სავალუტო კურსი

COVID-19-ით ინფიცირებული ლარი და მძიმე პაციენტის პერსპექტივა

1101
(განახლებულია 16:31 13.05.2020)
კორონავირუსი უკან იხევს. ლარი გაუფასურების ტენდენციას ინარჩუნებს. ემუქრება თუ არა საფრთხე ქვეყნის ფინანსურ სტაბილურობას, რა წერია საერთაშორისო სავალუტო ფონდის ანგარიშში და რაზე მიგვანიშნებენ ექსპერტ-ანალიტიკოსები?

სამსონ ხონელი

საკამათო არ არის, ბოლო პერიოდის სტატისტიკა საგანგაშო აღარ არის, მეტიც, იმედის მომცემია. რას გულისხმობ? − შესაძლოა ჩამეძიოს მკითხველი და, რა გაეწყობა, განვმარტავ: COVID-19 უკან იხევს! უკვე რამდენიმე დღეა, მთელი მსოფლიოს მასშტაბით ინფიცირების ახალი შემთხვევები იკლებს, გამოჯანმრთელებულთა რაოდენობა კი მკვეთრად მზარდია. ეს დადებითი ტენდენცია ჩვენში განსაკუთრებით გამოიკვეთა. კი, ნამდვილად ასეა, თუმცა კორონავირუსის ნეგატიური გავლენა ქვეყნის საფინანსო-ეკონომიკურ სისტემაზე საგრძნობია − მიმანიშნებს მკითხველი და მართალიც იქნება.

პირველი, რაც მახსენდება, ეროვნული ვალუტის კურსია. ორ თვეზე მეტია, ლარი ამერიკულ დოლართან მიმართებაში სამიან ნიშნულს გასცდა და ჯერ ისეთი პირი უჩანს, ნაკლებად სავარაუდოა „მწვერვალიდან“ დაეშვას. არადა, დაახლოებით ოციოდე დღეში საბანკო ვალდებულებათა გადავადების სამთვიანი ვადა ამოიწურება და ყველა ის მსესხებელი, რომელსაც კრედიტი ამერიკულ დოლარში აქვს, საკუთარ ჯიბეზე მთელი თავისი „სიდიადით“ შეიგრძნობს ლარის საგაზაფხულო ამბიციების შედეგს.

აქვე დავძენ, რომ ეროვნული ვალუტის გაუფასურება მოკლე და საშუალოვადიან პერიოდში ეკონომიკურ პროცესებზეც უარყოფითად აისახება, რაც საბოლოოდ ეკონომიკური ზრდის ტემპს შეაფერხებს. ერთი სიტყვით, ვითარება რთულია და, როგორც გაირკვა, ლარის გაუფასურება შეშფოთებას არა მხოლოდ ქვეყნის შიგნით, არამედ საერთაშორისო საფინანსო ინსტიტუტებშიც იწვევს...

„ლარის გაცვლითი კურსის გადაჭარბებული რყევები, შესაძლოა, ფინანსური სტაბილურობის კუთხით საფრთხის შემცველიც კი იყოს“, − აღნიშნულია საერთაშორისო სავალუტო ფონდის ანგარიშში. იქვეა რეკომენდაციაც: „მონეტარული პოლიტიკის გადაწყვეტილებები ინფლაციის მოლოდინების შესაბამისად წარიმართოს... სწორედ ამიტომ ადეკვატური ლიკვიდობის დონის უზრუნველყოფა და კაპიტალური ბუფერების გამოთავისუფლება ფინანსური სტაბილურობის გარანტიაა”.

