დაცარიელებული ბაზარი

კორონავირუსი ეკონომიკას აზარალებს: რამდენით შემცირდა საქართველოს საგარეო სავაჭრო ბრუნვა

146
(განახლებულია 17:19 22.04.2020)
მიმდინარე წლის მარტში საქართველოს საგარეო სავაჭრო ბრუნვა 16%-ით შემცირდა: ექსპორტი - 22%-ით, იმპორტი - 13%-ით.

თბილისი, 22 აპრილი - Sputnik. კორონავირუსის ეპიდაფეთქებამ საქართველოს ეკონომიკას სერიოზული დარტყმა მიაყენა - ქვეყნის საგარეო სავაჭრო ბრუნვა 2020 წლის იანვარ-მარტში 2,7%-ით შემცირდა 2019 წლის იმავე პერიოდთან შედარებით და 2,8 მილიარდი დოლარი შეადგინა (არაორგანიზებული ვაჭრობის გათვალისწინების გარეშე). ამის შესახებ საქართველოს სტატისტიკის ეროვნული სამსახურის „საქსტატის“ მასალებშია საუბარი.

ექსპორტი 2020 წლის დასაწყისიდან 5,9%-ით შემცირდა 2019 წლის იმავე პერიოდთან შედარებით - იანვარ-მარტში ქვეყნის ფარგლებს გარეთ 778,2 მლნ დოლარის ღირებულების პროდუქცია გავიდა.

საქართველოს მთავრობა ანტიკრიზისულ გეგმას კვირის ბოლოს წარმოადგენს>>

წლის დასაწყისიდან შემცირდა იმპორტიც - 2020 წლის იანვარ-მარტში საქართველოში თითქმის 2 მილიარდი დოლარის ღირებულების საქონელი შემოვიდა, რაც 1,4%-ით ნაკლებია გასული წლის იმავე პერიოდთან შედარებით.

საქართველოს უარყოფითმა სავაჭრო ბალანსმა მითითებულ პერიოდში 1,2 მილიარდ დოლარს გადააჭარბა, რაც მთელი საგარეო სავაჭრო ბრუნვის 43,9%-ს შეადგენს.

რითი ვაჭრობს საქართველო

საქართველოდან საქონლის ფართო ასორტიმენტი გააქვთ — სპილენძის მადნები და კონცენტრატები, ფეროშენადნობები, მსუბუქი ავტომობილები, ნატურალური ღვინო, სამკურნალო საშუალებები, მინერალური წყლები, დამუშავებული ან ნახევრადდამუშავებული ოქრო, თხილი და სხვ.

2020 წლის დასაწყისიდან მსუბუქი ავტომობილების ექსპორტი გაიზარდა 26%-ით, სპილენძის მადნებისა და კონცენტრატების — 17,3%-ით. თუმცა შემცირდა ფეროშენადნობების ექსპორტი 39,1%-ით, ნატურალური ყურძნის ღვინის ექსპორტი - 9,6%-ით, აზოტოვანი სასუქების - 14,2%-ით, მინერალური და მტკნარი წყლების – 11,3%–ით.

საქართველოში შემოდის ნავთობი და ნავთობპროდუქტები, მსუბუქი ავტომობილები, ნავთობის აირები და აირისებრი ნახშირწყალბადები, სპილენძის მადნები და კონცენტრატები, სამკურნალო საშუალებები, ხორბალი, ელექტროენერგია, სატელეფონო აპარატები და სხვ.

მსუბუქი ავტომობილების იმპორტი აღნიშნულ პერიოდში გაიზარდა 8,7%-ით, ნავთობის აირებისა და აირისებრი ნახშირწყალბადების - 3,4%-ით და სხვ. ამავდროულად შემცირდა სამკურნალო საშუალებების იმპორტი - 19,7%-ით, სპილენძის მადნებისა - 7,9%-ით,  ნავთობისა და ნავთობპროდუქტების — 0,1%-ით და სხვ.

