თბილისი, 29 აპრილი – Sputnik. სამრეწველო პროდუქციის მწარმოებლების ფასების ინდექსი 2020 წლის მარტში, 2019 წლის მარტთან შედარებით, 8,7%-ით გაიზარდა, ნათქვამია საქართველოს სტატისტიკის ეროვნული სამსახურის „საქსტატის“ მასალებში.
ინდექსის ფორმირებაზე ძირითადად გავლენა მოახდინა გადამამუშავებელ ინდუსტრიაში ფასების ზრდამ 8,7%-ით, მათ შორის საკვებ პროდუქტებზე – 12,4%-ით და სამთო-მომპოვებელ მრეწველობაში – 13,7%-ით.
რატომ იზრდება ფასები საქართველოში – ექსპერტები მიზეზებზე საუბრობენ>>
თებერვალთან შედარებით, მარტში ფასები სამრეწველო პროდუქციაზე 3%-ით შემცირდა.
ადგილობრივი წარმოება
საქართველოში წარმოებული სამრეწველო პროდუქციის ფასები მარტში, 2019 წლის მარტთან შედარებით, 6,3%-ით გაიზარდა.
ყველაზე მეტად ფასები გაიზარდა სამთო მომპოვებელ ინდუსტრიაში – 4,1%-ით, გადამამუშავებელ მრეწველობაში – 5,5%-ით, მათ შორის საკვებ პროდუქტებზე – 8,1%-ით.
ექსპორტი და იმპორტი
ექსპორტირებული სამრეწველო პროდუქციის ფასების ინდექსი მარტში, 2019 წლის იმავე თვესთან შედარებით, 12,8%-ით გაიზარდა.
სამთო-მომპოვებელი მრეწველობის პროდუქციის ფასები 27,9%-ით გაიზარდა. გადამამუშავებელი ინდუსტრიის ექსპორტირებული პროდუქციის ფასები გაიზარდა 10,7%-ით, მათ შორის საკვებ პროდუქტებზე – 21,4%-ით, ხოლო ლითონის ნაწარმზე – 12,7%-ით.
საქართველოში იმპორტირებული სამრეწველო პროდუქციის ფასები საანგარიშო პერიოდში 10,3%-ით გაიზარდა. ამავდროულად გადამამუშავებელი მრეწველობის იმპორტირებული პროდუქცია გაძვირდა 11,3%-ით, კვების პროდუქტები – 15,1%-ით.
რატომ ერჩის COVID-19 ლარს და მოუსწრებს თუ არა „ვაქცინა“ ეროვნულ ვალუტას?>>
სამომხმარებლო ფასები
ინფლაციის წლიურმა დონემ მარტში შეადგინა 6,1%, როდესაც მიზნობრივი მაჩვენებელი იყო 3%. საკვებზე ფასები გაიზარდა 13,4%-ით. ექსპერტები ფასების ზრდას ეროვნული ვალუტის გაუფასურებას უკავშირებენ.
2019 წლის სექტემბრიდან ეროვნულმა ბანკმა დაიწყო პოლიტიკის გამკაცრება, რათა გაცვლითი კურსის გაუფასურებით გამოწვეული ინფლაციური ზეწოლა გაანეიტრალოს. შედეგად – რეფინანსირების განაკვეთი 6,5%-დან 9%-მდე გაიზარდა.