საერთაშორისო სავალუტო ფონდის ანგარიშში აღნიშნულ მოსაზრებებს ამერიკაში მცხოვრები ანალიტიკოსი თემურ ბასილია გამოეხმაურა. მისი შეფასებით, ეს დიპლომატიურ ენაზე დაწერილი ტექსტია პრობლემაზე, რომელზეც ის უკვე წლებია ამახვილებს ყურადღებას. „რომ განვმარტო რას ნიშნავს ეს: ლარის კურსის ხელოვნური გაუფასურება და მანიპულაციები დიდ საფრთხეს უქმნის საქართველოს ფინანსურ სტაბილურობას. ლარის კურსის ხელოვნურად გაუფასურების ერთ-ერთი მთავარი გამომწვევი მიზეზი კი ქვეყნის ეროვნული ბანკის ე.წ. რეფინანსირების სესხებია, რაც გამოწვეულია იმით, რომ ბანკებს არა აქვთ ლიკვიდობა; ანუ, კომერციულ ბანკებს არა აქვთ მიმდინარე ვალდებულებების დასაფარი ფული. რატომ არა აქვთ ბანკებს მიმდინარე ვალდებულებების დასაფარი ფული? ეს ძალიან საინტერესო კითხვაა, რომელზეც პასუხის გაცემას ყველა არიდებს თავს“, – წერს თემურ ბასილია.

მისი შეფასებით, COVID-19-ის პრობლემების შესამსუბუქებლად მიღებული საერთაშორისო დახმარების დიდი ნაწილის ბანკებისთვის მიცემა სერიოზული შეცდომა იქნება. „ეს იმის გამეორება იქნება, რაც მიხეილ სააკაშვილის დროს გააკეთეს, როდესაც ცხინვალის ავანტიურის შემდეგ გამოყოფილი საერთაშორისო დახმარების ნაწილი კომერციულ ბანკებს მისცეს. სინამდვილეში ეს არ არის ბანკების დახმარება, ეს არის კომერციული ბანკების პრობლემების დროში გაწელვა და მათი კიდევ უფრო გაღრმავება. ეს პრობლემა სხვაგვარად შეიძლება მოწესრიგდეს, მაგრამ, როგორც ჩანს, ჯერ ამისთვის არავინ არის მზად“, − დასძენს თემურ ბასილია.

ანალიტიკურ წრეებში კობა გვენეტაძის უწყების პოლიტიკას ბოლო დროს სულ უფრო ბევრი კრიტიკოსი ჰყავს. მათ შორის არის ექსპერტი ლია ელიავა, რომელიც აცხადებს, რომ ეროვნული ბანკი ხელს არ უწყობს ლარის სტაბილურობას და, შესაბამისად, ის ვერ აკონტროლებს ფასების დონეს, რაც მას პირდაპირ კანონმდებლობით ევალება. შედეგად - ეროვნული ბანკი აზარალებს ეკონომიკას, ბიზნეს-პროცესებს და მოსახლეობის კეთილდღეობას.

„ჩვენ ღია ტიპის ეკონომიკა გვაქვს. აქ სავალუტო კონტროლი არ არსებობს. ეროვნული ბანკი თავს არ იწუხებს ეროვნული ვალუტის კურსზე ზრუნვით. არ აქვს მნიშვნელობა, როგორი იქნება ლარის გაცვლითი კურსი დოლარის მიმართ. მთავარია, რომ ეს კურსი სტაბილური იყოს! სწორედ სტაბილურობის განცდა და მოკლე თუ საშუალო ვადის პროგნოზირება განაპირბობებს ბიზნესისა და ფიზიკური პირის სამომავლო გეგმების რეალიზების საშუალებას“, − აცხადებს ლია ელიავა.

მისი თქმით, ეროვნულ ბანკს უზარმაზარი ფუნქცია და როლი აკისრია ეკონომიკაში. ბევრად უფრო დიდი, ვიდრე მთავრობას. ეკონომიკას მართავს ეროვნული ბანკი. დღეს კი კობა გვენეტაძის უწყება კრიჭაში უდგას მთავრობას, ეკონომიკას სისტემატურად აყენებს დარტყმებს, ბიზნეს-შოკებს ამ რყევებით, ლარის არასტაბილურობით და ინფლაციის მაჩვენებლის ზრდით. ამ ვითარებაში კი, ბუნებრივია, ბიზნესმენები ვეღარ საზღვრავენ მათი საქმიანობის პერსპექტივას.