ვისთან ვაჭრობს საქართველო

საქართველოს ყველაზე დიდი სავაჭრო პარტნიორები 2020 წლის დასაწყისიდან არიან თურქეთი, აზერბაიჯანი და რუსეთი — ამ ქვეყნებთან სავაჭრო ბრუნვამ 2020 წლის იანვარ-მარტში 1 მილიარდ დოლარს გადააჭარბა, რაც მთლიანი სავაჭრო ბრუნვის 36,4%-ია.

თურქეთთან ბრუნვამ მიმდინარე წლის იანვარ-მარტში 402,2 მილიონი დოლარი შეადგინა, რაც საქართველოს მთლიანი სავაჭრო ბრუნვის 14,5%-ია. ორ ქვეყანას შორის სავაჭრო ბრუნვა, გასული წლის ამავე პერიოდთან შედარებით, 6,5%-ით გაიზარდა.

თურქეთში 2020 წლის დასაწყისიდან გავიდა 10,4 ათასი ტონა ფეროშენადნობი, 381,7 ათასი ტონა ტრიკოტაჟის ნაწარმი, 10 ათასი ტონა ნახევარფაბრიკატები ნახშირბადიანი ფოლადისგან და სხვ.

თურქეთიდან ამავე პერიოდში შემოვიდა 17 ათასი ტონა შავი ლითონის მილები და პროფილები, 163,9 ტონა სამედიცინო პრეპარატი, 12,7 ათასი ტონა ნავთობი და ნავთობპროდუქტი და ა.შ.

აზერბაიჯანი მეორე ადგილზეა

წლის დასაწყისიდან აზერბაიჯანში ექსპორტირებულია 7 983 მსუბუქი ავტომობილი, 406 სატვირთო ავტომობილი, 103,2 ტონა სამკურნალო საშუალებები და ა.შ.

აზერბაიჯანიდან შემოტანილია 667,7 ათასი ტონა ნავთობის აირები და აირისებრი ნახშირწყალბადები, 23,5 ათასი ტონა ნავთობი და ნავთობპროდუქტები, 8,1 ათასი ტონა წნელები ნახშირბადიანი ფოლადისგან, 21 მლნ დოლარის ელექტროენერგია და ა.შ.

მესამე ადგილზეა რუსეთი

2020 წლის დასაწყისიდან საქართველოსა და რუსეთს შორის ბრუნვა 2019 წლის ანალოგიურ პერიოდთან შედარებით შემცირდა 7,8%-ით და შეადგინა 301,4 მილიონი დოლარი - საქართველოს მთლიანი საგარეო სავაჭრო ბრუნვის 10,9%.

წლის დასაწყისიდან საქართველოდან რუსეთის ფედერაციაში ექსპორტირებულია 25,6 ათას ტონაზე მეტი ფეროშენადნობი, 8,6 ათას ტონაზე მეტი ნატურალური ყურძნის ღვინო, 18,3 ათას ტონაზე მეტი მინერალური და სასმელი წყალი, დაახლოებით 1,5 ათასი ტონა სპირტიანი სასმელი და ა.შ.

რუსეთი რჩება საქართველოს ყველაზე მსხვილ საწვავის მომწოდებლად - წლის დასაწყისიდან რუსეთიდან შემოტანილია ნავთობი და ნავთობპროდუქტები, რომელთა საერთო რაოდენობა დაახლოებით 65,1 ათასი ტონაა.

რუსეთიდან ასევე შემოიტანეს 86,6 ათასი ტონა ხორბალი, დაახლოებით 64,2 ათასი ტონა ნავთობის აირები, 5,9 ტონა ტელეფონის აპარატები, დაახლოებით 8,1 მილიონი დოლარის ელექტროენერგია და ა.შ.

საქართველო ასევე ვაჭრობს სხვა ქვეყნებთან

საქართველოს სავაჭრო პარტნიორების ათეულში შედიან ასევე: ჩინეთი - დაახლოებით 281,3 მილიონი დოლარი, აშშ - დაახლოებით 138,6 მილიონი დოლარი, უკრაინა - დაახლოებით 138,2 მილიონი დოლარი, სომხეთი - 132,8 მილიონ დოლარზე მეტი, გერმანია - დაახლოებით 111 მილიონი დოლარი, ბულგარეთი - დაახლოებით 112 მილიონი დოლარი, იტალია - 52,4 მლნ დოლარი.

