების პროდუქტებზე – 18,7%-ით, ლითონის ნაკეთობაზე – 6,4%-ით.

საქართველოში იმპორტირებულ სამრეწველო პროდუქციაზე ფასები საანგარიშო პერიოდში 3,3%-ით გაიზარდა. ამასთან გადამამუშავებელი მრეწველობის იმპორტირებული პროდუქცია 4,4%-ით გაძვირდა.

სამომხმარებლო ფასები

ოქტომბერში ინფლაციის წლიურმა დონემ 3,8% შეადგინა (მიზნობრივი მაჩვენებელი 3%-ს შეადგენს). სურსათზე ფასები 5,5%-ით გაიზარდა. ექსპერტები ფასების ზრდას კორონავირუსის პანდემიით გამოწვეულ კრიზისს უკავშირებენ.

2019 წლის სექტემბრიდან ეროვნულმა ბანკმა მონეტარული პოლიტიკა გაამკაცრა გაცვლითი კურსის დაცემის შემდეგ ინფლაციაზე ზეწოლის განეიტრალების მიზნით. რეფინანსირების განაკვეთი ამ პერიოდში 6,5%-დან 9%-მდე გაიზარდა. თუმცა, კორონავირუსის პანდემიისგან გამოწვეული კრიზისის დაწყების შემდეგ მონეტარული პოლიტიკის განაკვეთი ეტაპობრივად 8%-მდე შემცირდა.

25
თემები:
საქართველოს ეკონომიკა (838)
კალაუბანი

ფინანსთა მინისტრი: შეზღუდვები ქვეყნის ეკონომიკურ მაჩვენებლებზე აისახება

16
(განახლებულია 10:02 27.11.2020)
2020 წელს ეკონომიკური ზრდის მაჩვენებლის გაუარესება 2021 წლის მაჩვენებელზე აისახება, მიაჩნია ფინანსთა მინისტრს

თბილისი, 27 ნოემბერი – Sputnik. 28 ნოემბრიდან შემოღებული შეზღუდვები საქართველოს ეკონომიკური ზრდის პროგნოზზე აისახება, განაცხადა საქართველოს ფინანსთა მინისტრმა ივანე მაჭავარიანმა ბრიფინგზე.

ფინანსთა სამინისტროს პროგნოზის თანახმად, 2020 წელს 5%–იანი, 2021 წელს კი 4,3%–იანი ეკონომიკური ზრდა უნდა ყოფილიყო. მთავრობის გადაწყვეტილებით, ინფიცირების გავრცელების პრევენციის მიზნით  28 ნოემბრიდან 31 იანვრის პერიოდში ქვეყანაში წესდება ახალი შეზღუდვები, მათ შორის, ეკონომიკურ საქმიანობაზე საცალო ვაჭრობის კუთხით. 

 „ჩვენ ვხედავთ, რომ უკვე ნოემბერში შეიმჩნევა შემოსავლის კლება, ჯერ კი შეზღუდვები არ ამოქმედებულა. როდესაც ჩვენ ვსაუბრობდით ეკონომიკის 5%–მდე ვარდნაზე, ეს ოპტიმისტური პერიოდიდან გამომდინარე იყო გამოთვლილი, ამიტომაც ნოემბერი და დეკემბერი მასზე გავლენას იქონიებენ“, – განაცხადა მაჭავარიანმა ჟურნალისტებთან.

მისი თქმით, 2020 წელში ეკონომიკური ზრდის მაჩვენებლის გაუარესება 2021 წლის მაჩვენებელზე აისახება.

 „2020 წლის პროგნოზი 2021 წლის ეკონომიკური ზრდის მაჩვენებლის გადახედვის საფუძველს იძლევა, რამდენადაც ერთის მხრივ, გაუარესდება სასტარტო პირობები, მათ შორის იანვარსა და თებერვალში, როდესაც შეზღუდვების ნაწილი მოიხსნება. ეკონომიკური აქტიობა ასე მარტივად არ აღდგება, ეს ის ფაქტორია, რომელიც კიდევ უფრო დაამძიმებს წლიურ 4,3%–იან პროგნოზს“, განაცხადა მაჭავარიანმა.