ექსპერტის აზრით, მიმდინარე მოვლენების 2008-2009 წლების ფინანსურ კრიზისთან შედარება არასწორია. „პარალელს არ გავავლებდი. მაშინ სამხედრო კონფლიქტის ფონზე ხელოვნურად იყო შექმნილი საბანკო კრიზისი, ანუ კომერციული ბანკები ხელოვნურად დაიკეტა. ბუნებრივია, ამ ფონზე ლარს პრობლემა შეექმნა. არა, ახლა აბსოლუტურად სხვა სიტუაციაა. როგორც დღეს, ასევე წინა პერიოდში ლარის კურსის ვარდნა განპირობებულია ქვეყნიდან კაპიტალის გადინებით. იქნება ეს კაპიტალი გასული იმპორტის დასაფინანსებლად თუ ეს იქნება ნებისმიერ ბიზნესმენის მიერ გადარიცხული 20-30 მილიონი“, − განაცხადა ლია ელიავამ და ხაზი გაუსვა, რომ ბოლო დროს უცხოეთიდან მკვეთრად შემცირდა ფულადი გადმორიცხვები. მისივე შეფასებით, სწორედ ეს სავალუტო შემოდინებები ასაზრდოებდა კომერციულ ბანკებს.

არახალია, რომ უცხოეთიდან ფულადი გზავნილების მოცულობა ეროვნული ვალუტის კურსზე პირდაპირ აისახება. მსოფლიო ბანკის შეფასებით, ფულად გზავნილებზე დამოკიდებულების მიხედვით ჩვენი ქვეყანა მსოფლიოში 24-ე ადგილზეა და ეკონომიკის 11.6 პროცენტს სწორედ უცხოეთში დასაქმებული ჩვენი მოქალაქეების მიერ გამოგზავნილი სახსრები აკმაყოფილებს. ეს განსაკუთრებით საგანგაშოა ახლა, იმ ვითარებაში, როცა COVID-19-ის პანდემიის გამოისობით გადმორიცხვები მცირდება. საქართველოს ეროვნული ბანკის ინფორმაციით, წინა წლის იმავე პერიოდთან შედარებით, მიმდინარე წლის მარტში საქართველოში ფულადი გზავნილები უკვე 9 პროცენტით შემცირდა. როგორც ანალიტიკოსები ვარაუდობენ, მთელი წლის განმავლობაში დანაკარგი რამდენიმე ასეული მილიონი ამერიკული დოლარი იქნება.

სამხრეთ კავკასიაში მსოფლიო ბანკის რეგიონული დირექტორი სებასტიან მოლინეუსი ფულადი გზავნილების შემცირებას მნიშვნელოვან გამოწვევად აფასებს და ქვეყნის მთავრობას მოუწოდებს, რომ უზრუნველყოს იმ ჯგუფების დაცვა, რომლებიც პანდემიამ შემოსავლების მნიშვნელოვანი შემცირების რისკის წინაშე დააყენა. „ფულადი გზავნილები ოჯახებს ეხმარება სურსათზე, ჯანდაცვაზე წვდომაში და ძირითადი მოთხოვნილებების დაკმაყოფილებაში. რამდენადაც მსოფლიო ბანკის ჯგუფი ახორციელებს სწრაფ და ფართო ღონისძიებებს ქვეყნების მხარდასაჭერად, ჩვენ ვმუშაობთ ფულადი გზავნილების არხების ფუნქციონირების შესანარჩუნებლად და ღარიბი ფენებისთვის ძირითად საჭიროებებზე წვდომის უზრუნველსაყოფად“, – აცხადებს სებასტიან მოლინეუსი.