გასაღების ბაზრები

ბოლო დროს საქართველომ თავისუფალი ვაჭრობის შესახებ შეთანხმება გააფორმა ევროკავშირთან, ევროპის თავისუფალი ვაჭრობის ასოციაციის (EFTA) წევრ ქვეყნებთან, თურქეთთან, ჰონკონგთან და ჩინეთთან. საქართველომ ჯერ კიდევ Brexit-ის ამოქმედებამდე მოახდინა დიდ ბრიტანეთთან თავისუფალი ვაჭრობის შესახებ შეთანხმების რატიფიცირება.

გახარია: ყველა ბიზნესმენს, ვინც ადგილობრივ წარმოებას შექმნის, გვერდში დავუდგებით>>

მოლაპარაკებები თავისუფალი ვაჭრობის შესახებ მალე დაიწყება ინდოეთთანაც. შეთანხმების ტექსტი უკვე მზადაა, ასევე შექმნილია მოლაპარაკებების ჯგუფები ორივე მხრიდან, რომლებიც ამჟამად მოლაპარაკებების პირველი რაუნდის ჩატარების თარიღის დათქმას ელოდებიან. გარდა ამისა, აქტიურად განიხილება მსგავსი ხელშეკრულებების გაფორმების შესაძლებლობა იაპონიასთან და აშშ-თან.

ეკონომიკის სამინისტროს მონაცემებით, გასულ წელს საქართველოს წმინდა ექსპორტის 87% თავისუფალი ვაჭრობის რეჟიმის ქვეყნებზე მოდიოდა.

პროგნოზები

კორონავირუსის ეპიდაფეთქებამ ქვეყნის ეკონომიკას სერიოზული დარტყმა მიაყენა. მარტში საქართველოს საგარეო სავაჭრო ბრუნვა 16%-ით შემცირდა: ექსპორტი - 22%-ით, იმპორტი - 13%-ით.

იზარალეს სასტუმროებმა, რესტორნებმა, სავაჭრო ცენტრებმა, დასვენებისა და გართობის სფეროებმა, ტრანსპორტმა. საფრთხის წინაშეა საფინანსო სექტორი, სამშენებლო, უძრავი ქონებისა და განათლების სფეროები.

ქართული საინვესტიციო კომპანია Galt&Taggart-ის მონაცემებით, კორონავირუსის პანდემიასთან დაკავშირებით დაწესებული შეზღუდვების გამო ექსპორტის შემცირებამ ეკონომიკას შეიძლება 200 მილიონიდან ერთ მილიარდ დოლარამდე ზარალი მიაყენოს, იმის მიხედვით, თუ როგორ განვითარდება მოვლენები.

ანალიტიკოსები მთავრობას საქართველოს ეკონომიკური კრიზისიდან გამოყვანაში დაეხმარებიან>>

საქართველოს მთავრობა მუშაობს ანტიკრიზისულ გეგმაზე ეკონომიკის გადასარჩენად, საერთაშორისო საფინანსო ორგანიზაციები კი ამზადებენ ფინანსურ დახმარებას. საერთაშორისო დონორები საქართველოს წლის ბოლომდე 1,5 მილიარდი დოლარის ფინანსური დახმარების გამოყოფას ჰპირდებიან.

146
თემები:
საქართველოს ეკონომიკა (943)
საქართველოში ბაზრობები ამუშავდა

საქართველოში ფასების ზრდამ პროგნოზს გადააჭარბა: „საქსტატის“ ახალი მონაცემები

13
(განახლებულია 23:13 02.03.2021)
თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

თბილისი, 2 მარტი – Sputnik. საქართველოში წლიურმა ინფლაციამ (2021 წლის თებერვალი – 2020 წლის თებერვალი) 3,6% შეადგინა – 3%-იანი მიზნობრივი მაჩვენებლის პირობებში, იუწყება საქართველოს სტატისტიკის ეროვნული სამსახური „საქსტატი“

2021 წლის თებერვალში, 2021 წლის იანვართან შედარებით, ინფლაციის დონემ 1,1% შეადგინა.