ამავე დროს, მან აღნიშნა, რომ არის დამაიმედებელი ფაქტორი ვაქცინის სახით, რომლის მიღების შემდეგ ეკონომიკა უფრო სწრაფ აღდგენას დაიწყებს.

 „ახალი პროგნოზი დასათვლელია  იმის მიხედვით, რა სურათს მოგვცემს შეზღუდვები. მე მაინც მგონია, რომ  2021 წელს 4%-იანი ზრდის შენარჩუნება  შესაძლებელი იქნება, მაგრამ ეს დასაზუსტებელია“, - განაცხადა მაჭავარიანმა.

16
თემები:
საქართველოს ეკონომიკა (838)
გოგონა გაკვეთილზე

სამი მთავარი პრობლემა, რომლებსაც განათლება გადაააწყდა პანდემიის დროს

0
(განახლებულია 12:41 27.11.2020)
ვინ ადაპტირდება ონლაინ–სწავლებაზე ყველაზე მარტივად, შეიძლება თუ არა ტრადიციული სწავლება ვირტუალური კურსებით შეიცვალოს და როგორ შეიძლება „დავამეგობროთ“ ასაკოვანი პედაგოგები სოციალურ ქსელებთან?

დიანა კურმანოვა

ამ კითხვებზე პასუხების გაცემას „როსსოტრუდნიჩესტვოს“ ფორუმზე შეეცადნენ.

კორონავირუსი, რა თქმა უნდა, ნეგატიური მოვლენაა. თუმცა განათლების სფეროსთვის აქაც შეიძლება მოიძებნოს ახალი შესაძლებლობები. ამგვარ დასკვნამდე მივიდნენ „როსსოტრუდნიჩესტვოს“ ფორუმის სპიკერები 2019-2020 წლების პროგრამებზე მსჯელობისას, რომელიც ფედერალური პროექტის, „კადრები ციფრული ეკონომიკისთვის“ ფარგლებში გაიმართა 26 ნოემბერს Россия сегодня–ს მულტიმედიურ პრესცენტრში.

„როსსოტრუდნიჩესტვომ“ 40 საგანმა ნათლებლო პროექტი ჩაუშვა სარეალიზაციოდ, რომლებითაც 92 ქვეყნის 100 ათასზე მეტმა მცხოვრებმა ისარგებლა, — აღნიშნა სააგენტოს ხელმძღვანელის მოადგილე პაველ შევცოვმა.

ყველა ამ პროექტს აერთიანებდა საერთო მიზანი: დახმარებოდნენ მოსწავლეებს, სტუდენტებსა და პედაგოგებს ახალ ტექნოლოგიებში გარკვევაში, ვინაიდან თანამედროვე ცხოვრება „ციფრულში“ გადადის: ონლაინ სულ უფრო მეტი საკითხის გადაჭრა ხდება შესაძლებელი. 2019 წლისგან განსხვავებით, „როსსოტრუდნიჩესტვო“ 2020 წელს, პანდემიის გამო, თითქმის ყველა პროექტს ონლაინ რეჟიმში ახორციელებდა. ერთი მხრივ, პროგრამას ეს წაადგა, მეორე მხრივ პანდემიამ გამოავლინა პრობლემები, რომლებსაც ინტერნეტში მოსწავლეებიც აწყდებიან და პედაგოგებიც.

ციფრული უთანასწორობა სოციალურ ნაპრალს ნიშნავს

რუსეთის საზოგადოება „ზნანიეს“ თავმჯდომარე ლიუბოვ დუხანინას თქმით, პანდემია აღრმავებს ნაპრალს ტექნიკურად მომზადებულ ადამიანებსა და იმ მოქალაქეებს შორის, რომლებსაც ან შესაბამისი აღჭურვილობა არ აქვთ ონლაინზე გადასასვლელად, ან მედიაგანათლების სფეროში ცოდნა.

„ამიტომაც მნიშვნელოვანია არა მარტო IT–სპეციალისტებზე ორიენტირებული პროექტები, არამედ მასობრივი პროექტები“, — განაცხადა მან.