არადა, 2016 წლიდან მოყოლებული ფულადი გზავნილების შემოდინება ჩვენში იზრდებოდა და უკანასკნელ წლებში მთლიანი შიდა პროდუქტის 10 პროცენტსაც გადააჭარბა. უცხოეთიდან მიღებული ფულადი გზავნილები ჩვენი მოქალაქეებისთვის შემოსავლის მნიშვნელოვანი წყარო იყო. გასულ წელს შინამეურნეობების 20 პროცენტი ფულად შემოსავალს უცხოეთში მცხოვრები ნათესავებისგან იღებდა. ახლა კორონავირუსის პანდემია ფულადი გზავნილების შემოდინების პროცესზე ნეგატიურად აისახება. ის ძირითადი ქვეყნები, საიდანაც საქართველოს მოქალაქეები ფულად გზავნილებს იღებდნენ, კრიზისის ძლიერი ზემოქმედების ქვეშ არიან. ეს ქვეყნებია იტალია, რუსეთის ფედერაცია, ამერიკის შეერთებული შტატები. ანალიტიკოსთა პროგნოზით, უახლოეს მომავალში პრაქტიკულად წარმოუდგენელია, რომ ამ ქვეყნებიდან ფულადი გზავნილების მოცულობა გასული წლის მიწურულის, კრიზისის წინა პერიოდის ნიშნულს დაუბრუნდეს...  

საინვესტიციო კომპანია „გალტ ენდ თაგარტის“ პროგნოზით, წლის განმავლობაში გზავნილები დაახლოებით 10 პროცენტით შემცირდება. აქვე ისიც უნდა ითქვას, რომ ფულადი ნაკადების შემცირება მოსალოდნელია არა მხოლოდ ჩვენში, არამედ მსოფლიო ბანკის ჯგუფის ყველა სხვა რეგიონში. ევროპასა და ცენტრალურ აზიაში − 27.5 პროცენტით, საჰარის სამხრეთით მდებარე აფრიკის ქვეყნებში − 23.1 პროცენტით, სამხრეთ აზიაში − 22.1 პროცენტით, ახლო აღმოსავლეთსა და ჩრდილოეთ აფრიკაში − 19.6 პროცენტით, ლათინური ამერიკისა და კარიბის აუზის ქვეყნებში − 19.3 პროცენტით და აღმოსავლეთ აზიის და წყნარი ოკეანის აუზის ქვეყნებში − 13 პროცენტით. დიდი ვერაფერი ნუგეშია, მაგრამ ხომ ფაქტია, საქართველოში ფულადი გზავნილების შესაძლო შემცირების საპროგნოზო მაჩვენებელი აქ მოყვანილ სხვა მონაცემებს აშკარად ჩამოუვარდება... და, ბოლოს, საკამათო არ არის, რომ საშუალოვადიან პერიოდში ეროვნული ვალუტის კურსის მერყეობის საზღვრების პროგნოზირება შესაძლებელი მას შემდეგ იქნება, როდესაც ეკონომიკურ საქმიანობაზე დაწესებული ყველა შეზღუდვა მოიხსნება და ბიზნესიც დაიქოქება. არახალია, ერთ-ერთი ძირითადი განმსაზღვრელი პარამეტრი ტურისტული ნაკადების მოცულობა იქნება.

 

1101
ტრაქტორები

საქართველოში შეღავათებით საწვავზე 100 ათასზე მეტმა ფერმერმა ისარგებლა

29
(განახლებულია 15:09 07.08.2020)
ფერმერებმა, რომლებმაც დიზელის საწვავზე თავიანთი საშეღავათო ბარათები გაანაღდეს, ჯამში 3,6 მილიონ ლარამდე ეკონომია გასწიეს.

თბილისი, 7 აგვისტო  — Sputnik. სახელმწიფო პროგრამა „აგროდიზელის“ ფარგლებში დიზელის საწვავის შეღავათიან ფასად შესაძენად ბარათები 112 ათასზე მეტმა ფერმერმა მიიღო, ნათქვამია სოფლისა და სოფლის მეურნეობის განვითარების სააგენტოს განცხადებაში. 