რუსული ხორბლის გაძვირება ქართველ მეწარმეებს ალტერნატივის ძებნას აიძულებს >>

„საქსტატის“ მონაცემებით, თებერვალში ფასები შემცირდა ტანსაცმელზე (3,4%) და კომუნალურ მომსახურებაზე (0,4%). ამავე დროს ფასები სურსათზე გაიზარდა 1,1%-ით, სასტუმროებისა და რესტორნების მომსახურებაზე - 3,7%-ით, ტრანსპორტზე - 2,5%-ით.

როგორ იცვლებოდა ინფლაციის დონე გასულ წელს

2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტარული პოლიტიკის გამკაცრება დაიწყო. წლის ბოლომდე რეფინანსირების განაკვეთი 6,5%-დან 9%-მდე გაიზარდა, ბოლოს იგი 2019 წლის დეკემბერში გაიზარდა. 

2020 წლის დასაწყისიდან ინფლაციის დონემ შემცირება დაიწყო – იანვარსა და თებერვალში მან 6,4% შეადგინა, მარტში – 6,1%, სექტემბერში – 3,8% და ამ დონეზე სამი თვე შენარჩუნდა. საქართველოში კორონავირუსის გავრცელების პრევენციის მიზნით ხელისუფლებამ 21 მარტიდან კარანტინი და კომენდანტის საათი დააწესა. ეკონომიკური აქტივობის სტიმულირებისთვის ეროვნულმა ბანკმა აპრილიდან სამ ეტაპად 8%-მდე შეამცირა მონეტარული პოლიტიკის ძირითადი განაკვეთი.

2021 წლის თებერვალში, გასული წლის ანალოგიურ პერიოდთან შედარებით, ფასები შემცირდა კომუნალურ მომსახურებაზე (21,2%).

ამასთან, წლის განმავლობაში სურსათი 6,2%-ით გაძვირდა, მათ შორის, რძე, ყველი და კვერცხი – 6,4%-ით, მზესუმზირის ზეთი – 34,3%-ით, ყავა და ჩაი – 12,4%-ით, პურპროდუქტები – 8,7%-ით. ხილი კი გაიაფდა 4,8%-ით. კორონავირუსის გამო შექმნილი ვითარების გათვალისწინებით, 9,8%-ით გაიზარდა ჯანდაცვის სფეროს მომსახურების ფასებიც.

რა მოქმედებს საქართველოში ფასების დინამიკაზე

ბოლო ორ თვეში წლიური ინფლაციის დონე 3%-იან მიზნობრივ მაჩვენებელზე დაბალია. საქართველოს ეროვნული ბანკის (სებ-ის) ინფორმაციით, ეს დაკავშირებულია სახელმწიფოს მხრიდან კომუნალური ხარჯების სუბსიდირებასთან, რაც დროებით ხასიათს ატარებს. 

პანდემიის პერიოდში საქართველოს ხელისუფლებამ გადაწყვეტილება მიიღო მოქალაქეებისთვის ელექტროენერგიისა და ბუნებრივი აირის (შესაბამისად, 200 კვტ/სთ და 200 მ3) ხარჯების დაფარვის შესახებ.

„როგორც წესი, ცენტრალური ბანკები მსგავსი ტიპის ეგზოგენური ფაქტორების გამო ინფლაციის დროებით გადახრებზე არ რეაგირებენ და ინფლაციის საშუალოვადიანი პროგნოზით ხელმძღვანელობენ. მიმდინარე პროგნოზის თანახმად, 2021 წელს ინფლაცია საშუალოდ 4%-ის ფარგლებში შენარჩუნდება და შემდეგ მიზნობრივ მაჩვენებელს ეტაპობრივად დაუახლოვდება“, – აღნიშნავს ეროვნული ბანკი.

 სებ-ის მონაცემებით, საერთაშორისო სასაქონლო ბაზრებზე ფასების მნიშვნელოვან ზრდასთან ერთად, რაც განსაკუთრებით იანვარში გამოიკვეთა, ინფლაციაზე აღმავალი ზეწოლა შენარჩუნებულია პანდემიასთან დაკავშირებული შეზღუდვების გახანგრძლივების ფონზე წარმოების ხარჯების ზრდისა და ლარის გაუფასურებული კურსის გამო.