მარტო 2019 წელს „როსსოტრუდნიჩესტვომ“ 250 მასობრივი ღონისძიება გამართა: ვირტუალური რეალობის დღეები, VR-მუზეუმები, სასწავლო კურსები და ბიზნეს–ჰაკატონები — გუნდური შეჯიბრები ინოვაციური პროექტების შემქმნელებისთვის. რაც ყველაზე მნიშვნელოვანია, ონლაინ–პლატფორმები ხელმისაწვდომი იყო ყველასთვის — მაგალითად, შეიძლებოდა მუზეუმის ექსპოზიციების ნახვა ვირტუალური რეალობის სათვალის გარეშე, ამასთან შეიძლებოდა პროგრამების უმეტესობაში ტელეფონით შესვლა.  

თაობათა პრობლემა

„გაკვეთილების ონლაინ–ფორმატთან ადაპტირება ყველაზე მეტად „ძველი სკოლის“ პედაგოგებს გაუჭირდათ — ყოველდღიურ ცხოვრებაში ისინი იშვიათად სარგებლობენ ინტერნეტით. ამ ნაკლის აღმოფხვრაში მათ პროექტი „ციფრული კურატორი“ ეხმარება, რომელიც ბელარუსზეც ვრცელდება“, — ამბობს ლიუბოვ დუხანინა.

ციფრული განათლების კურსები 1800–მა ადმიანმა გაიარა ბელარუსში, მათ შორის იყვნენ როგორც მინსკელი, ისე სხვა ქალაქების მასწავლებლები.

კვალიფიკაციის ასამაღლებელი კურსები პედაგოგებს ახალგაზრდების გაგებაშიც ეხმარება. მაგალითად, იყენებენ რა აქტიურად ონლაინ–ინსტრუმენტებს, მასწავლებლებს ესმით, რომ ბავშვებს აქვთ უნარი, აღიქვან დიდი ტექსტები ინტერნეტში, თუ ისინი სწორად იქნება გაფორმებული.

ახლა პედაგოგებისთვის პროექტებით ყაზახეთი და უზბეკეთიც დაინტერესდნენ.

ბავშვებს განსაკუთრებული მიდგომა სჭირდებათ

„ონლაინ–პროგრამებს ყველაზე უკეთ ბავშვები ითვისებენ“, — მიაჩნია პაველ შევცოვს. მის მოსაზრებას ადასტურებენ პროექტ „ინჟინირიუმის“ ავტორები, რომელიც „როსსოტრუდნიჩესტვოს“ დახმარებით შექმნეს ბაუმანის სახელმწიფო ტექნიკური უნივერსიტეტის სპეციალისტებმა.

„ინჟინირიუმი — ეს საგანმანათლებლო ცენტრების ქსელია, რომლებიც უკვე მიიღო მონაწილეობა 40 ქვეყნის შვიდი ათასმა ბავშვმა, — ამბობს ცენტრ „რუსეთის კომპოზიტების“ ხელმძღვანელი მარგარიტა სტოიანოვა. — ჩვენ წერტილი გვაქვს ყაზახეთში, ალმათში, სადაც პროგრამირების, 3–D მოდელირებისა და რობოტოტექნიკის გაკვეთილები მიმდინარეობს. ჩვენი ონლაინ–კურსები მოთხოვნადია არა მარტო დსთ–ში. ჩვენ უკვე შემოგვიაერთდა ავსტრალია, ვინაიდან პროგრამებს ინგლისური სუბტიტრები ახლავს. და ეს ეფექტური პოპილარიზაციია არა მარტო ინჟინერიისა, არამედ რუსული ენისაც. ენის სწავლა ყოველთვის უფრო მარტივია საინტერესო თემებით“.

სტოიანოვას აზრით, ონლაინ–გარემოს განვითარება ვერ შეცვლის ტრადიციულ განათლებას,  ვინაიდან თანამშრომლობისთვის ურთიერთობაა მნიშვნელოვანი, და იმედი აქვს, რომ 2021 წელს ყველანი ისევ ჩვეულ ფორმატში შეხვდებიან ერთმანეთს.

0
თემები:
რუსეთი დღეს