ფერმერებისთვის დიზელის საწვავის შეღავათიან ფასებში მიწოდება საქართველოს მთავრობის სოფლის დახმარების პროგრამის ერთ-ერთ პუნქტს წარმოადგენს. სოფლის განვითარების პროგრამა მიმართულია დარეგისტრირებული მიწების მფლობელთა ფერმერული მეურნეობების განვითარებისკენ. სწორედ მიწის რეგისტრაცია წარმოადგენს დახმარების განმსაზღვრელ ფაქტორს.

7 აგვისტოს მონაცემებით, ფერმერებმა  29 ათას ტონაზე მეტი მოცულობის აგროდიზელის ფასდაკლების ბარათები მიიღეს. იმ ფერმერებმა, რომლებმაც უკვე გაანაღდეს ფასდაკლების ბარათები, ჯამურად 3,6 მლნ  ლარამდე დაზოგეს.

პროგრამის ფარგლებში, ბენზინგასამართ სადგურებზე ფერმერთა ორგანიზებული მომსახურების მიზნით, ძალაშია დადგენილი წესი, რომლითაც ყველა ფერმერმა 1 ივლისამდე შეძლო კუთვნილი საწვავის ფასდაკლების ბარათების 20%-ის განაღდება, თუ სულ მცირე 100 ლიტრი საწვავი აიღო. თუ მისაღები დიზელის საწვავის ოდენობა 100 ლიტრზე ნაკლები იყო, ფერმერებს შეეძლოთ საწვავის ფასდაკლების ბარათების სრულად გამოყენება. 

1 ივლისიდან 1 სექტემბრამდე შესაძლებელი იქნება კუთვნილი საწვავის დამატებით 20%-ის განაღდება არანაკლებ 300 ლიტრის შემთხვევაში. თუ კუთვნილი საწვავის ოდენობა 300 ლიტრზე ნაკლებია, ფერმერები საწვავის ფასდაკლების ბარათების სრულად განაღდებას შეძლებენ. 1 სექტემბრიდან კი მათ ნებისმიერი რაოდენობის დიზელის ფასდაკლების ბარათების გამოყენების შესაძლებლობა ექნებათ.
ყველა ფერმერი, რომელიც 0,25-დან 10 ჰექტრამდე რეგისტრირებულ მიწის ნაკვეთს ფლობს, აგროტექნიკური სამუშაოებისთვის აუცილებელ საწვავს საბაზრო ღირებულებაზე იაფად შეიძენს. წლიური ლიმიტი იქნება 150 ლიტრი ერთ ჰექტარ მიწის ნაკვეთზე.

დამატებითი დახმარება ფერმერებს

გარდა ამისა, 132 ათასზე მეტ ფერმერს, რომლებიც ლეგალურად ფლობენ 0,25-დან 10 ჰექტრამდე ფართობის დარეგისტრირებულ მიწის ნაკვეთებს, აგრობარათებზე უკვე დაერიცხა აგროქულები. დარიცხული სუბსიდიის ოდენობა 24 მლნ ლარს აჭარბებს. 

აგრობარათებით ფერმერებს შეუძლიათ სასუქებისა და მცენარეთა დამცავი პრეპარატების, ქიმიური და ბიოლოგიური საშუალებების, თესლისა და ნერგების შეძენა, ასევე აგროტექნიკის მომსახურების საფასურის გადახდა.

გარდა ამისა, აგროდაზღვევის პროგრამის ფარგლებში, მიმდინარე წლის 31 ივლისის მონაცემებით, გაცემულია 16 ათასზე მეტი პოლისი. დაზღვეულია 17 ათას ჰექტრამდე მიწის ფართობი,  რაც 2019 წლის ანალოგიურ პერიოდთან შედარებით, 34%–ით მეტია. დაზღვეული მოსავალის ღირებულება 150 მილიონ ლარს აღემატება.