„ნომინალური ეფექტური გაცვლითი კურსის გაუფასურება ასუსტებს ერთობლივი მოთხოვნის დაღმავალ გავლენას პროგნოზირებულ ინფლაციაზე, ხოლო ეკონომიკის მაღალი დოლარიზაციის გამო გაცვლითი კურსის ცვლილების გადაცემა ინფლაციაზე საგრძნობია“, – ნათქვამია ეროვნული ბანკის განცხადებაში.

რეგულატორის ინფორმაციით, რჩება გაურკვევლობის მაღალი დონე როგორც გლობალური ეკონომიკური აქტივობის აღდგენის დინამიკის, ისე ადგილობრივი დაკრედიტების ზრდის ტემპის თვალსაზრისით.

13
ღვინო

„საქართველო მეღვინეობის აკვანი" სეულში გამოფენა გაიმართება

32
(განახლებულია 15:49 02.03.2021)
გამოფენის ფარგლებში წარმოდგენილი ვიზუალური მასალა კორეელი დამთვალიერებლებისთვის საქართველოს, როგორც ღვინის უძველესი ცივილიზაციის სამშობლოს გაცნობას ემსახურება

თბილისი, 2 მარტი – Sputnik. სამხრეთ კორეის დედაქალაქ სეულში, კორეის ფონდის გალერეაში 2021 წლის 3 მარტიდან 1 აპრილის ჩათვლით გამოფენა „საქართველო მეღვინეობის აკვანი“ მოეწყობა, იუწყება ღვინის ეროვნული სააგენტო.

ქართული ღვინო ექსპერტმა მსოფლიოს საუკეთესო ღვინოების ხუთეულში დაასახელა>>

ექსპოზიციაზე წარმოდგენილი იქნება საქართველოს ეროვნულ მუზეუმში დაცული უნიკალური ექსპონატების ფოტო–ნიმუშები, საქართველოს ტერიტორიაზე, არქეოლოგიური გათხრების შედეგად აღმოჩენილი ღვინის ჭურჭლის, ოქრომჭედლობის ნიმუშები, მარნის, ქვევრისა და ქართული ხუროთმოძღვრების ძეგლების ამსახველი ნამუშევრები, ასევე ეროვნული მუზეუმის უნიკალური ფოტო არქივი, რაც დამთვალიერებლებს შესაძლებლობას მისცემს, გაეცნონ საქართველოში ღვინის დამზადების რვაათასწლიან უწყვეტ ტრადიციას.

ქართული ღვინის უნიკალური ისტორიისა და კულტურისადმი მიძღვნილი ღონისძიება კორეაში საქართველოს საელჩოს, კორეის ფონდის ორგანიზებითა და ღვინის ეროვნული სააგენტოსა და საქართველოს ეროვნული მუზეუმის მხარდაჭერით ხორციელდება.

სამხრეთ კორეა მსოფლიო მასშტაბით ღვინის ერთ-ერთი უმსხვილესი იმპორტიორი ქვეყანა და ქართული ღვინის პრიორიტეტული ბაზარია.

2020 წელს საქართველოდან სამხრეთ კორეაში 90 ათასამდე ბოთლის ექსპორტი განხორციელდა, რაც 353%-ით აღემატება 2019 წლის ანალოგიურ მონაცემებს.

„გამოფენა „საქართველო მეღვინეობის აკვანი“ კიდევ უფრო გაზრდის ქართული ღვინის ცნობადობასა და საექსპორტო პოტენციალს სამხრეთ-აღმოსავლეთ აზიის ამ უმნიშვნელოვანეს ღვინის ბაზარზე“, - აღნიშნავენ სააგენტოში.

უწყების განცხადებით, გამოფენის ფარგლებში წარმოდგენილი კონცეფცია და ვიზუალური მასალა კორეელი დამთვალიერებლებისთვის საქართველოს, როგორც ღვინის უძველესი ცივილიზაციის სამშობლოს გაცნობას ემსახურება.

32
თემები:
ღვინის კულტურა და მეღვინეობა