აგროდაზღვევის პროგრამაში სიახლეა ის, რომ მრავალწლიანი კულტურების დაზღვევა სეტყვის, წყალდიდობის, ქარიშხლისა და შემოდგომის ყინვებისგან სამი წლით არის შესაძლებელი. გარდა ამისა, სახელმწიფო, სხვადასხვა მოცულობით კულტურის სახეობის მიხედვით, მონაწილეობას მიიღებს სადაზღვევო პრემიების თანადაფინანსებაში.

წელს შეიცვალა აგროკრედიტის პროგრამაც, რომელიც ქვეყანაში 2012 წლიდან მოქმედებს. სახელმწიფო სრულად აანაზღაურებს 5-დან 100 ათას ლარამდე იმ კრედიტის პროცენტს, რომელიც ერთწლიანი კულტურების წარმოების განვითარებაზეა აღებული. კრედიტი ნახევარი წლის განმავლობაში გაიცემა. 

ბოლო მონაცემებით, უკვე გაცემულია 1 707 აგროკრედიტი. კრედიტის საერთო თანხა 31 მილიონ ლარს აჭარბებს, მათ შორის სააგენტოს მიერ კრედიტის პროცენტის თანადაფინანსება 2,5 მლნ ლარზე მეტია.

სააგენტოს ინფორმაციით, აგროწარმოების ხელშეწყობის პროგრამაში ჩართულია 387 ბენეფიციარი, მათ შორის სასოფლო-სამეურნე ტექნიკის ღირებულების 50-% დაუფინანსდა 252 ბენეფიციარს, ხოლო სასათბურე მეურნეობის მოწყობისთვის და მოდერნიზებისთვის შესასყიდი ძირითადი საშუალებების შეძენის და მათი სამონტაჟო სამუშაოების, ასევე, ერთწლოვანი სასოფლო-სამეურნეო კულტურებისთვის სარწყავი სისტემის შესყიდვასა და მონტაჟისათვისათვის 135 ბენეფიციარის განაცხადი დაკმაყოფილდა.

29
თემები:
საქართველოს სოფლის მეურნეობა
ქართული ღვინო

ლატვია ქართულ ღვინოს ეცნობა

40
(განახლებულია 15:13 07.08.2020)
ლატვიის დედაქალაქ რიგაში გამართულ დეგუსტაციაზე საკუთარი პროდუქცია 70-მდე ღვინის ქართულმა კომპანიამ წარადგინა.

თბილისი, 7 აგვისტო – Sputnik. ქართული ღვინოები ლატვიაში პოპულარულობის მოპოვებას აგრძელებს - ამჯერად მათ გაყიდვებისა და პრესის დაახლოებით 50 წარმომადგენელი ეცნობოდა, იუწყება ტელეკომპანია „იმედი".

„ქართული ღვინის მაღალი რეპუტაციისთვის": ღვინის ხარისხს ახალი პარამეტრებით შეამოწმებენ>>

ღვინის ეროვნულ სააგენტოსა და ლატვიურ მარკეტინგულ კომპანია Tribe International-ს შორის გაფორმებული ხელშეკრულების ფარგლებში, დაახლოებით ერთი თვეა, ლატვიის დედაქალაქ რიგაში ქართული ღვინის დეგუსტაციების ციკლი იმართება, რომლის ფარგლებშიც ქართული ღვინო ანჯერად გაყიდვების სფეროსა და პრესის 50-მდე წარმომადგენელს წარედგინა.

დეგუსტაციებზე თავისი პროდუქცია ქართული ღვინის მწარმოებელმა 70-მდე კომპანიამ წარადგინა.

„დააგემოვნე საუკეთესო ქართული ღვინოები“ - ასე ეწოდება ქართული ღვინის სარეკლამო კამპანიას, რომელმაც ლატვიაში სტარტი  6 ივლისს აიღო.

ქართული ღვინოებისა და ღვინის კულტურის პოპულარიზაციის მიზნით ადგილობრივმა ტელეკომპანიებმა თავიანთ ეთერში ვიდეოკლიპები განათავსეს, ხოლო მედიაპლატფორმებზე ქართული ღვინისადმი მიძღვნილი გვერდები შექმნეს.

მთავრობის ხელშეწყობით ქართული ღვინო სტრატეგიულ ბაზრებზე სულ უფრო ვითარდება ახალი ონლაინ–პლატფორმებისა და ციფრული მარკეტინგის გამოყენებით. ასეთი ზომები განსაკუთრებით მნიშვნელოვანია გლობალური პანდემიის ფონზე, რომელმაც ქართული ღვინის მრეწველობას ზარალი მიაყენა - ექსპორტმა იკლო,  ხოლო ტურისტული სექტორის კრიზისმა მკვეთრად შეამცირა გაყიდვები ქვეყნის შიგნით.

40
თემები:
ღვინის კულტურა და მეღვინეობა
რუსთავი

თბილისის შემდეგ რუსთავში: გაეროს განვითარების პროგრამამ მოხუცებულთა სახლს ტექნიკა გადასცა

0
(განახლებულია 15:32 07.08.2020)
საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა.

თბილისი, 7 აგვისტო  — Sputnik.  გაეროს განვითარების პროგრამამ (UNDP) ქალაქ რუსთავის მოხუცებულთა სახლს საჩუქრად სამედიცინო და საყოფაცხოვრებო ტექნიკა გადასცა, ნათქვამია რუსთავის მერიის ვებგვერდზე გავრცელებულ განცხადებაში.

UNDP–იმ ამ დღეებში ანალოგიური ჰუმანიტარული დახმარება აღმოუჩინა თბილისის მოხუცებულთა სახლს.

საქართველოში გაეროს მუდმივი კოორდინატორი და პროგრამის წარმომადგენელი ლუიზა ვინტონი რუსთავის მოხუცთა სახლს, საქართველოს რეგიონული განვითარებისა და ინფრასტრუქტურის მინისტრის მოადგილე მზია გიორგობიანთან და რუსთავის მერ ირაკლი ტაბაღუასთან ერთად ესტუმრა.  

როგორც განცხადებაშია ნათქვამი, ლუიზა ვინტონმა მოხუცთა სახლს სამედიცინო და საყოფაცხოვრებო აღჭურვილობა, მათ შორის ჟანგბადის კონცენტრატორი, მაცივრები, გაზქურა, სამზარეულოს სავენტილაციო სისტემა და მინიტრაქტორი გადასცა.

 „კორონავირუსის პანდემია განსაკუთრებულ საფრთხეს წარმოადგენს უსახლკარო და მზრუნველობამოკლებული ადამიანებისთვის. ამ  თვალსაზრისით თავშესაფრების რაოდენობა ნამდვილად მისასალმებელია. UNDP-ის მიზანია თავშესაფრების უსაფრთხოებისა და საცხოვრებელი პირობების გაუმჯობესება, პანდემიის შემდეგ კი გრძელვადიანი სისტემური გადაწყვეტილებების მოძიება მოწყვლადი მოსახლეობის დასახმარებლად“, – განაცხადა ლუიზა ვინტონმა.

საყოფაცხოვრებო ტექნიკისა და სამედიცინო აღჭურვილობის შეძენა, გაეროს განვითარების პროგრამის ინიციატივით, დანიის მთავრობისა და გაეროს პანდემიაზე რეაგირებისა და აღდგენის ფონდის ფინანსური ხელშეწყობით განხორციელდა.

საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა. ქვეყანაში შექმნილი ვითარების გათვალისწინებით ორგანიზაცია ცვლილებები შეიტანა მიმდინარე პროექტებში, რომელთა ჯამური ღირებულება წელიწადში 20 მილიონ აშშ დოლარს შეადგენს.

0